Givim Samting—Yumi Mas Mekim Olsem?

ATING yu save pinis, pasin bilong ples i save bosim pasin bilong givim presen long man. Long planti lain, i gat taim bilong givim presen long man, na ol i ting ol i mas mekim olsem. Ating ol i givim ol dispela presen bilong makim olsem ol i tingim man o laikim tru man. Planti presen ol man i save kisim, ol i no mekim wok long en; tasol sampela presen ol man i save kisim, ol i amamas tru long en, long wanem, ol i bin sot long dispela samting na nau ol i kisim pinis.

Long kantri Denmak, taim meri i karim pikinini, ol pren na wanblut i save kam lukim em na ol i karim ol presen bilong pikinini i kam; ol i laik bai mama bilong pikinini inap mekim wok long ol dispela presen. Long sampela kantri, ol i save wokim pati na ol man i givim ol presen, em i bilong pikinini taim em i kamap.

Long planti hap, ol man i mas givim presen long sampela taim long olgeta yia. Ol Kristen bilong pastaim ol i no gat dispela pasin, tasol nau long dispela taim, ol lain i tok ol i Kristen na ol lain i no Kristen ol i save bihainim dispela pasin bilong givim presen long ol dispela taim bilong yia. Long sampela lain, ol i save givim presen long pikinini long betde bilong em, tasol taim em i go bikpela ol i no tingim tumas. Tasol ol Grik i no olsem. Long kantri Grik ol i strong tru long mekim betde. Na ol i save givim presen long man long de ol i kolim “nem-de” bilong em. Em wanem kain de? Lotu bilong ol i tok, i gat narapela narapela “santu” bilong olgeta wan wan de bilong yia, na ol i save putim nem bilong ol “santu” long planti pikinini. Taim de bilong dispela “santu” i kamap, ol man i holim nem bilong em ol i save kisim ol presen.

Ol Korea i save mekim betde bilong pikinini, na tu, ol i gat wanpela bikpela de bilong ol, ol i kolim De Bilong Ol Pikinini. Long dispela de ol famili i save raun wantaim na ol papamama i save givim presen long ol pikinini bilong ol, maski pikinini i bin kamap long narapela de bilong yia. Na ol Korea i gat De Bilong Ol Papamama tu, na long dispela de ol pikinini i save givim presen long papamama; na i gat De Bilong Ol Tisa, na long dispela de ol sumatin i save litimapim nem bilong ol tisa bilong ol na givim presen long ol. Na wanpela pasin bilong ol Korea i olsem: Taim man o meri i kisim pinis 60 krismas, ol i wokim bikpela pati bilong em. Ol wanblut na pren ol i bung na ol i tok olsem ol i laik bai em i stap longtaim na i stap amamas, na ol i save givim presen long man o meri i kisim pinis bikpela krismas olsem.

Na long taim bilong marit tu, planti man i save bihainim pasin bilong givim presen. Long Kenya, taim man na meri i marit, famili bilong man i mas givim presen long famili bilong meri. Na ol man i kam long bung bilong marit, ol tu i save karim ol presen i kam. Sampela nupela marit i save bihainim pasin bilong ples na ol i sindaun long wanpela pletfom na ol man i save bringim ol presen i kam long tupela. Taim olgeta wan wan i givim presen, ol i save kolim nem bilong em na tokaut olsem em i bringim presen i kam long tupela. Planti man bilong givim presen ol bai bel hevi stret sapos man bilong mekim toksave em i no kamapim nem bilong ol.

Pasin bilong ol Lebanon i olsem: Taim man na meri i marit, ol pren na ol man i sindaun long hap bilong em​—⁠na sampela man ol i no save gut long tupela​—⁠ol i save kam lukim tupela inap planti de bihain long de bilong marit, na ol i karim ol presen i kam. Taim ol Lebanon i pikinini yet, ol i save lain olsem pasin bilong givim presen em i wanpela samting ol i mas mekim, wankain olsem bekim dinau. Wanpela man bilong Lebanon i tok, “Sapos mipela i no mekim olsem, bel bilong mipela i no gutpela. Em i pasin bilong mipela.”

Tasol long planti kantri, bikpela de tru bilong ol man i mas givim presen, em Krismas. Ating long hap bilong yu tu i wankain, a? Long 1990 ol i tok, ol Amerika i save lusim olsem 40 bilion kina samting long olgeta yia bilong baim ol presen bilong Krismas. Na long Japan ol lain bilong lotu Buda na lotu Sinto ol i givim bel tru long mekim Krismas, na long Yurop na Saut Amerika na sampela hap bilong Afrika, ol i gat ol narapela narapela kain pasin bilong mekim Krismas.

Ol man i ting Krismas em i taim bilong ol man i stap amamas. Tasol planti ol i no stap amamas long dispela taim. Na tu, planti man i pilim olsem bikpela wok ol i mas mekim bilong raun raun long ol stua na painim ol presen, na ol i mas tromoi bikpela mani long baim, dispela i save givim hevi long ol na i daunim liklik amamas ol i kisim long dispela de.

Tasol Baibel i tok, pasin bilong givim samting i save mekim man i amamas. Na dispela tok i tru sapos man i amamas long givim samting na em i no bel hevi na mekim.​—⁠Aposel 20:⁠35.