Jehova i Save Tokaut ‘Long Ol Samting Bai Kamap’

“Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem.”​​—AISAIA 46:10.

1, 2. Wanem samting i narakain long ol samting i painim Babilon? Dispela i givim yumi wanem save long Jehova?

EM TUDAK pinis na ol soldia i wokabaut isi isi tru long wara Yufretis i go kamap long strongpela taun Babilon. Taim ol i kam klostu, ol i kirap nogut tru. Tupela bikpela dua bilong banis bilong taun i op i stap! Ol i lusim wara na go insait long taun. Wantu ol i kisim taun, na lida bilong ol, Sairus, i kirap bosim kantri. Bihain em i raitim wanpela tok i larim ol Israel i lusim kalabus. Planti tausen Israel i go bek long ples bilong kirapim gen lotu bilong Jehova long Jerusalem.​​—2 Stori 36:​22, 23; Esra 1:​1-4.

² Ol dispela samting i bin kamap long yia 539 i go 537 B.C.E., na em ol samting ol saveman long nau i tokaut olsem i bin kamap. Tasol samting i narakain i olsem: Inap 200 yia paslain long ol i daunim Babilon, Jehova i kirapim profet bilong em Aisaia long tokaut long ol samting bai painim Babilon. (Aisaia 44:24–​45:7) God i tokim Aisaia long pasin ol soldia bai mekim wok long en bilong daunim Babilon, na tu, long nem bilong lida bilong ol.a Jehova i tokim ol Israel, em ol i witnes bilong em long dispela taim bipo, olsem: “Yupela i mas tingim ol samting mi bin mekim bipo, long wanem, mi wanpela tasol mi God, na i no gat narapela god moa i stap. Mi tasol mi God, na i no gat narapela god olsem mi i stap. Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok.” (Aisaia 46:​9, 10a) Tru tumas, taim wanpela samting i no kamap yet, Jehova inap save dispela samting bai kamap.

3. Nau bai yumi skelim bekim bilong wanem ol askim?

³ Olsem wanem? God i save long olgeta wan wan samting bai kamap? Jehova i save long ol samting yumi olgeta wan wan bai mekim? Em i makim pinis ol samting i mas painim yumi? Long dispela stadi na long stadi i kamap bihain long dispela, bai yumi skelim ol tok Baibel i mekim long bekim long ol dispela askim.

Jehova​​—God Bilong Mekim Ol Tok Profet

4. Husat i As bilong ol tok profet i stap long Baibel?

⁴ Jehova inap save long wanem samting bai kamap bihain, olsem na em i kirapim ol wokboi bilong em, ol i stap long taim bilong ol man i raitim Baibel, long raitim planti tok profet. Ol dispela tok profet i givim rot long yumi long save long ol samting Jehova bai mekim bihain. Jehova i tok: “Ol samting bipo mi tok long ol bai i kamap, nau ol i kamap pinis. Na nau bai mi tokim yupela long ol arapela samting bai i kamap bihain, olsem bai yupela i ken save long ol long taim ol i no kamap yet.” (Aisaia 42:9) Man! Em i gutpela samting tru long lain bilong God i ken save long ol dispela samting!

5. Taim ol profet i save pinis long samting Jehova bai mekim, i gat wanem wok ol i mas mekim?

⁵ Profet Amos i tok: “Tru tumas, olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” Taim ol profet i save pinis long samting Jehova bai mekim, orait nau ol i gat wok ol i mas mekim. Tingim dispela tok piksa Amos i mekim: “Taim man i harim laion i singaut strong, ating dispela man i no inap pret, a?” Taim laion i singaut strong, ol man na ol animal i stap klostu ol i kirap hariap long mekim wanpela samting, na olsem tasol, taim Jehova i givim tok long ol profet olsem Amos, ol i save kirap hariap long autim. “Taim God, Bikpela i givim tok long wanpela man, ating dispela man i no inap autim, a? Nogat. Em bai i autim.”​​—Amos 3:​7, 8.

“Tok” Bilong Jehova i Save “Kamap”

6. Samting Jehova i “laik mekim” long Babilon, dispela i bin kamap tru olsem wanem?

⁶ Long maus bilong profet Aisaia, Jehova i tok: “Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim dispela samting.” (Aisaia 46:10b) Insait long dispela samting God i “laik mekim” long Babilon​—em samting em i tingting pinis long mekim​—i olsem: God bai singautim Sairus bilong Persia long kam pait na daunim Babilon. Jehova i autim dispela laik bilong em planti yia paslain long dispela samting i kamap. Olsem yumi stori pinis, dispela samting i kamap tru long yia 539 B.C.E.

7. Bilong wanem yumi ken bilip strong olsem olgeta “tok” bilong Jehova bai kamap tru?

⁷ Klostu 400 yia paslain long Sairus i daunim Babilon, King Jehosafat bilong Juda i mas pait long ol ami bilong Amon na Moap. Em i bilip strong na beten olsem: “O God, Bikpela bilong ol tumbuna bilong mipela, yu stap long heven na yu save bosim olgeta lain manmeri bilong graun. Yu gat bikpela strong tru na i no gat wanpela man inap pait na winim yu.” (2 Stori 20:6) Aisaia i gat wankain pasin bilong bilip, na em i tok: “Bikpela I Gat Olgeta Strong i tingting pinis long mekim olsem, na husat inap pasim em? Em i apim han pinis, na i no gat wanpela bai i putim han bilong en i go daun.” (Aisaia 14:27) Bihain, King Nebukatnesar bilong Babilon i kamap longlong, na taim tingting bilong em i kamap gutpela gen, long pasin daun em i tok: “Taim [God] i laik mekim wanpela samting, i no gat wanpela man inap long pasim em. Na i no gat wanpela man inap long askim em olsem, ‘Yu laik mekim wanem samting?’ ” (Daniel 4:35) Jehova i tokim lain bilong em: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” (Aisaia 55:11) Yumi tu i ken bilip strong olsem olgeta “tok” bilong Jehova bai kamap tru. Samting God i tingting pinis long mekim, em bai kamap.

Samting God i “Tingting Pinis Long Mekim na i Bilong i Stap Oltaim Oltaim”

8. Samting God i “tingting pinis long mekim na i bilong i stap oltaim oltaim” em i makim wanem samting?

⁸ Long pas em i raitim long ol Kristen long Efesus, aposel Pol i stori long samting God i “tingting pinis long mekim na i bilong i stap oltaim oltaim.” (Efesus 3:​11, NW) Dispela samting God i tingting pinis long mekim em i makim laik bilong em long pastaim tru long dispela graun na ol manmeri. (Stat 1:​28) Bilong helpim yumi long save olsem dispela laik bai kamap tru, yumi ken tingim namba wan tok profet long Baibel.

9. Olsem wanem Stat 3:​15 i insait long samting God i tingting pinis long mekim?

⁹ Tok promis i stap long Stat 3:​15 i kamapim klia olsem bihain stret long Adam tupela Iv i mekim sin, Jehova i makim meri bilong em long kamapim wanpela lain, olsem pikinini. (Dispela meri i no wanpela meri bilong graun, em wanpela tok piksa tasol.) Na tu, Jehova i save long wanem samting bai kamap long pasin birua i stap namel long dispela meri na Satan, na long lain bilong meri na lain bilong Satan. Jehova bai larim Satan i krungutim lek bilong Pikinini bilong dispela meri, tasol long taim God i makim, dispela Pikinini bai krungutim het bilong snek, em Satan. Insait long dispela haptaim, laik bilong Jehova long Jisas i mas kamap Mesaia em i wok long kamap long rot bilong wanpela lain manmeri Em i makim.​​—Luk 3:​15, 23-​38; Galesia 4:4.

Ol Samting Jehova i Makim Pinis

10. Olsem wanem? Paslain tru Jehova i makim Adam tupela Iv long mekim sin? Stori long dispela.

¹⁰ Aposel Pita i stori long wok bilong Jisas insait long samting God i tingting pinis long mekim, na em i tok: “Taim graun i no kamap yet,” God “i makim Krais bilong mekim dispela wok bilong baim bek yupela. Na nau long dispela taim bilong ol las de yumi stap long en, God i mekim Krais i kamap ples klia pinis, bilong helpim yupela.” (1 Pita 1:​20; NW) Olsem wanem? Paslain tru Jehova i makim Adam tupela Iv long mekim sin na Jisas Krais i mas i dai olsem ofa bilong baim bek yumi? Nogat. Long dispela ves, “graun” i makim ol pikinini bilong Adam na Iv. Orait olsem wanem? Tupela i kamapim ol pikinini paslain long tupela i mekim sin? Nogat. Ol pikinini bilong ol i kamap bihain long ol i sakim tok bilong God. (Stat 4:1) Olsem na taim Adam na Iv i bikhet long God, tasol paslain long ol i kamapim pikinini, Jehova i makim dispela Pikinini, Jisas, long kamap. Jisas i dai na kirap bek, na long dispela rot em i givim pe bilong baim bek ol man, na long dispela pasin, sin ol i kisim long Adam bai pinis na olgeta wok bilong Satan tu.​​—Matyu 20:28; Hibru 2:​14; 1 Jon 3:8.

11. God i makim pinis wanem samting bilong kamapim laik bilong em?

¹¹ I gat narapela samting God i makim pinis bilong kamapim laik bilong em. Pol i stori long dispela long pas em i raitim long ol Efesus. Em i tok God “bai i bungim olgeta samting long Krais, ol samting bilong heven na bilong graun tu.” Pol i tok long dispela “ol samting bilong heven,” em ol man God i makim bilong mekim wok king wantaim Krais, olsem: “God i save bihainim laik na tingting bilong em yet na mekim olgeta samting i kamap, na long laik bilong em, bipo yet em i makim mipela.” (Efesus 1:​10, 11) Yes, bipo yet, Jehova i makim wanpela lain i gat namba stret bilong en, na dispela lain bai kamap olsem nambatu pikinini bilong meri bilong God na wok wantaim Krais long mekim wok long ofa bilong em bilong helpim ol manmeri. (Rom 8:​28-​30) Aposel Pita i tok ol i “lain manmeri i holi.” (1 Pita 2:9) Long rot bilong wanpela driman, aposel Jon i kisim save long namba bilong dispela lain em ol bai mekim wok king wantaim Krais​—144,000. (KTH 7:​4-8; 14:​1, 3) Ol bai wok wantaim Krais, em King, bilong “litimapim nem bilong [God].”​​—Efesus 1:​12-​14.

12. Olsem wanem yumi ken save olsem bipo yet God i no makim ol wan wan man yet bilong lain 144,000?

¹² God i makim pinis lain 144,000, tasol i no olsem em i makim ol wan wan man yet bilong dispela lain bilong mekim wok wantaim Krais, nogat. Tingim: Ol tok bilong Ol Skripsa Grik i bilong stiaim na strongim ol Kristen God i bin makim ol long holi spirit, na bai ol inap stap gut long em na stap insait long dispela lain bilong i go long heven. (Filipai 2:​12; 2 Tesalonaika 1:​5, 11; 2 Pita 1:​10, 11) Jehova i save pinis olsem 144,000 manmeri bai inapim mak bilong mekim wok king wantaim Krais. Em bai singautim ol long mekim dispela wok, tasol samting ol wan wan yet i mekim long wokabaut bilong ol​—em samting ol wan wan yet i mas tingim na makim​—dispela bai makim olsem ol bai stap insait long dispela lain o lus long kisim dispela wok.​​—Matyu 24:13.

Ol Samting Jehova i Save Pinis

13, 14. Strong bilong Jehova long save long ol samting bai kamap bihain, dispela i stret wantaim wanem samting? Bilong wanem?

¹³ Jehova em i God bilong mekim ol tok profet na kamapim ol samting em i tingting pinis long mekim, olsem na em i save mekim wanem wok long strong bilong em long save long ol samting bai kamap bihain? Namba wan samting yumi mas tingim i olsem: Long olgeta samting God i mekim, em i save bihainim pasin bilong tok tru, stretpela pasin, na pasin laikim. Taim aposel Pol i raitim pas long ol Kristen Hibru, em i tok, promis bilong God na tok tru antap God i mekim, dispela “tupela [samting] i no inap senis, na long dispela tupela tok God i no inap tru long giaman.” (Hibru 6:​17, 18) Long pas Pol i raitim long disaipel Taitus, em i mekim wankain tok, em i tok God “i no save giaman.”​​—Taitus 1:2.

¹⁴ Na tu, maski Jehova i gat bikpela strong, em i no save mekim pasin i no stret. Moses i tok long Jehova olsem: “Em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:4) Olgeta samting Jehova i mekim i stret wantaim ol gutpela pasin bilong em, olsem pasin laikim, savetingting, stretpela pasin, na strong.

15, 16. Long gaden Iden, Jehova i tokim Adam long wanem samting inap painim em?

¹⁵ Tingim olsem wanem ol dispela pasin i bin kamap ples klia long ol samting i bin kamap long gaden Iden. Jehova em i wanpela gutpela Papa, olsem na em i bin putim olgeta samting em ol manmeri i mas i gat. Em i givim Adam pasin bilong mekim wok long tingting, skelim gut ol samting, na makim samting em bai mekim. Adam i no olsem ol animal em ol i bihainim nating ol lo i stap pinis long skin, nogat. Adam inap tingim na makim wanem wanem samting em i laik mekim. Olsem na taim God i wokim pinis Adam, em i lukluk i kam daun na lukim olgeta samting em i wokim “i gutpela, na em i amamas tru.”​​—Stat 1:26-​31; 2 Pita 2:​12.

¹⁶ Taim Jehova i tokim Adam long em i no ken kaikai “pikinini bilong dispela diwai bilong givim gutpela save long wanem samting i gutpela na wanem samting i nogut,” Em i tokaut klia long ol samting na bai Adam inap skelim gut wanem samting em bai mekim. Em i orait long Adam i ken kaikai long “pikinini bilong olgeta diwai bilong dispela gaden.” Tasol i gat wanpela diwai Adam i no ken kaikai long en, na God i tok sapos em i kaikai em bai dai. (Stat 2:​16, 17) Em i tokim Adam long wanem samting bai kamap long pasin em i mekim. Adam bai mekim wanem?

17. Bilong wanem yumi ken tok olsem sampela taim Jehova i no mekim wok long dispela strong long save long wanem samting bai kamap bihain?

¹⁷ Jehova i gat strong long save long olgeta samting i kamap bihain, tasol em i no mekim wok long dispela strong na bai em i ken save long samting Adam na Iv bai mekim, nogat. God inap save long olgeta samting bai kamap bihain, tasol sampela taim em i no mekim wok long dispela strong. Na tu, yumi ken tok olsem Jehova em i God bilong pasin laikim, olsem na em i no inap makim Adam na Iv long mekim pasin bikhet​—wantaim ol samting nogut i kamap long en​—nogat. (Matyu 7:​11; 1 Jon 4:8) Olsem na long laik bilong em yet, sampela taim Jehova i no mekim wok long dispela strong.

18. Jehova inap pasim strong bilong em long save long wanem samting bai kamap, tasol bilong wanem yumi ken tok dispela i no makim olsem em i sot long sampela samting?

¹⁸ Jehova inap pasim strong bilong em long save long wanem samting bai kamap, tasol yu ting dispela i makim olsem em i sot long sampela samting? Nogat. Moses i tok long Jehova olsem em i wanpela “strongpela ston” na i tok: “Pasin bilong en i gutpela na stretpela tasol.” Em i no gat asua long ol samting nogut i bin kamap long sin bilong Adam. Ol samting nogut dispela sin i bin kamapim long yumi olgeta long nau, em i kam long dispela rong Adam i mekim long sakim tok. Aposel Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”​​—Lo 32:​4, 5; Rom 5:12; Jeremaia 10:23.

19. Bai yumi skelim wanem ol askim long stadi i kamap bihain long dispela?

¹⁹ Ol samting yumi stori pinis long en i kamapim klia olsem Jehova i no save mekim pasin i no stret. (Song 33:5) Olgeta wok na pasin na lo bilong em i save wok wantaim ol samting em i tingting pinis long mekim. (Rom 8:​28) Jehova i God bilong ol tok profet, olsem na “taim wanpela samting i no kamap yet, [em i ] save tokaut long dispela samting bai i kamap na bai i go pinis olsem wanem.” (Aisaia 46:​9, 10) Na tu, yumi bin stori olsem sampela taim em i no mekim wok long strong bilong em long save long wanem samting bai kamap bihain. Orait, dispela ol tok i mekim wanem long yumi? Yumi ken mekim wanem na bai ol disisen bilong yumi i stret wantaim ol samting God i tingting pinis long mekim? Yumi bai kisim wanem ol blesing long mekim olsem? Stadi i kamap bihain long dispela bai skelim ol dispela askim.

[Futnot]

Yu Inap Stori Long Dispela?

• Wanem sampela samting i bin kamap bipo i soim olsem “tok” bilong God i save “kamap” tru?

• Bipo yet, Jehova i makim pinis wanem samting na i insait long samting em i “tingting pinis long mekim na i bilong i stap oltaim oltaim”?

• Jehova i save mekim wanem wok long strong bilong em long save long ol samting bai kamap bihain?

[Piksa long pes 22]

Jehosafat i bilip strong long Jehova

[Piksa long pes 23]

God i tok profet olsem Jisas bai dai na kirap bek

[Piksa long pes 24]

Olsem wanem? Jehova i makim pinis samting Adam na Iv bai mekim?