Ol Yangpela—Yupela Bihainim Tok Bilong Husat?
“Sampela man bai i lusim bilip . . . ol bai . . . bihainim tok bilong ol [spirit nogut].”—1 TIMOTI 4:1.
YUPELA ol yangpela: Yupela i bihainim tok bilong husat? I olsem i gat tupela rot na yu mas makim wanem rot yu laik bihainim. Yu laik bihainim tok bilong God o tok bilong ol spirit nogut? Jehova i skulim ol man long tok bilong em long rot bilong Baibel na long maus bilong lain bilong em long graun, em ol i autim tok bilong em. (Aisaia 54:13; Aposel 8:26-39; Matyu 24:45-47) Yu kirap nogut long ol spirit nogut tu i save skulim ol man long tok bilong ol?
2 Aposel Pol i tok: “Long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong . . . ol spirit nogut na bihainim tok bilong ol.” (1 Timoti 4:1) Yumi stap long “taim bilong las de” na Satan wantaim ol spirit nogut i wok strong moa. Long dispela as mipela i askim yupela: Yupela i bihainim tok bilong husat? (2 Timoti 3:1-5; KTH 12:7-12) Satan na ol spirit nogut i save tru long pasin bilong giamanim ol man na grisim ol, olsem na yupela mas tingim gut dispela askim.—2 Korin 11:14, 15.
Ol Spirit Nogut na Tok Bilong Ol
3 Bipo ol spirit nogut em ol ensel Jehova i bin wokim. Tasol ol i bikhet long Man bilong wokim ol, olsem na ol i kamap lain bilong Satan. (Matyu 12:24) Ol i laik paulim ol man bai ol i lusim wok bilong God. Ol i mekim olsem long rot bilong ol man i kirapim ol narapela long tingim laik bilong ol yet tasol na mekim pasin pamuk, em pasin Jehova i tambuim. (Lukim 2 Pita 2:1, 12-15.) Sapos yu save ol gutpela ensel i bin kamap spirit nogut olsem wanem, dispela bai helpim yu long save ol spirit nogut i as bilong wanem ol tok na pasin.
4 Long taim bilong Noa, sampela ensel i aigris long ol naispela meri long graun, na ol i lusim ples bilong ol long heven na kam daun long graun. Ol i kisim ol dispela meri na kamapim ol hapkas pikinini. I no stret ol dispela ensel i slip wantaim ol meri bilong graun; ol i mekim pasin nogut wankain olsem ol man na manki bilong Sodom i bin mekim bihain, taim ol i mekim narapela kain pasin pamuk. (Stat 6:1-4; 19:4-11; Jut 6, 7) Ol dispela meri wantaim ol hapkas pikinini bilong ol i dai long bikpela Tait Wara, tasol ol ensel nogut i tanim i kamap spirit gen na ol i go bek long heven na wok wantaim Satan.—2 Pita 2:4.
5 Dispela stori bilong ol spirit nogut i helpim yumi long save ol i wanem kain man. Ol i man bilong laikim pasin sem. Ol i stap hait na bosim ol man bilong dispela graun i tingting oltaim long mekim pasin pamuk. Ol i no inap tanim i kamap man gen, olsem na nau ol i kisim amamas long rot bilong ol pasin sem ol man i mekim, em ol spirit nogut i paulim ol. (Efesus 6:11, 12) Ol i paulim tingting bilong ol man na bai ol i ting ol tambu bilong God long pamuk i pasim ol tumas. Ol spirit nogut i kirapim ol man long ting, i no gat rong long pasin pamuk, na em i samting bilong amamas.
Helpim Tok Bilong Ol Spirit Nogut
6 Ol spirit nogut i mekim pasin hait na pulim ol man long bihainim tok bilong ol. Yumi no ken kirap nogut long dispela, long wanem, hetman bilong ol, em Satan, em i mekim olsem bilong giamanim Iv. Em i mekim ol tok olsem em i laik helpim Iv. Yu tingim? Em i tok: “Ating God i tambuim yutupela long kaikai pikinini bilong olgeta diwai bilong gaden, a?” Em i laik kirapim Iv long sakim tok bilong God na em i tok, sapos Iv i kisim kaikai tambu, dispela bai helpim em. Em i tok: “Bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” (Stat 3:1-5) Dispela tok gris bilong Satan i giamanim Iv na em i sakim tok bilong God.—2 Korin 11:3; 1 Timoti 2:13, 14.
7 Long nau tu ol spirit nogut i giamanim planti man. Ol i wok hait, olsem na planti man bipo ol i tambuim pasin pamuk nau ol i orait long en. Olsem: I gat wanpela meri long Amerika em i save raitim tok long nius bilong helpim ol manmeri. Wanpela man i askim em long pasin bilong ol singel i slip wantaim, na meri i tok: “Mi no ting bai mi senisim tingting bilong mi long dispela pasin, tasol nau mi ting sapos man na meri singel i tingting tru long marit, gutpela sapos tupela i stap wantaim long sampela taim bambai ol i ken save, ol inap i stap amamas wantaim o nogat.” Na bihain em i tok: “Mi kirap nogut long mi raitim tok olsem!” Em i kirap nogut, tasol em i orait long pasin pamuk! Olsem na yumi mas was gut, nogut tok bilong ol spirit nogut i paulim tingting bilong yumi long ol pasin God i tambuim.—Rom 1:26, 27; Efesus 5:5, 10-12.
8 Yumi no ken lusim tingting, Satan em i “hetman i save bosim dispela graun,” na “dispela graun olgeta em i stap aninit long strong bilong Satan.” (Jon 12:31; 1 Jon 5:19) Tru, sampela taim Jisas i tok long “dispela graun” bilong makim olgeta manmeri bilong graun. (Matyu 26:13; Jon 3:16; 12:46) Tasol planti taim em i kolim dispela tok bilong makim olgeta lain i no insait long lain Kristen tru. Em i tok, ol disaipel bilong em “i no bilong dispela graun” (ol man nogut bilong graun), olsem na ol manmeri bilong dispela graun i birua long ol. (Jon 15:19; 17:14-16) Na Baibel i toksave olsem yumi no ken kamap pren bilong dispela graun Satan i bosim.—Jems 4:4.
9 Aposel Jon i tok: “Yupela i no ken laikim ol pasin bilong graun na olgeta samting bilong graun.” Na em i tok: “Olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa.” (1 Jon 2:15, 16) Tingim dispela: Wanem samting long graun i kirapim ol laik nogut, olsem laik long mekim pasin pamuk? (1 Tesalonaika 4:3-5) Olsem wanem long musik bilong ol lain bilong dispela graun? Wanpela plismeri long Kalifonia i tok: “Dispela kain musik na singsing i lainim yu olsem yu no ken harim tok bilong papamama, na i kirapim yu long bihainim laik bilong yu yet.” Yu save long as bilong ol tok bilong dispela kain musik?
10 Tingim tok bilong Satan: I olsem em i tokim Iv, ‘Yu lus long kisim gutpela samting. Bihainim laik bilong yu. Yu yet yu ken skelim wanem samting i gutpela o i nogut. No gat wok long yu harim tok bilong God.’ (Stat 3:1-5) Ol musik bilong dispela graun i lainim ol man long mekim olsem, a? Ol spirit nogut i skulim ol man long rot bilong musik, na long rot bilong televisen tu na ol piksa wokabaut na ol video. Ol i mekim olsem wanem? Long redio na televisen na ol video i gat planti tok na piksa i givim tingting long ol man olsem ol tambu bilong God i pasim ol long mekim laik bilong ol. Planti stori long redio na televisen i makim olsem pasin pamuk em i gutpela pasin bilong amamas.
11 Wanpela nius (U.S. News & World Report) i tok: ‘Long yia 1991, long ol piksa 3-pela televisen-stesin [long Amerika] i putim long taim planti man i lukim televisen, ol i kamapim 10,000 piksa long maritpasin; wan wan i makim tupela marit i mekim maritpasin, tasol planti tru i makim ol man o meri i mekim wantaim narapela i no poroman marit bilong ol.’ Olsem na yu ting televisen i lainim ol man long wanem kain pasin? Barry S. Sapolsky i bekim dispela askim long wanpela ripot em i wokim wantaim narapela man. Em i tok: “Sapos yangpela i lukim televisen inap planti yia, planti tausen taim bai em i lukim ol man i gris long meri o mekim maritpasin, na dispela i lainim em olsem em i ken mekim nabaut long dispela bilong amamas tasol—na em i no ken kisim nogut long en.” (Ripot: Sex in Primetime Television: 1979 Versus 1989) Tru tumas, televisen na ol piksa wokabaut samting i lainim ol yangpela olsem i no gat tambu, na i no gat rong long pasin pamuk, na sapos ol i mekim ol pasin God i tambuim, ol i no ken kisim hevi.—1 Korin 6:18; Efesus 5:3-5.
12 Ol i wokim ol musik bilong dispela graun na ol piksa wokabaut na video na televisen, bilong pulim tingting bilong ol yangpela bambai ol i laikim. Ol dispela samting i helpim ol tok giaman bilong ol spirit nogut! Tasol yu no ken kirap nogut long dispela samting. Yu tingim: Sapos lotu giaman na ol wok politik i hap bilong dispela graun Satan i bosim—na tru tumas ol i hap bilong en—orait yu ting ol amamas bilong dispela graun i no aninit long strong bilong ol spirit nogut? Yupela ol yangpela i mas was gut tru, nogut ol man bilong dispela graun i paulim yupela na subim yupela long bihainim pasin bilong ol.—Rom 12:2.
Skelim Yu Yet
13 Ol tok bilong yu na pasin bilong yu i kamapim klia olsem yu bihainim tok bilong husat. (Rom 6:16) Olsem na yu mas askim yu yet: ‘Ol samting mi lain long en long televisen samting i paulim tingting na pasin bilong mi? Mi larim tok bilong ol spirit nogut i paulim mi?’ Bilong helpim yu long bekim dispela askim, skelim hamas aua yu lusim long stadi long Baibel, na go long ol miting Kristen, na autim tok bilong Kingdom, wantaim hamas aua yu lusim long lukim televisen, na harim musik, na pilai spot o mekim sampela samting moa olsem. Yu mas skelim gut pasin na tingting bilong yu yet—em bikpela samting—nogut yu lus long kisim laip.—2 Korin 13:5.
14 Yu save pinis, kaikai yu kisim em inap strongim skin bilong yu o bagarapim. Na olsem tasol ol samting yu putim long tingting na long bel em inap strongim yu long spirit o bagarapim bilip bilong yu. (1 Pita 2:1, 2) Yu inap giamanim bel bilong yu yet, tasol yu no inap giamanim Jas bilong yumi Krais Jisas—em i save long samting yu laikim tru. (Jon 5:30) Olsem na askim yu yet: ‘Sapos Jisas i stap long graun na em i kam long haus bilong mi na harim musik mi harim, o lukim piksa mi lukim, bai mi sem?’ Tingim gut dispela samting, long wanem, Jisas i lukim tru yumi na em i save long ol samting yumi mekim.—KTH 3:15.
Sakim Tok Bilong Ol Spirit Nogut
15 Ol spirit nogut i wok strong tru long pulim ol yangpela long bihainim tok bilong ol. I olsem ol i tok, ‘Kisim amamas nau na inapim olgeta laik bilong skin.’ Moses em i bikpela man long haus bilong king bilong Isip na em inap kisim olkain amamas, tasol em i laik bai God i orait long em, olsem na “em i no laik bihainim pasin bilong sin na kisim amamas bilong sotpela taim tasol.” (Hibru 11:24-27) I hatwok long sakim ol spirit nogut; yu gat pait long mekim pasin i stret. Yumi mas wok strong long sakim ol, long wanem, yumi gat sin tu na bel bilong yumi i save laikim pasin nogut. (Stat 8:21; Rom 5:12) Aposel Pol tu i gat sin na em i mas wok strong long daunim ol laik nogut i laik bosim em.—1 Korin 9:27; Rom 7:21-23.
16 Tru “planti man i mekim pasin nogut,” tasol God inap helpim yu long sanap strong na sakim ol narapela yangpela i laik pulim yu long bihainim pasin nogut bilong ol. (Kisim Bek 23:2; 1 Korin 10:13) Tasol yu mas bihainim tok bilong God; yu mas putim tok bilong God i stap long bel na tingting bilong yu. (Song 119:9, 11) Sapos yangpela man na meri i stap long hap i no gat man, laik bilong bel inap kirap na pulim ol long brukim lo bilong God. Wanpela yangpela meri i tok: “Taim mitupela boipren tasol i stap, laik bilong skin i pait wantaim lo i stap long tingting bilong mi.” Nogut yu putim hevi long yu yet; yu mas save, bel bilong yu inap giamanim yu. (Jeremaia 17:9) Nogut yutupela tasol i stap. (Sindaun 18:1) Yupela i mas putim lo long ol samting yupela inap mekim na ol samting yupela i no ken mekim bilong makim olsem narapela i laikim narapela. Na bikpela samting em olsem: Yu mas poromanim tasol ol man i laikim tumas Jehova na ol i tingim tru ol lo bilong em.—Song 119:63; Sindaun 13:20; 1 Korin 15:33.
17 Stadi gut long ol buk Kristen i bilong strongim yu long spirit, na dispela bai helpim yu. Olsem: Buk Sampela Askim Bilong Ol Yangpela—Ol Gutpela Bekim, na sapta “Yumi Gat Pait Long Mekim Pasin i Stret” long buk Yu Inap i Stap Oltaim Long Paradais Long Graun. Ol tok bilong Baibel yu lainim, putim i stap long bel na tingting bilong yu, na bai em i strongim yu. Yu no ken lusim tingting, ol spirit nogut i bosim dispela graun na i hatwok long mekim pasin i stret. Yu mas taitim bun. (Luk 13:24) Oltaim wok long strongim bilip bilong yu bambai yu inap sanap strong. No ken bihainim ol man i no strong na ol i pret na ol i bihainim pasin bilong planti man.
Tok Bilong God Inap Helpim Yu
18 Yu mas save, sapos yu bihainim tok bilong God, bai yu no lus long wanpela gutpela samting. Em i laikim yu tru, olsem na em i ‘skulim yu long ol stretpela pasin yu mas bihainim bambai yu ken i stap gutpela.’ (Aisaia 48:17) Olsem na bihainim ol tok bilong Jehova, na bai bel bilong yu i no bagarap, na yu no sem, o kamapim nating pikinini, o kisim sik bilong pamuk, o narapela hevi olsem. Jehova i save amamas taim ol wokman bilong em i sanap strong long traim na stap gut long em na em inap bekim tok long Satan. (Jop 1:6-12) Sapos yu stap gut long Jehova na mekim em i belgut, bai yu inap abrusim bagarap long taim em i givim strafe long ol man nogut bilong dispela graun, na olgeta man i bin kalapim lo bilong em bai i pinis.—Sindaun 27:11; 1 Korin 6:9, 10; 1 Jon 2:17.
19 Sapos yu bung wantaim ol manmeri i pilim tru ol gutpela samting Jehova i bin mekim bilong helpim ol, bai yu lain long bihainim gutpela pasin. Wanpela meri bipo em i kisim drak oltaim na mekim pasin pamuk, em i tok: “Sapos mi no bin harim tok bilong Jehova, ating longtaim mi dai pinis. Mi bin tingting long maritim wanpela man tasol sik AIDS i kilim em i dai pinis. Olgeta gutpela pren bilong mi bilong bipo, sik AIDS i kilim ol i dai pinis o i wok long kilim ol i dai. Mi save lukim ol long rot, na olgeta taim mi tenkyu long Jehova long ol lo bilong em i bosim lain bilong em na i helpim yumi long i stap klin sapos yumi bihainim. I no gat wanpela taim bipo mi stap amamas tru, na bel isi, na gutpela olsem long nau.” Tru tumas, taim yumi bihainim tok bilong Jehova, dispela i helpim yumi!
Tingting Gut na Bihainim Stretpela Rot
20 Mipela i laik kirapim yupela ol yangpela long tingting gut na mekim wok bilong Jehova. Na yu mas strong long mekim dispela wok. (Josua 24:15) I gat tupela rot tasol. Jisas i tok, i gat bikpela rot—i no hatwok long bihainim dispela rot na mekim laik bilong yu yet. Na i gat liklik rot, em hatwok long bihainim namel long ol manmeri bilong dispela graun i save mekim olkain pasin pamuk na ol spirit nogut i bosim ol. Tasol ol manmeri i bihainim liklik rot bai ol i stap long gutpela nupela taim God bai kamapim. (Matyu 7:13, 14) Yu bai bihainim wanem rot? Yu bai bihainim tok bilong husat?
21 Jehova i larim yu yet yu makim. Em i no subim yu long mekim wok bilong em. Profet Moses i tok: “I gat rot bilong i stap gut na rot bilong i dai.” Na em i tok: “Mi laikim yupela i mas bihainim rot bilong i stap gut.” Taim yu “laikim tru God, . . . [na] harim tok bilong en na bel tru long em oltaim,” i olsem yu makim rot. (Lo 29:2; 30:19, 20) Yu mas tingting gut na bihainim ol tok bilong God, na bai yu inap i stap oltaim long nupela taim God bai kamapim.
Bai Yu Bekim Olsem Wanem?
◻ Ol spirit nogut i kamap olsem wanem? Ol i lainim ol man long wanem samting?
◻ Ol spirit nogut i kamapim tok bilong ol long wanem ol rot long nau?
◻ I gat wanem rot bilong sakim tok bilong ol spirit nogut?
◻ Sapos yumi bihainim tok bilong Jehova, dispela bai helpim yumi olsem wanem?
[Askim Bilong Stadi]
1. (a) I gat wanem tupela rot ol yangpela i mas skelim? (b) Jehova i skulim yumi olsem wanem?
2. Bilong wanem yumi mas was gut moa yet long tok bilong ol spirit nogut nau long dispela taim?
3. Ol spirit nogut i kamap olsem wanem? Ol i laik mekim wanem? Ol i mekim long wanem rot?
4. (a) Ol ensel i bikhet, bilong wanem ol i kam long graun long taim bilong Noa? (b) Wanem samting i painim ol ensel nogut, na pikinini bilong ol, long bikpela Tait Wara?
5. Ol spirit nogut i wanem kain man? Olsem wanem ol i paulim tingting bilong ol man long ol lo bilong God?
6. Bilong wanem yumi no ken kirap nogut long ol spirit nogut i kamapim tok bilong ol long pasin hait?
7. Ol tok ol spirit nogut i kamapim long pasin hait i bin mekim wanem long ol man? Olsem na yumi mas was gut long wanem samting?
8. (a) Baibel i tok long “dispela graun” bilong makim wanem samting? (b) Husat i bosim dispela graun? Ol disaipel bilong Jisas i mas ting olsem wanem long dispela graun?
9, 10. (a) Wanem ol samting bilong dispela graun i kirapim ol laik nogut long bel bilong ol man? (b) Olsem wanem yumi ken save long as bilong ol tok em redio na televisen i skulim ol man long en?
11. Planti taim televisen i lainim ol man long wanem kain pasin?
12. Bilong wanem ol yangpela Kristen i mas was gut moa yet long ol samting ol i lukim na harim long televisen samting?
13. Yumi mas skelim wanem samting bilong yumi yet?
14. Wanem samting inap bagarapim bilip bilong yumi? Olsem na yumi mas tingim gut wanem samting?
15. Bilong wanem ol Kristen i mas wok strong long sakim tok bilong ol spirit nogut?
16. Olsem wanem ol yangpela i ken sakim ol samting i laik pulim ol long mekim pasin pamuk?
17. Wanem samting inap helpim ol yangpela Kristen long kisim strong inap long ol i sakim tok bilong ol spirit nogut?
18. Sapos yumi bihainim tok bilong God, dispela inap helpim yumi olsem wanem?
19. Bilong wanem i gutpela yumi bung wantaim ol man i save, ol tok bilong Jehova i helpim ol?
20, 21. (a) I gat wanem tupela rot ol yangpela inap bihainim? (b) Sapos yu bihainim tok bilong God, olsem wanem dispela inap helpim yu long olgeta taim bihain?
[Piksa long pes 16]
Paslain long Tait Wara ol bikhet ensel na ol pikinini bilong ol i kirapim ol man long pait na bagarapim man na mekim pasin sem nogut tru
[Piksa long pes 18]
Sapos Jisas i harim musik yu laikim, bai yu sem?