Daunim Bel Hevi Bilong Sori Long Ples Taim Yu Mekim Wok Bilong God

KRAIS JISAS i tokim lain bilong em: “Go mekim olgeta lain manmeri i kamap disaipel bilong mi.” (Matyu 28:19) Bilong mekim dispela wok, planti Kristen i bin lusim ples bilong ol na karim hevi na hatwok long narapela ples longwe. Ol wasman distrik na wasman sekit na meri bilong ol na ol narapela i bin lusim planti samting bilong mekim wok bilong God. Olgeta dispela Witnes Bilong Jehova inap tingting bek na sori long ples bilong ol.

Sapos yu tingting bek long gutpela sindaun bilong yu long ples na ol manmeri yu laikim tumas, yu inap bel hevi. Bel bilong yu inap bagarap stret, na bai yu laik go bek. Sampela ol i bin baim olgeta samting bilong ol i go long ol man, na tromoi bikpela mani bilong baim rot i go long narapela kantri longwe, tasol ol i tingting bek long ples na bel hevi na ol i go bek.

Taim yu lusim ples, ating pastaim bai yu tingim planti taim, tasol bihain, nogat. Tasol sampela man i bel sori long ples i go inap long taim ol i dai. Jekop i lusim ples inap 20 yia pinis, tasol em i “laikim tumas long go bek.” (Stat 31:30) Dispela kain hevi i save painim husat? Wanem samting i kirapim? Olsem wanem man i ken winim dispela hevi?

Wanem Samting i Mekim na Ol i Bel Sori?

Dispela kain hevi inap painim olgeta. Em i bin painim Amitis, em pikinini meri bilong King Astiages bilong Midia. Em inap i stap amamas, long wanem, em i gat mani kago, na biknem, na gutpela haus, tasol em i tingting bek long ol maunten bilong Midia na em i bel hevi. Olsem na man bilong em, King Nebukatnesar, i wokim ol gutpela gaden long Babilon bilong mekim gut bel bilong em.

Dispela kain bel hevi i kamap strong moa sapos sindaun bilong man long narapela kantri i no gutpela olsem long ples. Ol Juda i stap longwe long ples na ol i bel hevi na tok: “Mipela i sindaun long arere bilong ol wara bilong Babilon na mipela i tingting long Saion. Olsem na mipela i krai i stap. . . . Olsem wanem bai mipela inap singim ol [song bilong Bikpela] long dispela ples i no kantri bilong mipela? I no inap tru.”​—⁠Song 137:​1, 4.

Planti samting inap mekim na bai man i sori long ples. Terri em i lusim Kanada na em i tok: “Wanpela taim piksa bilong famili i lusim buk na pundaun. Mi kisim na taim mi lukim, mi tingting bek long ples na mi krai.” Chris em i lusim Inglan na i go long wanpela kantri i stap rabis. Em i tok: “Taim mi harim wanpela singsing o smelim wanpela kaikai bilong ples, mi tingting bek long ples na bel bilong mi i bagarap stret.”​—⁠Lukim Namba 11:⁠5.

Sapos man i pas gut wantaim famili, dispela inap mekim na bai em i bel sori long ples. Roseli, em wanpela meri bilong Brasil i stap long narapela kantri klostu, na em i tok: “Taim mi harim tok olsem famili i gat hevi, mi save bel hevi, long wanem, mi stap longwe na mi no inap helpim ol. Na taim mi no harim sampela tok, mi tingting planti na bel hevi moa yet.” Janice i lusim Not Amerika na em i go i stap long wanpela liklik taun long ples hat bilong Amason. Em i tok: “Taim mi kisim pas i stori long ol famili na pren long ples i bung wantaim na amamas, mi bel sori na mi laik tumas bai mi stap wantaim ol.”

Ol man i lusim ples, ol i no tingim famili tasol na ol i bel sori. Linda i tok: “Pastaim mi no save mi ken baim we ol samting mi mas kisim, na mi no save long pe bilong en o olsem wanem mi ken kirapim ol man long daunim pe. Mi no gat mani bilong baim ka, olsem na mi mas raun long bas. Planti man i pas pas, olsem na taim mi laik kalap ol i wok long subim mi nabaut. Ol dispela samting i mekim na mi sori gen long ples.” Janet i tok: “Mi lukim ol man i stap rabis na mi bel hevi. Bipo mi no bin lukim ol man i singaut long bret, o bikpela famili i stap wantaim long wanpela rum tasol na i no gat wara. . . . Bel bilong mi i bagarap na mi pilim olsem mi no inap i stap long dispela ples.”

Rot Bilong Daunim Bel Hevi

Yumi no ken sem long laikim tumas ol famili bilong yumi na ples yumi go bikpela long en. God Jehova yet i wokim yumi bilong givim bel long ol narapela na pas tru wantaim ol. Ol wasman bilong kongrigesen long Efesus ol i strongpela Kristen i bosim gut bel, tasol taim aposel Pol i laik lusim ol, “olgeta i krai planti, na ol i holimpas Pol na i givim kis long em”! (Aposel 20:37) Tru, ol i no sori long ples, tasol dispela samting i bin kamap inap givim tingting long yumi. Bel bilong yumi i save sori, tasol yumi no ken larim dispela i bosim yumi. Orait, yu ken mekim wanem bilong daunim bel hevi i save kamap taim yu tingting bek long ples?

Sapos yu lainim tok ples bilong kantri yu go long en, dispela bai helpim yu. Sapos yu no inap toktok wantaim ol man, ating bai yu no laik i stap long dispela kantri. Sapos yu inap lainim tok ples taim yu no go yet, em gutpela. Sapos nogat, taim yu kamap pinis, yu ken kirap kwik na wok strong long lainim. Taim yu kam nupela, yu gat strongpela laik long lainim, olsem na em gutpela taim bilong mekim. Olsem bai i no longtaim na yu inap toktok wantaim ol man, na bai yu no tingting long go bek long ples.

Kwiktaim kisim ol nupela pren. Dispela bai helpim yu long amamas long i stap long dispela kantri. Yu inap kisim ol pren tru insait long kongrigesen bilong ol Witnes Bilong Jehova. Yu mas kirap na kisim save long ol narapela. Wok long kisim save long i stap bilong ol, na famili bilong ol, na hevi bilong ol, na ol samting ol i save amamas long mekim. Singautim ol wanlotu i kam long haus. Sapos yu wok long kamap pren bilong ol, bai ol i wok long kamap pren bilong yu.

Insait long lain bilong God, yu inap kisim ol gutpela pren ol bai kamap olsem famili tru bilong yu. Jisas i tok: “Man o meri i save bihainim laik bilong God, em i brata na susa na mama bilong mi.” (Mak 3:35) Na em i tokim ol disaipel: “Olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. . . . Ol bai i kisim planti haus na planti brata na planti susa na planti mama na planti pikinini na planti gaden. Na tu, bai sampela man i mekim pasin nogut long ol. Na long taim i laik kamap bihain ol bai i kisim laip i stap gut oltaim oltaim.” (Mak 10:​29, 30) Yumi stap olsem bikpela lain brata bilong spirit, olsem na maski yu stap long nupela ples, yu gat ol gutpela poroman.

Na yu mas tingim yet ol pren bilong yu long ples. Sapos yu raitim pas long ol, ating bai yu pas moa yet wantaim ol, long wanem, yu bai tingim gut ol tok yu raitim, na i gat planti nupela samting yu ken tokim ol long en. Janet, em yumi bin stori long em, em i tok: “Bilong telefon longwe, i gat bikpela pe, tasol i no gat bikpela pe bilong salim kaset long rot bilong posofis. I hatwok liklik long toktok long masin na putim ol tok long kaset. Tasol sapos yu holim maikrofon na toktok wantaim wanpela man, i no hatwok.” Na yu ken askim ol pren long ples long salim kaset long yu.

Shirley em i bin lusim Yunaitet Stets na i go long Latin Amerika 25 yia bipo, na em i tok: “Long pas mi save stori long ol gutpela samting i bin painim mi; mi no stori long ol hevi. Dispela i kirapim ol narapela long bekim pas long mi.” Tasol was gut, nogut yu lusim bikpela hap taim tumas long raitim ol pas na yu no gat taim bilong kisim ol nupela pren. Del i lusim Kanada i go long narapela kantri na em i tok: “Nogut yu stap tasol long haus na tingting bek long ples. Yu mas raun na amamas long nupela ples.”

Wok long kisim save long ol pasin bilong kantri, na stori bilong en, na ol gutpela hap bilong en, na ol samting ol asples i save amamas na lap long en. Olsem bai yu no tingting tumas long ol samting nogut bilong en. Na sapos yu laik i stap olgeta long dispela nupela kantri, nogut yu go bek kwiktaim tumas o planti taim tumas na lukim ples. Yu no inap kisim kwik ol nupela pren o lain kwik long nupela sindaun, olsem na nogut yu wok long go bek lukim ples na yu stap longtaim. Taim yu lain pinis long nupela kantri, bai yu amamas long go bek lukim ples na kam bek gen. Pastaim yu mas wok long lain na sindaun gut long nupela kantri.

Tingting Long Bihain

Jehova i givim dispela graun olgeta long yumi, olsem ples bilong yumi. (Song 115:16) Sapos amamas bilong ol Kristen i pulap long bel bilong yu, bai yu stap amamas, maski yu stap we. Sapos yu laik lusim ples bambai yu inap helpim wok bilong Kingdom na autim tok long narapela kantri o long narapela hap bilong kantri bilong yu, yu mas amamas long tingim ol samting bilong bihain. Tingting long kisim ol nupela pren, na lain long ol nupela pasin, na kamapim ol disaipel, na mekim ol gutpela wok bilong God.

Maski yu stap we, God Jehova i stap Pren bilong yu oltaim. (Song 94:14; 145:​14, 18) Olsem na yu mas stap klostu long em long rot bilong beten. (Rom 12:12) Olsem bai yu tingim gut wok yu laik mekim, em wok bilong God. Abraham tupela Sara i tingim dispela na ol i lusim gutpela sindaun bilong ol long Ur. Ol i bihainim tok bilong Jehova na lusim ol pren na famili bilong ol. (Aposel 7:​2-4) Sapos ol i tingting tasol long ples ol i lusim, orait ol inap go bek long en. Tasol ol i tingting long kisim samting i gutpela moa​—⁠bai ol inap kisim laip long Paradais long graun aninit long Kingdom bilong God long heven.​—⁠Hibru 11:​15, 16.

I hatwok long autim tok long narapela kantri o long narapela hap bilong kantri bilong yu i no gat planti Witnes. Tasol dispela wok i karim kaikai na yu inap amamas long en. (Jon 15:⁠8) Na sapos sampela taim yu bel hevi, yu mas tingim as bilong wok yu mekim na tingting long samting i kamap bihain, na bai yu inap daunim dispela bel hevi. Wanpela sista singel i mekim wok misineri em i tok: “Taim bel bilong mi i laik hevi, mi wok long tingim nupela taim na olgeta manmeri bai stap olsem wanpela famili.” Kain gutpela tingting olsem inap helpim yu, na bai yu no bel hevi na sori long ples; bai yu stap amamas.

[Piksa long pes 29]

Pasin bilong sori long ples i no ken pasim yu long mekim wok bilong God