Yu Save Pilim Gut Tok i Tru?
“Yupela i mas larim God i mekim tingting bilong yupela i kamap nupela na bai . . . yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”—ROM 12:2.
1, 2. Bilong wanem i hatwok long stap Kristen tru long nau?
LONG dispela taim bilong las de—em ‘taim bilong planti hevi nogut tru’—i hatwok long stap olsem Kristen tru. (2 Timoti 3:1) Tru tumas, bilong bihainim pasin bilong Krais, man i mas winim strong bilong dispela graun. (1 Jon 5:4) Tingim tok Jisas i bin mekim long pasin ol Kristen i mas bihainim. Em i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” Na em i tok tu olsem: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en long olgeta de, na em i mas bihainim mi.”—Matyu 7:13, 14; Luk 9:23.
2 Taim wanpela Kristen i painim pinis dispela liklik rot, orait nau em i mas wok strong long i stap long dispela rot. Bilong wanem em i mas wok strong? Long wanem, taim yumi dediket na baptais, Satan bai traim long mekim wok long olgeta kain trik na giaman bilong daunim yumi. (Efesus 6:11) Em i save tingim ol pasin kranki bilong yumi na em i laik mekim wok long en bilong bagarapim yumi long ol samting bilong spirit. Em i bin traim long pundaunim Jisas, olsem na yumi ken ting em bai traim long pundaunim yumi tu.—Matyu 4:1-11.
Olgeta Kain Pasin Trik Bilong Satan
3. Satan i mekim wanem na Iv i kisim pasin bilong tupela tingting?
3 Wanpela samting Satan i save mekim wok long en em i olsem: Em i laik bai ol man i mas kisim pasin bilong tupela tingting. Em i wok long painim sampela samting i no strong tumas long klos pait bilong spirit yumi pasim. Long bipo tru, em i bin mekim olsem long Iv, na em i askim em olsem: “Ating God i tambuim yutupela long kaikai pikinini bilong olgeta diwai bilong gaden, a?” (Stat 3:1) I olsem Satan i tok: ‘Tru God i givim dispela tambu long yu? Tru em i pasim yu long kisim dispela gutpela samting? God i save, sapos yu kaikai pikinini bilong dispela diwai, bai ai bilong yu i op na yu bai kisim save long wanem samting i gutpela na wanem samting i nogut, na yu bai kamap wankain olsem God!’ Satan i mekim na Iv i kisim pasin bilong tupela tingting; i olsem em i planim wanpela pikinini kaikai, na nau em i wet bilong pikinini kaikai i kru.—Stat 3:5.
4. Long nau sampela inap kisim tupela tingting long wanem samting?
4 Olsem wanem Satan i mekim wok long dispela pasin long nau? Sapos yumi no kaunim Baibel long olgeta taim, na mekim stadi bilong yumi yet, na beten, na mekim wok Kristen bilong autim tok na go long ol miting, yumi inap opim rot na taim sampela i sutim ol askim long yumi, bai yumi kisim tupela tingting. Olsem: “Olsem wanem yumi ken save tru olsem dispela em tok i tru olsem Jisas i bin skulim ol man long en?” “Tru yumi stap long taim bilong las de? Nau yumi stap pinis bihain long yia 2000.” “Klostu nau Armagedon bai kamap, o em i stap longwe yet?” Sapos yumi kisim tupela tingting long ol samting olsem, yumi ken mekim wanem bilong daunim?
5, 6. Yumi mas mekim wanem sapos yumi kisim tupela tingting?
5 Jems i kamapim sampela gutpela tok bilong helpim yumi taim em i tok: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em. Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut. Kain man olsem i no ken ting Bikpela bai i givim wanpela samting long em. Nogat. Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.”—Jems 1:5-8.
6 Olsem na yumi mas mekim wanem? Long rot bilong beten yumi mas wok long “askim” God long em i ken givim bilip na stretpela tingting long yumi, na yumi mas wok strong moa long stadi sapos yumi gat wanpela askim o yumi gat tupela tingting long wanpela samting. Na tu, yumi ken askim ol man i gat strongpela bilip long helpim yumi, na yumi mas bilip tru olsem Jehova bai helpim yumi long ol samting yumi sot long en. Jems i tok moa: “Olsem na yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe. Yupela i mas i go klostu tru long God, na em bai i kam klostu tru long yupela.” Tru tumas, yumi inap daunim pasin bilong tupela tingting taim yumi go klostu long God long rot bilong stadi na beten.—Jems 4:7, 8.
7, 8. Wanem sampela bikpela mak bilong save long pasin bilong lotu em Jisas i bin skulim ol man long en? Husat long nau i winim ol dispela mak?
7 Tingim dispela askim: Olsem wanem yumi ken save olsem yumi save lotuim God long pasin Jisas i bin skulim ol man long en? Bilong bekim dispela askim, yumi mas tingim wanem samting? Baibel i tok klia olsem ol Kristen tru i mas laikim tru ol narapela. (Jon 13:34, 35) Ol i mas mekim nem bilong God, Jehova, i stap holi. (Aisaia 12:4, 5; Matyu 6:9) Na ol i mas tokim ol man long dispela nem.—Kisim Bek 3:15, NW; Jon 17:26.
8 Narapela mak bilong trupela lotu em olsem: Ol i mas daun long Tok bilong God, em Baibel. Em i wanpela buk i narapela kain na i kamapim pasin na laik bilong God. (Jon 17:17; 2 Timoti 3:16, 17) Na tu, ol Kristen tru i autim tok olsem Kingdom bilong God em wanpela rot tasol bilong ol man i ken kisim laip oltaim long Paradais long graun. (Mak 13:10; KTH 21:1-4) Ol i no insait long ol wok politik na pasin nogut bilong dispela graun. (Jon 15:19; Jems 1:27; 4:4) Husat long nau i winim ol dispela mak? Ol samting i kamapim long ples klia olsem i gat wanpela lain tasol i winim ol dispela mak—em ol Witnes Bilong Jehova.
Olsem Wanem Sapos Yumi Holim Yet Tupela Tingting?
9, 10. Yumi ken mekim wanem bilong daunim pasin bilong tupela tingting?
9 Olsem wanem sapos pasin bilong tupela tingting i wok long daunim yumi? Sapos olsem, yumi ken mekim wanem? Saveman King Solomon i bekim dispela askim olsem: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save. Na yu mas askim gutpela tingting na save long kam long yu, olsem yu singautim wanpela man i kam bilong helpim yu. Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.”—Sindaun 2:1-5.
10 Man! Yumi kirap nogut long dispela tok, a? Sapos yumi redi long save tru long gutpela tingting bilong God, bai yumi “save gut long God.” Tru tumas, yumi inap kisim save long King bilong heven na graun sapos yumi redi long kisim dispela save na putim gut long tingting na bel bilong yumi. Olsem yumi mas go long Jehova long rot bilong beten na yumi mas stadi. Ol gutpela tok bilong Baibel—kain olsem ol gutpela samting i stap hait insait long graun—ol inap daunim tupela tingting bilong yumi na helpim yumi long lukim lait bilong tok i tru.
11. Pasin bilong tupela tingting i mekim wanem long wokman bilong Elisa?
11 Long 2 King 6:11-18 yumi inap painim wanpela gutpela stori long olsem wanem beten i bin helpim wanpela wokman bilong God i bin pret na i gat tupela tingting. Wokman bilong Elisa i no gat pasin bilong pilim gut ol samting bilong spirit. Em i no bin lukim long tingting olsem ol lain bilong heven i stap bilong helpim profet bilong God, em ami bilong Siria i bin banisim em. Wokman hia i pret na em i singaut olsem: “Bikman, ol Siria i banisim yumi pinis. Nau bai yumi mekim wanem?” Orait Elisa i tok wanem? “Maski pret. I tru ol i gat planti soldia, tasol yumi gat bikpela lain moa bilong helpim yumi.” Tasol olsem wanem em i ken strongim bilip bilong wokman? Em i no inap lukim bikpela lain long heven.
12. (a) Wanem samting i mekim na wokman bilong Elisa i no gat moa tupela tingting? (b) Olsem wanem yumi inap daunim pasin bilong tupela tingting?
12 “Orait na Elisa i beten olsem, ‘Bikpela, yu ken opim ai bilong dispela man bai em i ken lukim dispela lain mi tok long en.’ Orait na Bikpela i opim ai bilong dispela wokman na wokman i lukim ol hos na karis i inapim dispela maunten Elisa i stap long en. Ol dispela hos na karis i wankain olsem paia stret.” Long dispela taim Jehova i opim ai bilong dispela wokman na em i lukim ol lain ami bilong heven ol i lukautim Elisa. Tasol yumi no ken ting God bai helpim yumi long wankain rot long nau. Tingim, dispela wokman bilong profet Elisa em i no gat Baibel olgeta bilong stadi long en bambai em i ken strongim bilip bilong em, nogat. Tasol yumi gat Baibel. Sapos yumi stadi gut long en, dispela inap strongim bilip bilong yumi. Olsem: Yumi ken tingim gut ol stori bilong Baibel i toktok long Jehova na lain bilong em long heven. Ol i kamapim long ples klia olsem Jehova i gat wanpela oganaisesen long heven i save helpim ol wokman bilong em long wok bilong skulim ol man long olgeta hap long nau.—Aisaia 6:1-4; Esekiel 1:4-28; Daniel 7:9, 10; KTH 4:1-11; 14:6, 7.
Lukaut Long Ol Trik Bilong Satan!
13. Satan i save mekim wok long wanem rot na bai yumi no holimpas tok i tru?
13 Wanem sampela rot moa bilong Satan long nogutim yumi long ol samting bilong spirit na yumi no holimpas tok i tru? Wanpela rot em ol kain kain pasin pamuk samting. Long nau tingting bilong ol man long pamuk i kamap strong tru, olsem na pasin bilong ol marit long prenim narapela i no poroman bilong ol na pasin bilong slip nabaut wantaim ol narapela, dispela kain pasin i kamap olsem samting ol i save mekim long olgeta taim—em pasin bilong ol lain bilong nau i tingting tasol long painim ol amamas bilong skin, maski wanem hevi bai painim ol long dispela. Ol piksa wokabaut, televisen, na ol video i save kirapim ol man long mekim ol dispela kain pasin. Ol piksa nogut bilong pasin sem i save kamap long televisen na nius samting, na ol i kamap moa yet long Intenet. Ol traim i save painim ol man i gat laik long save long dispela samting.—1 Tesalonaika 4:3-5; Jems 1:13-15.
14. Bilong wanem sampela Kristen i pundaun long ol trik na giaman bilong Satan?
14 Sampela Kristen i gat laik long save long ol samting na ol i larim dispela laik i pulim ol long lukim ol piksa nogut bilong pasin sem, na dispela i bin bagarapim tingting na bel bilong ol. Ol i bin larim Satan i giamanim ol na ol i pundaun i go insait long umben bilong em. Dispela samting i mekim na planti ol i kisim bagarap long ol samting bilong spirit. Ol dispela kain man i no bin holimpas pasin bilong ‘stap olsem ol liklik pikinini long olgeta kain pasin nogut.’ Ol i no kamap man i gat “tingting bilong ol bikpela man.” (1 Korin 14:20) Long olgeta yia, planti tausen manmeri ol i kisim hevi, long wanem, ol i no bihainim ol lo bilong Baibel. Ol i no bin lukautim gut “olgeta klos pait God i save givim long yumi.”—Efesus 6:10-13; Kolosi 3:5-10; 1 Timoti 1:18, 19.
Laikim Tru Ol Samting Yumi Holim
15. Bilong wanem i hatwok long sampela long pilim tru ol gutpela samting bilong spirit ol i bin kisim?
15 Jisas i tok: “Yupela bai i save long tok tru, na tok tru bai i mekim yupela i kamap fri.” (Jon 8:32) Planti Witnes i bin lusim ol pasin nogut na ol lotu bilong ol bilong pastaim. Olsem na ating ol i amamas tru olsem tok i tru i mekim ol i kamap fri. Tasol ating sampela yangpela—em papamama bilong ol i stap long tok i tru na i mekim bikpela long ol—ol i hatwok long pilim tru ol gutpela samting bilong spirit ol i bin kisim. Ol i no bin insait long ol lotu giaman o ol pasin bilong dispela graun i strong long ol man i painim amamas, na kisim drak, na mekim pasin pamuk samting. Ating dispela i mekim na ol i no pilim tru olsem paradais bilong spirit yumi stap long en i narapela kain tru long ol pasin nogut bilong dispela graun bilong Satan. Na sampela i larim ol samting nogut bilong dispela graun i pulim ol—ol i laik traim swit bilong olgeta kain gip nogut bilong dispela graun, nogut ol i lus long wanpela samting!—1 Jon 2:15-17; KTH 18:1-5.
16. (a) Yumi ken givim wanem ol askim long yumi yet? (b) Ol i skulim na kirapim yumi long mekim wanem?
16 Olsem wanem? Yumi mas larim paia i kukim pinga bilong yumi pastaim bambai yumi ken save long pen na hevi? Ol samting nogut i painim sampela, dispela inap skulim yumi, a? Yu ting yumi mas go insait long ol samting nogut bilong dispela graun, olsem “graun malumalum,” bilong save olsem yumi bin lus long kisim sampela gutpela samting o nogat? (2 Pita 2:20-22) Pita i bin tokim ol Kristen em pastaim ol i bin stap insait long dispela graun bilong Satan, olsem: “Yupela i wokabaut inap pinis long pasin bilong olpela bel, na mekim olkain pasin ol haiden i save laikim tumas long mekim, em ol pasin pamuk, na pasin bilong bel i kirap long ol samting nogut, na pasin bilong spak nabaut, na pasin bilong mekim ol bikpela pati na kaikai planti tumas na dringim planti strongpela dring na mekim pasin nogut, na pasin bilong sakim lo bilong God na mekim lotu long ol giaman god.” I no olsem yumi mas insait long ol “pasin nogut” bilong dispela graun bilong save olsem ol dispela pasin i nogut tru. (1 Pita 4:3, 4) Ol i save skulim yumi long ol stretpela lo bilong Jehova long ol Haus Kingdom, em ples bilong skulim yumi long Baibel. Na ol i kirapim yumi long mekim wok long stretpela tingting yumi kisim pinis bilong soim long yumi yet olsem yumi holim pinis tok i tru, na long dispela rot yumi ken pilim tru tok i tru.—Josua 1:8; Rom 12:1, 2; 2 Timoti 3:14-17.
Yumi No Holim Nating Nem
17. Olsem wanem yumi inap mekim gut wok olsem Witnes Bilong Jehova?
17 Sapos yumi pilim tru tok i tru, oltaim bai yumi painim rot long autim tok long ol narapela. Dispela i no makim olsem yumi strong strong long autim tok long ol man i no laik harim. (Matyu 7:6) Tasol yumi no pret long kamapim long ples klia olsem yumi Witnes Bilong Jehova. Sapos wanpela man i kamapim olsem em i laik save liklik long tok i tru, olsem em i kamapim wanpela askim o em i kisim wanpela buk o nius bilong Baibel, yumi redi na amamas long tokim em long ol gutpela samting yumi bilip na wet long en. Bilong mekim olsem, long olgeta taim yumi mas holim sampela buk na nius, maski yumi stap long wanem wanem hap—long haus, long ples wok, long skul, long stua, o long ol ples bilong kisim amamas.—1 Pita 3:15.
18. Sapos yumi kamapim long ples klia olsem yumi Kristen, olsem wanem dispela inap helpim yumi?
18 Taim yumi kamapim long ples klia olsem yumi Kristen, yumi strongim yumi yet long sakim ol spia Satan i sutim i kam long yumi. Sapos i gat wanpela pati bilong betde o pati bilong Krismas o pilai laki long ofis, planti taim sampela wanwok bai tok: “Larim em. Em i wanpela Witnes Bilong Jehova.” Na long wankain as, planti man i no save kamapim tumas ol tok pilai nogut taim yumi stap. Olsem na taim yumi kamapim long ples klia bilip Kristen bilong yumi, dispela inap helpim gut yumi, olsem aposel Pita i tok: “Sapos yupela i wok strong long bihainim gutpela pasin, orait husat bai i mekim nogut long yupela? Tasol sapos yupela i mekim stretpela pasin, na yupela i karim pen long dispela, orait yupela i ken amamas.”—1 Pita 3:13, 14.
19. Olsem wanem yumi save, yumi stap klostu long pinis bilong taim bilong las de?
19 Narapela gutpela samting i save kamap sapos yumi pilim gut tok i tru em olsem: Bai yumi bilip tru olsem nau yumi stap long taim bilong las de bilong pasin nogut bilong dispela graun. Bai yumi save olsem planti tok profet bilong Baibel i wok long kamap tru long nau.a Ol samting nogut tru i bin kamap insait long dispela 100 yia i go pinis i strongim tok lukaut bilong Pol, em i tok “long taim bilong las de planti hevi nogut tru bai i kamap.” (2 Timoti 3:1-5; Mak 13:3-37) I no longtaim i go pinis na wanpela stori bilong niuspepa i toktok long ol samting i bin kamap long dispela 100 yia i go pinis, na het-tok bilong en i olsem: “Bai Yumi Tingim Dispela Taim Olsem Taim Bilong Pasin Nogut Tru.” Dispela stori i tok: ‘Long 1999 planti man tru i bin kisim bagarap, winim olgeta narapela yia bihain long 1950.’
20. Nau em i taim bilong mekim wanem?
20 Nau em i no taim bilong surik. Ol samting i kamap i makim olsem Jehova i mekim gut long dispela wok bilong skulim ol manmeri long Baibel bambai ol i ken harim—i kam inap long nau i no gat wanpela bikpela wok olsem i bin kamap bilong autim tok long olgeta lain bilong graun. (Matyu 24:14) Pilim gut tok i tru, na autim long ol narapela. Samting yu mekim long nau, dispela bai makim olsem yu inap i stap oltaim oltaim long bihain o nogat. Sapos yumi slek, Jehova i no inap mekim gut long yumi. (Luk 9:62) Nau em i taim bilong ‘stap strong, na i no ken surik liklik. Yumi save olsem, hatwok yumi save mekim long Bikpela, em bai i no inap lus nating. Olsem na oltaim yumi mas wok strong long mekim wok bilong Bikpela.’—1 Korin 15:58.
[Futnot]
a Lukim Wastaua bilong Janueri 15, 2000, pes 12-14. Paragraf 13 i go inap long paragraf 18 i stori long 6-pela samting i kamapim long ples klia olsem kirap long 1914 na i kam inap long nau yumi stap long taim bilong las de.
Yu Inap Tingim?
• Olsem wanem yumi ken daunim pasin bilong tupela tingting?
• Stori bilong wokman bilong Elisa inap skulim yumi long wanem samting?
• Oltaim yumi mas was gut long wanem ol traim?
• Bilong wanem yumi mas kamapim klia long ol man olsem yumi Witnes Bilong Jehova?
[Ol Piksa long pes 10]
Stadi oltaim long Baibel na beten em inap helpim yumi long daunim tupela tingting
[Piksa long pes 11]
Wanpela samting olsem driman i daunim tupela tingting bilong wokman bilong Elisa
[Piksa long pes 12]
Ol i skulim yumi long ol stretpela lo bilong Jehova long ol Haus Kingdom, olsem dispela long Benin