Laip Stori
Amamas Long Mekim Wok Maski Mi Gat Bagarap Long Skin
STORI BILONG VARNAVAS SPETSIOTIS
Long 1990, taim mi gat 68 krismas, skin olgeta bilong mi i dai. Tasol inap 15 yia nau mi bin amamas long mekim wok bilong autim tok fultaim long ailan Saiprus. Wanem samting i strongim mi long mekim yet wok bilong Jehova maski mi gat sik?
LONG Oktoba 11, 1922, mi kamap insait long famili i gat 9-pela pikinini—4-pela boi na 5-pela gel. Mipela i sindaun long ples Xylophagou, long Saiprus. Papamama i no sot long ol samting bilong skin, tasol bilong lukautim bikpela famili olsem bilong mipela, mipela i mas wok hat long mekim ol gaden samting.
Papa bilong mi, Antonis, em i man bilong stadi long ol buk samting na i gat laik long kisim save long ol samting. Bihain liklik long mama i karim mi, Papa i go lukim skul tisa bilong ples na em i lukim wanpela liklik nius, nem bilong en Peoples Pulpit, em ol Sumatin Bilong Baibel i wokim (em nem bilong ol Witnes Bilong Jehova long bipo). Em i kirap ritim, na em i skelim gut ol tok bilong en. Olsem na Papa wantaim wanpela poroman bilong em, Andreas Christou, tupela wantaim sampela arapela ol i namba wan lain bilong dispela ailan long wanbel wantaim bilip bilong ol Witnes Bilong Jehova.
Lain i Go Bikpela Maski i Gat Pasin Birua
Bihain, tupela i kisim sampela moa buk na nius long ol Witnes Bilong Jehova, em ol buk na nius Baibel i as bilong en. I no longtaim na Papa na Andreas i kirap autim ol tok i tru bilong Baibel long ol wanples. Wok autim tok bilong tupela i mekim na ol pris bilong Misin Otodoks na ol narapela husat i ting olsem ol Witnes Bilong Jehova bai nogutim ol man, ol i kirap birua long tupela.
Planti asples i rispektim dispela tupela tisa bilong Baibel. Papa i gat nem long pasin bilong mekim gut long ol man na givim samting long ol narapela. Planti taim em i save helpim ol famili i stap rabis. Sampela taim, long pasin hait em i save lusim haus long biknait na go putim wit o bret long haus bilong ol famili i sot long ol samting. Dispela kain pasin Kristen i mekim na ol manmeri i laikim tru ol tok em dispela tupela tisa bilong Baibel i autim.—Matyu 5:16.
Dispela i mekim na inap olsem 12-pela man i putim yau long tok bilong Baibel. Taim save bilong ol long tok i tru i kamap klia moa, ol i pilim olsem ol i mas bung wantaim long ol narapela narapela haus na stadi long Baibel. Long 1934 samting, Nikos Matheakis, em wanpela man Grik bilong autim tok fultaim i kam long Saiprus na bung wantaim grup bilong Xylophagou. Brata Matheakis i no les kwik na em i wok strong long helpim dispela grup long kliagut long ol tok bilong Baibel. Dispela grup i kamapim namba wan kongrigesen bilong ol Witnes Bilong Jehova long Saiprus.
Taim dispela wok Kristen i kamap bikpela na planti man i kisim tok i tru bilong Baibel, ol brata i pilim olsem ol i mas i gat wanpela ples stret bilong mekim ol miting. Bikpela brata bilong mi, George, na meri bilong em, Eleni, ol i givim wanpela haus em ol i yusim bilong putim ol tul na kaikai samting bilong gaden long en. Dispela haus i stap klostu long haus bilong ol. Ol i stretim dispela haus na mekim i kamap wanpela gutpela ples bilong mekim ol miting. Nau ol brata i gat namba wan Haus Kingdom bilong ol long dispela ailan. Ol i amamas tru long dispela samting! Dispela i kirapim planti man moa long kam bung wantaim ol.
Mi Pilim Tru Tok i Tru
Long 1938, taim mi gat 16 krismas, mi tingting long kamap wanpela kapenta. Olsem na Papa i salim mi i go long biktaun bilong Saiprus, em Nicosia. Papa i tingting gut na em i stretim rot na mi go stap wantaim Nikos Matheakis. Planti manmeri long dispela ailan ol i tingim yet pasin bilong dispela gutpela brata long wok strong na mekim gut long ol man. Pasin bilong em long amamas na sanap strong na i no pret, em ol pasin olgeta Kristen long Saiprus long dispela taim bipo ol i mas i gat.
Brata Matheakis i helpim mi long kisim gut save long Baibel na kamap strong long ol samting bilong lotu. Taim mi stap wantaim em, mi bin go long olgeta miting i kamap long haus bilong em. Nau em namba wan taim mi pilim olsem pasin bilong mi long laikim tru Jehova i wok long kamap bikpela. Mi tingting strong long pas gut wantaim God. Bihain long sampela mun, mi tokim Brata Matheakis olsem mi laik wok wantaim em long autim tok. Dispela i kamap long 1939.
Bihain mi go bek long ples long lukim famili bilong mi. Taim mi stap wantaim papa bilong mi, dispela i strongim bilip bilong mi olsem mi painim pinis tok i tru na as bilong i stap bilong yumi man. Long Septemba 1939, Wol Woa 2 i kirap. Planti yangpela man em ol i wankrismas bilong mi, ol i volantia long i go long woa, tasol mi bihainim tok bilong Baibel na mi no insait long pait. (Aisaia 2:4; Jon 15:19) Long dispela yia, mi dediketim mi yet long Jehova na mi kisim baptais long 1940. Em namba wan taim mi pilim olsem mi no pret long ol man!
Long 1948 mi maritim Efprepia. Bihain mipela i kamapim 4-pela pikinini. Mipela i luksave olsem mipela i mas wok strong na bai mipela inap “mekim gutpela pasin long ai bilong Bikpela, na stretim gut ol pikinini bilong [mipela] na skulim ol long tok bilong Bikpela.” (Efesus 6:4) Mipela i beten na wok strong long helpim ol pikinini long kisim pasin bilong laikim tru Jehova na rispektim ol lo na stiatok bilong em.
Sik i Givim Bikpela Hevi Long Mi
Long 1964, taim mi gat 42 krismas, lek na han bilong mi long han sut i dai. Isi isi lek na han bilong mi long han kais, ol tu i dai. Dokta i tok mi gat wanpela kain sik we masol i go slek, em wanpela sik i no gat rot bilong oraitim na bihain bodi olgeta i dai. Taim mi harim dispela tok, bel bilong mi i bagarap stret. Ol samting i kamap hariap tumas na mi no ting kain samting olsem bai kamap! Mi kros nogut tru na mi tingting: ‘Bilong wanem dispela samting i kamap long mi? Mi bin mekim wanem na dispela samting i painim mi?’ Tasol bihain, bel na tingting bilong mi i orait liklik. Nau mi tingting planti stret na wari long wanem samting bai kamap. Planti askim i stap long tingting bilong mi. Skin bilong mi bai i dai olgeta na ol narapela i mas mekim olgeta samting bilong helpim mi? Olsem wanem bai mi karim dispela hevi? Bai mi inap lukautim famili bilong mi—meri na 4-pela pikinini bilong mipela? Mi tingting planti stret long dispela samting.
Long dispela taim bilong bikpela hevi, winim olgeta taim bipo, mi pilim olsem mi mas beten long Jehova na kamapim tru olgeta hevi na wari bilong mi. Long san na long nait mi beten na aiwara i pundaun. I no longtaim na bel bilong mi i stap isi. Ol tok bilong mekim gut bel bilong man i stap long Filipai 4:6, 7 i kamap tru long mi. Em i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”
Karim Hevi Bilong Skin i Dai
Sik bilong mi i go bikpela. Mi luksave olsem kwiktaim mi mas mekim sampela senis. Mi no inap wok moa olsem wanpela kapenta, olsem na mi painim wanpela wok i no hatwok tumas na i stret long sik bilong mi na i helpim mi long sapotim famili bilong mi. Pastaim mi yusim wanpela ka long salim ol aiskrim. Mi mekim dispela wok inap 6-pela yia samting, i go inap long taim mi mas sindaun long wilsia. Bihain mi kirap mekim ol wok i isi moa na mi inap mekim.
Long yia 1990 helt bilong mi i wok long bagarap na mi no mekim wok skin moa. Orait, long dispela taim ol narapela i mas helpim mi long mekim ol samting em ol man i gat gutpela helt ol yet i save mekim. Mi mas kisim helpim long go long bet, na ol i mas wasim mi, na putim klos bilong mi. Bilong i go long ol miting Kristen, ol i mas subim mi long wilsia i go long ka na bihain ol apim mi i go insait long ka. Taim mi kamap long Haus Kingdom, ol i mas apim mi i kam ausait na putim mi long wilsia na kisim mi i go insait long Haus Kingdom. Long taim bilong miting, mi gat wanpela elektrik hita na bai lek bilong mi i no kol.
Mi go long olgeta miting, maski mi gat dispela hevi. Mi save dispela em hap we Jehova i skulim yumi, na taim mi stap wantaim ol bratasista Kristen ol i kamap olsem ples hait bilong mi na ol i helpim na strongim mi. (Hibru 10:24, 25) Ol wanbilip husat i strong long lotu i kam oltaim na helpim mi. Mi amamas tru na mi gat tingting olsem bilong Devit, em i tok: “Yu kisim mi i kam sindaun wantaim yu, na yu lukautim mi gutpela tumas.”—Song 23:5.
Insait long ol dispela planti yia, gutpela meri bilong mi i bin i stap olsem gutpela helpim. Ol pikinini bilong mi tu i bin givim gutpela helpim long mi. Long sampela yia nau, ol i helpim mi long ol samting mi mas kisim long olgeta de. Ol samting ol i mekim i hatwok na taim ol yia i lus, em i hatwok moa nau long lukautim mi. Ol i stap gutpela piksa long pasin bilong i no les kwik na pasin bilong givim bel bilong helpim narapela, na mi save beten askim Jehova long mekim gut long ol.
Beten em i narapela gutpela samting tru Jehova i givim bilong strongim ol wokman bilong em. (Song 65:2) Jehova i harim beten bilong mi na em i givim strong long mi long stap strong long bilip insait long ol dispela yia. Taim mi pilim bel hevi, beten i helpim mi long stap amamas yet. Pasin bilong toktok gut wantaim Jehova i givim nupela strong long mekim yet dispela wok. Mi bilip tru olsem Jehova i save harim ol beten bilong ol wokman bilong em na em i save mekim bel na tingting bilong ol i stap isi.—Song 51:17; 1 Pita 5:7.
Na bikpela samting moa, mi kisim nupela strong long olgeta taim mi tingim olsem God bai mekim gut tru long olgeta manmeri long Paradais aninit long wok king bilong Pikinini bilong em, Jisas Krais. Aiwara bilong amamas i pundaun long pes bilong mi taim mi tingim ol dispela gutpela samting tru.—Song 37:11, 29; Luk 23:43; KTH 21:3, 4.
Mekim Wok Bilong God Fultaim
Long 1991 samting, mi luksave olsem nambawan gutpela rot bilong abrusim pasin bilong sori long mi yet, em mi mas bisi long toktok wantaim ol narapela long gutnius bilong Kingdom. Long dispela yia, mi kirap mekim wok autim tok fultaim.
Skin olgeta bilong mi i dai, olsem na planti taim mi save autim tok long rot bilong raitim pas. Pasin bilong raitim pas em wanpela wok i hatwok long mekim na mi mas taitim bun tru na mekim. Mi hatwok long holim strong pen long han bilong mi, long wanem, sik i mekim na ol masol bilong mi i no gat strong. Tasol long rot bilong beten na pasin bilong i no les kwik, mi autim tok long rot bilong pas winim 15 yia nau. Na tu, mi save yusim telefon long autim tok long ol man. Taim ol wanblut, pren, na ol neiba i kam lukim mi long haus, oltaim mi save tokim ol long nupela taim na Paradais bai kamap long graun.
Olsem na mi bin kisim planti gutpela ekspiriens i strongim bel bilong mi. Mi amamas tru long lukim wanpela bubu bilong mi, em mi bin stadi wantaim em long Baibel long 12-pela yia i go pinis, i strong long lotu, na em i tingim tru tok i tru bilong Baibel. Maus bilong bel, em Baibel i bin skulim pinis, i kirapim em long stap gut na sanap strong long dispela tok bilong ol Kristen long i no ken insait long samting bilong graun.
Mi amamas tru taim ol man mi raitim pas long ol, ol i askim mi long givim sampela save moa long ol long tok bilong Baibel. Sampela taim, sampela man i tok ol i laik kisim sampela buk moa. Olsem: Wanpela meri i ringim mi na tok tenkyu long pas mi bin salim i go long man bilong em. Em i ting ol tok insait long pas i gutpela tru. Na long dispela rot planti taim mi inap toktok wantaim dispela meri na man bilong em long ol tok bilong Baibel long haus bilong mi.
Mi Bilip na Wetim Gutpela Samting
Insait long ol dispela yia, mi bin lukim namba bilong ol man husat i autim tok bilong Kingdom i go antap long dispela hap. Liklik Haus Kingdom klostu long haus bilong brata bilong mi George, ol i bin stretim na mekim i kamap bikpela inap planti taim. Em wanpela naispela ples bilong lotu, na 2-pela kongrigesen bilong ol Witnes Bilong Jehova i save yusim.
Papa bilong mi i dai long 1943, taim em i gat 52 krismas. Tasol em i bin mekim gutpela wok bilong lotu i tru insait long famili! Etpela pikinini bilong em i kisim tok i tru na ol i mekim yet wok bilong Jehova. Long ples Xylophagou, we Papa i kamap, na long ol ples i stap klostu, nau i gat 3-pela kongrigesen, na 230 pablisa bilong Kingdom i stap long dispela hap!
Ol dispela gutpela samting i bin givim bikpela amamas tru long mi. Nau mi gat 83 krismas, na mi bilip tru long tok bilong man bilong raitim song: “Ol yangpela laion i save sot long abus na ol i hangre. Tasol ol manmeri i bihainim Bikpela ol i no save sot long ol gutpela samting.” (Song 34:10) Mi wetim taim truim bilong tok profet bilong Aisaia 35:6 bai kamap: “Ol lek nogut bai ol i kalap olsem ol dia.” Maski skin bilong mi i bagarap, mi tingting strong long amamas yet long mekim wok bilong Jehova i go inap long dispela taim.
[Mep long pes 17]
(Bilong save ol dispela rait i stap we long pes, lukim buk o magasin)
TEKI
SIRIA
LEBANON
SAIPRUS
Nicosia
Xylophagou
Solwara Mediterenian
[Piksa long pes 17]
Namba wan Haus Kingdom long Xylophagou, ol i yusim inap long nau
[Ol Piksa long pes 18]
Mi wantaim Efprepia long 1946 na long nau
[Piksa long pes 20]
Mi amamas long autim tok long rot bilong telefon na raitim pas