Gutaim Klostu Bai Kamap!

YUMI olgeta i save bel hevi taim yumi harim tok olsem wanpela samting nogut bilong givim hevi long yumi yet em i bin kamap. Tasol taim yumi harim tok olsem wanpela gutpela samting i bin kamap bilong helpim yumi yet o ol man yumi laikim tumas, yumi save amamas, a? Tasol taim samting i kamap i mekim nogut long ol narapela na yumi nogat, ating planti i laik save long dispela samting, na ating sampela i amamas tru long save long en. Em nau, yumi save long wanpela as na planti man moa i save baim ol nius i kamapim ol samting nogut!

Taim Namba 2 Pait i kirap nupela, wanpela samting i kamap i kamapim klia olsem sampela man i laik save long ol samting nogut. I gat wanpela sip bilong pait, nem bilong en Graf Spee, na hevi bilong sip i olsem 10,000 ton, na long 1939 em nambawan sip tru bilong bikpela lain sip bilong ol Jeman. Inap planti wik dispela sip i wok long bagarapim sampela kago-sip bilong Briten long hap bilong solwara Saut Atlantik na solwara India. Tripela sip bilong Briten i wok long painim dispela sip na taim ol i painim pinis, ol i kirapim pait​—⁠planti man i dai na isi isi sip i ran i go sua long taun Montevideo, Yurugwai, bilong ol man i ken stretim ol samting i bagarap long en. Gavman bilong Yurugwai i tok, wantu dispela sip i mas lusim Montevideo; sapos nogat, ol bai holimpas dispela sip. Ating nau wanpela pait i laik kamap na Briten bai win.

Sampela bisnisman long Amerika na ol i gat planti mani, ol i harim tok bilong dispela samting, na olgeta wan wan i tromoi $2,500 long baim wanpela balus i go long Yurugwai bambai ol i ken lukim dispela pait. Tasol pait i no kamap, na ating ol bisnisman i hevi liklik. Adolf Hitler i bin tokim boskru bilong Graf Spee long ol i mas bagarapim sip. Planti tausen manmeri i bin kam sanap arere long wara bilong ol i ken lukim pait ol i ting bai kamap, tasol ol i lukim narapela samting i kamap​—⁠ol i lukim na harim wanpela bikpela pairap na sip i go daun insait long solwara, em boskru bilong dispela sip yet i mekim. Kepten bilong sip i kilim i dai em yet​—⁠em i kisim gan na sutim het bilong em.

Tru, sampela man i amamas long ol samting nogut i kamap, tasol planti man i laik bai ol gutpela samting i mas kamap; ol samting nogut, nogat. Ating yu tu yu pilim olsem, a? Orait, i gat wanem as na ol stori bilong bipo i save toktok long planti samting nogut; planti gutpela samting, nogat? Yu ting senis inap kamap na yumi harim stori long ol gutpela samting tasol?

As Bilong Olgeta Samting Nogut

Baibel i stori long wanpela taim bipo na long dispela taim ol gutpela samting tasol i bin kamap​—⁠samting nogut, nogat. Taim God Jehova i wokim pinis olgeta samting, dispela graun hia i redi long man na ol animal i ken i stap long en. Buk Stat i tok: “God i lukim olgeta dispela samting i gutpela, na em i amamas tru.”​—⁠Stat 1:31.

Tasol bihain liklik long God i wokim man, samting nogut i kamap. Taim Adam tupela Iv i no kamapim yet wanpela pikinini, wanpela ripot i kamap long heven i tok olsem sampela lain i bin bikhet long God na long gutpela pasin bilong em long bosim heven na graun. Wanpela pikinini spirit bilong God, em i gat namba, em i no bin stap gut long wok bilong em na em i kirapim namba wan man na meri long bihainim em long mekim pasin bikhet.​—⁠Stat 3:​1-6.

Ol planti samting nogut ol man i bin lukim, i bin kirap long dispela taim bipo. Olsem na yumi no ken kirap nogut olsem planti pasin giaman i bin insait long ol samting nogut i bin kamap bipo na i kam inap nau. Krais Jisas i tok, Satan em i as bilong ol samting nogut, na em i tokim ol bikman bilong lotu long taim bilong Em: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.”​—⁠Jon 8:44.

Taim ol manmeri i wok long kamap planti, ol samting nogut i wok long kamap planti tu. Tasol i no olsem i no gat wanpela taim bipo na ol man i no kisim amamas, nogat; i gat planti samting i bin kamap na i givim amamas long ol. Tasol ol samting i kamapim klia olsem kirap long bipo na i kam inap nau, planti hevi i bin kamap.

Tasol i gat narapela as na ol samting nogut i kamap. Olsem: Yumi olgeta i gat hap tingting long mekim rong. Jehova yet i kamapim klia dispela samting, olsem: “Stat long taim ol manmeri i yangpela yet ol i save tingting long mekim ol pasin nogut.”​—⁠Stat 8:21.

Bilong Wanem Ol Samting Nogut i Kamap Planti

I gat as na ol samting nogut i kamap planti long taim bilong yumi. Baibel i tokaut klia long dispela samting, na i tok profet olsem yumi ol man long nau i stap long “taim bilong las de.” (2 Timoti 3:1; Daniel 12:⁠4) Ol tok profet bilong Baibel na ol yia Baibel i kolim, i makim olsem dispela taim bilong pinis i bin kirap long 1914. Bilong kisim sampela save moa long dispela, lukim sapta 11 bilong buk Save i Bringim Man Long Laip Oltaim, em Sosaiti Wastaua bilong Nu Yok i wokim.

I gat wanpela samting bai kirapim taim bilong las de, na dispela i mekim na ol samting nogut bai kamap planti moa. Em wanem samting? Satan wantaim ol ensel nogut bilong em ol i raus long heven na i kam daun long graun. Yu ken kaunim stori bilong dispela samting long Kamapim Tok Hait 12:​9, 12: “Ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em. . . . Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”

Olsem na yumi ken save, inap long pinis bilong taim bilong las de, ol samting nogut bai wok long kamap planti moa.

Senis Bai Kamap

Tasol yumi ken amamas, ol samting i kamapim ol hevi long nau, em bai pinis. Na yumi ken bilip olsem, ol hevi tu bai i pinis. Maski ol samting nogut i wok yet long kamap, klostu nau bai i no gat moa wanpela samting nogut i kamap. Dispela samting bai kamap tru tru long taim God yet i bin makim.

Yumi ken bilip olsem, long wanem, Baibel i tok profet, long pinis bilong taim bilong las de, God bai bagarapim na rausim olgeta samting i save kamapim ol samting nogut. Em bai rausim olgeta man nogut i save kirapim pasin birua, em ol i no laik tanim bel na lusim olpela wokabaut bilong ol. Dispela samting bai kamap long bikpela de bilong God i Gat Olgeta Strong, yumi kolim pait bilong Armagedon. (KTH 16:16) Bihain long dispela pait, Satan wantaim ol lain ensel bilong em bai ol i no inap mekim wanpela samting moa. Kamapim Tok Hait 20:​1-3 i stori ol bai pasim Satan, em as bilong olgeta samting nogut, olsem: “Mi lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela “Man I Save Kotim Olgeta Man.” Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain.”

Bihain long ol dispela bikpela samting, ol manmeri bai lukim gutaim tru i kamap long graun​—⁠kain gutaim olsem i no bin kamap bipo. Ol dispela manmeri em ol milion milion manmeri i bin winim dispela laspela pait Armagedon, wantaim ol bilion bilion manmeri i dai pinis na i kirap bek long matmat. Laspela hap bilong Baibel i stori long dispela nambawan gutpela samting olsem: “Haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:​3, 4.

Olsem wanem? Yu inap tingim dispela taim bilong amamas? Ol samting nogut i no ken kamap gen. Tru tumas, olgeta samting nogut bai pinis na i no gat wanpela taim bihain na yumi harim tok olsem wanpela samting nogut i bin kamap. Gutaim tru tasol bai i stap na i go inap olgeta taim bihain.