Yumi Mas i Gat Ol Pren Tru
JENNY na Sue i mekim save toktok wantaim. Tupela i lap na ai bilong ol i lait—pasin bilong tupela i makim olsem narapela i putim gut yau long tok bilong narapela. Tupela i bilong narapela narapela hap na ol i gat narapela narapela kain sindaun, tasol planti laik na tingting bilong tupela i wankain, na narapela i tingim gut narapela.
Long narapela hap, em Eric na Dennis i wok wantaim long wanpela wok; inap planti yia pinis tupela i bin wok wantaim long kain wok olsem. Tupela i stap bel isi na i save lap planti taim. Ol i toktok i go na nau ol i toktok long ol bikpela samting, na ol i kamapim tingting bilong ol. Narapela i tingim gut narapela. Eric na Dennis ol i pren tru, olsem Jenny na Sue.
Ating yu pilim tru gutpela pasin pren bilong ol, na yu tingim ol gutpela pren bilong yu yet. O ating yu laik tru bai yu gat ol pren tru olsem. Tasol yu inap kisim ol kain pren olsem!
Yumi Mas i Gat Ol Pren Tru
Yumi mas i gat ol pren tru bambai tingting na bel bilong yumi i ken i stap isi, na dispela i helpim skin bilong yumi tu. Tasol sapos sampela taim yumi pilim olsem yumi stap wanpis, dispela i no makim olsem sampela pasin bilong yumi i no gutpela tumas na ol narapela i no laikim, nogat. Sampela saveman i tok, taim bel i pilim olsem yumi stap wanpis, dispela i kain olsem hangre, na i makim olsem yumi mas i gat sampela poroman. Taim yumi kisim kaikai, dispela i save daunim o pinisim hangre. Na i olsem tu taim yumi kisim ol stretpela kain pren—dispela i save daunim o pinisim bel hevi bilong i stap wanpis. Na tu, yumi olgeta inap kisim ol gutpela pren i save tingim yumi.
Taim God i wokim yumi, em i putim laik long bel bilong yumi olsem yumi mas i gat ol poroman. (Stat 2:18) Baibel i tok, pren tru, o poroman tru, “i save laikim yumi long olgeta taim,” na em i save sambai long yumi long taim bilong hevi. (Sindaun 17:17) Olsem na man inap singaut long pren tru i helpim em long taim bilong hevi samting. Tasol yumi no ken ting, ol gutpela pren i bilong helpim yumi long taim bilong hevi o bilong poroman wantaim yumi long wok o long taim bilong mekim ol pilai na em tasol, nogat. Ol gutpela pren i save helpim yumi long kamapim long ples klia ol gutpela pasin bilong yumi. Sindaun 27:17 i tok: “Ol i save wokim samting long ain bilong sapim ain. Olsem tasol, wanpela man i save helpim tingting bilong narapela man i kamap gutpela.” Yumi inap mekim wok long wanpela hap ain bilong sapim naip ol i bin wokim long ain, na olsem tasol wanpela pren inap kirapim yumi long wokim gut tingting na long tingim gut ol samting bilong spirit. Taim yumi bel hevi long sampela samting i bin painim yumi, orait wanpela pren inap sori long yumi na givim sampela gutpela tok bilong Baibel long yumi, na dispela inap strongim tru yumi.
Long Baibel, i gat ol narapela pasin i insait long pasin bilong i stap pren tru, olsem laikim em tru, save gut long em, no ken kamapim ol samting bilong em long ol narapela, stap poroman bilong em. Ating wanpela gutpela pren bilong yumi em wanpela i save sindaun long hap bilong yumi, o wanwok samting. Na sampela i save tingim wanpela wanblut i pren tru bilong ol. Tasol long nau planti man i hatwok long painim pren tru na i stap olsem inap longtaim. Bilong wanem i olsem? Yu inap painim sampela gutpela pren tru na yupela ken i stap olsem inap longtaim?