Ples Nating i Karim Kaikai
EM STORI BILONG ARTHUR MELIN
Long wanpela gutpela de long kirap bilong yia 1930, mi sanap long bris long taun Prins Rupet, long Britis Kalambia. Mi lukluk long bot i sindaun long wesan na wara i drai olgeta, na mi tingting: ‘Wara i go we?’ Em namba wan taim mi save long tait bilong solwara Pasifik long hap wes bilong Kanada—namel long taim bilong haiwara na draiwara, wara inap go daun 7-pela mita insait long 6-pela aua tasol. Tasol olsem wanem wanpela yangpela man bilong fam long ples kunai i kam sanap long nambis bilong solwara Pasifik?
OL I singautim mi bilong kamap wanpela boskru long bot Charmian na mekim wok painia bilong mi i go bikpela. Ol i makim mipela long go pas long autim tok long ol longwe ples i stap long nambis long hap wes bilong Kanada, namel long biktaun Vankuva na Alaska. Dispela bikpela hap long nambis bilong Britis Kalambia i go inap planti mail na i no gat ol man i autim tok bilong Kingdom long en. Liklik lain bilong autim tok i stap long taun Prins Rupet.
Mi laik kirap kwik long mekim wok, olsem na taim mi lusim tren mi go stret long bris bilong painim dispela bot Charmian na tupela boskru bilong en, em Arne Barstad na meri bilong em Christina. No gat man long bot, olsem na mi lusim. Taim mi kam bek gen, mi kirap nogut tru. I olsem solwara i laik drai olgeta!
Tasol wanem samting i kamap pastaim na nau mi kisim dispela gutpela wok?
Papamama i Lainim Mi Long God
Mi kirap laikim ol samting bilong spirit long taim mi stap yet wantaim papamama long ples kunai long Albeta, long Kanada. Papa i painim pinis wanpela liklik nius em Charles Taze Russell bilong Sosaiti Was Taua i bin raitim. Ol tok bilong dispela nius i senisim tru tingting bilong em. Papa i kirap autim tok long ol manmeri i stap klostu, maski em i gat bikpela wok bilong lukautim fam long Kalma, long Albeta. Em 100 yia bipo, olsem long yia 1892 samting.
Long Februeri 20, 1905, mi kamap insait long dispela famili i pret long God. Mi namba 8 bilong ol 10-pela pikinini long famili. Papa wantaim sampela moa bilong lain Swiden i stap long dispela hap ol i kirap long bung wantaim ol Intenesenel Baibel Stiuden. Ol i wokim wanpela haus miting, em bihain ol i kolim Haus Kingdom. Em wanpela Haus Kingdom ol i wokim pastaim tru long Kanada.
Mipela i gat planti wok long fam, tasol mipela i no save lusim ol miting Kristen. Sampela taim Sosaiti Was Taua i salim man i kam mekim tok long mipela. Ol dispela tok i kirapim laik long bel bilong mipela long autim tok. Olsem na klostu olgeta long famili bilong mipela i wokabaut long lait na holim strong tok i tru.
Mekim Wok Autim Tok
Long yia 1921 samting, em namba wan taim ol i givim wok long mi bilong autim tok. Ol i salim mi i go long ol haus long taun Edmenten bilong tilim ol tanget i singautim ol man i kam harim pablik-tok. Mi stap wanpela tasol na mi lain long gutpela samting long dispela de: Yumi mas bilip strong long Jehova. (Sindaun 3:5, 6) Mi amamas tru Jehova i helpim mi na mi inapim dispela wok bilong namba wan taim!
Mi kirap long bilip strong tru long oganaisesen bilong Jehova na long lain ‘gutpela wokboi,’ long wanem, ol i helpim mipela long save klia moa long ol tok i tru bilong Baibel. Mipela i lusim planti pasin bilong ol misin, olsem pasin bilong mekim Krismas na betde. Mipela i no wari moa long helpim mipela yet long kisim laip; mipela i save, wok bilong autim tok bilong Kingdom em i bikpela samting. Dispela olgeta samting i mekim na sindaun bilong mi i senis olgeta. Mi givim laip bilong mi long Jehova long Epril 23, 1923, na bihain liklik mi wok strong long kamap painia.
Long taim bilong kol long ples kunai, ples i kol olgeta, tasol mipela i raun long kain bet em hos i pulim na autim tok long ol longwe hap bilong bus. Wanpela taim mi stap tupela wik wantaim lain i autim tok wantaim haus-ka. Dispela kain ka i helpim ol long autim tok long ol bikpela ples klia bilong kunai long Kanada. Maski hevi bilong mani na bikpela kol na longwe longwe rot, mi mekim wok painia planti taim insait long 3-pela yia long Albeta, i go inap long dispela de mi tingim yet long yia 1930, em taim ol i singautim mi i go mekim wok long hap wes, long nambis bilong solwara Pasifik. Mi no man bilong solwara na mi no gat save long bot, olsem na mi tingting planti.
Mi go kamap long Prins Rupet na i no longtaim na mi amamas long nupela sindaun bilong mi long bot wantaim tupela wanwok bilong mi. Brata Barstad i save tru long solwara, em i bin wok bisnis long kisim pis inap planti yia. Inap 6-pela yia mipela i raun long solwara bilong Britis Kalambia na wok strong tru long autim tok long ol longwe longwe ples, kirap long hap bilong Vankuva i go inap long Alaska. Mi lain long narapela samting: Wanem wanem wok Jehova i laik givim long yu, yu kisim; no ken surik long en.
Planim Pikinini Kaikai Arere Long Solwara
Long kirap bilong yia 1930, pastaim mipela i go long taun Ketsikan, long Alaska, na kisim 60 katon i gat ol buk na nius bilong Baibel long en. Inap sampela wik mipela i go long olgeta haus long Ketsikan, na Rangel, na Pitasbek, na Juno, na Skagwe, na Hens, na Sitka, na ol liklik ples i stap nabaut. Bihain mipela i go autim tok long olgeta hap long nambis bilong Britis Kalambia. Taim bilong san i stap yet na mipela inapim dispela wok. Mipela i go long kem bilong ol man i katim ol diwai, na long kem bilong ol man bilong putim pis long tin, na ples bilong ol retskin bilong Amerika, na ol liklik taun, na long haus bilong ol wan wan man i stap longwe, na long ol man bilong kisim abus long bus.
Bihain Sosaiti i givim ol pikap long mipela na ol plet i gat ol pablik-tok bilong Baibel long en. Mipela i karim dispela i go wantaim mipela, na ol buk na Baibel na nius tu. Planti taim mipela i wokabaut long ol bikpela ston long nambis na karim ol dispela samting i go. Long taim bilong draiwara mipela mas go antap long lata i no strong bilong kam antap long bris, na mipela pulim ol dispela samting i go antap wantaim. Mi amamas mi bin wok long fam long ples kunai na skin bilong mi i strong.
Long bot mipela i gat masin bilong bikmaus na dispela i helpim mipela gut long autim tok bilong Kingdom. Wara i mekim ol toktok bilong Baibel long masin i kamap strong na ol man i stap longwe inap planti mail inap harim. Mipela anka i stap long wanpela pasis long ailan Vankuva, long ples i no gat man, na mipela i putim pablik-tok bilong Baibel long masin. Ol man i stap long ailan longwe long nambis i kirap nogut. Long de bihain ol i tokim mipela: “Asde mipela i harim tok bilong Baibel i kam stret long heven!”
Narapela taim lapun man wantaim meri bilong em i tok, ol i harim musik i kam daun insait long paip bilong stov, tasol taim ol i go ausait ol i no inap harim. Taim ol i go bek insait long haus ol i harim wanpela nek i toktok. As bilong dispela i olsem: Long dispela taim mipela i rausim plet long masin na wok long putim narapela. Mipela i save putim musik pastaim bilong pulim tingting bilong ol man, na bihain mipela i putim tok bilong Baibel.
Taim mipela i go long ol longwe ples bilong ol man i wok long kampani i putim pis long tin, planti taim mipela i save tilim 100 buk long wanpela de. I no gat planti samting bilong pulim nabaut tingting bilong ol dispela man na ol i gat taim bilong tingim ol samting bilong spirit. Bihain planti ol i kamap Witnes. Taim mipela i raun gen, mipela i amamas long i go lukim ol. Dispela i “strongim bel bilong [mipela] olgeta wantaim.”—Rom 1:12.
Wok Wantaim Poroman
Long yia 1931 mi maritim Anna, em sista bilong Christina Barstad. Mipela wok i go long mekim wok painia long bot inap sampela yia, na planti gutpela samting i painim mipela. Ol weil, na olkain sil, na bulmakau bilong solwara, na dia, na bea, na tarangau, ol i poroman bilong mipela. Na mipela i lukim ol bikpela maunten, na ol liklik wara, na gutpela pasis, na ples i gat planti diwai sida na diwai pain na kain traipela diwai ol i kolim Dagles. Sampela taim mipela i bin helpim ol dia wantaim pikinini bilong ol, em ol i ranawe long birua na i laik brukim wara i tait na i no gat strong moa.
Wanpela apinun mipela i lukim wanpela tarangau em i flai klostu long wara na em i holim bikpela pis samon long lek bilong en. Pis i bikpela tumas na tarangau i no inap apim na lusim wara olgeta. Wanpela boskru bilong mipela, em Frank Frankse, em i lukim olsem em inap kisim dispela pis na em i ran i go long nambis na bungim tarangau. Strong bilong tarangau i laik pinis na Frank i kisim pis. Mipela ol painia long bot i amamas long kaikai pis samon long apinun, na tarangau i lain long givim samting bilong em bilong helpim ol narapela, maski em i no gat laik long mekim.
Long wanpela liklik ailan klostu long hap not bilong ailan Vankuva, mipela i autim tok long wanpela man na meri bilong em, nem bilong tupela Thuot, na ol i bilip. Man i gat olsem 95 krismas na em i no inap rit rait; em i gat strongpela pasin na em i no laik bai narapela i bosim em. Meri i gat olsem 85 krismas. Man i laikim tumas tok i tru, olsem na em i daunim em yet na larim meri i lainim em long rit. I no longtaim na em yet inap stadi long Baibel na ol buk bilong Sosaiti, na i no 3-pela yia yet na tupela i baptais long ples bilong ol long dispela longwe ailan. Mipela pulapim wara long dingi bilong mipela na mi amamas long baptaisim tupela!
Mipela i amamas tu long lukim famili Sallis bilong taun Pauel Riva ol i bilip long tok bilong Kingdom. Papa, em Walter, em i kaunim wanpela liklik buk (War or Peace—Which?) na kwiktaim em i bilip olsem tok bilong dispela buk em tok i tru. I no longtaim na famili olgeta i kirap long mekim wok painia wantaim Walter long Vankuva, em ples mipela i save anka long taim bilong kol. Walter em i man bilong wok strong, na olgeta brata long hap bilong Vankuva i save laikim em. Em i dai na pinisim wok bilong em long graun long yia 1976, na ol famili bilong em i stap yet ol i bikpela lain Witnes.
Daunim Pasin Birua
Ol pasto long ol liklik ples bilong ol retskin ol i no amamas long wok bilong mipela; ol i tok, mipela i laik stilim ol sipsip bilong ol. Long liklik ples Pot Simson, pasto i tokim hetman bilong ples em i mas tambuim mipela long go long ol haus na autim tok. Mipela i go lukim hetman na askim em: ‘Yu ting i stret pasto i mekim olsem ol lain bilong yu i no gat save na ol yet i no inap skelim samting ol i laik mekim?’ Mipela i tok, ‘Gutpela sapos yu givim rot long ol bambai ol inap harim ol tok bilong God na ol yet i ken tingim wanem tok ol i laik bilipim.’ Wanem samting i kamap? Em i orait long mipela i wok long autim tok long dispela ples.
Inap planti yia narapela hetman i mekim na ol kaunsil na ol lain bilong lotu i no inap pasim ol Witnes long autim tok long lain bilong em. Em i tok: “Mi stap hetman bilong dispela ples, olsem na mi amamas long ol Witnes i kam.” Tru, long sampela ples ol man i no amamas long mipela i kam, tasol maski i gat birua, i no gat wanpela taim ol i rausim mipela long wanpela ples. Olsem na olgeta taim mipela i go sua, mipela inap mekim wok bilong mipela.
Karim Hevi Long Solwara
Planti taim hevi i bin painim mipela long solwara, i gat bikpela win na ren, na tait, na ol bikpela ston i no stap long mep bilong solwara, na sampela taim ensin i bagarap. Wanpela taim mipela i trip i go klostu long ailan Laskete, em longwe long Vankuva inap 160 kilomita long hap not. Mipela i go pas long rip long taim bilong draiwara na sapos bikpela win na ren i kamap bai bot i bagarap. Mipela lusim bot na i go sindaun long ol bikpela ston long rip na wet i stap. Mipela kisim kaikai long belo, na stadi liklik, na wetim taim bilong haiwara.
Bagarap inap painim mipela na sampela samting i nogutim sindaun bilong mipela, tasol mipela i stap amamas na i no gat planti sik. Tasol taim mipela i kamapim tupela pikinini man, nau bikpela senis i kamap. Mipela i stap yet long bot, tasol taim mipela i go longwe long hap bilong not, long wara Ona, Anna wantaim tupela manki i save stap wantaim papamama bilong Anna, na mipela ol narapela tasol i go olgeta long Alaska. Taim mipela i kam bek gen long hap saut, Anna wantaim tupela manki i bung gen wantaim mipela.
Mi no tingim wanpela taim ol pikinini i bin les o kisim sik. Oltaim ol i save pasim samting bilong lukautim ol sapos ol i pundaun insait long wara, na sampela taim mipela i pasim rop long ol. I gat sampela taim mipela i bin pret, nogut ol i pundaun.
Sampela Senis Moa
Long yia 1936, mipela i mas lusim bot Charmian, na mi kisim wok mani. Bihain namba 3 pikinini man i kamap. Bihain long dispela taim mi baim wanpela bot bilong kisim pis. Dispela i helpim mipela long kisim liklik wansiling na mekim wok autim tok tu long ol ples long nambis.
Mipela i kisim haus long ailan Digbi, long hapsait bilong pasis long Prins Rupet, na bihain liklik i gat liklik kongrigesen i kamap. Long taim bilong Namba 2 Pait Bilong Olgeta Hap, gavman i tambuim wok bilong ol Witnes Bilong Jehova long Kanada. Mipela i save kalap long bot long biknait tru na go long Prins Rupet na tilim ol nius samting long olgeta haus. Ol man i no save mipela i brukim pasis bilong tilim ol nius samting i gat tambu long en!
Graun i Karim Kaikai
Isi isi sampela moa i kirap long bung wantaim ol Witnes Bilong Jehova, na long yia 1948 mipela i save, mipela i sot long Haus Kingdom long Prins Rupet. Mipela i baim wanpela haus ami long hapsait bilong pasis, na brukim na karim ol plang samting bilong en i kam long hap bilong sanapim Haus Kingdom. Jehova i blesim wok bilong mipela na mipela i gat Haus Kingdom.
Long yia 1956 mi kirap gen long mekim wok painia, na long 1964, Anna i kirap gen long mekim. Mipela i raun gen long bot na autim tok long nambis bilong solwara Pasifik. Inap liklik taim mipela bin mekim wok sekit tu. Mipela i go lukim ol kongrigesen long ol ailan Kwin Salot na i go long hap is long raunwara Fresa long hapsait bilong ol maunten, na bihain mipela i go olgeta long taun Prins Jos na ples Makensi. Mipela bin raun inap planti tausen mail long hap Pasifik Not-Wes long ka na bot na balus.
Long Prins Rupet ol gutpela samting i wok yet long painim mipela long wok bilong autim tok. Mitupela Anna i bin stadi wantaim sampela man na meri, em bihain ol i go long Skul Gileat na kamap misineri long ol narapela kantri. Mitupela i amamas tru long lukim ol dispela pikinini bilong spirit i kisim tok bilong Kingdom i go long ol longwe ples!
Klostu nau mitupela i winim 90 krismas na skin i no strong moa, tasol mipela i mekim yet wok bilong Jehova na i stap amamas. Mipela i amamas long tingim ol gutpela ples mipela i bin lukim long Alaska na Britis Kalambia. Tasol mipela i amamas moa long lukim ples nating bilong spirit long dispela bikpela hap em i karim kaikai—nau planti man bilong litimapim nem bilong Jehova i stap long ol kongrigesen long dispela hap.
Na mipela i amamas moa yet long lukim ol pikinini tru bilong mipela, wantaim ol pikinini bilong spirit, ol i kamap bikpela man pinis na litimapim nem bilong Jehova. Mipela i amamas long liklik hap wok mipela inap mekim bilong helpim wok bilong God i kamap bikpela long dispela hap. Nau i gat brens-ofis bilong Alaska yet, em i lukautim wok bilong 25 kongrigesen.
Long Prins Rupet mipela i amamas long dediketim nupela Haus Kingdom long 1988, em i stap insait tru long taun. Tru tumas, mipela i amamas long mekim tok olsem Aisaia i bin mekim: “Bikpela, yu surikim tru ol mak bilong graun bilong mipela, na . . . i kamap bikpela tru. Na dispela i mekim biknem bilong yu i kamap bikpela moa.”—Aisaia 26:15.
[Piksa long pes 21]
Mipela mekim wok sekit long 1964 i go inap 1967
[Piksa long pes 24]
Mipela mekim wok long dispela kain bot taim mipela autim tok long ol ples klostu long nambis