Man Bilong Bel Kaskas

TOK Hibru i gat wanpela as tok tasol bilong dispela tok “bel nogut long man.” Taim yumi laik kolim dispela tok bilong makim ol sinman bilong graun, yumi inap tanim tu olsem ‘mangal’ o bel kaskas. (Stat 26:14; Song 106:16) Long tok Grik i no gat wanpela tok tasol bilong dispela tok “bel nogut long man.” Tok Grik zeʹlos em inap makim pasin bilong bel nogut i stret long mekim, na pasin bilong bel nogut i no stret long mekim; tok Hibru tu i olsem. Narapela tok Grik, phthoʹnos, i makim tasol pasin bilong bel nogut i no stret long mekim.

Long tok Grik bilong bipo ol i save kamapim tok phthoʹnos olsem wanem? Wanpela dikseneri bilong Baibel (The Anchor Bible Dictionary) i tok: “Man i gat dispela pasin phthonos em i no olsem man bilong mangal​—⁠em i no laik kisim ol samting narapela man i holim. Tingting bilong em i olsem: Em i no laik bai dispela man i gat ol dispela samting. Na em i no olsem man i save resis long winim narapela; em i laik pasim ol narapela na bai ol i no ken win.”

Planti man bilong bel kaskas o mangal ol i no save dispela pasin bilong ol i as bilong hevi bilong ol long bel nogut long man. Dispela buk i tok moa: “Wanpela pasin bilong phthonos, i olsem man i no pilim dispela pasin i stap long skin bilong em. Sapos ol i askim em, i gat wanem as na i stret em i mekim dispela pasin, em bai tok, ol man em i sutim tok long ol, i stret em i mekim olsem long ol, na em i lukim olsem ol i no mekim stretpela pasin long em, na dispela i kirapim em long sutim tok long ol. Na sapos man i askim em, olsem wanem na em inap mekim kain tok olsem long pren bilong em, em bai tok, em i laik helpim pren bilong em na em i mekim dispela tok.”

Tupela man bilong raitim Gutnius, em Matyu na Mak, ol i kolim dispela tok Grik phthoʹnos taim ol i stori long tingting i stap long bel bilong ol man na i kirapim ol long kilim i dai Jisas. (Matyu 27:18; Mak 15:10) Pasin bilong bel nogut o bel kaskas i kirapim ol long mekim olsem. Em dispela pasin tasol i mekim na sampela man bilong bikhet na lusim bilip tru ol i bel nogut tru long ol brata na ol i laik mekim nogut long ol. (1 Timoti 6:​3-5) Olsem na i gat as na ol man bilong mangal o bel kaskas long ol man i stap gut i no inap i go insait long Kingdom bilong God! God Jehova i tok pinis, ol man i wok yet long “mangal nogut” na “bel kaskas long ol man i stap gut,” ol i “mas i dai.”​—⁠Rom 1:​29, 32; Galesia 5:⁠21.

[Ol Piksa long pes 7]

Yu no ken larim pasin bilong bel kaskas i bagarapim sindaun bilong yu