‘Pundaun, Tasol i No Bagarap’
EM STORI BILONG ULF HELGESSON
Long Julai 1983, ol dokta i sanap klostu long mi na ol i kirap nogut na tok: “Em i kirap pinis!” Ol i bin rausim wanpela buk nogut long bun bilong baksait, longpela bilong buk em olsem 12-pela sentimita, na ol i wok inap 15 aua long rausim. Olgeta hap skin bilong mi i dai.
SAMPELA de bihain, ol i kisim mi i go long wanpela haus sik longwe liklik inap 60 kilomita long ples bilong mi, em Halsingbok, long hap saut bilong Swiden. Nau mi mas lain long mekim wanpela kain eksasais bilong strongim bek skin. Dokta bilong givim eksasais long man em i tok, dispela eksasais bai givim hatwok tru long mi. Tasol mi laik kirap kwik long lain, long wanem, mi laik tru bai mi inap wokabaut gen. Mi strong strong na mi mekim eksasais inap 5-pela aua long olgeta de, olsem na skin bilong mi i wok long kamap gutpela hariap.
Wanpela mun bihain wasman bilong raun em i kam lukim kongrigesen bilong mipela, na maski mi stap longwe, em wantaim ol narapela elda Kristen long kongrigesen ol i kam long haus sik na mekim miting bilong ol elda insait long rum bilong mi. Bel bilong mi i amamas tru long dispela pasin bilong ol long laikim tru ol brata! Taim miting i pinis, ol nes i givim ti na sanwis long ol.
Pastaim ol dokta i kirap nogut long skin bilong mi i wok long kamap strong. Inap 3-pela mun bihain mi inap sindaun long wilsia bilong mi, na mi inap sanap inap wanpela minit samting. Mi amamas, na mi tingting strong long mi bai wokabaut gen. Famili wantaim ol wanlain Kristen bilong mi ol i kam lukim mi na ol i strongim tru bel bilong mi. Sampela taim ol dokta i larim mi i go bek long haus na i stap inap liklik taim.
Hevi i Kamap
Tasol bihain long dispela, skin bilong mi i no wok moa long kamap gutpela. Bihain dokta bilong givim eksasais long mi em i tokaut olsem: ‘Skin bilong yu bai stap olsem; em i no ken kamap gutpela moa.’ Nau ol i tingting long strongim skin bilong mi na bai mi yet inap raun long wilsia. Mi tingting: Wanem samting bai painim mi nau? Olsem wanem long meri bilong mi? Ol dokta i bin katim em bikpela na mi mas helpim em long ol wok samting. Nogut mi mas i stap olgeta long wanpela haus sik bilong lukautim ol kain man olsem mi.
Mi bel hevi stret. Strong bilong mi i pinis, na bel bilong mi tu i no strong moa. Planti de i go pinis na mi stap tasol. Skin bilong mi i dai, na i olsem tingting na bel tu i dai, na long ol samting bilong spirit tu i olsem mi dai. I olsem ol i ‘paitim mi na mekim mi i pundaun.’ Oltaim mi bin ting olsem mi strong long ol samting bilong spirit. Mi bilip strong tru long Kingdom bilong God. (Daniel 2:44; Matyu 6:10) Mi bilip tru long tok bilong Baibel olsem olgeta sik na bagarap long skin bai orait gen long stretpela nupela taim God bai kamapim, na skin bilong olgeta man bai kamap gutpela olgeta. (Aisaia 25:8; 33:24; 2 Pita 3:13) Nau mi pilim olsem i no skin bilong mi tasol i dai—mi dai tu long ol samting bilong spirit. Mi pilim olsem mi ‘bagarap olgeta.’—2 Korin 4:9.
Tasol pastaim mi laik stori liklik long i stap bilong mi wantaim famili bilong mi long pastaim.
Famili i Stap Amamas
Mama i bin karim mi long 1934, na mi no save sik. Long 1950 samting mi bin bungim Ingrid, na long 1958 mitupela i marit na mipela i sindaun long taun Astasant long sentral Swiden. Orait, long 1963 mitupela i kirap stadi wantaim ol Witnes Bilong Jehova long Baibel. Long dispela taim mipela i gat 3-pela liklik pikinini—Ewa, Björn, Lena. I no longtaim na famili olgeta bilong mipela i stadi na ol i wok long kamap strong na kisim save long ol tok i tru bilong Baibel.
Bihain liklik long taim mipela i bin kirap long stadi, mipela i lusim dispela ples na i go sindaun long Halsingbok. Long dispela hap mi wantaim meri bilong mi i dediketim laip bilong mipela long Jehova, na long 1964 mipela i kisim baptais. Mipela i amamas moa yet taim namba wan pikinini meri, Ewa, i kisim baptais long 1968. Inap 7-pela yia bihain, long 1975, Björn na Lena tu i kisim baptais, na long yia antap ol i makim mi long kamap elda insait long kongrigesen Kristen.
Wok mani bilong mi i helpim mi long lukautim gut famili bilong mi long ol samting bilong skin. Na amamas bilong mipela i go bikpela tru taim Björn na Lena i kirap mekim wok bilong God long olgeta de. I no longtaim na ol i singautim Björn i go wok long brens-ofis bilong ol Witnes Bilong Jehova long Aboga. I olsem ol gutpela samting tasol i painim mipela. Orait, long 1980 mi kirap pilim pen bilong dispela buk em bihain ol dokta i rausim long 1983.
Daunim Sik Bilong Spirit
Taim ol dokta i tok mi no inap wokabaut moa, bel bilong mi i bagarap olgeta. Orait, olsem wanem mi kisim bek strong bilong spirit? Mi ting bai i hatwok, tasol nogat. Mi kisim Baibel na mi kirap kaunim. Mi kaunim kaunim i go na mi wok long kisim strong bilong spirit. Na bikpela samting, em mi pilim tru ol tok Jisas i bin mekim long maunten. Mi kaunim kaunim planti taim na mi wok long tingim.
Nau mi kisim bek amamas bilong mi. Taim mi kaunim na tingim tingim ol tok bilong Baibel, nau mi kirap tingim ol samting mi gat rot long mekim—mi no tingim ol samting i laik pasim rot bilong mi. Mi kisim bek laik bilong autim tok i tru bilong Baibel long ol man, na bilong inapim dispela laik, mi autim tok long ol lain bilong haus sik na ol narapela mi bungim ol. Famili bilong mi i sambai long mi, na ol i lain long pasin bilong lukautim mi. Bihain mi inap lusim haus sik.
Em nau, mi kam bek pinis long haus bilong mi. Long mipela olgeta, em i taim bilong amamas tru! Famili bilong mi i wokim lista bilong ol wok ol i mas mekim na wok bilong lukautim mi tu. Pikinini man bilong mi, em Björn, i lusim wok long brens-ofis bilong ol Witnes Bilong Jehova na em i kam bek long haus bilong helpim ol long lukautim mi. Pasin bilong famili long laikim mi tumas na tingim mi, dispela i strongim tru bel bilong mi.
Narapela Hevi i Kamap
Tasol bihain skin bilong mi i wok long go nogut, na mi hatwok long wokim skin liklik. Bihain famili bilong mi i no inap lukautim mi moa, maski ol i bin givim bel tru long mekim. Olsem na mi ting i gutpela sapos ol i putim mi long wanpela kain haus sik bilong ol man i kain olsem mi. Em nau, senis i kamap gen long sindaun bilong mi, na long ol samting mi save mekim long olgeta de. Tasol mi no larim dispela i daunim mi long ol samting bilong spirit.
Mi no lusim pasin bilong mi long kaunim Baibel na stadi long olgeta taim. Mi wok long tingim ol samting mi inap mekim—i no ol samting mi no inap mekim. Mi tingim tingim ol gutpela blesing bilong spirit olgeta Witnes Bilong Jehova i save kisim. Mi stap klostu long Jehova long rot bilong beten na mi wok strong long painim rot bilong autim tok long ol man.
Long nait na long sampela aua long san mi save stap long dispela haus sik. Long belo bek na long apinun mi save stap long haus wantaim famili o long ol miting Kristen bilong mipela. Wanpela lain bilong gavman [olsem welfe samting] i save kisim mi long ka i go i kam long ol miting na long haus bilong mi. Famili bilong mi, na ol brata long kongrigesen, na ol lain i wok long dispela haus sik, ol i save lukautim mi gutpela tru.
Mi Mekim Ol Samting Mi Inap Mekim
Mi no save ting olsem mi bagarap na mi no inap mekim wanpela samting, na famili bilong mi na ol brata Kristen ol tu i no gat dispela tingting long mi. Ol i save lukautim mi gut long pasin sori tru, na dispela i helpim mi long mekim wok elda bilong mi. Mi save lukautim wanpela Buk-Stadi Bilong Kongrigesen long olgeta wik, na mi lukautim stadi Wastaua long Haus Kingdom. Mi hatwok long opim ol pes long Baibel, olsem na ol i save makim wanpela bilong helpim mi long mekim long miting. Mi save sindaun long wilsia na lukautim ol miting na mekim ol pablik-tok samting.
Olsem na mi inap mekim yet ol samting bipo mi bin amamas long mekim, na helpim ol brata sista i gat hevi samting. (1 Pita 5:2) Mi save mekim taim ol i kam askim mi long helpim ol o givim sampela tok long ol. Na mi mekim dispela wok long rot bilong telefon tu; mi no wetim ol i ring long mi—mi yet mi save ring long ol. Em nau, mi strongim ol na ol i strongim mi. (Rom 1:11, 12) Wanpela pren bilong mi i tok: “Taim mi stap bel hevi, em nau, yu save ring long mi bilong strongim bel bilong mi.” Tasol dispela i strongim mi tu, long wanem, mi save Jehova i blesim dispela wok bilong mi.
Paslain na bihain long miting, mi save toktok wantaim ol pikinini insait long kongrigesen. Mi save sindaun tasol long wilsia, olsem na ol inap lukluk stret long ai bilong mi na mi tu inap mekim olsem long ol, na mipela inap toktok gut wantaim. Mi amamas long pasin bilong ol, em ol i save kamapim stret tingting bilong ol, na bel bilong ol i no giaman. Wanpela manki i bin tokim mi: “Maski yu no inap wokabaut, yu gat gutpela skin tru!”
Mi putim tingting i go long ol samting mi inap mekim, na mi no bel hevi na tingim ol samting mi no inap mekim, olsem na mi amamas long mekim wok bilong Jehova. Dispela samting i bin painim mi i givim save long mi olsem: Ol hevi i painim yumi ol i save skulim na strongim yumi.—1 Pita 5:10.
Mi bin lukim olsem: Planti man i gat strongpela skin ol i no pilim olsem wok bilong yumi long lotuim Papa bilong yumi long heven i bikpela samting tru. Tasol sapos yumi no ting em i bikpela samting, orait taim yumi stadi na go long miting na autim tok, bel bilong yumi i no ken pilim—i olsem yumi mekim nating tasol. Tasol mi ting ol dispela samting i bikpela samting tru bilong helpim yumi long abrusim bagarap taim pasin bilong dispela graun i pinis, na yumi ken i stap long Paradais long graun em God i tok promis long kamapim.—Song 37:9-11, 29; 1 Jon 2:17.
Long bel bilong yumi, oltaim yumi mas tingim gutpela samting yumi wetim i stap—em laip oltaim long nupela taim God bai kamapim. (1 Tesalonaika 5:8) Na mi lain tu olsem mi mas wok strong oltaim long daunim pasin bilong bel hevi. Mi lain pinis long tingim Jehova i olsem Papa bilong mi, na oganaisesen bilong em i olsem Mama bilong mi. Na nau mi save pinis, sapos yumi wok strong, Jehova bai helpim yumi long kamap gutpela wokman bilong em.
Tru, sampela taim mi bin pilim olsem ol i bin ‘paitim mi na mekim mi i pundaun,’ tasol mi no ‘bagarap olgeta.’ Jehova na oganaisesen bilong em i no bin lusim mi; na famili bilong mi na ol brata Kristen, ol tu i no lusim mi. Gutpela tru mi bin kisim Baibel na kirap long kaunim—dispela i mekim na mi kisim bek strong bilong spirit. Mi tenkyu tru long God Jehova, em i save givim ‘strong bilong em’ long yumi taim yumi bilip na wet long em.—2 Korin 4:7.
Mi bilip strong long Jehova na mi amamas long tingim gutpela samting tru bai kamap bihain. Mi bilip tru olsem klostu nau God Jehova bai truim tok promis bilong em long kamapim bek Paradais hia long graun wantaim ol gutpela gutpela samting bilong en.—KTH 21:3, 4.