Mipela i No Pret​—Jehova i Stap Wantaim Mipela

Stori bilong Egyptia Petridou

Long 1972, ol Witnes long olgeta hap bilong Saiprus ol i bung long Nicosia bilong harim spesel tok bilong Nathan H. Knorr, husat i bin go pas long wok bilong ol Witnes Bilong Jehova inap planti yia. Wantu em i luksave long mi, na taim mi no kolim yet nem bilong mi em i askim mi: “Yu bin harim sampela stori i kam long Isip?” Inap 20 yia i go pinis mi bin bungim Brata Knorr long ples bilong mi, Aleksandria, long Isip.

MAMA i karim mi long Aleksandria long Janueri 23, 1914, na mi namba wan bilong 4-pela pikinini. Mipela i go bikpela long hap i stap klostu long solwara. Long dispela taim Aleksandria em i naispela taun i gat ol kain kain lain i sindaun long en. Em i gat nem olsem ples bilong ol stail haus na ol bikpela samting i bin kamap bipo long en. Ol lain bilong Yurop i bung wantaim ol Arap, olsem na mipela ol pikinini i lain long mekim tok Arap, tok Inglis, tok Frans, tok Itali, na tok ples bilong famili bilong mipela yet, em tok Grik.

Taim mi pinisim skul, mi kisim wok long wanpela haus bilas bilong Frans, na mi save wokim ol kain kain stail bilong ol gutpela klos na samapim bilong ol meri i gat biknem. Na tu, mi meri bilong lotu na mi amamas long ritim Baibel, maski mi no kliagut long ol tok mi ritim.

Long dispela taim​—long 1935 samting​—mi bungim wanpela gutpela yangpela man bilong Saiprus. Theodotos Petrides i save gut long resling, tasol em i bin lain tu long wokim ol kain kain switpela kek samting, na em i wok long wanpela stua i save kukim ol kek. Theodotos i laikim mi tru, mi wanpela meri i gat liklik skin na braunpela gras. Planti taim em i save sanap aninit long windo bilong mi na mekim ol naispela singsing bilong ol Grik. Mitupela i marit long Jun 30, 1940. Em taim bilong bikpela amamas. Mipela i sindaun long wanpela flet aninit long flet bilong mama. Namba wan pikinini bilong mipela, Jon, i kamap long 1941.

Lainim Tok i Tru Bilong Baibel

Inap longpela taim liklik, Theodotos i no amamas tumas long lotu bilong mipela, na em i wok long mekim sampela askim long Baibel. Ol Witnes Bilong Jehova i bin kirap stadi wantaim em long Baibel, tasol mi no save long dispela. Orait wanpela taim mi stap wantaim bebi bilong mipela long haus, na wanpela meri i paitim dua na em i givim kat long mi i gat wanpela tok bilong Baibel long en. Mi laik mekim gutpela pasin na mi kisim na ritim kat. Orait nau em i soim sampela buk bilong Baibel long mi. Mi kirap nogut! Em ol wankain buk olsem Theodotos i bin kisim i kam long haus!

Mi tokim meri: “Mi gat ol dispela buk. Plis, kam insait.” Kwiktaim mi kirap tromoi planti askim long dispela Witnes, em Eleni Nicolaou. Em i mekim wok long Baibel bilong bekim ol askim bilong mi. Mi laikim dispela pasin. Em nau, mi klia liklik long tok bilong Baibel. Eleni i lukim piksa bilong man bilong mi na i luksave long em. Em i tok: “Mi save long dispela man!” Em nau, Theodotos i no inap haitim moa samting em i mekim. Mi kirap nogut long Theo i save go long ol miting Kristen na em i no kisim mi i go wantaim em​—na em i no bin tokim mi tu! Taim em i kam bek long haus mi tokim em: “Ples yu bin go long en long Sande, mi bai go wantaim yu long en long dispela wik!”

Long namba wan miting mi go long en, wanpela grup i gat olsem 10-pela manmeri, ol i toktok long Buk Maika long Baibel. Mi putim gut yau long ol dispela tok. Kirap long dispela taim, long olgeta Fraide apinun George na Katerini Petraki i kam long haus na stadi wantaim mipela long Baibel. Papa na ol brata bilong mi ol i no orait long mipela i stadi wantaim ol Witnes. Susa bilong mi i no gat tok long en, tasol em yet i no kamap Witnes. Tasol Mama i kirap bihainim tok i tru bilong Baibel. Long 1942, Mama, Theodotos, na mi, i kisim baptais long solwara long Aleksandria bilong makim olsem mipela i dediket pinis long Jehova.

Hevi i Kamap

Long 1939, Wol Woa 2 i kirap, na kwiktaim woa i go bikpela. Long 1941 samting, Jeneral Erwin Rommel bilong Jemani wantaim ami bilong em ol i stap klostu long El Alamein, na i gat planti soldia bilong Inglan i stap long Aleksandria. Mipela i bungim planti kaikai long haus. Orait nau bos bilong Theodotos i askim em long lukautim nupela bisnis bilong em long Port Taufiq klostu long Suez, olsem na mipela i go sindaun long dispela hap. Tupela Witnes i save long tok Grik ol i kirap long painim mipela. Ol i no save long atres bilong mipela, tasol ol i autim tok long ol haus i go i go na ol i painim mipela.

Taim mipela i stap long Port Taufiq, mipela i mekim Baibel stadi wantaim Stavros na Giula Kypraios na ol pikinini bilong tupela, em Totos na Georgia, na ol i kamap gutpela pren bilong mipela. Stavros i amamas tru long stadi long Baibel, olsem na em i save tanim han bilong olgeta klok i stap long haus i go bek inap wanpela aua na bai mipela i abrusim taim bilong kisim laspela tren. Olsem na mipela i toktok long Baibel i go inap biknait.

Mipela i sindaun long Port Taufiq inap 18 mun, na bihain mipela i go bek long Aleksandria, long wanem, mama bilong mi i gat sik. Em i dai long 1947, na em i bin i stap gut long Jehova. Long dispela taim tu mipela i pilim tru olsem Jehova i strongim bel bilong mipela long rot bilong ol strongpela pren Kristen mipela i save bung wantaim ol. Na mipela i save singautim ol misineri i kam i stap wantaim mipela taim ol i laik i go long ol narapela kantri bilong mekim wok misineri na sip bilong ol i kam sua inap liklik hap taim long Aleksandria.

Ol Amamas na Ol Hevi

Long 1952, mi karim namba tu pikinini man, em James. Mitupela i save, em i bikpela samting long ol pikinini i mas i go bikpela insait long haus we lotu i tru i stap strong long en, olsem na mipela i tok long ol i ken putim ol miting bilong stadi long Baibel long haus bilong mipela, na planti taim mipela i lukautim ol brata i save mekim wok autim tok fultaim. Olsem na namba wan pikinini, John, em i kisim pasin bilong laikim tru ol tok i tru bilong Baibel, na taim em i gat 16 krismas samting, em i kirap mekim wok painia. Na em i save go skul long nait bilong pinisim skul bilong em.

Bihain liklik long dispela, dokta i tokim Theodotos olsem em i gat bikpela sik bilong klok, na em i tok Theodotos i no ken mekim moa wok bilong em. Pikinini bilong mipela, Jems, i gat 4-pela krismas tasol. Bai mipela i mekim wanem? Tasol Jehova i tok promis pinis: “Yupela i no ken pret, long wanem, mi . . . stap wantaim yupela.” (Ais. 41:10) Orait long 1956, ol i singautim mipela long mekim wok painia long Ismailia, klostu long Suez Canal, na mipela i kirap nogut na amamas tru long dispela! Ol yia bihain long dispela em taim bilong bikpela hevi long Isip, na ol brata Kristen i mas kisim ol gutpela tok bilong strongim bel bilong ol.

Long 1960, mipela i mas lusim Isip na mipela wan wan i karim wanpela sutkes tasol. Mipela i go long Saiprus, em ailan man bilong mi i kam long en. Long dispela taim Theodotos i sik nogut tru na em i no inap wok moa. Tasol wanpela brata Kristen na meri bilong em i mekim gutpela pasin na ol i tok mipela i ken sindaun long wanpela haus bilong ol. Tasol sori tru, inap tupela yia bihain man bilong mi i dai, na mi stap wanpis wantaim yangpela James. John tu i bin i kam long Saiprus, tasol em i marit pinis na i gat famili bilong em yet bilong lukautim.

Lukautim Mipela Long Taim Bilong Hevi

Orait nau Stavros na Dora Kairis i singautim mipela long go sindaun long haus bilong ol. Mi brukim skru na tenkyu long Jehova, em i lukautim gen mipela long ol samting mipela i mas kisim. (Sng. 145:16) Bihain Stavros na Dora i pasim tok long salim haus bilong ol na wokim nupela haus i gat wanpela Haus Kingdom daunbilo, na ol i wokim tupela liklik rum bilong mitupela James.

Bihain James i marit, na em wantaim meri bilong em i mekim wok painia i go inap long taim namba wan bilong 4-pela pikinini bilong ol i kamap. Long 1974, em tupela yia bihain long taim Brata Knorr i kam, kros pait i kamap long ol samting bilong wok politik long Saiprus.a Planti manmeri, na sampela Witnes tu, i mas ranawe lusim haus bilong ol na go sindaun long narapela hap. Pikinini bilong mi John em tu i mas ranawe. Em i go sindaun long Kanada wantaim meri na 3-pela pikinini bilong em. Tasol long dispela taim mipela i amamas long lukim lain bilong autim tok bilong Kingdom i go bikpela long Saiprus.

Taim mi kirap long kisim pensen, mi inap mekim bikpela wok moa long autim tok. Tasol i no longtaim i go pinis, sik strok i kisim mi na mi go sindaun wantaim pikinini bilong mi James na famili bilong em. Bihain, sik bilong mi i go bikpela na mi go i stap long haus sik inap sampela wik, na bihain ol i putim mi long wanpela haus sik bilong lukautim ol lapun i gat sik. Maski mi karim pen oltaim, mi save autim tok long ol nes, ol sikman, na ol lain i save kam lukim ol. Na mi save stap wanpis na stadi long Baibel inap planti aua, na ol gutpela brata spirit i save helpim mi na mi inap i go long Buk Stadi Bilong Kongrigesen i stap klostu.

Ol i Mekim Gut Bel Bilong Mi

Taim mi kisim tok long ol lain em mitupela Theodotos i bin helpim, dispela i save mekim gut bel bilong mi. Planti pikinini na tumbuna pikinini bilong ol i save mekim wok autim tok fultaim​—sampela i mekim long Australia, Grik, Inglan, Kanada, na Swiselan. Long nau, pikinini bilong mi John na meri bilong em i sindaun long Kanada wantaim pikinini man bilong ol. Wanpela pikinini meri bilong ol wantaim man bilong em i mekim wok painia. Na laspela pikinini meri bilong tupela na man bilong em, em Linda na Joshua Snape, ol i bin singautim ol i go long namba 124 klas bilong Skul Gileat.

Pikinini bilong mi James wantaim meri bilong em ol i sindaun nau long Jemani. Tupela pikinini man bilong ol i save wok long Betel​—wanpela long Atens, long Grik, na wanpela long Selters, long Jemani. Laspela pikinini man bilong ol, na pikinini meri wantaim man bilong em, ol i mekim wok painia long Jemani.

Man! Bai mipela i gat planti stori tru bilong mekim long mama bilong mi na Theodotos taim ol i kirap bek! Ol bai amamas moa yet taim ol i lukim gutpela samting tru bilong spirit em famili bilong ol i bin kisim long ol.b

[Ol Futnot]

[Rait long pes 24]

Long dispela taim tu mipela i pilim tru olsem Jehova i strongim bel bilong mipela long rot bilong ol strongpela pren Kristen mipela i save bung wantaim ol

[Mep long pes 24]

(Bilong save ol dispela rait i stap we long pes, lukim buk o magasin)

SAIPRUS

NICOSIA

SOLWARA MEDITERENIAN

ISIP

CAIRO

El Alamein

Aleksandria

Ismailia

Suez

Port Taufiq

Suez Canal

[Kredit Lain]

Based on NASA/​Visible Earth imagery

[Piksa long pes 23]

Mi wantaim Theodotos long 1938

[Piksa long pes 25]

Pikinini bilong mi James wantaim meri bilong em

[Piksa long pes 25]

Pikinini bilong mi John wantaim meri bilong em