Taim Tok Bilong Ol Man i Pait Wantaim Tok i Tru

LUKAUT​—⁠WARA I NO GUTPELA BILONG DRING. Ating yu bin lukim sampela toksave olsem, a? Long planti hap ol man i save was gut long wara ol i save dring, long wanem, ol i save pinis, sampela wara i gat ol pipia na marasin nogut long en na i no gutpela long dring. Wanpela lain i skelim dispela samting na i tok, tru wara em i samting bilong helpim man long i stap laip, tasol ol pipia na marasin nogut ol i save tromoi long ol wara, dispela i mekim na wara inap kamap olsem “samting ol man i kisim olkain binatang bilong sik long en na . . . ol marasin nogut.”​—⁠Buk Water Pollution.

Bagarapim Wara Bilong Tok i Tru

Ol tok bilong ol man i save pait wantaim tok i tru, ol i kain olsem wara bilong dring i gat ol pipia na marasin nogut long en. Ating yumi no save na yumi holimpas tok bilong ol man​—⁠olsem ol toksave, o tingting, o bilip, o pasin i kam long ol tumbuna, na ol tingting giaman na tok giaman bilong ol man i bagarapim. Ol dispela samting inap bagarapim tru man long ol samting bilong spirit, olsem wara nogut inap bagarapim man.

Na maski yumi ting Baibel i as bilong ol bilip bilong lotu yumi bin kisim long ol tumbuna, yumi olgeta i mas glasim gut ol dispela bilip bilong yumi. Tingim gut Martin Luter​—⁠em i holimpas tok bilong ol man i stap long taim bilong em na em i daunim tru tok bilong Kopenikus, long wanem, em i bilip olsem Baibel yet i helpim tok bilong em. Tasol Luter i no bihainim gutpela pasin bilong ol Beria bilong bipo, em “ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.”​—⁠Aposel 17:​10, 11.

Tingim ol samting nogut ol dispela bilip bilong ol man i bin mekim long sampela Juda long taim bilong Jisas. Ol i bilip strong olsem ol dispela tok i tru. Wanpela taim ol i sutim tok long ol disaipel bilong Jisas, olsem ol i no save bihainim lo ol i kisim long ol tumbuna. Orait Jisas i givim askim long ol olsem: “Olsem wanem na yupela i save bihainim pasin bilong yupela yet [olsem pasin ol i kisim long ol tumbuna], na yupela i brukim lo bilong God?” (Matyu 15:​1-3) Wanem samting i bin kirapim ol Juda long mekim olsem? Jisas i kamapim as bilong en taim em i kolim wanpela tok bilong profet Aisaia, em i tok: “Ol i save autim lo bilong ol man tasol na tok, ‘Dispela em i tok bilong God.’ Olsem na ol i lotu nating long mi.”​—⁠Matyu 15:9; Aisaia 29:⁠13.

Tru tumas, ol i lusim ol tok i tru em God i as bilong en, na ol i bihainim tingting em ol man i as bilong en​—⁠o ol spirit nogut i as bilong en. Buk Insight on the Scriptures, Volyum 1, pes 506, i tok: “Ol Farisi long dispela taim bipo ol i save skulim ol man olsem: Sapos man i gat mani samting bilong helpim papa o mama, tasol em i tokim tupela, em i makim dispela bilong givim long God, orait em i no inap mekim wok long dispela mani bilong helpim papamama, maski ol i stap rabis, tasol sapos em i laik, em inap mekim wok long en bilong helpim em yet, i go inap long taim em i dai.” Dispela tingting bilong ol man i bagarapim tok i tru olsem ol pipia na marasin nogut i save bagarapim wara, na i nogutim ol Juda long ol samting bilong spirit. Planti Juda ol i sakim dispela Mesaia ol i bin wet longtaim tru long em.

Ol Lotu i Gat Nem Kristen

Taim Jisas i dai pinis, pasin bilong bagarapim “wara” bilong tok i tru i nogutim sampela man moa long ol samting bilong spirit. Planti man i tok ol i disaipel bilong em, ol i kirap bihainim tok ol i kisim long maus bilong ol man na ol i kamapim sampela nupela bilip. Wanpela buk (Cyclopedia of Biblical, Theological, and Ecclesiastical Literature, bilong McClintock na Strong) i tok, sampela man i tok ol i Kristen, ol i ting ol dispela tok ol i bilip long en em ‘ol tok lotu Kristen bilong pastaim i bin kisim long maus bilong ol aposel, na i kam i kam inap long taim bilong ol, na ol tok i stret olgeta na i no paul liklik.’

Tasol planti tok ol i bin kisim long ol man ol i kranki. Olsem dispela buk i tok, ol dispela nupela tok bilong ol man ol i kisim, “ol i pait wantaim ol narapela tok bilong ol, na ol i pait tu wantaim ol rait bilong ol aposel yet, em ol i holim long han bilong ol.” Aposel Pol i toksave pinis long ol Kristen long dispela samting bai kamap. Em i tok: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong . . . graun. Ol i no save bihainim tingting bilong Krais.”​—⁠Kolosi 2:⁠8.

Long nau tu, planti bilip bilong lotu i pait wantaim ol rait bilong ol aposel. Ol lotu i gat nem Kristen ol i kisim planti tok ol spirit nogut i as bilong en na ol i tanim wantaim tok i tru, olsem tok bilong God Triwan, bikpaia, ol man i gat tewel i no save dai, litimapim kantri, lotuim imis; ol dispela bilip i bagarapim tok i tru, olsem man i tromoi pipia na marasin nogut long wara.a (1 Timoti 4:​1-3) Stori bilong ol samting i bin kamap bipo i kamapim klia ol bikpela sik bilong spirit i bin painim ol man i bin bilip long tok i kam long ol spirit nogut na ol i kamap olsem bilip bilong ol lotu i gat nem Kristen.​—⁠Skelim wantaim Aisaia 1:​4-7.

Kirap long taim ol man i kamap nupela long graun, dispela pasin bilong bagarapim tok i tru em i bin i stap. Satan i wok yet long bihainim pasin em i bin kirapim long Iden long bagarapim tingting bilong ol man long rot bilong ol tok giaman. (Jon 8:44; 2 Korin 11:⁠3) Bihain long Tait long taim bilong Noa, ol man i kamap planti na ol i go nabaut long olgeta hap bilong graun, na ol tok na tingting bilong ol man em ol spirit nogut i as bilong en i kisim ol lain man na bagarapim save bilong ol, olsem marasin nogut i save bagarapim wara.

Bagarapim Man Long Spirit

Taim ol i tanim ol bilip giaman wantaim tok i tru, dispela inap nogutim man olsem wanem? Bilong save long dispela, yumi ken tingim samting nogut inap painim skin bilong man taim em i dring wara nogut. Wanpela saveman i tok: “Inap olsem 200 milion manmeri ol i kisim sik skistosomaiasis (bilhasia) [wanpela sik fiva ol i kisim long ol demdem, na sik i mekim na ol i sot long blut, na skin i pen samting, na man i olsem i sik oltaim, na em inap i dai tu], na as bilong dispela sik em wara nogut ol man i waswas long en. Inap 500 milion manmeri ol i gat wanpela sik bilong ai, olsem trakoma, em wanpela bikpela samting i mekim na planti man i kamap aipas, na as bilong en em wara nogut ol man i save waswas long en. . . . Inap olsem 2 bilion manmeri ol i no gat gutpela wara bilong dring.” (Buk Our Country, the Planet) Na planti milion manmeri ol i bin kamap sik na aipas na i dai long ol samting bilong spirit, long wanem, ol i bin bihainim tok bilong ol man em ol i bin tanim wantaim tok giaman bilong ol spirit nogut na ol i bagarapim.​—⁠1 Korin 10:​20, 21; 2 Korin 4:​3, 4.

I olsem: Planti man i longlong nabaut na ol i no save, Krais Jisas i stap olsem wanem wantaim Papa bilong em, God Jehova. Wanpela pasin i kamap namel long sampela man i tok ol i Kristen na ol i rausim nem holi bilong God, Jehova, long hap bilong Baibel ol i kolim Ol Skripsa Grik. Long wanpela buk (Journal of Biblical Literature), George Howard i tok: “Long tingting bilong mipela, taim ol i rausim Tetragram[aton] [olsem nem bilong God long rait Hibru], dispela i paulim tingting bilong planti Kristen bilong pastaim ol i no bilong lain Juda na ol i no save, ‘Bikpela bilong yumi, God,’ i husat na ‘Bikpela bilong yumi, Krais,’ i husat.”

Na tingim tu samting nogut i kamap long dispela tok bilong ol man olsem man i gat tewel i no save dai, em Baibel i no as bilong en​—⁠dispela tok i paulim tru tingting bilong ol man, na ol i kalabus long ol stori giaman bilong ol tumbuna, na ol i pret pret. (Skelim wantaim Saveman 9:5; Esekiel 18:⁠4.) Hamas manmeri ol i kalabus long pasin bilong lotuim ol tumbuna o ol i pret pret long olgeta taim, nogut ol man i dai pinis bai kam bek na mekim nogut long ol? Planti tru, a? Dispela bilip i bin kirapim sampela man long kilim i dai skin bilong ol yet na ol narapela man tu.

Planti Japan i bilip olsem taim ol i dai, tewel bilong ol bai i lusim ol na i go bung wantaim ol narapela long wanpela hap. Olsem na sampela papamama, taim ol i laik kilim i dai skin bilong ol yet, ol i ting i gutpela sapos ol i kilim i dai ol pikinini bilong ol tu. Wanpela buk (An English Dictionary of Japanese Ways of Thinking) i tok: “Long Japan, taim man i kilim i dai skin bilong em yet, sampela taim ol man i no save tok, em i pasin nogut; planti ol i ting em i wanpela rot bilong man long tok sori long wanpela bikpela rong em i bin mekim . . . Na taim nius i stori long wanpela famili olgeta i kilim i dai skin bilong ol yet, nius i mekim tok sori long dispela samting i kamap.”

Skelim Gut Tok Bilong Ol Man

Nau yumi save, taim yumi bihainim nating ol bilip na pasin bilong ol man, dispela inap nogutim yumi. Orait, yumi mas mekim wanem? Klostu long yia 100, aposel Jon i givim tok long ol Kristen, olsem: “Ol pren, planti giaman profet i save raun nabaut long graun. Olsem na yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit [olsem yupela i save traim wara, i gutpela o nogat], bai yupela i ken save, ol i kam long God, o nogat.” (1 Jon 4:1; lukim tu 1 Tesalonaika 5:21.) Olsem wanem yu ken save, wanpela tok bilong ol man inap nogutim yu? Yu mas i gat wanpela samting i gat lo bilong skelim, na lo bilong en i stret olgeta, na bai yu ken skelim bilip bilong yu, i stret wantaim dispela lo o nogat.

Dispela samting em Baibel. Krais Jisas i tok: “Tok bilong yu i tru olgeta, na mi laik bai yu mekim tok tru bilong yu i wok insait long bel bilong ol, na mekim ol i kamap ol lain bilong yu stret.” (Jon 17:17) Na em i tok tu olsem: “Taim i laik kamap, na nau i kamap pinis, na olgeta man i laik lotu tru bai ol i lotu long Papa long strong bilong Holi Spirit na long pasin i tru.” (Jon 4:23) Sapos yu mekim wok long Tok Bilong God, em Baibel, bilong skelim bilip bilong yu, bai yu kisim tok i tru olgeta, olsem gutpela klinpela wara, na i no olsem tok bilong ol man na ol tok i kam long ol spirit nogut, i olsem wara i gat ol pipia na marasin nogut long en.​—⁠Jon 8:​31, 32; 2 Timoti 3:⁠16.

Na tingim dispela samting tu: Maski dispela marasin nogut i stap long wara em i liklik tru, em inap bagarapim man. Sampela taim sik bilong en bai hait i stap planti yia long skin bilong man, tasol bihain em bai kamap ples klia. Shridath Ramphal, bipo em i presiden bilong wanpela lain bilong lukautim gut ol samting long graun, em i tok, “Wara i gat doti long en i kamap olsem namba wan samting bilong bagarapim man. Inap olsem 25 tausen manmeri ol i save dai long olgeta de, na as bilong en, em ol i mas mekim wok long dispela wara nogut.” Na tok bilong ol man i gat ol bilip giaman long en, olsem pipia nogut i stap long wara, em inap bagarapim man moa yet.

Orait, sapos nau yu save pinis, ol bilip bilong ol man yu bin bihainim inap planti yia pinis ol i pait wantaim tok i tru, yu gat strongpela bel na bai yu inap lusim ol dispela bilip yu stap kalabus long en? Harim gut ol toksave. Ol tok yu kisim long ol man, skelim gut bambai yu ken save, ol i stret wantaim tok i tru bilong God o nogat. Long dispela rot yu inap lukautim yu yet wantaim famili bilong yu.​—⁠Song 19:​8-11; Sindaun 14:15; Aposel 17:⁠11.

[Futnot]

[Piksa long pes 7]

Tok i tru bilong Baibel i olsem wanpela wara i klin olgeta na i no gat doti long en