Ripot Long Wok Bilong Kingdom

‘Mekim Wok Evanjelis’

WANEM insait bilong dispela tok, evanjelis? Long tok Grik, em eu·ag·ge·li·stesʹ, na i gat narapela tok, em eu·ag·geʹli·on, olsem “gutnius”; tupela tok Grik hia i gat wanpela as tasol. Olsem na evanjelis em i man bilong autim, o bringim, gutnius.

Olgeta Kristen tru ol i evanjelis, long wanem, ol i save autim gutnius bilong Kingdom bilong God. Olsem na aposel Pol i tokim Timoti long “mekim wok bilong autim gutnius [olsem wok evanjelis].” Timoti i mas tingim dispela wok i bikpela samting. Pol i tok strong long Timoti long “tingting klia oltaim” na long “mekim tru dispela wok [bilong autim gutnius].”​—⁠2 Timoti 4:⁠5.

Yumi tu i man bilong autim gutnius, olsem evanjelis, na yumi tingim dispela wok i bikpela samting, na yumi “tingting klia oltaim,” olsem was i stap bilong painim rot long autim gutnius. Long dispela rot planti bilong yumi ol i bin kisim save long Jehova na ol tok promis bilong em taim ol Witnes Bilong Jehova i autim tok long ol long kain kain taim na ples. Dispela samting i bin painim Seymore, em wanpela man bilong Babedos.

Seymore em i tisa long wanpela skul bilong gavman. Charles em i mekim wok tisa haptaim long dispela skul, na em i wanpela Witnes Bilong Jehova. Oltaim em i was i stap bilong painim rot long autim tok. Em i save autim gutnius long olgeta de, olsem wanpela painia, na oltaim em i painim rot bilong autim gutnius long ol man. Em nau, Charles i autim tok long Seymore, na dispela em i namba wan taim bilong Seymore long harim tok bilong Kingdom.

I no longtaim na Seymore i tingting strong long autim tok i tru bilong Baibel long ol man. Olsem na em i kirap autim tok long ol man long ples wok bilong em, na long ol sumatin bilong em tu. Long sampela kantri i tambu long skulim ol pikinini long ol samting bilong lotu long ol skul bilong gavman. Tasol dispela man i gat wok long skulim ol pikinini long lotu na long stretpela pasin ol i mas bihainim. Tasol nau ol nupela save em i kisim long Baibel i senisim pinis olpela tingting bilong em long ol dispela samting. Long taim bilong malolo long belo samting, em i toktok wantaim ol pikinini long tok promis bilong God long kamapim nupela taim long graun na ol man i gat rot long kisim laip i stap oltaim oltaim.

Ol pikinini i ting olsem wanem long dispela tok? Planti ol i laikim tru dispela gutnius bilong Kingdom ol i bin harim. Bihain Seymore i kirapim Baibel-stadi wantaim 13 sumatin bilong em. Ol i laikim tru, olsem na ol i stretim rot bambai ol i ken stadi tupela taim long olgeta wik. Bihain planti ol i kirap i go long ol miting Kristen long Haus Kingdom bilong ol Witnes Bilong Jehova. I kam inap long nau i gat 9-pela ol i dediket na kisim baptais na kamap Witnes Bilong Jehova. Nau long dispela taim Seymore em i wok strong moa long autim gutnius olsem wanpela painia oltaim na wanpela elda insait long wanpela kongrigesen bilong ol Witnes Bilong Jehova long Babedos.

I gat planti stori moa long olsem wanem ol Witnes Bilong Jehova i save “mekim wok bilong autim gutnius” olsem evanjelis, na wanpela rot bilong ol long mekim, em ol i save autim tok long kain kain taim na ples. Ol i bihainim tok bilong Baibel i stap long Kolosi 4:​5, 6, i tok: “Taim yupela i stap wantaim ol man i stap ausait long sios, yupela i mas bihainim gutpela tingting na mekim ol stretpela pasin. . . . Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.”