Ol Haus i Sanap Long Pos
Wanpela man bilong Benin i raitim dispela stori bilong Kirap!
WANPELA buk bilong ol turis long Wes Afrika i tok: “Ganvie em i wanpela namba wan ples long Benin ol turis i amamas long lukim.” Narapela buk i tok: “Ol Afrika yet i amamas long lukim Ganvie; yu inap lukim planti turis bilong Afrika na turis bilong ol narapela hap.”
Tru tumas, Ganvie em i narapela kain ples. Inap 15,000 manmeri i sindaun long ol haus ol i bin sanapim long pos long raunwara Nokue, long hap not bilong Kotonu, Benin. Long Ganvie i no gat wilwil, ka, o rot. Sapos ol i laik go long skul, maket, klinik, haus bilong wanpela man, o long narapela hap, ol i mas kalap long kanu ol i bin wokim long diwai iroko.
Klostu olgeta famili i gat 3-pela kanu samting—wanpela bilong Papa, wanpela bilong Mama, na wanpela bilong ol pikinini. Taim pikinini i liklik yet em i lain long pul long kanu. Taim pikinini i gat 5-pela krismas em wanpela inap raun long kanu. I no longtaim na pikinini inap sanap long kanu long tromoi liklik umben. Sampela pikinini i amamas long hambak long ai bilong ol turis na sanap long het bilong ol long kanu.
Maket bilong Ganvie em ol kanu long wara. Ol meri i wok bisnis ol i sindaun long kanu em kaikai na ol narapela samting i hip i stap long en—lombo samting, prut, pis, marasin, paiawut, bia, na ol redio tu. Ol i pasim traipela hat ol i bin wokim long gras i drai bilong pasim bikpela san, na ol i salim ol samting long ol narapela em ol i pul i kam long kanu bilong ol. Sampela i maket em ol pikinini meri. Tasol krismas bilong ol i no ken giamanim yu! Taim ol i liklik yet ol i lain long pasin bilong maketim gut ol samting.
Taim ol meri i maketim o baim ol samting, ol man i tingting long painim pis. Ol i mekim olsem: Ol i sutim planti handet han bilong diwai i go daun long as bilong wara inap long ol i ken pas long graun malumalum, olsem na ol han bilong diwai i kamap olsem bus i pas pas. Ol pis i kam bilong kaikai ol han bilong diwai em ol i wok long sting. Sampela de bihain ol man i kam wantaim umben na kisim pis.
Ples Hait i Kamap Ples Turis
Bipo ol Tofinu bilong Ganvie ol i no “Manmeri Bilong Wara,” olsem ol man i save kolim ol long nau, nogat. Inap 200 yia samting bipo, wanpela kantri klostu long ol, ol i laik mekim nogut long ol, olsem na ol i bin ranawe i go long raunwara na ples tais bilong abrusim bagarap. Ol saveman i tok, nem Ganvie i makim dispela samting i bin kamap bipo, long wanem, tok gan long tok ples Tofin, ol i tanim olsem “mipela i no lus,” na tok vie ol i tanim olsem “lain.” Olsem na nem bilong dispela biktaun bilong ol ples bilong raunwara, yumi ken tanim olsem “ol manmeri i painim pinis bel isi.”
Pasin bilong ol Tofinu long ranawe long ples tais klostu long raunwara Nokue i gutpela, long wanem, lotu bilong kantri i birua long ol i no save larim wanpela soldia long raun insait long wara o long ol hap em tait inap kamap long en. Olsem na raunwara i gutpela ples bilong ol Tofinu i ken painim kaikai na ples bilong hait long ol birua. Bipo dispela ples em wanpela ples hait, tasol nau em i wanpela ples i gat nem na planti planti turis i save kam long en long bot i gat moto.