Askim

Taim mama bilong Jisas, em Maria, i go lukim kandere bilong em Elisabet, Maria i gat bel pinis o nogat?

Yumi ken save, em i gat bel.

Pastaim Luk sapta 1 i stori long Elisabet, em meri bilong pris Sekaraia, em i gat bel na i karim Jon (bilong Baptais). “Long namba 6 mun bilong Elisabet i gat bel, God i salim ensel Gebriel” i go tokim Maria em bai kisim bel na bai em i karim “Pikinini bilong God Antap Tru.” (Luk 1:​26, 30-33) Tasol wanem taim Maria i kisim bel?

Luk i stori moa olsem nau Maria i go long Juda bilong lukim kandere bilong em Elisabet em i gat bel. Taim em i bungim Elisabet, pikinini (Jon) i stap long bel bilong Elisabet em i kalap. Elisabet i tok long ‘pikinini i stap long bel bilong Maria,’ na em i kolim Maria “mama bilong Bikpela bilong mi.” (Luk 1:​39-44) Olsem na yumi ken save Maria i kisim bel pinis, na taim em i go lukim Elisabet em i gat bel.

Luk 1:56 i tok: “Maria i stap wantaim Elisabet inap tripela mun samting, na bihain em i go bek long ples bilong en.” Dispela tok i no makim de stret long kalenda. Em i tok tasol, “inap tripela mun samting,” olsem na em namba 9 mun bilong Elisabet i gat bel.

Maria i helpim Elisabet i go inap klostu long taim Elisabet i laik karim pikinini na nau Maria i go bek long ples bilong em Nasaret. Ating Maria i save, taim Elisabet i karim pinis pikinini (Jon), planti manmeri na sampela wanblut tu bai i kam lukim Elisabet, na nogut ol i lukim Maria yet i gat bel, long wanem, em i meri singel. Maria i gat bel inap hamas mun na em i go bek long Nasaret? Baibel i tok, em i stap wantaim Elisabet “inap tripela mun samting,” olsem na ating em namba 3 mun bilong em o kirap bilong namba 4 mun.