Ripot Long Wok Bilong Kingdom

Bai Ol i Autim Dispela Gutnius Bilong Kingdom

INAP planti handet yia pinis, nambawan birua bilong God, em Satan, em i bin mekim wok long ol gavman bilong graun na ol lotu giaman na bai em i ken pasim wok bilong lotu Kristen tru na i no ken i go long olgeta hap. Tasol wok bilong em bai lus nating. Jisas i tok profet olsem “bai ol i autim dispela gutnius bilong kingdom bilong God [em i no tok, “ating bai ol i autim,” o “ol inap autim”] long olgeta hap bilong graun, bai olgeta lain manmeri i ken harim.”​—⁠Matyu 24:⁠14.

Samting i bin kamap long kantri Grik i kamapim klia olsem Satan i no inap pasim dispela wok. Misin Grik Otodoks long dispela kantri i laik pasim ol Witnes Bilong Jehova long autim gutnius bilong Kingdom. Tasol olsem wanpela stori mipela i kamapim hia i soim yumi, ol man i gat gutpela bel ol bai harim ol tok i tru bilong Baibel, maski ol man i laik pasim ol.

Inap 30 yia samting i go pinis, wanpela pris bilong misin Grik Otodoks i harim gutnius na em i bilip long en, na em i kamapim laik bilong em long kamap wanpela Witnes Bilong Jehova. Tasol famili bilong em i strong tru long pasim em, na ol i strong long em i no ken bung moa wantaim ol Witnes. Bilong amamasim famili, em i mekim yet wok pris; tasol oltaim em i pilim tru olsem ol Witnes Bilong Jehova i bin helpim em long kisim save long tok i tru, na em i bin lusim bambai em i ken holim yet wok i gat namba insait long wanpela lotu giaman.

Tasol taim rot i op, em i save mekim sampela tok bilong helpim ol Witnes Bilong Jehova. Sampela taim em i bin tokim ol man, sapos ol i laik kisim save long tok i tru bilong Baibel, ol i mas stadi wantaim ol Witnes. Sampela i bin mekim olsem.

Tasol nau long dispela taim bikpela sik i painim dispela pris, na em i ting liklik taim bai em i dai. Olsem na em i singautim ol pikinini bilong em na ol i bung long bet bilong em.a Em i tokim ol, sapos em i dai, ating ol inap bungim em gen. Em i tokim ol long tok bilong Baibel long Jehova bai kirapim bek ol man i dai pinis na ol bai stap long Paradais long graun. Tasol sapos ol i laik tru long lukim dispela samting i kamap, ol i mas lainim tok i tru bilong Baibel na lusim lotu giaman. Em i tokim ol long bung wantaim ol Witnes Bilong Jehova na kisim save long rot bilong kamap Kristen tru.

Bihain liklik dispela pris i dai. Tasol gutpela tok em i bin givim long ol pikinini bilong em taim em i laik i dai i kamapim gutpela samting. Pikinini meri bilong em i bin bihainim pasin bilong ol narapela long famili na em i biruaim tru ol Witnes Bilong Jehova na wok bilong ol. Tasol em i no inap sakim gutpela tok papa i mekim taim em i laik i dai. Olsem na kwiktaim em i go painim ol Witnes Bilong Jehova na em i kirap stadi wantaim ol long Baibel. Nau em yet i kamap wanpela Witnes na em i kisim baptais long wara bilong makim olsem em i bin dediketim skin bilong em long God Jehova.

Long kantri Grik na long planti narapela kantri, winim 230, ol Witnes Bilong Jehova i mekim wok bilong ol long strong bilong spirit holi bilong God. Spirit holi i helpim ol long inapim tok profet bilong Jisas, em i tok: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”​—⁠Aposel 1:⁠8.

[Ol Futnot]