Yu Save Skelim Yu Yet Wantaim Ol Narapela?
ATING yumi olgeta i bin bungim pinis wanpela man o meri i olsem em i winim tru yumi. Ating skin bilong em i naispela tru, ol narapela i laikim em, em i kisim kwik save, o ol mak bilong em long skul i gutpela. Ating sampela i gat gutpela helt moa, ol i amamas tru long wok skin bilong ol, wok bilong ol i save kamap gutpela, o ol i gat planti pren. Ating sampela i gat planti mani na kago, nupela ka, o i luk olsem ol i amamas moa winim yumi. Olsem wanem? Taim yumi lukim kain man olsem, yumi save skelim yumi yet wantaim ol? I olsem i no gat rot bilong abrusim dispela pasin bilong skelim yumi yet wantaim ol narapela? I gat wanem as na i gutpela sapos Kristen i abrusim dispela pasin? Na olsem wanem yumi inap i stap amamas, tasol yumi no skelim yumi yet wantaim narapela?
Bilong Wanem na Long Wanem Taim
Wanpela samting ol man i ting em i as na ol man i save skelim ol yet wantaim ol narapela em long wanem dispela i helpim ol long i stap amamas o i mekim ol i amamas moa long ol yet. Planti taim ol man i amamas long save olsem ol i mekim gutpela wok wankain olsem ol wanlain bilong ol. Narapela as na yumi save skelim yumi yet wantaim ol narapela em yumi laik daunim pasin bilong tupela tingting yumi holim long yumi yet, na yumi laik save long ol samting yumi inap mekim na ol samting yumi no inap mekim. Yumi save skelim ol samting ol narapela i bin mekim. Sapos long planti samting ol i olsem yumi na ol i bin winim sampela mak, yumi bai pilim olsem yumi tu inap winim sampela mak olsem.
Planti taim ol man i skelim ol yet wantaim sampela man i wankain long ol—olsem meri wantaim meri na man wantaim man, wantaim ol wankrismas, wantaim ol man i gat wankain sindaun, na ol man ol i save long ol. Ating yumi no skelim yumi yet wantaim wanpela i narapela kain tru long yumi. Olsem: Wanpela yangpela meri bai i no skelim em yet wantaim wanpela meri i gat nem long soim ol stail klos long ol so samting, ating em bai skelim em yet wantaim ol wanskul, na dispela stailmeri bai i no skelim em yet wantaim ol narapela yangpela meri nating.
Long wanem ol samting ol man i save skelim ol yet wantaim ol narapela? Olgeta samting ol man i holim o olgeta samting ol man i ting em i bikpela samting em inap i stap olsem as na man i skelim em yet wantaim narapela—olsem save bilong man, naispela skin, mani kago, na klos. Tasol planti taim yumi save skelim ol samting yumi laikim. Ating yumi no wari olsem wanpela pren bilong yumi i bungim pinis planti stem, sapos yumi yet i no gat laik long bungim ol stem.
Pasin bilong man long skelim em yet wantaim narapela dispela inap mekim kain kain samting long man, em bai bel gut o bel hevi, em bai laikim dispela man na i gat laik long stap olsem em o em i no amamas long dispela man na i birua long em. Sampela bilong ol dispela tingting inap bagarapim man, na ol i no stret wantaim ol pasin Kristen.
Resis Wantaim Narapela
Planti man i save skelim ol yet wantaim narapela ol i gat pasin bilong resis na i laik “winim” ol. Ol i laik stap gutpela moa winim narapela, na ol i no amamas sapos ol i no pilim olsem ol i winim pinis narapela. Ol man i no save amamas long poroman wantaim kain man olsem. Pasin bilong pren wantaim kain man olsem i no kamap gutpela, na ol i no pas gut wantaim kain man olsem. Kain man olsem i no gat pasin daun, na tu, ol i no save bihainim tok bilong Baibel long laikim tru narapela, long wanem, pasin bilong ol i save mekim na ol narapela i pilim olsem ol i samting nating na i daunim ol.—Matyu 18:1-5; Jon 13:34, 35.
Pasin bilong mekim ol narapela i pilim olsem ol i “samting nating” dispela i save mekim nogut long ol. Wanpela meri bilong raitim ol buk i tok, “sapos yumi no kisim samting yumi laik kisim na yumi lukim olsem ol man i gat wankain sindaun olsem yumi ol i bin kisim dispela samting, bai yumi bel hevi moa.” Olsem na pasin bilong resis wantaim narapela i kirapim pasin bilong jeles, na pasin bilong bel nogut, na i no amamas long narapela long ol samting em i holim, gutpela sindaun bilong em, na namba na nem samting em i holim. Dispela i kirapim bikpela resis moa i go i go. Baibel i tambuim pasin bilong “sutim bel bilong ol arapela long kirapim pait.”—Galesia 5:26.
Long rot bilong daunim gutpela wok bilong ol narapela, ol man i jeles i traim long apim ol yet. Dispela pasin i luk olsem i liklik samting nating, tasol sapos man i no luksave na bosim dispela pasin, em inap kamapim ol rong i nogut tru. Orait nau yumi ken toktok long tupela stori bilong Baibel we ol man i bin mekim pasin jeles.
Long taim Aisak i sindaun wantaim ol Filistia, em i kisim “planti sipsip na bulmakau na wokboi, olsem na ol Filistia i bel nogut long em.” Olsem na ol i kisim graun na pulimapim ol hul wara em bipo papa bilong Aisak, em Abraham, i bin wokim, na king bilong ol i askim Aisak long lusim dispela hap. (Stat 26:1-3, 12-16) Pasin jeles bilong ol i nogut tru na i bagarapim ol narapela. Ol i bel nogut long lukim olsem Aisak i kisim planti samting taim em i stap namel long ol.
Sampela handet yia bihain, Devit i kisim nem long winim planti pait. Ol meri bilong Israel i litimapim ol pait em i winim na ol i singsing: “Sol i kilim planti tausen man. Na Devit i kilim planti planti tausen.” Tru ol i litimapim nem bilong Sol, tasol em i pilim olsem pasin bilong ol long litimapim moa nem bilong Devit dispela i daunim em, na em i jeles. Kirap long dispela taim em i bel nogut long Devit. Na i no longtaim na em i traim long kilim i dai Devit long namba wan taim. Man! Pasin nogut tru inap kamap long pasin jeles, a?—1 Samuel 18:6-11.
Olsem na sapos pasin bilong skelim yumi yet wantaim narapela—ol wok na ol gutpela samting bilong ol—i kirapim pasin jeles o pasin bilong resis wantaim narapela, yumi mas lukaut! Ol dispela kain tingting nogut i no stret wantaim tingting bilong God. Tasol paslain long yumi skelim olsem wanem yumi ken sakim kain tingting olsem, yumi laik skelim narapela samting em inap kirapim yumi long skelim yumi yet wantaim narapela.
Skelim Yumi Yet na Amamas
‘Olsem wanem? Mi gat save, naispela skin, gutpela helt, mi inap mekim gut wok, na ol narapela i save rispektim mi na laikim mi? Mi gat ol dispela pasin inap long wanem mak?’ Yumi no save sanap long ai bilong wanpela glas na kamapim ol dispela askim. Tasol olsem wanpela meri bilong raitim ol buk i tok, “planti taim ol kain askim olsem i save kamap long tingting bilong yumi na yumi laik kisim ol bekim bilong ol dispela askim.” Man i no save gut long ol samting em inap long mekim, ating em i save tingim ol dispela samting, tasol dispela i no kirapim em long kisim tingting long resis wantaim narapela o jeles long narapela. Em i save skelim em yet tasol. I no gat rong long mekim olsem. Tasol bilong bihainim stretpela tingting long mekim olsem, yumi no ken skelim yumi yet wantaim narapela.
Yumi olgeta i gat narapela narapela save, na i gat kain kain as bilong dispela. Long olgeta taim bai i gat sampela we i luk olsem ol i winim yumi. Olsem na yumi no ken kirap skelim ol na jeles, mobeta yumi skelim ol samting yumi mekim wantaim ol stretpela lo bilong God, em ol dispela lo i stiaim gut yumi long ol samting i stret na i no stret. Jehova i tingim yumi wan wan. Em i no mas skelim yumi wantaim narapela. Aposel Pol i givim gutpela tok long yumi olsem: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”—Galesia 6:4.
Sakim Pasin Jeles
Olgeta man i gat sin, olsem na oltaim yumi mas wok strong tru long sakim pasin bilong jeles. Yumi olgeta i save olsem Baibel i tok “[yumi] mas strong long litimapim nem bilong ol arapela,” tasol i hatwok long mekim olsem. Pol i luksave long ol laik bilong em long mekim sin. Bilong sakim dispela pasin nogut, em i mas “paitim tru bodi bilong [em] na mekim [bodi] i bihainim laik bilong [em].” (Rom 12:10; 1 Korin 9:27) Long yumi, dispela inap makim olsem yumi mas sakim ol tingting bilong resis wantaim narapela, na kisim ol gutpela tingting. Yumi mas beten, askim Jehova long helpim yumi na yumi “no ken ting save na pasin bilong [yumi] i winim ol arapela.”—Rom 12:3.
Pasin bilong stadi long Baibel na tingim tingim long bel, dispela tu inap helpim yumi. Olsem: Yumi ken tingim gutpela Paradais God i bin tok promis long kamapim long bihain. Long dispela taim olgeta man bai stap bel isi, ol i gat gutpela helt, planti kaikai, gutpela haus, na gutpela wok. (Song 46:8, 9; 72:7, 8, 16; Aisaia 65:21-23) Yu ting bai i gat wanpela man i gat laik long resis wantaim narapela? Nogat, a? Bai i no gat as long mekim olsem. Tru, Jehova i no kamapim yet olgeta samting long i stap bilong ol man long dispela taim, tasol yumi ken ting olsem olgeta manmeri bai inap long mekim ol wok em ol i gat laik long mekim. Ating sampela bai stadi long ol sta samting, na sampela bai wokim ol naispela laplap. I no gat as long narapela bai jeles long narapela, a? Wok ol narapela i mekim bai kirapim tingting bilong yumi, ol bai i no mekim yumi bel hevi. Kain tingting olsem bai i no stap moa.
Sapos yumi laikim kain laip olsem, gutpela yumi wok strong long kisim wankain tingting long nau, a? Long nau yumi amamas long i stap long paradais bilong spirit, na yumi fri long planti hevi ol man bilong dispela graun i mas karim. Bai i no gat pasin bilong resis wantaim narapela long nupela taim God bai kamapim, olsem na i gat as na yumi mas sakim dispela pasin long nau.
Olsem na yu ting i gat rong long skelim yumi yet wantaim ol narapela? O i gat taim na i stret yumi mekim olsem?
I Stret Yumi Skelim Yumi Yet Wantaim Narapela
Planti taim, pasin bilong ol man long skelim ol yet wantaim narapela i kamapim bel hevi o man i no amamas, tasol dispela samting i no mas kamap. Tingim tok aposel Pol i mekim long dispela samting, em i tok: “Yupela i mas bihainim pasin bilong ol man i bilip tru na i no les kwik, na ol i kisim olgeta samting bipo God i tok long givim long ol pikinini bilong em.” (Hibru 6:12) Sapos yumi wok long kisim pasin bilong ol gutpela wokman bilong Jehova long pastaim dispela inap kamapim gutpela samting. Tru, bilong kisim ol gutpela pasin olsem sampela taim yumi mas skelim yumi yet wantaim ol. Tasol dispela i ken helpim yumi long save long ol pasin yumi ken bihainim na ol samting yumi mas stretim.
Tingim Jonatan. Yumi ken tok, i gat as long em i stap jeles. Em i namba wan pikinini man bilong King Sol bilong Israel, na ating bipo em i ting em bai kamap king, tasol Jehova i makim wanpela man i yangpela long em inap 30 yia, em yangpela Devit. Tasol Jonatan i no bel nogut, em i mekim gutpela pasin pren na i sapotim tru Devit em i dispela king Jehova i bin makim. Jonatan em i man bilong tingim tru ol samting bilong spirit. (1 Samuel 19:1-4) Em i no kisim pasin bilong papa bilong em, husat i tingim Devit olsem birua bilong em, nogat. Jonatan i luksave olsem Jehova i bin stiaim ol samting na em i daun long laik bilong Em; Jonatan i no skelim em yet wantaim Devit na i askim: “Bilong wanem Jehova i makim Devit na i no makim mi?”
Namel long ol wanlain Kristen, yumi no ken ting olsem ol narapela i laik winim yumi o kisim ples bilong yumi. Pasin bilong birua birua i no stret. Ol strongpela Kristen i gat pasin bilong wok gut wantaim, pasin wanbel, na ol i laikim tru narapela, na i no pasin bilong resis wantaim narapela. Saveman Francesco Alberoni i tok: “Pasin laikim i bikpela birua bilong pasin jeles. Sapos yumi laikim tru narapela, yumi laik em i kisim ol gutpela samting, na yumi amamas sapos wok bilong em i kamap gutpela na em i amamas.” Olsem na sapos ol i makim narapela Kristen long kongrigesen long mekim sampela wok, yumi mekim gutpela pasin sapos yumi amamas long dispela samting. Jonatan i bin mekim kain pasin olsem. Olsem Jonatan, bai yumi kisim blesing sapos yumi sapotim ol gutpela wokman bilong God i go pas long wok long oganaisesen bilong Jehova.
I no gat rong long litimapim gutpela pasin bilong ol wanbilip Kristen. Sapos long pasin i stret yumi skelim yumi yet wantaim narapela dispela inap kirapim yumi long bihainim pasin bilong bilip bilong ol. (Hibru 13:7) Tasol sapos yumi no was gut, pasin bilong bihainim pasin bilong narapela inap kirapim pasin bilong resis wantaim em. Sapos yumi pilim olsem man yumi save laikim i winim yumi na yumi traim long daunim em na sutim tok long em, pasin bilong bihainim pasin bilong narapela inap kamapim pasin jeles.
I no gat wanpela sinman bilong graun em inap i stap olsem gutpela piksa tru. Olsem na Baibel i tok: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” Na tu, “Krais . . . i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (Efesus 5:1, 2; 1 Pita 2:21) Ol pasin bilong Jehova na Jisas—pasin laikim bilong ol, pasin sori, pilim tru hevi bilong narapela, na pasin daun—em ol pasin yumi mas wok strong long bihainim. Yumi mas lusim haptaim bilong skelim yumi yet wantaim ol pasin na laik bilong ol, na pasin bilong ol long mekim ol samting. Sapos yumi mekim olsem, dispela inap mekim na i stap bilong yumi bai kamap gutpela na i gat as bilong en, em bai stiaim gut yumi, bai yumi stap bel isi, na em inap helpim yumi long kamap strongpela Kristen man na meri. (Efesus 4:13) Sapos yumi wok strong long bihainim gutpela pasin bilong ol, ating dispela bai helpim yumi na yumi no skelim yumi yet wantaim ol narapela man.
[Piksa long pes 28, 29]
King Sol i jeles long Devit
[Piksa long pes 31]
Jonatan i no tingim yangpela Devit olsem birua bilong em