Pen na Hevi—Em Bai Pinis o Nogat?

BIKPELA bagarap i kamap taim bom i pairap long wanpela ples maket long Sarayevo; long Ruanda ol i bagarapim nabaut na kilim i dai planti planti man; long Somalia ol pikinini i gat bikpela hangre na ol i singaut long kaikai; bikpela guria i kamap long Los Enjeles na ol famili i skelim ol samting bilong ol i bagarap; bikpela tait wara i kamap long Banglades na ol man i kisim nogut tru. Long olgeta de long televisen na long ol nius yumi lukim ol dispela kain pen na hevi i painim ol man.

Sori tumas, taim pen na hevi i painim ol man, dispela i mekim na sampela i no bilip moa long God. Buk bilong wanpela lain Juda long Amerika i tok, “Pasin nogut i stap na dispela em i wanpela bikpela samting i save pasim ol man na ol i no bilip.” Ol i toktok long ol bikpela ples kalabus bilong ol Natsi long Auswis na ol bom nogut kain olsem dispela bom ol i bin tromoi long Hirosima. Na buk i tok, “Ol man i bilip long God ol i save tingting planti​—⁠olsem wanem wanpela stretpela God i gat bikpela strong em inap larim ol i bagarapim planti planti manmeri i no bin mekim rong?”

Taim ol man i wok long lukim na harim stori bilong planti pait na bagarap i save kamap long olgeta taim, dispela inap mekim na bel bilong ol i no pilim moa. Sapos ol pren na famili bilong ol i no insait long ol dispela bagarap, bel bilong ol i no pilim ol dispela pen na hevi i painim ol man.

Tasol yumi inap bel sori long lain bilong yumi taim pen na hevi i painim ol, na dispela i ken lainim yumi long sampela pasin bilong dispela Man i bin wokim yumi. Baibel i tok, God i wokim man “i kamap olsem God yet.” (Stat 1:​26, 27) Tasol i no olsem skin bilong yumi ol man i kain olsem God, nogat. Long wanem, Krais Jisas i tok, “God em i Spirit,” na spirit “i no gat mit na bun.” (Jon 4:24; Luk 24:39) Dispela tok olsem yumi kamap olsem God yet, em i makim olsem yumi inap bihainim sampela pasin olsem bilong God. Yumi man i save bel sori long ol man i kisim pen na hevi, olsem na yumi inap save, dispela Man bilong wokim yumi, em God Jehova, em i Man bilong sori na em i pilim tru ol dispela pen na hevi i painim ol man em yet i bin wokim ol.​—⁠Skelim wantaim Luk 11:⁠13.

Wanpela rot God i bin kamapim klia sori bilong em, i olsem: Em i bin kamapim wanpela buk i tokim yumi long as bilong ol pen na hevi. Dispela buk em Baibel. Baibel i kamapim klia olsem God i bin wokim ol man bambai ol i ken i stap amamas​—⁠i no bilong kisim pen na hevi. (Stat 2:​7-9) Na Baibel i tokaut tu olsem namba wan man na meri i no laik i stap aninit long wok king bilong God na ol stretpela lo bilong em, na long dispela as ol pen na hevi i painim ol.​—⁠Lo 32:​4, 5; Rom 5:⁠12.

Tasol God i sori yet long ol man i kisim bikpela pen na hevi. Dispela i kamap klia long tok promis bilong em long pinisim ol dispela pen na hevi bilong ol. “Harim. . . . [God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:​3, 4; lukim tu Aisaia 25:8; 65:​17-25; Rom 8:​19-21.

Ol dispela gutpela tok promis i kamapim klia olsem God i pilim tru ol pen na hevi i painim ol man na em i laik pinisim olgeta. Tasol wanem samting i bin kamapim pen na hevi? Bilong wanem God i bin larim dispela samting i stap inap long nau?

[Piksa Kredit Lain long pes 2]

Cover and page 32: Alexandra Boulat/Sipa Press

[Piksa Kredit Lain long pes 3]

Kevin Frayer/Sipa Press