Toktok Long Lotu—I Tambu?
“I GAT tupela samting mi no save toktok long en—em lotu na wok politik!” Planti taim ol man i bekim tok olsem taim ol Witnes Bilong Jehova i toktok long ol long Baibel. Na yumi inap pilim tingting bilong ol.
Taim ol man i toktok long wok politik, bel bilong ol inap kirap long kros, na tok pait i save kamap. Planti man i no bilipim ol tok promis nating na ol i save planti bikman bilong politik i laikim tasol bikpela namba, na biknem, na mani. Na sori tru, sampela taim pasin birua na ol kros politik i kamapim pait na i bagarapim man.
Ating bai yu tok, ‘tasol wankain samting i save kamap long lotu tu.’ Ol man i strong long bihainim lotu bilong ol na dispela i bin kirapim planti pait long nau. Long Noten Aialan, inap longpela taim ol Katolik na ol Talatala i birua. Long hap bilong Bolkan, ol lain bilong Misin Isten Otodoks, na ol Katolik, na sampela moa, ol i pait bilong bosim graun. Dispela i kamapim wanem samting? Ol man i mekim pasin nogut tru na inap long nau narapela i no laikim narapela.
Ol man i pret ol birua bai kilim ol i dai, olsem na planti man i laik haitim lotu bilong ol na lotu bilong famili bilong ol. Long Afrika, inap planti handet yia ol man i holim nating nem Kristen, na ol man i insait long ol narapela lotu, na ol man i gat lotu bilong ol tumbuna, ol i save birua birua. Dispela i bin kirapim sampela papamama long givim tupela nem long pikinini bilong haitim lotu bilong ol na dispela i bin lukautim ol. Long nau ol man i bihainim yet dispela pasin. Olsem na wanpela manki i ken mekim wok long namba wan nem tasol na ol man bai ting em i bilong wanpela lotu i holim nating nem Kristen, o em i ken mekim wok long namba tu nem tasol na ol man bai ting em i bilong narapela lotu. Sapos lotu bilong wanpela man inap mekim na ol man inap kilim em i dai, ating yumi no kirap nogut sapos dispela man i no laik toktok long lotu long ai bilong ol man, a?
Sampela man i no laik toktok wantaim narapela man long lotu, maski i no gat wanpela man i laik kilim ol i dai. Ol i ting, sapos ol i toktok wantaim man i gat narapela lotu long ol bilip bilong ol, dispela bai kamapim wanpela tok pait nating tasol. Na sampela man i bilip, olgeta lotu i gutpela. Ol i tok, bikpela samting em man i mas amamas long bilip bilong em; toktok long ol narapela narapela bilip i no kamapim wanpela gutpela samting.
Na ol man i save stadi long as bilong ol lotu, ol tu i no wanbel. Buk The New Encyclopædia Britannica i gat wanpela stori (The Study and Classification of Religions) i tok olsem: ‘Ol saveman i no wanbel long as bilong lotu, olsem na long bipo yet i kam inap long nau ol man i no wanbel taim ol i toktok long lotu.’
Wanpela buk dikseneri i kolim insait bilong dispela tok lotu olsem “pasin man i mekim bilong kamapim klia olsem em i bilip na daun long wanpela bikpela man antap em i man bilong wokim na bosim olgeta samting long heven na long graun.” Sapos olsem, lotu em i bikpela samting long i stap bilong man. Tru tumas, lotu i as bilong stiaim ol samting i bin kamap long graun. Wanpela buk (Oxford Illustrated Encyclopedia of Peoples and Cultures) i tok: “Olgeta lain man i gat sampela kain lotu ol i mekim wok long en bilong makim rot stret na bilong makim as bilong i stap bilong man.” Long rot bilong lotu yumi ken save wanem rot “i stret” na yumi inap skelim “as” bilong en, olsem na nogut yumi tok pait long dispela samting. Gutpela samting moa, yumi mas stori gut long narapela long dispela samting. Tasol yumi ken toktok wantaim husat, na dispela inap helpim yumi olsem wanem?