Ripot Long Wok Bilong Kingdom
Autim Tok Long Taim Bilong Planti Hevi
APOSEL Pol i tok profet olsem, “long taim bilong las de planti hevi nogut tru bai i kamap.” (2 Timoti 3:1) Dispela tok i kamap tru! Inap longtaim pinis ol man bilong El Salvado long Sentral Amerika i kisim planti hevi nogut tru. Winim 10-pela yia, pait i bin stap insait long kantri yet, olsem na bikpela hevi na indai i painim planti tausen man. Long nau dispela pait i pinis, tasol ol hevi i stap yet. Bihain long pait, pasin raskol i go bikpela tru. I no longtaim i go pinis na wanpela man i save toktok long televisen i tok: “Pait na bagarapim man na pasin stil i save kamap long olgeta de.”
Ol dispela hevi i painim tu ol Witnes Bilong Jehova. Ol stilman i bin brukim planti Haus Kingdom na ol i stilim ol masin bikmaus samting. Sampela taim sampela lain raskol i holim gan ol i bin kam insait long Haus Kingdom long taim bilong ol miting Kristen, na ol i stilim mani, hanwas, na sampela narapela samting i gat bikpela pe long ol man i stap long miting. Na ol raskol i bin kilim i dai sampela Witnes taim ol i mekim wok bilong ol long olgeta de.
Tasol maski ol dispela hevi i stap, ol Witnes Bilong Jehova long El Salvado i wok strong long autim gutnius long ol man. Ol i mekim olsem, long wanem, ol i bihainim tok bilong Baibel: “Olgeta lain man i mas harim man i autim gutnius pastaim.” (Mak 13:10) I gat planti man yet long dispela kantri i gat bikpela laik tru long save long tok bilong Baibel long ol gutpela samting Kingdom bai kamapim, olsem na ol Witnes i wok strong long autim tok long olgeta man. Autim tok long kain kain taim na ples i save kamapim gutpela kaikai.
Taim wanpela Witnes i bin stap long haus sik bilong kisim sampela marasin, long olgeta taim em i autim tok long ol narapela sikman long ol tok promis bilong God long ol samting bai kamap bihain, olsem Baibel i tokaut long en. Wanpela man i gat bikpela sik i tok: “Klostu nau bai mi dai!” Tasol maski dispela sikman i bel hevi, dispela i no pasim Witnes long autim gutnius bilong Kingdom bilong God long em. Long strongpela nek em i kaunim long dispela man sampela hap bilong buk Yu Inap i Stap Oltaim Long Paradais Long Graun, em buk ol Witnes Bilong Jehova i wokim. Sampela de bihain, Witnes i lusim haus sik, na em i sori long dispela man i slip long bet na i laik i dai.
Fopela yia bihain dispela Witnes i mas go long narapela haus sik bilong kisim sampela marasin moa. Taim em i stap long haus sik, wanpela sikman i kam long em na i tok: “Yu tingim yet mi?” Em dispela man em i bin bungim 4-pela yia i go pinis, na em i ting em bai dai! Em i amamas tru taim dispela man i holim em na i tok moa: “Nau mi wanpela Witnes Bilong Jehova tu!” Em i bin kisim save long tok bilong Baibel long ol gutpela samting bai kamap bihain, na em i stadi long Baibel wantaim ol Witnes Bilong Jehova, na em i dediket long Jehova. Em i bin kamap wanpela Witnes na inap tupela yia em i autim tok long olgeta de olsem wanpela painia.
Tok i tru Witnes i autim long taim nating long haus sik, em i go daun tru long bel bilong dispela man. Dispela wok bilong helpim ol man long kisim save long tok i tru, em i save kirapim ol Kristen tru long mekim yet wok bilong autim tok, maski ol i stap ‘long taim bilong planti hevi nogut tru.’