Lait Bilong Ol i No Dai
LONG taim bilong Baibel, kain kain hevi i bin painim ol gutpela Witnes bilong Jehova. Ol man i birua long ol, na sampela wok bilong ol i olsem i no kamap gutpela. Tasol maski ol i bel hevi, ol i no lusim wok. I olsem lait bilong ol i no dai.
Tingim profet Jeremaia: God i makim em bilong mekim wok profet insait long lain Juda, em ol i bikhet na givim baksait long lotu i tru. Jeremaia i bin tokaut long bagarap bai painim Jerusalem. (Jeremaia 1:11-19) Long dispela as, planti taim ol wantok bilong em i birua long em; ol i tingim em olsem man bilong toktok tasol long ol hevi na samting nogut bai kamap.
Wanpela taim pris Pasur, em namba wan ofisa bilong ol lain i save was long haus bilong God, i paitim Jeremaia na kalabusim em, long wanem, Jeremaia i bin autim strongpela tok profet. Taim dispela hevi i painim Jeremaia, em i tok: “Nau olgeta manmeri i wok long tok bilas long mi na ol i lap long mi oltaim. Olgeta taim mi autim tok bilong yu, yu save mekim mi i bikmaus na singaut olsem, ‘Pait bai i kamap. Yupela bai i bagarap.’ Ol man i harim dispela tok na ol i save semim mi na tok nogut long mi oltaim.” Profet Jeremaia i bel hevi tru, olsem na em i tok: “Mi tok long mi yet long mi no ken tingting moa long nem bilong yu.”—Jeremaia 20:1, 2, 7-9.
Tasol Jeremaia i no larim bel hevi i daunim em. Em i tingim “tok bilong [Jehova]” na em i tok olsem: “Mi pilim tok bilong yu i olsem wanpela bikpela paia i stap long bel bilong mi na i olsem paia i lait insait long ol bun bilong mi. Mi trai hat long pasim tok bilong yu, tasol mi no inap.” (Jeremaia 20:8, 9) Bel bilong Jeremaia i kirapim em strong long autim ol tok bilong God, na spirit holi i strongim em na helpim em long pinisim wok bilong em.
Planti hevi i bin painim aposel Pol tu, na ol dispela hevi inap daunim em sapos em i no strongim bel bilong em. Em i karim hevi long taim bilong ol bikpela bagarap, na taim sip i bagarap, na ol man i birua long em na givim kanda long em. Na tu, ‘long olgeta de em i save tingting planti long pasin bilong lukautim gut olgeta sios.’ (2 Korin 11:23-28) Long olgeta de Pol i mas wok long stretim ol hevi, na em i tingting planti long ol nupela kongrigesen em i bin mekim hap wok bilong kamapim. Em i no gutpela man olgeta na wanpela hevi em i mas wok long karim i ‘olsem nil i save sutim skin bilong em’—ating ai bilong em i no inap lukim klia ol samting. (2 Korin 12:7; Rom 7:15; Galesia 4:15) Na tu sampela brata i mekim tok baksait long Pol, na bihain em i harim.—2 Korin 10:10.
Tasol Pol i no larim bel hevi i daunim em. I no olsem em i gat bikpela strong long em yet winim ol narapela man; nogat. (2 Korin 11:29, 30) Wanem samting i mekim na ‘paia i stap long bel’ bilong Pol i no dai? Wanpela samting, em i gat ol poroman bilong strongim em, na sampela i bin go wantaim em long Rom taim ol i kalabusim em i stap long wanpela haus. (Aposel 28:14-16) Namba tu samting, em aposel Pol i gat stretpela tingting long ol samting i bin painim em na em i save, em i no gat asua; ol man i birua na mekim nogut long em, ol yet i gat asua. Klostu long taim Pol i dai, em i skelim wok autim tok em i bin mekim na em i gat stretpela tingting long en. Em i tok: “Nau prais bilong man i winim resis em i redi na i wetim mi i stap. Dispela prais em i olsem. Bikpela bai i kolim mi stretpela man. Bikpela i save bihainim pasin i stret tasol na skelim pasin bilong ol manmeri.”—2 Timoti 4:8.
Nambawan samting tru i helpim Pol, oltaim em i save go klostu long God Jehova long rot bilong beten, na ‘Bikpela yet i bin sambai long em na givim strong long em.’ (2 Timoti 4:17) Pol i tok: “Krais i save strongim mi, na long strong bilong em mi inap mekim olgeta samting.” Pol inap stap gut long wok bilong Jehova, long wanem, em i save toktok gut wantaim God na ol wanlotu Kristen, na em i gat stretpela tingting long wok bilong em bilong autim tok.
God i givim spirit holi long Pol na em i raitim dispela tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.” (Galesia 6:7-9) Wanem kaikai bai yumi kisim? Laip i stap oltaim oltaim. Olsem na yu mas bihainim pasin bilong Jeremaia, Pol, na planti ol narapela gutpela witnes bilong Jehova em Baibel i stori long ol. No ken larim bel hevi i daunim yu. No ken larim lait bilong yu i dai.—Skelim wantaim Matyu 5:14-16.
[Ol Piksa long pes 25]
Pol na Jeremaia i no larim lait bilong ol i dai