Yumi Mas Strong Long Lotu Bilong Jehova i Stap Klin
“Jehova, nem bilong em Bel Nogut, em i God bilong bel nogut long pasin bilong lotuim narapela god.”—KISIM BEK 34:14, NW.
JEHOVA i tok, em i “God bilong bel nogut long pasin bilong lotuim narapela god.” Ating yu kirap nogut long dispela tok, a? Long wanem, planti taim dispela tok “bel nogut” em i makim samting i no stret long mekim. Yumi save, nambawan bikpela pasin bilong Jehova em i pasin bilong “laikim ol arapela.” (1 Jon 4:8) Olsem na taim em i bel nogut long wanpela samting, yumi save, dispela i bilong helpim ol man long i stap gutpela. Long dispela stori bai yumi kisim save olsem, God i mas bel nogut long sampela samting na bai olgeta long graun na long heven ol inap i stap bel isi na i stap wanbel.
2 Sampela tok Hibru ol i tanim olsem “bel nogut,” ol i kamap 80 taim samting long hap bilong Ol Skripsa Hibru long Baibel. Inap olsem 40 taim samting, dispela tok Hibru i stori long God Jehova. Long buk bilong em G. H. Livingston i tok: “Taim ol i kolim dispela tok bilong makim God, dispela i no wanpela tingting nogut i kamap long bel na em i bel nogut, nogat; dispela tok i makim olsem Jehova i strong long ol man i mas lotuim em wanpela tasol.” (Buk The Pentateuch in Its Cultural Environment) Olsem na sampela taim Baibel i kolim dispela tok olsem: “Mi Bikpela [Jehova], mi no save larim wanpela giaman god i senisim mi.” (Esekiel 5:13) Na Baibel i kolim tu olsem “kros” na “i gat strongpela laik tru.”—Song 79:5; Aisaia 9:7.
3 Taim God i wokim man, em inapim man long bel nogut long sampela samting. Tasol taim man i pundaun na mekim sin, dispela i paulim pasin bilong bel nogut long ol samting. Tasol pasin bilong bel nogut long sampela samting em inap mekim gutpela wok. Em inap kirapim man long lukautim gut wanpela long famili na bai sampela pasin nogut i no ken paulim em. Na tu, i stret ol man i ken strong long lotuim Jehova wanpela tasol na ol i bel nogut long pasin bilong lotuim narapela god. (1 King 19:10) Olsem na long wanpela ves, Baibel i tanim tok Hibru olsem “strong long bihainim Bikpela [Jehova] tasol.”—2 King 10:16.
Bulmakau Gol
4 Yumi ken tingim samting i kamap taim ol Israel i kisim pinis Lo long maunten Sainai na bai yumi ken save, sampela taim pasin bilong bel nogut em i stret. Planti taim Jehova i bin toksave long ol Israel olsem ol i no ken lotuim ol god ol man yet i wokim. Em i tokim ol: “Mi Bikpela [Jehova], mi God bilong yupela, na mi no inap larim wanpela giaman god i senisim mi.” (Kisim Bek 20:5; skelim wantaim Kisim Bek 20:22, 23; 22:20; 23:13, 24, 32, 33.) Jehova i wokim kontrak wantaim lain Israel, na em i tok promis long mekim gut long ol na bringim ol i go long Graun Bilong Promis. (Kisim Bek 23:22, 31) Na ol i tok: “Mipela bai bihainim stret olgeta tok bilong Bikpela.”—Kisim Bek 24:7.
5 Tasol i no longtaim na ol Israel i mekim sin long God. Ol i kem yet long as bilong maunten Sainai. Moses i stap long maunten inap planti de pinis, na em i kisim sampela tok moa long God. Orait ol Israel i strong long brata bilong Moses, em Aron, i mas wokim wanpela god bilong ol. Em i bihainim tok bilong ol na em i wokim wanpela bulmakau long gol ol i givim long em. Ol i tok, dispela imis i makim Jehova. (Song 106:20) Long de bihain ol i wokim ol ofa na ol i wok long brukim skru long dispela imis. Bihain ol i kaikai na dring, na “ol man i go pilai long ol meri.”—Kisim Bek 32:1, 4, 6, 8, 17-19.
6 Ol Israel i kaikai na amamas yet na Moses i kam daun long maunten. Taim em i lukim pasin nogut ol i mekim, em i singaut: “Husat man i laik bihainim Bikpela, orait em i mas i kam long mi.” (Kisim Bek 32:25, 26) Lain Livai ol i kam bung long Moses, na em i tokim ol long kisim bainat na kilim i dai olgeta manmeri i mekim amamas na lotuim god giaman. Ol Livai i strong long lotu bilong Jehova i stap klin, olsem na ol i kirap kilim i dai inap olsem 3,000 brata bilong ol i bin mekim dispela rong. Na Jehova i helpim dispela wok na em i salim wanpela sik nogut bilong pinisim ol manmeri i bin abrusim bainat bilong ol Livai. (Kisim Bek 32:28, 35) Orait nau Jehova i kolim gen dispela lo: “Yu no ken brukim skru long narapela god, long wanem, Jehova, nem bilong em Bel Nogut, em i God bilong bel nogut long pasin bilong lotuim narapela god.”—Kisim Bek 34:14, NW.
God Bal Bilong Peor
7 Fopela ten yia bihain ol Israel i redi long i go insait long Graun Bilong Promis na ol naispela meri Moap na Midian ol i pulim planti man Israel long go kaikai na amamas wantaim ol. Ol dispela man i mas sakim pasin bilong poroman wantaim ol lain i save lotuim ol god giaman. (Kisim Bek 34:12, 15) Tasol nogat; ol i go bihainim ol dispela lain olsem “bulmakau ol i bringim i go long ples bilong kilim em i dai,” na ol i pamuk nabaut wantaim ol meri na bung wantaim ol long lotuim god Bal bilong maunten Peor.—Sindaun 7:21, 22; Namba 25:1-3.
8 Jehova i salim bikpela sik nogut bilong kilim i dai olgeta manmeri ol i insait long dispela pasin sem nogut bilong lotuim god giaman. Na ol Israel i no gat asua, God i tokim ol long kilim i dai ol brata bilong ol i gat asua. Pikinini man bilong wanpela bikman bilong Israel, nem bilong em Simri, em i bringim wanpela meri Midian i kam insait long haus sel bilong em bilong slip wantaim em. Orait wanpela pris i save pret long God, nem bilong em Finias, em i lukim dispela samting na em i kilim i dai tupela. Nau dispela bikpela sik nogut i pinis, na God i tokaut olsem: “Finias i kilim tupela, olsem na mi no moa kros long ol manmeri bilong Israel. Long wanem, em i no laik tru bai ol Israel i lotu long ol giaman god. Em i strong long ol i mas lotu long mi wanpela tasol, olsem mi yet mi laik ol i mekim.” (Namba 25:11) Tru, lain Israel olgeta i no bagarap, tasol samting olsem 23,000 ol i dai. (1 Korin 10:8) Ol i bin wet longtaim long go insait long Graun Bilong Promis, tasol nau ol i lus long dispela gutpela samting.
Em i Bilong Skulim Yumi
9 Tasol sori tru, i no longtaim na ol Israel i lusim tingting long ol dispela samting i bin kamap. Ol i no strong long lotuim Jehova wanpela tasol na bel nogut long pasin bilong lotuim narapela God, nogat. “Ol i wokim ol alta bilong giaman god na dispela i mekim God i kros.” (Song 78:58) Olsem na long yia 740 paslain long Krais, Jehova i larim ol Asiria i kam daunim tenpela lain bilong Israel na kisim ol i go kalabus. Orait, long yia 607 paslain long Krais, Jehova i larim wankain strafe i painim tupela lain bilong Juda taim ol Babilon i kam na bagarapim nambawan biktaun bilong ol, em Jerusalem. Planti ol i dai, na ol narapela i stap laip ol i go kalabus long Babilon. Olgeta Kristen bilong nau i mas tingim gut dispela samting!—1 Korin 10:6, 11.
10 Long nau, samting olsem 1,900 milion manmeri bilong graun ol i tok ol i Kristen. (1994 Britannica Book of the Year) Planti ol i bilong ol lotu i save mekim wok long ol piksa o imis na kruse long taim ol i lotu. Taim lain bilong Jehova bipo ol i bin mekim olsem, em i no larim ol—em i givim strafe long ol. Na Jehova i no ken larim ol lain bilong nau tu, em ol i tok ol i Kristen na ol i lotu long rot bilong ol piksa samting—strafe bai painim ol tu. Krais Jisas i tok: “God em i Spirit. Na ol man i lotu long em, ol i mas lotu long . . . Spirit na long pasin i tru.” (Jon 4:24) Na Baibel i givim strongpela toksave long ol Kristen long ol i mas klia long pasin bilong lotuim ol imis. (1 Jon 5:21) Ol man i lotuim ol imis, olsem god giaman, na ol i no tanim bel na lusim dispela pasin, ol bai insait long dispela lain ol i no inap i go insait long Kingdom bilong God.—Galesia 5:20, 21.
11 Yumi save, Kristen tru i no inap brukim skru long wanpela imis, tasol em i mas abrusim olgeta samting long tingting bilong God i olsem pasin bilong lotuim god giaman, na i no klin, na i gat rong. Baibel i tok: “Yupela i mas kilim i dai olgeta pasin bilong dispela graun i stap long bel bilong yupela . . . olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal . . . em i wankain olsem pasin bilong lotu long giaman god. God i redim pinis pe nogut bilong givim long olgeta man i save mekim ol dispela kain pasin.” (Kolosi 3:5, 6) Bilong bihainim dispela tok, yumi mas sakim olgeta kain pasin i gat sem, olsem pamuk samting. Olsem na yumi mas abrusim olgeta samting bilong amamas em i bilong kirapim ol laik nogut long bel olsem pamuk samting. Ol Kristen tru i no tingting long inapim ol dispela laik nogut bilong bel; ol i strong long lotu bilong God i stap klin.
Sampela Moa i Olsem Gutpela Piksa
12 Krais Jisas em i strong tru long lotu bilong Jehova i stap klin, na em i stap nambawan gutpela piksa bilong yumi. Long namba wan yia bilong em long wok bilong autim tok, em i lukim ol man bilong laikim tumas mani ol i wok bisnis insait long banis bilong haus bilong God. Ol Juda i bin kam long ol narapela hap, sampela taim ol i mas senisim mani bilong ol na bai mani i stret long givim olsem takis bilong haus lotu. Na ol i mas baim ol animal na pisin samting bilong mekim ofa olsem Lo bilong God i makim. Tasol ol man bilong bisnis i mas mekim ol dispela wok ausait long banis bilong haus lotu—ol i no ken mekim insait long banis. Na samting nogut moa ol i mekim, em ol i pulim nating mani long ol brata bilong ol na ol i mas tromoi bikpela mani long baim ol samting bilong mekim ofa. Jisas i bel nogut tru long dispela pasin bilong bagarapim lotu bilong Jehova, na em i kisim rop olsem baklain na rausim ol sipsip na bulmakau i go ausait. Na em i kapsaitim tebol bilong ol man bilong senisim mani na em i tok: “Yupela i no ken mekim haus bilong Papa bilong mi i kamap olsem haus bilong maket.” (Jon 2:14-16) Em nau, Jisas i truim tok bilong Song 69:9 i tok: “Mi laikim tru haus bilong yu, olsem na mi wok strong long mekim dispela haus i stap gut.”
13 Tripela yia bihain, Jisas i lukim gen ol dispela man bilong wokim bisnis ol i mekim wok bilong ol insait long haus bilong Jehova. Olsem wanem? Em bai rausim ol gen? Em i strong yet long ol man i mas lotuim God long klinpela pasin, olsem na em i rausim ol man i wokim bisnis long ol sipsip na pisin samting na ol man bilong baim tu. Na em i tokaut long as bilong samting em i mekim, em i tok: “Buk bilong God i gat tok olsem, ‘Haus bilong mi bai i stap haus bilong ol manmeri bilong olgeta kantri i ken i kam long en na beten long mi.’ Tasol yupela i mekim em i kamap olsem ples hait bilong ol stilman.” (Mak 11:17) Tru tumas, Jisas i stap gutpela piksa tru bilong yumi!
14 Nau Bikpela bilong yumi Krais Jisas em i stap King long heven, tasol pasin bilong em i no senis. (Hibru 13:8) Olsem long taim Jisas i stap long graun, long nau tu em i strong long lotu bilong Papa bilong em i stap klin. Dispela i kamap ples klia long ol tok em i givim long 7-pela kongrigesen olsem yumi lukim long Buk Kamapim Tok Hait. Bikpela truim bilong ol dispela tok i kamap nau long “de bilong Bikpela.” (KTH 1:10; 2:1–3:22) Long driman aposel Jon i lukim King Krais Jisas na “ai bilong en i lait olsem paia i lait strong moa.” (KTH 1:14) Dispela i makim olsem i no gat wanpela samting Krais i no inap lukim taim em i skelim pasin bilong ol kongrigesen bambai ol i ken i stap klin na mekim wok bilong Jehova. Ol Kristen bilong nau i mas tingim gut toksave bilong Jisas long ol i no ken mekim wok bilong tupela bos wantaim—God na mani. (Matyu 6:24) Jisas i tokim ol manmeri bilong kongrigesen Laodisia em ol i laikim tumas mani samting: “Yu no hatpela tru na yu no kolpela tru. Olsem na mi laik trautim yu long maus bilong mi. . . . Olsem na yu mas strong long stretim pasin bilong yu, na yu mas tanim bel.” (KTH 3:14-19) Long toktok na pasin bilong ol, ol elda Kristen i mas helpim ol wanbilip long abrusim pasin bilong laikim tumas mani samting, em i olsem umben bilong kalabusim ol. Na ol elda i mas lukautim ol sipsip na bai pasin pamuk na ol narapela kain pasin sem bilong dispela graun i no ken i kam insait na bagarapim kongrigesen. Na lain bilong God i no ken larim sampela pasin bilong Jesebel i stap insait long kongrigesen.—Hibru 12:14, 15; KTH 2:20.
15 Aposel Pol i bihainim pasin bilong Krais. Bilong lukautim ol Kristen i baptais nupela yet na bai ol pasin nogut i no ken bagarapim ol long ol samting bilong spirit, Pol i tokim ol: “Mi gat strongpela laik long yupela i mas bihainim tru Krais.” (2 Korin 11:2) Paslain long dispela, Pol i strong tru long lotu bilong God i stap klin, na dispela i kirapim em long tokim dispela kongrigesen long rausim wanpela man i bin pamuk na i no tanim bel, na em inap long bagarapim klinpela kongrigesen. Ol dispela tok spirit holi i kirapim Pol long raitim, em i bin helpim tru ol elda bilong nau em ol i wok strong tru long lukautim ol 75,500 kongrigesen bilong ol Witnes Bilong Jehova bambai ol i ken i stap klin.—1 Korin 5:1, 9-13.
Bel Nogut Bilong God i Helpim Lain Bilong Em
16 Taim God i givim strafe long lain Juda na em i larim ol i go kalabus long Babilon, ol narapela lain i tok bilas long ol. (Song 137:3) Ol Idom i bel nogut na birua long ol, olsem na ol i helpim ol Babilon long bagarapim lain bilong God, na Jehova i tingim dispela samting ol i mekim. (Esekiel 35:11; 36:15) Taim ol Juda i stap kalabus ol i tanim bel. Orait taim 70 yia i pinis, Jehova i bringim ol i go bek long kantri bilong ol.
17 Pastaim lain Juda ol i gat bikpela hevi tru. Jerusalem na haus lotu bilong en i bagarap i stap. Tasol ol narapela lain i stap nabaut ol i strong long pasim wok bilong ol long sanapim gen haus bilong Jehova. (Esra 4:4, 23, 24) Orait, Jehova i ting olsem wanem long dispela? Baibel i tok: “God i tok olsem, ‘Mi gat bikpela sori long ol manmeri bilong Jerusalem, em biktaun bilong mi, na mi tingting planti long ol. Bipo mi kros liklik long ol manmeri bilong mi, na tokim ol man bilong ol arapela lain long kam mekim save long ol. Orait ol i kam, tasol ol i no bagarapim ol manmeri bilong mi liklik tasol. Nogat. Ol i winim mak na bagarapim ol nogut tru. . . . Tasol mi belhat nogut long ol. Olsem na nau mi kam bek long Jerusalem bilong marimari long ol manmeri bilong en. Na bai ol i wokim haus bilong mi gen.’ ” (Sekaraia 1:14-16) Jehova i truim dispela tok promis na ol i wokim gen haus bilong em na taun Jerusalem.
18 Wankain samting i bin painim lain Kristen tru bilong nau. Long taim bilong Namba Wan Pait, Jehova i laik stretim lain bilong em, long wanem, ol i insait liklik long ol samting bilong dispela pait. (Jon 17:16) God i larim ol gavman i putim bikpela hevi long ol, na ol pris pasto bilong ol misin ol i amamas long dispela hevi i painim ol. Na ol dispela misin yet i go pas long kirapim ol lain politik long tambuim wok bilong ol Sumatin Bilong Baibel, em nem bilong ol Witnes Bilong Jehova long dispela taim bipo.—KTH 11:7, 10.
19 Tasol Jehova i bel nogut long ol i laik bagarapim lotu bilong em, na bihain long pait, long 1919, em i lukim lain bilong em i tanim bel na em i orait gen long ol na mekim gut long ol. (KTH 11:11, 12) Olsem na lain bilong autim tok bilong Jehova i go bikpela tru; long 1918 ol inap olsem 4,000 tasol, na long nau ol inap olsem 5 milion. (Aisaia 60:22) Klostu nau na Jehova bai mekim sampela bikpela samting bilong kamapim long ples klia olsem em i strong long lukautim klinpela lotu bilong em.
Ol Bikpela Samting God Bai Mekim
20 Inap planti handet yia ol lotu i gat nem Kristen ol i bihainim pasin bilong ol Juda i lusim Jehova na kisim ol bilip giaman, na ol i kirapim Jehova long bel nogut. (Esekiel 8:3, 17, 18) Klostu nau God Jehova bai kirap na em bai putim narapela kain tingting long bel bilong sampela lain insait long Yunaitet Nesen. Dispela tingting bai kirapim ol dispela lain politik long bagarapim ol lotu i gat nem Kristen na ol narapela lotu giaman. (KTH 17:16, 17) Taim dispela kot bilong God i painim ol, ol manmeri i lotu tru long Jehova ol bai abrusim dispela bikpela strafe nogut. Ol bai bihainim tok bilong ol lain bilong heven, em ol i tok: “Yumi litimapim nem bilong God! . . . Dispela bikpela pamukmeri [em ol lotu giaman] em i bin bagarapim olgeta manmeri bilong graun long pasin pamuk bilong en [olsem ol bilip giaman na pasin bilong en long helpim ol lain politik nogut]. Olsem na God i bekim pe nogut long em. Dispela meri em i gat asua bilong kilim i dai ol wokman bilong God, na God i bekim pinis dispela asua bilong em.”—KTH 19:1, 2.
21 Orait, taim olgeta lotu giaman i pinis, wanem samting bai kamap? Satan bai kirapim ol gavman long wokim rot bambai ol i ken mekim pait long lain bilong Jehova i stap long olgeta hap. God tru bai mekim wanem samting taim Satan i traim long pinisim lotu tru long graun? Esekiel 38:19-23 i tokim yumi: “Belhat bilong mi [Jehova] bai i kamap bikpela tru . . . Mi bai mekim olkain sik i kamap long em [Satan] na mekim pait i kamap long em bilong mekim save long em. Bai mi kapsaitim bikpela ren na ren ais na ol hatpela ston i gat paia, na ol dispela samting bai i pundaun antap long em na long ol soldia i bin kam wantaim em. Long dispela pasin bai mi soim olgeta lain manmeri olsem, mi gat bikpela strong na pasin bilong mi i gutpela na stretpela olgeta. Na bai ol i save tru long mi. Na bai ol i save gut olsem, mi yet mi Bikpela [Jehova].”—Lukim tu Sefanaia 1:18; 3:8.
22 Em nau, yumi save Nambawan King bilong heven na graun i tingim tru ol man i lotu tru long em, na em i bel nogut long ol lain i laik bagarapim ol! Dispela save i mekim gut bel bilong yumi. Yumi pilim tru dispela gutpela pasin bilong em long mekim gut long yumi, olsem na yumi mas strong long lotu bilong God Jehova i stap klin. Yumi mas strong na wok yet long autim gutnius na wetim dispela bikpela de Jehova bai litimapim na mekim holi gutpela nem bilong em.—Matyu 24:14.
Sampela Tok Bilong Tingim Gut
◻ Olsem wanem yumi ken strong long lotu bilong Jehova i stap klin?
◻ Pasin bilong ol Israel bilong bipo inap skulim yumi olsem wanem?
◻ Yumi mas mekim wanem na bai yumi no kirapim Jehova long bel nogut?
◻ Olsem wanem God na Krais i kamapim klia olsem ol i strong long lotu bilong God i stap klin?
[Askim Bilong Stadi]
1. Wanem nambawan bikpela pasin bilong God? Olsem wanem dispela pasin i ken stret wantaim narapela pasin bilong em long bel nogut long sampela samting?
2. Wanem sampela pasin moa bilong tanim sampela tok Hibru bilong dispela tok “bel nogut”?
3. Sampela taim pasin bilong bel nogut inap mekim wanem gutpela wok?
4. Insait long Lo God i bin givim long ol Israel, em i kolim wanem bikpela lo bilong bel nogut i stret long mekim?
5, 6. (a) Olsem wanem ol Israel i mekim bikpela rong taim ol i kem long maunten Sainai? (b) Long Sainai, Jehova wantaim ol man i stap gut long lotuim em ol i mekim wanem na ol i kamapim bel nogut bilong ol i stret long mekim?
7, 8. (a) Olsem wanem ol Israel i pundaun na mekim pasin nogut tru bilong lotuim god giaman Bal bilong maunten Peor? (b) Bikpela sik nogut Jehova i salim, em i pinis olsem wanem?
9. Ol manmeri bilong Israel na Juda i no strong long lotu bilong Jehova i stap klin, olsem na wanem samting i painim ol?
10. Wanem samting bai painim ol man i lotuim ol imis na ol i no tanim bel?
11. Maski Kristen i no brukim skru long wanpela imis, olsem wanem bai em i gat asua long lotuim god giaman? Wanem samting bai helpim yumi long abrusim kain pasin i olsem lotuim god giaman? (Efesus 5:5)
12, 13. Jisas i bin mekim wanem na em i kamapim klia olsem em i strong tru long lotu bilong Jehova i stap klin?
14. Pasin bilong Jisas, em i strong long lotu bilong Jehova i stap klin, dispela i mas mekim wanem long yumi?
15. Olsem wanem Pol i bihainim pasin bilong Jisas na em tu i strong long lotu bilong Jehova i stap klin?
16, 17. (a) Taim Jehova i givim strafe long lain Juda bilong bipo, ol narapela lain i mekim wanem long ol? (b) Taim ol Juda i kalabus inap 70 yia pinis, Jehova i mekim wanem na em i kamapim klia olsem em i laikim tumas Jerusalem?
18. Long taim bilong Namba Wan Pait, wanem samting i painim ol Kristen tru?
19. Kirap long 1919, olsem wanem Jehova i kamapim klia olsem em i strong long lotu bilong em i stap klin?
20. Klostu nau God bai mekim wanem na em bai kamapim klia bel nogut bilong em long ol lain i birua long klinpela lotu bilong em?
21. (a) Satan wantaim lain bilong em long graun ol bai mekim wanem long taim ol lotu giaman i pinis? (b) God bai kirap na mekim wanem?
22. Olsem wanem yumi ken kamapim klia olsem yumi strong long lotu bilong Jehova i stap klin?
[Blok long pes 12]
Man i Laikim Ol Narapela, Em i No Bel Nogut Long Man
WANPELA saveman bilong Baibel long bipo, em Albert Barnes, em i tok: “Dispela [bel nogut] em wanpela pasin i save kamap ples klia planti taim long ol man nogut, na i kamapim klia olsem pasin bilong yumi man i nogut tru.” Na em i tok moa: “Sapos wanpela man inap painim as bilong olgeta bikpela pait na ol kros na ol samting ol man bilong graun i pasim tok long mekim—na olgeta samting ol man i tok ol i Kristen ol i gat tingting long mekim na i nogutim lotu bilong ol na mekim ol i kamap olsem man i gat tingting bilong dispela graun—sapos man inap painim as bilong ol dispela samting, ating em bai kirap nogut long save, as bilong planti bilong ol dispela pasin, em pasin mangal. Yumi bel hevi long ol narapela man i gat planti samting, winim yumi; yumi laik kisim ol gutpela samting bilong ol narapela, tasol ol i no bilong yumi; orait dispela i kirapim yumi long mekim sampela samting . . . na bai ol i no ken amamas long ol samting ol i holim, o yumi mekim sampela samting na bai yumi yet i ken kisim, o bilong soim olsem ol i no gat planti mani samting olsem ol man i ting ol i gat. . . . Long dispela rot yumi inapim laik bilong pasin mangal i stap long bel bilong yumi.”—Rom 1:29; Jems 4:5.
Orait nau Barnes i mekim wanpela tok long pasin bilong laikim tru ol narapela, em man i gat dispela pasin “em i no save bel nogut long ol man i gat planti samting.” (1 Korin 13:4) Em i tok: “Man i laikim tru ol narapela, em i no save mangalim amamas bilong ol; em i amamas long ol i stap gutpela; na taim . . . amamas bilong ol i go bikpela, orait man i laikim tru ol narapela em i amamas long dispela samting. Em i no laik daunim amamas bilong ol; em i no laik mekim na bai ol i sem long ol gutpela samting ol i holim; . . . em i no ken toktok planti o tok em i no gat ol gutpela samting olsem. . . . Sapos yumi laikim tru ol narapela—sapos yumi amamas long lukim ol yet i amamas, orait yumi no ken mangal long ol gutpela samting bilong ol.”
[Piksa long pes 10]
Finias i strong long lotu bilong Jehova i stap klin