Pasin Bilong Karim Hevi i Stap Long Bel
OLSEM WANEM? Long nau yu save lukautim wanpela long famili i gat bikpela sik? Sapos olsem, ating yu tingting planti na yu pret long sampela samting. Yu ken mekim wanem? Tingim hevi bilong sampela em ol i save lukautim sikman na tingim ol gutpela samting i bin helpim ol long karim hevi.
Sem. Sampela taim pasin bilong man i sik i mekim na yu inap sem long ai bilong ol narapela. Tasol sapos yu stori gut long ol pren na wantok long sik bilong wanblut, ating dispela bai helpim ol long pilim tru hevi bilong yu, na long mekim “pasin sori,” na no ken les kwik. (1 Pita 3:8) Sapos yu inap, toktok wantaim ol narapela famili em ol i gat wankain hevi. Ating yu no ken sem tumas taim yu save long hevi bilong ol narapela. Sue i stori long samting i bin helpim em: “Mi bin sori tru long papa bilong mi, olsem na taim mi sem, dispela sori i karamapim hevi. Na papa i man bilong lap, dispela tu i bin daunim hevi.” Tru tumas, sapos sikman inap lap wantaim man i lukautim em, em i wanpela gutpela samting bilong helpim ol long stap isi.—Skelim wantaim Saveman 3:4.
Pret. Man i no gat save long sik, em bai pret nogut tru. Sapos yu inap, askim dokta long ol samting em bai kamap taim sik i go bikpela. Kisim save long ol samting yu mas mekim bilong lukautim sikman long dispela taim. Wanpela bikpela samting i helpim Elsa na em i no pret tumas, em i bin toktok wantaim ol narapela i save lukautim sikman, na ol nes, na em i kisim tingting bilong ol bilong save long ol samting em bai kamap taim sik i go nogut nogut. Jeanny i tok: “No ken haitim pret bilong yu—bosim pret bilong yu. Planti taim pasin bilong pret long samting inap kamap em i nogut moa, winim pasin bilong pret long samting em i kamap tru.” Dokta Ernest Rosenbaum i tok, maski i gat wanem as na yu pret, gutpela yu ‘toktok long pret bilong yu taim pret i kamap.’—Skelim wantaim Sindaun 15:22.
Bel Hevi. I hatwok long karim bel hevi, na i hatwok moa sapos bel hevi i painim yu taim yu lukautim sikman. Yu inap bel hevi, long wanem, nau yu pilim olsem yu stap wanpis na dispela i tru sapos sikman i no inap toktok moa, o kisim gut tok bilong yu, o em i no save moa long yu. Ating sampela i no inap pilim hevi bilong yu. Sapos yu kamapim bel hevi bilong yu long wanpela gutpela pren em i save stap isi na putim gut yau, dispela inap helpim yu.—Sindaun 17:17.
Belhat na Tingting Planti. Dispela inap kamap taim wanpela i save lukautim man i gat bikpela sik na sampela taim pasin bilong em i givim hatwok. (Skelim wantaim Efesus 4:26.) Yu mas save, planti taim sik i as bilong pasin i givim hevi long yu, sikman nogat. Lucy i tingting bek na em i tok: “Taim mi belhat stret, mi bin krai. Dispela i mekim na mi traim long tingim i stap bilong sikman na bikpela sik bilong em. Mi save sikman i mas kisim helpim long mi. Dispela tingting i save helpim mi long lukautim yet em.” Ating kain tingting olsem inap helpim yu na yu no ken “belhat kwik.”—Sindaun 14:29; 19:11.
Bel i Gat Tok. Planti taim bel i kotim ol man i save lukautim sikman. Tasol yu mas save, wok yu mekim em wanpela wok yu mas mekim, na em i hatwok long mekim, olsem na olgeta taim yu no inap mekim tok o pasin i stret olgeta. Baibel i tokim yumi: ‘Planti taim yumi save popaia. Sapos i gat wanpela man i stap, em i no save mekim sampela tok i no stret, orait em i gutpela man tru, na em bai inap long bosim gut olgeta hap bilong bodi bilong en.’ (Jems 3:2; Rom 3:23) Yu no ken larim bel i pasim yu long mekim wanpela samting nau bilong stretim hevi. Taim yu bel hevi long wanpela tok o pasin bilong yu na yu tok, “Mi sori,” em nau, ating yu na sikman bai stap isi gen. Wanpela man i bin lukautim wanpela wanblut i gat sik, em i tok: “Inap long strong bilong yu, mekim gut ol samting.”
Bikpela Bel Hevi. Bikpela bel hevi i save painim planti man—na yumi ken save—dispela hevi i kamap insait long ol famili em wanpela bilong ol i gat bikpela sik. (Skelim wantaim 1 Tesalonaika 5:14.) Wanpela meri i save lukautim ol sikman na planti taim em i gat bikpela bel hevi, em i stori long samting i bin helpim em, em i tok: “Planti i save tok tenkyu long pasin bilong mipela long lukautim ol. Kain liklik tok olsem i ken strongim yumi long mekim yet wok bilong yumi, maski skin i les o yumi bel hevi.” Baibel i tok: “Man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” (Sindaun 12:25) Sampela i no pilim hevi bilong yu olsem yu mas kisim liklik tok amamas samting, olsem na ating sampela taim yu mas kamapim “bel hevi” bilong yu pastaim bilong kisim “gutpela tok” long ol. Tasol sapos bikpela bel hevi i stap yet o i go bikpela moa, ating i gutpela yu go lukim dokta.
No Gat Rot. Taim man i gat bikpela sik yu inap pilim olsem yu no gat rot bilong helpim em. Yu no ken giamanim bel bilong yu, yu mas bilip olsem i gat sampela samting yu inap mekim na sampela samting yu no inap mekim—yu no ken bosim sik bilong sikman na sik bilong em bai pinis o nogat, tasol yu inap mekim gut long em taim yu lukautim em. Yu no ken ting yu yet o sikman o sampela man i save helpim yu, ol i mas mekim ol samting i kamap stret olgeta, nogat. Stretpela tingting bai helpim yu na yu no ken ting olsem yu no gat rot tru bilong helpim sikman, nogat. Na tu, stretpela tingting bai helpim yu long skelim gut wok bilong yu. Planti man i bin lukautim wanpela long famili i gat sik ol i kamapim gutpela tok olsem: Lain long karim hevi bilong wanpela de tasol.—Matyu 6:34.
[Rait long pes 26]
“No ken haitim pret bilong yu—bosim pret bilong yu. Planti taim pasin bilong pret long samting inap kamap em i nogut moa, winim pasin bilong pret long samting em i kamap tru”
[Piksa long pes 26]
Bilong daunim pret bilong yu, kisim save long sik
[Piksa long pes 27]
Taim yu toktok wantaim wanpela gutpela pren, dispela inap helpim yu