Amamas Long Mekim Wok Bilong God
YUMI mas redi long lusim sampela samting bambai yumi inap mekim gutpela wok yumi laik mekim. Man i laik kamap dokta, em i mas lusim planti yia long stadi, na wok strong, na lusim bikpela mani tu. Man i kamap gutpela tru long spot jimnastik em i bin trening trening kirap long taim em i yangpela yet bambai em inap mekim gut. Man i save tru long wokim musik em i bin lusim planti yia long kisim dispela save long mekim.
Tasol i gat wanpela wok yumi inap mekim na bai yumi kisim planti samting, winim tru ol samting yumi lusim. Em wanem wok? Em wok bilong Jehova, em God Antap Tru. Sapos yu mekim wok bilong dispela Man i bin wokim yumi, em wanpela blesing, na maski yu lusim planti samting, olsem taim na mani na strong bilong yu, bai yu kisim planti samting moa—ol gutpela gutpela samting. Tok bilong aposel Pol i stret: “Sapos yumi trening long mekim pasin bilong God i kamap strong long yumi, dispela bai i helpim yumi moa yet. Em inap long helpim yumi long dispela laip nau yumi stap long en, na long laip yumi bai kisim bihain tu.” (1 Timoti 4:8) Dispela tok i stret olsem wanem?
Taim Yumi Kirap Long Kisim Save Long God
Ol man i amamas long harim tok bilong Kingdom na ol i kirap long stadi long Baibel, planti ol i no save long ol senis dispela stadi bai kamapim long laip bilong ol. Taim man i kirap long stadi, sampela pren bai lusim em, long wanem, ol i no save bilong wanem em i no laik poromanim ol moa long mekim samting nau em i save i no stret long ai bilong God. (1 Pita 4:4) O famili i birua long em, na bai em i bel hevi long ol dispela man em i laikim tumas, ol i no laikim Jehova o sakim Em tru. (Matyu 10:36) Em bikpela hevi.
Long ples wok na long skul tu bai i gat hevi. Man i kirap long stadi, isi isi bai em i no insait moa long ol pati samting bilong dispela graun. Em i no laik harim o kamapim moa ol tok pilai nogut wantaim ol wanwok o wanskul. Em bai wok long bihainim tok bilong Efesus 5:3, 4: “Tok bilong [pamuk na pasin doti] i no ken kamap liklik namel long yupela. . . . Yupela i no ken mekim tok doti na tok kranki na tok pilai nogut.”
Em i senisim pasin bilong em na nau em i stap narapela kain. Dispela i givim hatwok long ol yangpela i stap yet long skul. Ol yangpela Kristen i mas wok strong oltaim bambai ol inap holimpas bilip. I gat samting bilong ol bikpela de ol i no laik insait long en, na ol tisa i laik lainim ol long ol tok i sakim God, olsem tok bilong evolusen, na ol wanskul i laik pulim ol long bihainim pasin bilong ol. Na ating ol wanskul na tisa i tok bilas long ol, long wanem, ol i bihainim pasin bilong God na i stap narapela kain. Dispela i givim hatwok long ol yangpela, tasol ol i mas karim dispela hevi na bai God i ken orait long ol.
Ol i Lusim, Tasol Dispela i Givim Hevi Tru?
Sampela samting Kristen i mas lusim, pastaim dispela i olsem i givim hevi long ol, tasol bihain em i kamap olsem blesing. Olsem: Sampela i mas lusim pasin bilong smok. (2 Korin 7:1) Tru, pastaim dispela i givim hatwok long ol, tasol taim ol i lusim pinis, dispela i helpim ol tru! Na i wankain tu long ol man i wok long lusim drak na dring planti. Taim ol i lusim ol dispela kain pasin em inap bagarapim ol, ol i stap gutpela moa! Sapos man na meri i stap nating wantaim, ol i mas stretim dispela na marit tru, o lusim poroman. (Hibru 13:4) Man i gat planti meri, em i mas lusim ol na stap wantaim namba wan meri tasol. (Sindaun 5:18) Tru, em i mas lusim sampela samting, tasol dispela bai kamapim bel isi insait long famili.
Tingim Ol Gutpela Samting Yu Inap Kisim
Tru tumas, man i bihainim ol lo bilong Jehova, dispela i helpim em tru. Man i stadi long Baibel, em i kisim save long nem bilong Man i bin wokim em, em Jehova, na nau em i kirap na kolim dispela nem taim em i beten. (Song 83:18, NW) Em i kisim save long ol gutpela samting Jehova i bin mekim na em bai mekim bilong helpim ol man, na em i kirap laikim tumas Jehova. Em i no pret moa long ol man i dai pinis, olsem planti man long sampela kantri; em i save ol i slip na wet long kirap bek. (Saveman 9:5, 10) Na em i amamas tru long save, Jehova i no givim pen oltaim long ol man long bikpaia! Em i kisim save long tok i tru na em i kamap fri!—Jon 8:32.
Taim man i stadi i wok long bihainim moa yet ol lo bilong Jehova, bel bilong em i stap stret na em i no sem. Em i lain long bihainim ol pasin Kristen tru na dispela i helpim em long lukautim gut famili bilong em, na em i stap belgut na amamas. Na taim em i go long ol miting long Haus Kingdom, gutpela samting i painim em! Em i bung wantaim ol manmeri i save laikim tru ol narapela na mekim gut long ol olsem Baibel i tok ol manmeri bilong God i mas mekim. (Song 133:1; Jon 13:35) Ol i mekim klinpela tok i strongim ol narapela; ol i toktok long “ol strongpela wok bilong God.” (Aposel 2:11) Tru tumas, taim em i bung wantaim “ol arapela manmeri bilong God,” dispela i helpim em long i stap amamas. (1 Pita 2:17) Na dispela i helpim em long “kamap nupela” na bihainim stretpela pasin olsem God i laikim.—Efesus 4:24.
Dediket Long God
Taim man o meri i wok long kisim save na givim bel long Jehova dispela i kirapim em long givim laip bilong em long God, olsem dediket, na kisim baptais long wara. (Matyu 28:19, 20) Jisas i tok, em i mas tingting gut pastaim—em i mas tingim ol hevi inap painim em. (Luk 14:28) Kristen i dediket pinis, em i putim ol samting bilong Jehova i stap namba wan samting long laip bilong em, na em i givim baksait long ol laik nogut bilong skin. Em i wok strong long lusim “pasin bilong olpela bel” na kamapim ol gutpela pasin em “Holi Spirit i save kirapim yumi long mekim.” (Galesia 5:19-24) Em i wok strong long bihainim tok bilong Rom 12:2: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap save tru long laik bilong God.” Kristen i dediket em i save long laik bilong God na em i bihainim.
Orait, tingim ol gutpela samting em i kisim: Nau em i save long Man i bin wokim olgeta samting. God i kolim em stretpela man bai em i ken kamap pren bilong em! (Jems 2:23) Nau em i save tru long God na kolim em olsem “Papa bilong mipela.” (Matyu 6:9) Narapela blesing nupela Kristen i dediket inap kisim i olsem: Em i save long as bilong i stap bilong em na nau em i bihainim laik bilong God. (Saveman 12:13) Em inap i stap gut long God olsem Jisas i bin mekim, na bai em i kamapim klia olsem Satan em i man bilong giaman, na bai Jehova i belgut tru!—Sindaun 27:11.
Tasol Kristen i mas lusim sampela samting moa bambai em i ken i stap gut long God. Em i mas lusim hap taim moa bambai em inap stadi gut bilong strongim em yet na redi long ol miting. (Song 1:1-3; Hibru 10:25) Em i mas lusim sampela samting em i laik mekim bambai em i gat taim bilong autim tok. (Efesus 5:16) Em i mas lusim taim na strong bilong em long i go long ol miting bilong ol Witnes Bilong Jehova na long ol kibung. Na ating em i mas lusim sampela samting bilong em yet bilong givim mani bilong lukautim Haus Kingdom na helpim wok bilong autim tok long olgeta hap. Tasol planti milion Kristen inap tokim yu, sapos yu givim bel long helpim ol dispela wok, bai yu amamas. Jisas i tok, ‘Amamas bilong man i givim samting i winim amamas bilong man i kisim samting.’—Aposel 20:35.
Gutpela samting yumi kisim taim yumi helpim wok bilong Jehova, dispela i winim tru ol hevi yumi kisim. Taim yumi wok long kamap strong, yumi amamas moa long mekim wok bilong God na i kamapim planti kaikai moa. Tru tumas, sapos yu lainim wanpela man long ol tok i tru bilong Baibel na yu lukim em i kirap lotuim Jehova, i no gat narapela samting bilong mekim yu i stap belgut moa. Na sapos em i wanpela famili bilong yu, olsem pikinini bilong yu em yu bin skulim em “long tok bilong Bikpela,” orait amamas bilong yu bai narapela kain. (Efesus 6:4) Yumi lukim God i blesim ol wok yumi mekim olsem “wanwok” bilong em.—1 Korin 3:9.
Sampela Samting Moa Yumi Kisim
Tru, bai yumi gat hevi, long wanem, taim nogut i stap yet. Na ating ol hevi bai kamap bikpela moa, long wanem, Satan i gat sotpela taim tasol i stap. Ating bai ol man i mekim nogut long yumi o traim i painim yumi. Tasol yumi save God i sambai long yumi na dispela i mekim gut bel bilong yumi na helpim yumi long sanap strong. (1 Korin 10:13; 2 Timoti 3:12) Sampela brata, ol man i bin mekim nogut tru long ol inap planti yia, tasol ol i sanap strong, long wanem, ol i givim bel tru long God. Ol brata i karim hevi o winim traim na sanap strong, ol i pilim olsem ol aposel long taim ol man i paitim ol na lusim ol i go. Aposel 5:41 i tok: “Ol i amamas long God i ting ol inap long kisim sem long nem bilong Jisas.”
Sapos yu sanap strong, ol gutpela samting yu bai kisim long nau na long bihain bai winim tru hevi yu kisim. Yu mas tingim: Sapos yu bihainim pasin bilong God, dispela inap helpim yu “long dispela laip nau yumi stap long en, na long laip yumi bai kisim bihain tu.” (1 Timoti 4:8) Yu inap kisim gutpela samting tru sapos yu sanap strong! Sapos yu stap gut long God, bai yu abrusim bagarap long bikpela hevi tru em bai kamap long las de bilong dispela taim nau. O sapos yu dai paslain long dispela bikpela samting, bai yu kirap bek na i stap long nupela taim bihain. (Daniel 12:1; Jon 11:23-25) Tingim bikpela amamas yu bai pilim taim yu inap tok: “Long strong bilong Jehova, mi win pinis!” Bai yu amamas tru long i stap long taim “olgeta samting long graun bai i save tru long Bikpela.”—Aisaia 11:9.
Tru, yumi mas lusim sampela samting bambai yumi inap mekim wok bilong God na hevi bai painim yumi, tasol dispela i samting nating sapos yumi skelim wantaim ol gutpela samting yumi kisim. (Filipai 3:7, 8) God i mekim ol gutpela samting bilong helpim ol wokboi bilong em, na bihain tu bai em i mekim, olsem na yumi mekim tok olsem man bilong raitim Song: “Bikpela i bin mekim gut tru long mi. Olsem na bai mi givim wanem samting long em?”—Song 116:12.