Taim Yumi Go Lukim Sikman—Yumi Inap Helpim Em Olsem Wanem?

ATING wanpela pren bilong yu i stap long haus sik, na yu laik tru long i go lukim em. Tasol bai yu mekim wanem kain toktok, na yu inap mekim wanem ol samting? Bai yu bringim wanem samting i kam bilong givim long em? Yu ting wanem samting bai i helpim em tru? Na i gat sampela samting yu no ken kamapim stori long en taim yu go lukim em? I gat sampela samting yu no ken mekim?

Taim yu go lukim sikman, yu laik stori gut wantaim em, a? I no bilong hariap hariap na tok “Gude, yu stap orait tasol?” na bihain yu tok “Gutbai” long em na tokim em, “Kamap gutpela gen hariap” na yu lusim em na yu go. Dispela em i no gutpela tumas, olsem na bai yu mekim wanem samting bilong strongim na helpim em?

Wanpela toksave em olsem: Bihainim savepasin na makim taim i stret long sikman. Yu inap askim sikman yet o famili bilong em long save wanem taim em wanpela i stap na i no gat ol narapela man o famili i stap wantaim em na bai yu inap i go lukim em. Na sapos ol dokta i mas katim em, ating i gutpela sapos yu go lukim em long apinun long de paslain long dispela, long taim dokta i no katim em yet. Bai em i amamas long harim ol stori na toktok wantaim yu. Tasol sapos yu kam bihain tasol long dokta i katim em, ating strong bilong marasin i stap yet long skin bilong em, o ating skin bilong em i pilim pen yet.

Mekim Ol Tok Olsem Bilong Man i Gat Gutpela Tingting

Ating yumi save long dispela hap tok ‘ol gutpela tok bilong amamasim bel.’ Long taim yu go lukim sikman yu mas kirapim toktok pastaim na traim long mekim sampela stori moa. Na mekim ol samting olsem yu amamas long i kam lukim em, na taim yu stori yu mas lap liklik na bai sikman i no ken tingting tumas long mekim gut long yu taim yu stap wantaim em. Orait nau tingim wanem ol samting yu inap stori long en na wanem ol samting yu no ken stori long en.

Yu no ken pes drai taim yu go lukim sikman, na pes bilong yu i no ken kamapim olsem yu tingting planti long sik bilong em maski yu save sik bilong em i nogut. Baibel i tok: “Pasin bilong belgut i olsem marasin bilong mekim man i stap gut. Tasol sapos tingting bilong man i bagarap, dispela i olsem sik nogut i wok long bagarapim ol bun bilong en.” (Sindaun 17:22) Olsem na em wok bilong yu long mekim ol gutpela toktok bilong strongim em.​—Sindaun 25:11; skelim Aisaia 41:13.

Taim famili bilong sikman o ol brata sista bilong kongrigesen i kam na ol i mekim ol gutpela stori, ating dispela inap long strongim bel bilong em. I gutpela tu, sapos yu mekim tok pani long sampela samting; na mekim ol narapela samting bilong mekim sikman i amamas na lap. Tasol yu mas was gut. Yu no kam bilong mekim ol tok pilai nabaut, yu laik kamapim ples klia olsem, yu sori tru long dispela samting i painim em.

Sikman i mas i gat strongpela tingting. Olsem na was gut na nogut yu mekim ol stori i daunim wok bilong dispela dokta o gutpela nem bilong dispela haus sik samting, na bai i bagarapim tingting na bel bilong sikman. Na i no gutpela sapos yu wok long skelim sik bilong dispela man wantaim long samting i bin painim yu. Yumi olgeta i narapela narapela kain, olsem na sik i painim yumi tu bai i narapela narapela kain.​—Sindaun 18:13.

Orait nau tingim pasin bilong yu long stori: Yu bin bungim wanpela man em i no save malolo long stori na em i mekim planti toktok tumas olsem ol katres i save lusim maus bilong wanpela gan, o i olsem wara i ron spit nogut tru olsem wara kalap bilong Iguasu? Ating bai yu les tru, a? Olsem na yu no ken stori olsem long taim yu toktok wantaim wanpela pren o wantok bilong yu em i stap long haus sik. Taim yu mekim ol gutpela toktok bilong strongim sikman no ken mekim planti toktok tumas, na yu mas malolo liklik tu. Na sapos yu no man bilong mekim planti toktok yu no ken tingting planti long dispela. Sampela taim yupela i ken stap isi tasol na dispela tu inap strongim em. Olsem na was gut na no ken pulim longpela stori tumas​—dispela inap mekim na skin bilong sikman bai i les long planti tumas ol man i kam lukim em na toktok planti tumas.

Nogut Yu Stap Longtaim Wantaim Sikman

Long sampela hap bilong graun, famili olgeta bilong sikman i save go stap long haus sik wantaim em. Ating ol i mas wasim sikman na lukautim em long kaikai, olsem na dispela bai skruim taim bilong i stap wantaim sikman. Tasol long planti haus sik, i gat ol lo bilong haus sik long wanem taim ol man i ken kam lukim sikman bambai ol i no putim hevi long sikman. Na tu, ol wokman bilong haus sik i ken raun na lukim ol sikman na mekim wok bilong ol. Sapos sikman em i wanpela gutpela pren o wanpela lain bilong yu, ating bai yu inap stap wanpela aua samting. Tasol olsem wanem sapos sikman i askim yu long i stap longpela taim moa liklik wantaim em? Ating skin bilong sikman i les na em i no tingting gut, olsem na gutpela sapos yu bihainim savepasin na no ken i stap longtaim tumas.

I gutpela sapos yu bihainim dispela toksave, long wanem dispela bai helpim sikman na ol wokman bilong haus sik. Taim yu go lukim sikman inap planti taim, na yu stap sotpela taim tasol wantaim em, dispela i gutpela na i winim taim yu go lukim em inap wanpela taim tasol na yu stap inap longpela taim tru. Tingim dispela samting tu: Yu mas bihainim savepasin sapos yu kam na ol lain bilong em i stap pinis, na ol i no amamas tumas long lukim yu.​—Lukim Sindaun 25:17.

Gutpela Pasin Yu Mekim

I gat narapela gutpela samting yu inap mekim long taim yu laik i go lukim sikman. Olsem wanem? I gat wanpela samting yu inap bringim na bai em i ken kaunim, olsem wanpela nius Kirap! o Wastaua samting? Ating em bai amamas long kaunim. Na sikman bai i pilim tru dispela gutpela pasin. Na yu inap kaunim sampela hap tok bilong dispela nius long em, olsem wanpela tok i bin helpim yu yet.

Wanem ol narapela samting yu inap bringim bilong em? Ol samting olsem ol plaua o sampela samting inap mekim em i amamas. O ating yu save long wanpela kain kaikai em sikman i save laikim, olsem na yu inap long wokim long haus na bringim i kam long em sapos lo bilong haus sik i orait long dispela. Tasol pastaim yu ken askim famili bilong em na kisim save long dispela, na taim yu kamap long haus sik yu mas askim ol nes samting pastaim, na sapos i orait yu ken kisim kaikai i go long rum bilong sikman.

Ating yu inap askim ol nes na dokta bilong em, i gat sampela samting moa yu inap bringim i kam bilong em o yu inap long mekim bilong helpim ol na bai i no hatwok tumas long ol long haus sik? Ating bai ol i amamas long dispela tingting bilong yu.

I gat wanem ol narapela rot yu inap long helpim sikman? Orait yu inap askim sikman, i gat wanpela i save kisim ol pas bilong em i kam o nogat? Na tu, sapos i orait long em, yu ken lukautim haus bilong em​—ating yu inap tokim sampela pren long helpim yu long klinim gut haus bilong em taim em i laik lusim haus sik na kam bek long haus. Na olsem wanem? Em i laik bai wanpela i ken stretim na katim gras samting ausait long haus, na givim wara long ol plaua, na mekim sampela ol narapela wok? Nogut ples i stap olsem i no gat man i stap long en na bai i pulim ai bilong ol raskol. Na sapos em i gat wanpela dok samting em i save lukautim, yu ting em i laik bai narapela i ken helpim em long lukautim dispela animal? Ating sikman i tingting planti long dispela ol samting na planti narapela samting moa, tasol em i no ken tokim yu​—yu askim em na bai em i tokim yu. Taim yu mekim gutpela pasin olsem bilong helpim em, em i save olsem yu laik tru long helpim em.

Ol bilas na pasin bilong yu inap strongim tu ol wokman bilong haus sik na ol inap lukautim gut sikman hia. Ating bai ol i kirap nogut long lukim olsem, ol man i kam bilong lukim dispela sikman ol i save bilas gut tru na mekim gut skin. Na sapos sampela ol i bilas gut na ol i askim long sik bilong dispela sikman, ating ol wokman bai tingting, dispela sikman i mas wanpela bikman samting. Taim yu mekim olsem, ating pasin bilong yu inap kirapim ol wokman bilong haus sik long mekim gut long dispela sikman.​—1 Timoti 2:​9, 10.

Sapos Wanpela Bikpela Hevi i Kamap

Sampela taim dispela sikman em yu laik i go lukim em, em i save hatwok long toktok gut wantaim ol nes samting bilong haus sik. Olsem na long pasin isi yu inap askim em olsem, “Dokta bilong yu i ting olsem wanem long sik bilong yu?” Sapos sik bilong em i bikpela, na yu wanblut bilong em o yu wanpela elda long kongrigesen bilong em, orait yu inap mekim ol samting bilong helpim em. Na bilong helpim em moa, ating yu ken i go lukim nes o dokta samting bilong save gut long ol narapela samting yu ken mekim bilong helpim dispela sikman. O sapos famili bilong em i surik liklik long toktok wantaim ol dokta samting, orait yu ken i go wantaim ol long lukim dokta na toktok wantaim em.

Sapos yu mekim olsem, orait yu no ken pret long ol dokta o nes samting. Ating sikman yet i gat bikpela sik tru na em i mas i stap klostu long ol masin samting bilong helpim em, na ating dispela rum i gat planti ol sikman i stap. Olsem na ol nes i gat planti wok long mekim na bai ol i hariap hariap na ol i no bekim gut tok bilong yu. Tasol maski ol i gat planti wok, yu no ken pret​—sapos yu olsem maus bilong dispela sikman, ol i mas tok klia long yu. Tasol yu mas was long ol toktok yu mekim, nogut yu sutim tok long wok bilong ol. Tasol sapos em wok bilong yu long lukautim sikman long haus sik, orait, i stret long yutupela i mas save gut long wanem ol samting i kamap long em o sampela senis samting. Tru, taim yu stap lukautim sikman, yu no laik givim planti hevi long ol narapela, tasol yu no ken les long askim ol long sik bilong em na ol samting bilong helpim. Wanpela taim Jisas i mekim wanpela tok bokis na em i tok, sampela taim yu mas askim planti taim na bai yu inap long kisim bekim bilong ol samting yu laik save long en.​—Luk 18:​1-6.

Tingim Bek Ol Samting Long Taim Yu Bin i Go Lukim Sikman

Yu go lukim pinis sikman na taim yu lusim sikman em i bin amamas long yu kam, na nau yu ken tingim bek ol samting yutupela i bin stori long en na ol samting yu bin mekim. Dispela samting bai i helpim yu long tingim gut ol samting yu inap mekim long bihain sapos yu go lukim dispela sikman gen o narapela sikman, na bai yu save tru long wanem samting yu bai mekim na olsem wanem dispela bai i helpim sikman.

Olsem na yu inap mekim planti samting taim yu go lukim wanpela sikman long haus sik. Tingim gut ol samting yu bai mekim na tu, yu mas laik long helpim em. Sapos yu inap long mekim ol dispela samting, em nau yu kamapim long ples klia olsem yu kamap ‘pren bilong em na dispela pasin i winim pasin namel long tupela brata [bilong skin].’​—Sindaun 18:24.

[Blok long pes 20]

Gutpela Pasin Bilong Yu Inap Helpim Sikman

1. Redi gut pastaim.

2. Skelim gut sik bilong man, na no ken stap longpela taim.

3. Putim ol gutpela klos na mekim gut skin.

4. Go pas long mekim ol stori, tasol no ken mekim planti toktok tumas.

5. Tingim gut ol samting yu laik bringim bilong em na ol samting yu inap mekim bilong helpim em.

6. Mekim olsem yu amamas long lukim em na mekim ol toktok bilong strongim em.

7. Kam bek lukim em na stap inap sotpela taim tasol.