Bilip Long Jehova na Tok Bilong Em
“Ol man i save long yu bai ol i bilip tru long yu.”—SONG 9:10.
LONG dispela taim nau yumi stap long en, God i singautim ol man long bilip long em na long Tok bilong em, em Baibel, tasol long planti man ating dispela singaut i no samting ol inap bihainim—ol i ting dispela i no inap helpim ol. Tasol long bipo yet na i kam inap nau, gutpela tingting na save bilong God i no bin popaia liklik—oltaim em i tru na em i bin helpim gut ol man. Man bilong wokim namba wan man na meri em i As bilong marit na famili, na em i save moa long ol samting yumi mas kisim bilong helpim yumi. Ol samting yumi mas kisim, em i no bin senis liklik. Olsem na rot bilong helpim yumi long kisim ol dispela samting, em tu i no senis—em i wankain yet. Ol gutpela savetok bilong Baibel, maski ol i bin raitim inap sampela tausen yia i go pinis, em inap soim rot yet long yumi long i stap gutpela na long stretim ol hevi. Sapos yumi bihainim ol tok bilong Baibel, bai yumi stap amamas, maski yumi stap namel long ol man i hambak long ol save bilong ol na ol man i gat bikpela save long wok saiens!
2 Taim yumi bilip long Jehova na bihainim ol lo bilong Baibel, dispela i save helpim yumi long olgeta de. Dispela samting i kamap ples klia long i stap bilong planti milion Witnes Bilong Jehova long olgeta hap, em ol i bilip na strongim bel na dispela i strongim ol long bihainim ol tok bilong Baibel. Ol i bilip long Man bilong wokim olgeta samting na ol i bilip long tok bilong em long Baibel, na gutpela samting i kamap long dispela. (Song 9:9, 10) Ol i bihainim ol lo bilong God na dispela i mekim na ol i kamap gutpela moa long pasin bilong ol long i stap klin, na long mekim tok i tru tasol na i no giaman o stil, na long wok strong, na long tingim gut laip na ol samting bilong ol narapela man, na kisim kaikai na dring long skel tasol. Na pasin bilong ol long bihainim lo bilong God, dispela i mekim na pasin bilong laikim tru ol narapela na lainim gut ol pikinini em i kamap strong insait long famili—ol i singautim ol man i kam long haus bilong ol, na isi long ol man, na marimari long ol, na mekim ol narapela gutpela pasin. Na ol i abrusim ol samting nogut i save kamap long pasin bilong belhat, birua, kilim man i dai, bel kaskas, pret, les, pasin antap, giaman, bagarapim gutnem bilong man, pasin pamuk. (Song 32:10) Tasol God i no tok promis tasol long gutpela samting bai painim ol man i bihainim ol lo bilong em. Jisas i tok, ol man i bihainim rot bilong ol Kristen ol bai kisim “100 moa. Taim ol i stap yet long dispela graun . . . ol bai i kisim planti haus na planti brata na planti susa na planti mama na planti pikinini na planti gaden. Na tu, bai sampela man i mekim pasin nogut long ol. Na long taim i laik kamap bihain ol bai i kisim laip i stap gut oltaim oltaim.”—Mak 10:29, 30.
No Ken Bilip Long Save Bilong Graun
3 Pasin bilong ol man bilong graun, em ol i save lusim tingting long ol samting God i laik bai ol i mas mekim. Ol i ting ol i gat bikpela save moa, o ol i ting gutpela save bilong ol saveman bilong graun i winim gutpela tingting na save bilong God, long wanem, ol i kisim ol nupela save bilong helpim ol man bilong dispela taim nau. Ol wokman bilong God tu inap kisim dispela kain tingting, long wanem, ol i stap namel long ol man bilong dispela graun. Olsem na taim Papa bilong yumi long heven i singautim yumi long putim yau long tok bilong em, em i givim toksave long yumi olsem: “Pikinini, mi laik skulim yu nau, na yu no ken lusim tingting long dispela tok. Nogat. Oltaim yu mas tingim gut. Sapos yu bihainim dispela tok bai yu stap longpela taim long graun na bai yu sindaun gut tru. Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim. Nogut yu ting, save bilong yu yet em i samting tru. Nogat. Yu mas aninit long Bikpela na givim baksait long pasin nogut.”—Sindaun 3:1, 2, 5-7.
4 Save bilong dispela graun i pulap tru na i gat kain kain rot long kisim. I gat planti bikpela skul i stap, na “ol man i save raitim planti buk, na dispela kain wok i no gat pinis bilong en.” (Saveman 12:12) Nau long rot bilong kompyuta ol man inap kisim planti save tru long kain kain samting. Tasol maski ol i gat rot bilong kisim dispela bikpela save, ol i no kisim gutpela tingting, na dispela save i no helpim ol long stretim ol hevi bilong graun, nogat. Ol hevi bilong graun i wok long go bikpela tru long olgeta de. Olsem na Baibel i tok: “Gutpela save bilong dispela graun em i olsem longlong pasin tasol long ai bilong God.”—1 Korin 3:19, 20.
5 Nau yumi stap klostu long pinis bilong taim bilong las de, olsem na yumi save, nambawan man bilong giamanim ol man, em Satan, em i laik kamapim planti tok giaman bambai ol man i no ken bilip moa olsem tok bilong Baibel i tru. Na sampela saveman bilong graun i save skelim skelim ol tok bilong Baibel, ol i raitim planti buk i laik givim tingting long ol man olsem God i no as bilong ol tok bilong Baibel, na yumi no ken bilip tumas long en. Pol i toksave long ol wanwok Kristen olsem: “Timoti, yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God. Na stap longwe long ol man i ting ol i gat gutpela save na ol i mekim kain kain toktok i pait long tingting bilong God. Sampela man i bihainim dispela kain save na ol i lusim pinis pasin bilong bilip.” (1 Timoti 6:20, 21) Na Baibel i toksave moa olsem: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”—Kolosi 2:8.
Sakim Pasin Bilong Tupela Tingting
6 Na narapela trik bilong Satan long giamanim ol man, em i laik givim sampela tingting long yumi na bai yumi gat tupela tingting long Baibel. Oltaim em i save was i stap, na taim em i lukim olsem bilip bilong yumi i no strong tumas, em bai mekim mekim ol samting bilong kirapim yumi long kisim tupela tingting. Taim wanpela Kristen i gat tupela tingting long sampela tok bilong Baibel, em i mas save, man i bin kirapim em long mekim olsem, em dispela man i bin tokim Iv: “Ating God i tambuim yutupela long kaikai pikinini bilong olgeta diwai bilong gaden, a?” Satan i kirapim pinis Iv long kisim tupela tingting, na nau em i mekim wanpela tok giaman long Iv, na Iv i bilipim dispela tok. (Stat 3:1, 4, 5) Sapos yumi no laik kisim tupela tingting olsem Iv na yumi lusim bilip, yumi mas was gut i stap. Sapos yu lukim olsem yu gat tupela tingting long Jehova na Baibel na oganaisesen bilong em, kwiktaim yu mas rausim dispela tingting long bel bilong yu, nogut em i kamap strong na bagarapim bilip bilong yu.—Skelim wantaim 1 Korin 10:12.
7 Orait yumi ken mekim wanem? Yumi mas bilip tru long Jehova na tok bilong em long Baibel. “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. . . . Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut.” (Jems 1:5, 6; 2 Pita 3:17, 18) Olsem na namba wan samting bilong mekim, em yu mas beten strong long Jehova. (Song 62:8) Bihain yu mas askim ol gutpela elda bilong kongrigesen long helpim yu. (Aposel 20:28; Jems 5:14, 15; Jut 22) Ol bai helpim yu long painim as bilong dispela tupela tingting yu bin kisim, ating as bilong en em pasin antap o sampela tingting kranki bilong yu.
8 Olsem wanem? Yu bin kaunim o harim sampela tingting bilong ol man i bikhet na lusim bilip, o tok bilong ol saveman bilong dispela graun, na nau yu kisim tupela tingting olsem gip nogut i laik bagarapim yu? Baibel i tok olsem: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en. Givim baksait long olkain toktok nabaut i no bihainim tingting bilong God. Dispela kain tok bai i bringim ol man i go moa yet long rot bilong givim baksait long God. Dispela kain tok em i olsem sua nogut bilong bagarapim man, na em bai i kamap bikpela tru.” (2 Timoti 2:15-17) Planti man em ol i bin pundaun long tok bilong ol man i bikhet na lusim bilip, samting i bin kirapim ol long lusim stretpela rot em olsem: Pastaim ol i bin toktok planti olsem ol i ting ol brata sista insait long oganaisesen bilong Jehova i no bin mekim gutpela pasin long ol. (Jut 16) Bihain ol i laik painim rong long sampela bilip bilong yumi. Sapos yu toktok planti o yu no amamas long sampela pasin bilong mekim wok insait long kongrigesen Kristen, orait kwiktaim yu mas rausim dispela kain tingting, olsem dokta i save katim na rausim han o lek samting i gat sua nogut long en na em inap bagarapim man. (Kolosi 3:13, 14) Rausim olgeta samting i wok long givim tupela tingting long yu.—Mak 9:43.
9 Pas gut long Jehova na oganaisesen bilong em. Bihainim pasin bilong Pita, em i bin tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.” (Jon 6:52, 60, 66-68) Makim taim bilong stadi long Tok bilong Jehova bambai bilip bilong yu i ken stap strong, olsem wanpela plang, em inap “mekim i dai olgeta spia paia dispela man nogut Satan i save sutim i kam long yupela.” (Efesus 6:16) Mekim yet wok Kristen bilong autim tok, na long pasin sori givim tok bilong Kingdom long ol man. Long olgeta de, tingim gut na amamas long ol blesing Jehova i bin givim long yu. Na yu mas tenkyu long yu bin kisim save long tok i tru. Sapos yu mekim ol dispela samting long olgeta taim olsem Kristen i save mekim, dispela bai helpim yu long i stap amamas, na sanap strong na no ken les, na yu no gat tupela tingting.—Song 40:4; Filipai 3:15, 16; Hibru 6:10-12.
Bihainim Tok Bilong Jehova Insait Long Marit
10 Taim Jehova i stretim rot bilong man na meri i ken sindaun wantaim olsem tupela marit, Jehova i mekim olsem bambai ol man i ken pulap long graun, na em i gat laik tu long ol i ken i stap amamas tru. Tasol sin i kamap long graun na nau ol man i no gutpela tumas, na dispela i mekim na ol bikpela hevi i kamap insait long marit. Sampela hevi bilong marit i save painim ol Kristen tu, long wanem, ol tu i gat sin na ol i no gutpela tumas, na ol hevi bilong dispela taim nau i painim ol tu. Tasol sapos ol i bilip tru long Jehova na tok bilong em long Baibel, marit bilong ol na wok bilong ol long mekim bikpela long ol pikinini em inap kamap gutpela. Ol Kristen i no ken bihainim ol pasin bilong dispela graun insait long marit bilong ol. Baibel i tok strong olsem: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.”—Hibru 13:4.
11 Taim tupela marit i bihainim tok bilong Baibel long inapim laik bilong tupela, orait pasin bilong laikim tru narapela, na stap gut long poroman, na bel isi, em bai stap insait long marit bilong ol. Man wantaim meri bilong em i save long lo bilong Baibel olsem man i het bilong famili, na ol i bihainim. Taim sampela hevi i kamap insait long marit, ating as bilong en, em ol i no bihainim tok bilong Baibel. Bilong stretim wanpela hevi i bin i stap longtaim, tupela marit i mas tingim as tru bilong dispela hevi, na nau ol i ken wok long stretim dispela samting i bin kamapim hevi namel long tupela—nogut ol i tingting long stretim dispela hevi tasol. Sapos tupela i bin toktok wantaim long dispela samting na tupela i no wanbel, ol i ken singautim wanpela elda i gat pasin sori na em i ken helpim ol.
12 Wanem samting i bin kamapim dispela hevi? Tupela i no save toktok gut wantaim, o narapela i no pilim tingting o hevi bilong narapela, o meri i no daun long man, o meri i no amamas long pasin bilong man long pasim tok long ol samting ol i mas mekim? O ating tupela i no wanbel long pasin bilong mekim bikpela long ol pikinini, o long ol samting bilong maritpasin? O ating as bilong hevi em ol samting bilong mani, o bilong kisim amamas long taim bilong malolo, o ol poroman bilong ol, o meri i mas wok mani o nogat, o ol bai sindaun long wanem hap? Maski wanem hevi bilong tupela, Baibel i kamapim ol gutpela tok bilong stretim ol dispela hevi—em i kamapim sampela lo bilong en o sampela tok em ol lo i as bilong en. (Matyu 19:4, 5, 9; 1 Korin 7:1-40; Efesus 5:21-23, 28-33; 6:1-4; Kolosi 3:18-21; Taitus 2:4, 5; 1 Pita 3:1-7) Taim tupela marit i no strong long narapela i mas bihainim laik bilong narapela, na ol i larim pasin sori i kamap strong insait long marit, amamas bilong ol bai i go bikpela. Tupela wantaim i mas i gat bikpela laik tru long senisim sampela pasin bilong ol, na long mekim ol samting long pasin Jehova i makim. Baibel i tok: “Sapos man i putim yau gut long tok bilong ol man i skulim em, orait em bai i gat gutpela sindaun. Na sapos man i bilip strong long Bikpela, bai em i ken amamas.”—Sindaun 16:20.
Ol Yangpela—Harim Tok Bilong God
13 I hatwok long ol yangpela Kristen long i stap strong long bilip taim ol i stap namel long ol manmeri nogut bilong dispela graun. Wanpela as em olsem: “Dispela graun olgeta em i stap aninit long strong bilong Satan.” (1 Jon 5:19) Dispela birua nogut i wok strong long bagarapim ol yangpela—em inap mekim na bai ol i ting samting nogut em i gutpela tasol. Pasin bilong tingim yumi yet tasol, tingting long mekim ol wok samting bilong helpim yumi yet, bel i laikim tumas ol pasin doti olsem pamuk samting na pasin bilong bagarapim man o givim bikpela pen long em, na strong tumas long painim amamas—dispela olgeta samting i insait long tingting bilong dispela graun, em Baibel i kolim olsem “dispela strongpela spirit i wok yet insait long bel bilong ol man i save sakim tok bilong God.” (Efesus 2:1-3) Long pasin bilong trik, Satan i bin kamapim dispela kain tingting insait long ol buk bilong skul, na long planti musik, na spot, na ol narapela samting ol man i save mekim bilong kisim amamas. Papamama i mas was gut, nogut dispela kain tingting i kisim ol pikinini. Olsem na taim ol i wok long mekim bikpela long ol pikinini, ol i mas helpim ol long bilip long Jehova na tok bilong em long Baibel.
14 Pol i givim gutpela tok olsem bilong papa long yangpela poroman bilong em, Timoti: “Oltaim yu mas givim baksait long olgeta kain laik nogut i save kamap long bel bilong ol yangpela man. Na yu mas wok long kisim stretpela pasin na pasin bilong bilip tru long God na pasin bilong laikim tru ol arapela na pasin bilong bel isi. Na yupela olgeta i mas mekim ol dispela pasin, yu wantaim ol man i stap klin tru long ai bilong God.” (2 Timoti 2:22) Tru, i no olgeta laik bilong ol yangpela i nogut, tasol ol yangpela i mas “givim baksait long” ol dispela samting—olsem ol i no ken lusim bikpela hap taim long en na nau ol i no gat taim bilong mekim ol wok bilong God. Ol samting olsem eksasais bilong strongim skin, spot, musik, ol amamas, sampela wok ol i mekim bilong kisim amamas, raun long sampela hap, ol dispela samting yet i no gat rong long en, tasol ol inap kamap olsem umben bilong kalabusim yu sapos yu putim olsem nambawan bikpela samting bilong yu. Givim baksait olgeta long pasin bilong toktok nating, o long sanap nating long rot wantaim ol poroman, o tingting oltaim long ol samting bilong maritpasin, o les nabaut, o toktok planti olsem papamama i no pilim tingting o hevi bilong yu.
15 Na insait long haus tu, i gat sampela samting inap bagarapim ol yangpela. Sapos ol i lukim ol piksa bilong pait na bagarapim man long televisen o video, dispela inap kirapim laik long bel bilong ol long mekim ol pasin nogut. (Jems 1:14, 15) Baibel i tok: “Bikpela i laikim tru ol manmeri i no save laikim pasin nogut.” (Song 97:10; 115:11) Sapos wanpela man i mekim stretpela pasin long ai bilong ol man, tasol em i save hait na mekim sampela pasin nogut, Jehova i save. (Sindaun 15:3) Yupela ol yangpela Kristen, lukluk nabaut insait long rum bilong yupela. Yupela i gat sampela piksa bilong ol man o meri i gat nem long ol piksa wokabaut o spot o musik na ol i save mekim pasin pamuk samting? O yupela i gat ol gutpela piksa i save givim gutpela tingting long yupela? (Song 101:3) Ol klos bilong yupela ol i stret long putim, o sampela klos bilong yupela i wankain olsem ol narapela kain klos na bilas bilong ol lain bilong dispela graun? Long pasin hait Satan inap kalabusim yu insait long umben bilong em sapos yu larim bel i pulim yu long mekim sampela pasin nogut. Baibel i tokaut olsem: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”—1 Pita 5:8.
16 Baibel i tokim yu long was gut long ol poroman bilong yu. (1 Korin 15:33) Yu mas poromanim ol yangpela i save pret long Jehova. Yu mas strong na no ken larim ol narapela yangpela i pulim yu long mekim pasin nogut. (Song 56:11; Sindaun 29:25) Bihainim tok bilong papamama i save pret long God. (Sindaun 6:20-22; Efesus 6:1-3) Larim ol elda i soim rot long yu na strongim bel bilong yu. (Aisaia 32:1, 2) Oltaim putim tingting na ai bilong yu i go long ol samting bilong spirit na long mekim ol wok bilong spirit. Wok long painim rot bilong kamap strong long spirit na insait long ol wok bilong kongrigesen. Lain long mekim ol wok long han bilong yu. Wok long kamap strong long bilip, na long dispela rot bai yu kamapim klia olsem yu no man nating tasol—yu wanpela man em inap tru long kisim laip long nupela taim Jehova bai kamapim! Papa bilong yumi long heven em bai amamas tru long yu, na papamama tu bai amamas long yu, na pasin bilong yu bai strongim ol brata sista Kristen bilong yu. Dispela em i bikpela samting!—Sindaun 4:1, 2, 7, 8.
17 Spirit bilong God i bin kirapim man bilong raitim Song na em i tok olsem: “Bikpela . . . i no save pasim wanpela gutpela samting long ol manmeri i save wokabaut stret. Bikpela I Gat Olgeta Strong, ol manmeri i save bilip long yu, ol i ken amamas oltaim.” (Song 84:11, 12) Tru tumas, ol manmeri i save bilip long Jehova na tok bilong em long Baibel, bai ol i no bel hevi na wok bilong ol i no ken lus nating—ol bai stap amamas na wok bilong ol bai kamap gutpela tasol.—2 Timoti 3:14, 16, 17.
Bai Yu Bekim Olsem Wanem?
◻ Bilong wanem ol Kristen i no ken bilip long “gutpela save bilong dispela graun”?
◻ Sapos yumi kisim tupela tingting, yumi mas mekim wanem?
◻ Sapos ol marit i mekim ol samting long pasin Jehova i makim, olsem wanem dispela bai helpim ol long i stap amamas na marit bilong ol i kamap gutpela?
◻ Olsem wanem Baibel i save helpim ol yangpela long “givim baksait long olgeta kain laik nogut i save kamap long bel bilong ol yangpela”?
[Askim Bilong Stadi]
1. Nau long taim bilong yumi, olsem wanem yumi inap bilip long Jehova na tok bilong em long Baibel?
2. (a) Taim lain bilong Jehova i bihainim ol lo bilong em, wanem gutpela samting i kamap? (b) Jehova i tok promis long wanem samting moa bai painim ol man i bihainim tok bilong em long Baibel?
3. Taim ol Kristen i wok yet long bilip long Jehova na tok bilong em long Baibel, sampela taim wanem ol hevi i save painim ol?
4. “Save bilong dispela graun” inap pulim yumi olsem wanem? Bilong wanem dispela save bilong graun i olsem “longlong pasin tasol long ai bilong God”?
5. Baibel i givim wanem strongpela toksave long yumi long “save bilong dispela graun”?
6. Bilong wanem yumi mas was gut, nogut pasin bilong tupela tingting i kamap long bel bilong yumi?
7. Sapos yumi gat tupela tingting, yumi ken mekim wanem bilong rausim?
8. Olsem wanem tingting bilong ol man i bikhet na lusim bilip inap kamap long bel bilong yumi? Yumi ken mekim wanem na bai yumi no kisim dispela kain tingting?
9. Sapos yumi mekim olgeta wok bilong God yumi mas mekim, olsem wanem dispela bai helpim yumi long i stap strong long bilip?
10. Olsem wanem em i bikpela samting tru long larim Jehova i soim rot long yumi insait long marit Kristen?
11. Bilong stretim ol hevi bilong marit, tupela wantaim i mas save long wanem ol samting?
12. (a) Baibel i kamapim ol gutpela tok bilong stretim wanem ol hevi i save kamap insait long marit? (b) Bilong wanem tupela marit wantaim i mas mekim ol samting long pasin Jehova i makim?
13. Bilong wanem i hatwok long ol yangpela Kristen long bilip strong long Jehova na tok bilong em long Baibel?
14. Olsem wanem ol yangpela i ken “givim baksait long olgeta kain laik nogut i save kamap long bel bilong ol yangpela”?
15. Wanem ol samting inap kamap insait long haus na i kirapim yangpela long mekim hait sampela pasin nogut?
16. Olsem wanem tok bilong Baibel inap helpim ol yangpela long mekim ol pasin Jehova na papamama i amamas long en?
17. Ol man i bilip long Jehova na Tok bilong em, ol i kisim wanem ol gutpela samting long en?
[Piksa long pes 23]
Ol Kristen i bilip long Jehova na Tok bilong em na ol i sakim “save bilong dispela graun”
[Piksa long pes 25]
Ol famili i bilip long Jehova na Tok bilong em ol i stap gut wantaim na i stap amamas