Pasin Bilong Bel Nogut Long Man
PASIN bilong bel nogut long man i save kamap olsem wanem? Taim yumi lukim wok bilong wanpela man i kamap gutpela na bilong yumi nogat, yumi bel nogut long em. O yumi bel nogut long wanpela pren bilong yumi taim ol man i litimapim nem bilong em, na ol i no mekim long yumi. Tasol olsem wanem? Long olgeta taim dispela pasin bilong bel nogut i gat rong long en?
Ol man bilong bel nogut long narapela man, ol i save tingting nogut long ol man em ol inap kisim wok bilong ol o winim ol. King Sol bilong Israel em i bin mekim olsem. Pastaim em i save laikim tru Devit, em man bilong karim hap plang bilong Sol long taim bilong pait, na em i putim Devit olsem wanpela gopas long ami. (1 Samuel 16:21; 18:5) Orait wanpela taim King Sol i harim ol meri i mekim singsing na litimapim nem bilong Devit olsem: “Sol i kilim planti tausen man. Na Devit i kilim planti planti tausen.” (1 Samuel 18:7) I no stret Sol i larim dispela i bagarapim gutpela pasin pren i stap namel long em na Devit. Tasol em i bel hevi long dispela tok bilong ol meri. “Olsem na stat long dispela de Sol i ting long dispela samting na i bel nogut long Devit.”—1 Samuel 18:9.
Tasol taim man i bel nogut long narapela man, i no olsem em i laik bai samting nogut i painim dispela man. Ating em i bel hevi long wok bilong wanpela poroman i kamap gutpela tru na em i laik bai em i gat kain save o pasin samting olsem bilong dispela man o meri. Tasol sapos man i mangal long wok o save samting bilong narapela man, ating em bai i no ken helpim o mekim gut long dispela man, o ating em i laik bai samting nogut i painim em. Taim man i bel nogut olsem long narapela man, sampela taim em i no inap haitim i stap long bel. Ating dispela bai kirapim em long mekim nogut long dispela man. King Sol i laik kilim i dai Devit. Sampela taim em i tromoi spia long Devit “bilong kilim em i dai.”—1 Samuel 18:11; 19:10.
Tasol ating bai yu tok, ‘Mi no save bel nogut long man i gat ol gutpela samting.’ Tru ating dispela pasin i no bosim ol samting yu save mekim, tasol yumi olgeta i pilim pinis hevi bilong dispela pasin—ating yumi yet i bin bel nogut long narapela man i gat ol gutpela samting, o ol narapela man i bel nogut long yumi. Kwiktaim yumi save lukim dispela pasin i stap long ol narapela man, tasol taim yumi yet i gat dispela pasin, ating yumi no save lukim.
Pasin Bilong Mangal
Taim Baibel i stori long sin bilong ol man bilong graun, em i kamapim klia olsem planti taim dispela sin ol i mekim em pasin bilong mangal na bel nogut long man. Yu tingim stori bilong Kein na Abel? Dispela tupela pikinini bilong Adam na Iv ol i givim ofa long God. Abel em i mekim ofa, long wanem, em i man bilong bilip. (Hibru 11:4) Em i bilip olsem God inap kamapim tru gutpela laik bilong Em long dispela graun. (Stat 1:28; 3:15; Hibru 11:1) Na Abel i bilip olsem God bai givim gutpela pe long ol man i stap gut long em, olsem laip i stap oltaim long Paradais bihain bai kamap long graun. (Hibru 11:6) Olsem na God i soim Abel olsem em i amamas long ofa bilong Abel. Sapos Kein i laikim tru brata bilong em, em bai amamas long God i bin mekim gut long Abel. Tasol Kein i no mekim olsem. Em i “kros nogut tru.”—Stat 4:5.
God i wok long kirapim Kein long mekim gutpela pasin na bai em tu inap kisim blesing. Orait nau God i givim strongpela toksave long em olsem: “Sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.” (Stat 4:7) Tasol sori tru, Kein i no daunim dispela kros na bel nogut. Dispela i kirapim em long kilim i dai brata bilong em, em i stretpela man. (1 Jon 3:12) Kirap long dispela taim na i kam inap nau, ol liklik na bikpela pait i bin bagarapim planti milion milion manmeri. Wanpela bikpela buk (The World Book Encyclopedia) i tok, ‘sampela as bilong ol pait, em ol man i laik kisim sampela hap graun moa, o sampela mani moa, o bikpela strong bilong bosim ol man, o ol i laik i stap gutpela.’
Ol Kristen tru i no save insait long ol pait bilong dispela graun. (Jon 17:16) Tasol sori tru, sampela taim ol wan wan Kristen yet i save tok pait. Sapos ol narapela insait long kongrigesen i helpim tok pait bilong wanpela, dispela tok pait inap i go bikpela na nogutim man. Wanpela man bilong raitim Baibel, em Jems, em i askim ol wanbilip bilong em: “Wanem samting em i as bilong ol tok pait na kros i kamap namel long yupela?” (Jems 4:1) Bilong bekim dispela askim, em i tokaut olsem ol i mangal long ol samting bilong skin, na em i tok: “Yupela i save mangalim samting.” (Jems 4:2) Em nau, pasin bilong laikim tumas mani samting, em inap kirapim man long mangal na bel nogut long ol man i olsem ol i gat gutpela sindaun, winim ol. Olsem na Jems i givim toksave long yumi olsem “aigris na mangal” em i samting nogut.—Lukim Jems 4:5 long sta daunbilo.
Tasol dispela pasin bilong skelim as bilong mangal na bel nogut long man, em i helpim yumi olsem wanem? Em inap helpim yumi long save, yumi tu i gat sampela pasin olsem, na yumi mas wok long i stap gut wantaim ol narapela. Na tu, yumi inap pilim tingting bilong ol narapela, na isi long ol, na lusim rong bilong ol. Na bikpela samting tru, em i helpim yumi long pilim tru gutpela samting God i mekim bilong kisim bek yumi long dispela pasin bilong sin i stap long skin bilong yumi, na sapos em i no bin mekim pasin sori olsem, bai yumi lus olgeta.—Rom 7:24, 25.
Bihain i No Gat Dispela Pasin Moa
Long tingting bilong ol man, i olsem pasin bilong mangal na bel nogut long ol man i no ken pinis long graun. Wanpela man bilong raitim buk (Rom Landau) i tokaut olsem: ‘Inap planti handet handet yia pinis ol man i wok long kisim gutpela tingting na save, na ol saveman na ol man bilong stretim ol sik bilong tingting ol i bin mekim planti tok long dispela samting, tasol i no gat wanpela save ol i kisim bilong helpim man i save bel nogut long narapela man na dispela i bagarapim tingting bilong em. Olsem wanem? I gat wanpela dokta i bin oraitim wanpela man na em i no bel nogut moa long narapela man? Nogat, a?’
Tasol Baibel i tok promis long yumi inap kamap gutpela olgeta long nupela taim bai kamap long graun, na bai i no gat wanpela man i mekim moa dispela pasin nogut bilong bel nogut long narapela man o mangal. Na ol man i save mekim ol dispela pasin nogut, ol i no inap i stap na bagarapim bel isi bilong ol man long dispela nupela taim.—Galesia 5:19-21; 2 Pita 3:13.
Tasol i no olgeta pasin bilong bel nogut i no stret. Jehova i save bel nogut long pasin bilong lotuim ol narapela god, olsem na em i tok: “Mi no inap larim wanpela giaman god i senisim mi.” (Kisim Bek 34:14) Long dispela ves, Baibel i kolim wanpela tok Hibru em inap makim tupela kain pasin bilong bel nogut, em gutpela na nogut. Orait Baibel i tok wanem long pasin bilong bel nogut i stret long mekim? Na olsem wanem man inap daunim pasin i no stret bilong bel nogut long narapela man? Lukim ol stori i kamap bihain long dispela.