I Gat Wanem As na Lotu Tru i Kisim Blesing Bilong God

“Yumi litimapim nem bilong God! God bilong yumi em wanpela tasol i bin kisim bek yumi. Em i gat biknem na strong. God i save skelim pasin bilong ol manmeri long kot, na kot bilong en em i tru na i stret olgeta.”​—⁠KTH 19:​1, 2.

‘BIKPELA BABILON’​—⁠long ai bilong God em i pundaun pinis na klostu nau bagarap bai painim em. Ol tok profet bilong Baibel i makim olsem klostu nau dispela pamukmeri, em ol lotu giaman, bai kisim strafe long han bilong ol pren politik bilong em; em bai pinis hariap, wantu tasol. Ol tok hait Jisas i kamapim long Jon i tok profet olsem: “Wanpela strongpela ensel i kisim wanpela ston i wankain mak olsem ol bikpela ston bilong wilwilim wit. Em i litimapim dispela ston na i tromoi i go daun long solwara. Na em i tok olsem, ‘Long dispela pasin tasol ol bai i kisim dispela bikpela taun Babilon na tromoi i go daun strong tru, na ol man bai i no inap lukim em moa.’ ”​—⁠KTH 18:​2, 21.

² Taim Bikpela Babilon i kisim bagarap sampela lain bilong Satan yet bai krai sori, tasol ol wokboi bilong God long heven na long graun bai ol i no inap krai sori. Ol bai amamas na singaut long God olsem: “Yumi litimapim nem bilong God! God bilong yumi em wanpela tasol i bin kisim bek yumi. Em i gat biknem na strong. God i save skelim pasin bilong ol manmeri long kot, na kot bilong en em i tru na i stret olgeta. Dispela bikpela pamukmeri em i bin bagarapim olgeta manmeri bilong graun long pasin pamuk bilong en. Olsem na God i bekim pe nogut long em. Dispela meri em i gat asua bilong kilim i dai ol wokman bilong God, na God i bekim pinis dispela asua bilong em.”​—⁠KTH 18:​9, 10; 19:​1, 2.

Lotu Tru i Mas Kamapim Wanem Kaikai?

³ Lotu giaman bai pinis long dispela graun, olsem na wanem kain lotu bai stap? Olsem wanem yumi ken save wanem lotu long nau i no ken bagarap taim olgeta lotu giaman bilong Satan i bagarap? Dispela lotu i mas kamapim wanem ol stretpela pasin? I gat 10-pela bikpela samting i olsem mak bilong lotu tru bilong Jehova.​—⁠Malakai 3:18; Matyu 13:⁠43.

⁴ Namba wan mak na i bikpela tru i olsem: Ol Kristen tru i mas stap gut long wok king bilong Jehova​—⁠Jisas i dai bilong mekim olsem. Jisas i no lusim laip bilong em bilong helpim wanpela lain, o lain politik, o bilong helpim tingting bilong ol man long kamapim gutpela sindaun. Kingdom bilong Papa bilong em i namba wan samting long i stap bilong em, winim olgeta wok na tingting politik bilong lain Juda. Taim Satan i laik givim olgeta kingdom bilong dispela graun long em, em i tok olsem: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” Long Ol Skripsa Hibru em i bin kisim save olsem, Jehova em i King tru bilong olgeta hap bilong graun. Wanem lain bilong lotu i helpim tru wok king bilong Jehova na ol i no helpim wok politik bilong dispela graun?​—⁠Matyu 4:10; Song 83:⁠18.

⁵ Namba 2 mak: Lotu tru i mas litimapim nem bilong God. Bikpela i Gat Olgeta Strong i bin kamapim nem bilong em Jehova (sampela Baibel i tok Yawe) long lain bilong em Israel, na dispela nem i stap planti tausen taim long Ol Skripsa Hibru. Na paslain long dispela, Adam, na Iv, na sampela moa i bin save long nem bilong God, tasol ol i no bin daun long en long olgeta taim. (Stat 4:1; 9:26; 22:14; Kisim Bek 6:⁠2) Ol man bilong lotu Juda na ol lotu i holim nating nem Kristen em ol i tanim tok bilong Baibel, planti taim ol i no raitim nem bilong God long Baibel, tasol ol Witnes Bilong Jehova i bin raitim dispela nem long ples stret bilong en long Baibel New World Translation of the Holy Scriptures. Ol i litimapim dispela nem, olsem ol Kristen bilong pastaim i bin mekim. Jems i tok: “Saimon i bin tokaut klia tru long olsem wanem God i bin kam long ol man bilong ol narapela lain long namba wan taim bilong kisim wanpela lain i holim nem bilong em. Na tok bilong ol Profet tu i wankain, ol i bin raitim tok olsem, ‘. . .  olsem na bai ol man i stap yet ol i ken wok strong long painim Jehova, wantaim ol manmeri bilong olgeta narapela lain, em ol manmeri i holim nem bilong mi; Jehova, em man bilong mekim ol dispela samting . . . em i tok olsem.’ ”​—⁠Aposel 15:​14-18, NW; Amos 9:​11, 12.

⁶ Namba 3 mak: Ol man i lotu tru long God ol i mas litimapim Kingdom bilong God, long wanem, Kingdom tasol inap stretim hevi bilong ol man long bosim dispela graun. Jisas i bin lainim ol disaipel long beten askim God long Kingdom bilong em i mas i kam, na gavman bilong God i ken bosim graun. Daniel i tok profet long las de olsem: “God bai i kirapim wanpela kingdom na dispela kingdom bai i stap oltaim oltaim. . . . Em bai i daunim ol [gavman bilong graun] na bagarapim ol arapela king na kingdom bilong en bai i stap oltaim.” Pasin bilong husat long nau i kamapim long ples klia olsem ol i no gat tupela bel na ol i helpim tru dispela Kingdom​—⁠ol lotu bilong Bikpela Babilon o ol Witnes Bilong Jehova?​—⁠Daniel 2:44; Matyu 6:10; 24:⁠14.

⁷ Namba 4 mak: Bilong God i ken amamas long ol, ol wokman tru bilong God ol i mas bilip olsem Baibel em i tok bilong God. Dispela bai helpim ol na ol i no ken pundaun long bilip taim ol man i sutim tok long Baibel na ol i tok, Baibel i wanpela buk nating ol man tasol i bin raitim na i gat ol popaia long en. Ol Witnes Bilong Jehova i bilip olsem Baibel em i tok bilong God, olsem Pol i bin tok long Timoti. Em i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”a Olsem na ol Witnes Bilong Jehova i larim Baibel i soim rot long ol, em i olsem wanpela buk i tokim ol long wanem pasin ol i mas mekim bilong helpim sindaun bilong ol long olgeta wan wan de, na em i olsem as bilong ol gutpela samting ol i wetim long bihain.​—⁠2 Timoti 3:​16, 17.

Ol i Laikim Tru Narapela, Ol i No Bel Nogut Long Narapela

⁸ Jisas i tok olsem wanem yumi ken save long ol disaipel tru bilong em? Tok bilong em i kamapim namba 5 samting i olsem mak bilong lotu tru. Jisas i tok: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:​34, 35) Olsem wanem Jisas i kamapim olsem em i laikim tru narapela? Em i givim laip bilong em olsem ofa bilong baim bek ol man. (Matyu 20:28; Jon 3:16) Bilong wanem ol Kristen tru i mas laikim tru narapela? Jon i tok: “Ol pren, yumi wan wan i mas laikim tru ol arapela, long wanem, pasin bilong laikim ol arapela em i pasin bilong God. . . . God yet em i as bilong dispela pasin bilong laikim ol arapela. Olsem na man i no save laikim ol arapela, em i no save long God.”​—⁠1 Jon 4:⁠7, 8.

⁹ Husat long nau i bin kamapim kain pasin olsem bilong laikim tru narapela, maski ol man i bel nogut long ol man bilong narapela skin, na kantri, na lain? Husat i bin holimpas dispela pasin bilong sori, maski i dai inap painim ol? Olsem wanem? Yumi ken tok em ol pris pasto na ol sister Katolik, em ol yet i tok ol i gat hap asua taim ol man i bagarapim na pinisim wanpela lain olgeta long Ruanda long 1994? O em ol Otodoks bilong Serbia o ol Katolik bilong Kroesia, em ol i bin mekim planti pasin nogut i no stret wantaim lotu Kristen tru, na ol i bin insait long “bagarapim wanpela lain olgeta” long dispela pait long Bolkan? O em ol pris pasto bilong ol Katolik na Talatala long Noten Aialan, inap planti yia ol i bin kirapim ol man long tingting nogut na bel nogut tru long narapela man. Ol man i no ken sutim tok long ol Witnes Bilong Jehova, long wanem, ol i no bin insait long ol dispela pait. Ol i bin kisim bikpela pen na hevi long ol kalabus na ol banis kalabus nogut, na sampela i bin dai, long wanem, ol i no laik lusim pasin Kristen bilong laikim tru narapela.​—⁠Jon 15:⁠17.

¹⁰ Namba 6 mak: Ol man i lotu tru long God i no insait long ol wok politik bilong dispela graun. Bilong wanem ol Kristen i no ken insait long ol wok politik bilong dispela graun? Pol, na Jems, na Jon i kamapim as tru bilong dispela samting. Aposel Pol i tok Satan em i “giaman god bilong dispela graun,” na long kain kain rot em i pasim tingting bilong ol man i no bilip, olsem long rot bilong wok politik bilong dispela graun i save brukim ol man i stap narapela narapela lain. Disaipel Jems i tok, “man i laikim pasin bilong graun, em i mekim pasin birua long God,” na aposel Jon i tok “graun olgeta em i stap aninit long strong bilong Satan.” Olsem na Kristen tru i mas givim bel olgeta long God na em i no inap insait long wok politik nogut bilong dispela graun bilong Satan.​—⁠2 Korin 4:4; Jems 4:4; 1 Jon 5:⁠19.

¹¹ Sapos yumi tingim 2-pela mak nau yumi bin stori long en, yumi ken save ol Kristen tru i mas bihainim tu namba 7 mak olsem: Ol i no inap insait long pait. Lotu tru i olsem wanpela lain brata i stap long olgeta hap na pasin sori i as bilong en, olsem na i no gat wanpela samting inap brukim o bagarapim dispela lain. Jisas i skulim ol man long pasin bilong laikim tru ol man, em i no skulim ol long pasin bilong bel nogut long narapela; na em i skulim ol man long pasin bilong bel isi, em i no skulim ol long pait. (1 Pita 5:9; Matyu 26:​51, 52) Dispela man nogut, Satan, em i grisim Kein long kilim i dai brata bilong em Abel, na em i wok yet long kirapim ol man long bel nogut long narapela na pait na kilim i dai man, long wanem, ol i bilong narapela lain politik, o lotu, o lain. Ol Kristen tru i no save “skul moa long pait,” maski ol i kisim hevi long dispela. I olsem ol i ‘paitim ol bainat bilong ol i kamap olsem ol ain bilong brukim graun, na ol spia bilong ol i kamap olsem ol naip.’ Ol i kamapim pasin bilong bel isi, em spirit bilong God i as bilong en.​—⁠1 Jon 3:​10-12; Aisaia 2:​2-4; Galesia 5:​22, 23.

God i Blesim Man i Mekim Stretpela Pasin na i Bihainim Bilip Tru

¹² Pasin wanbel bilong ol Kristen em i namba 8 mak bilong lotu tru. Tasol ol lotu i holim nating nem Kristen i bruk bruk na ol man i no stap gut. Planti bikpela lotu ol i bruk long kain kain liklik lotu, na ol man i paul nabaut. Olsem: Lotu Baptis long Amerika i bruk long Lain Baptis Bilong Not (American Baptist Churches in the U.S.A.), na Lain Baptis Bilong Saut (Southern Baptist Convention), na planti narapela lain Baptis i kamap, long wanem, lotu Baptis i no wanbel. (Buk World Christian Encyclopedia, pes 714) Planti lotu i kamap, long wanem, lotu i no wanbel long ol bilip na ol i gat narapela narapela kain pasin bilong bosim lotu (olsem ol Presbitirian, Episkopelian, Kongrigesenal). Ol lotu i no bilong lain Kristen ol tu i bruk​—⁠olsem ol Budis, na Islam, na Hindu. Aposel Pol i bin givim wanem tok long ol Kristen bilong pastaim? Em i tok: “Ol brata, long nem bilong Bikpela bilong yumi Jisas Krais mi tokaut strong long yupela olsem, yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.”​—⁠1 Korin 1:10; 2 Korin 13:⁠11.

¹³ Wanem mak i olsem namba 9 samting bambai God i ken orait long lotu? Wok Pris 11:45 i kamapim wanpela lo olsem: “Yupela i mas i stap holi . . . long wanem, mi yet mi holi.” Aposel Pita i kolim gen dispela lo taim em i tok: “God i singautim yupela pinis, em i holi na em i save mekim gutpela na stretpela pasin olgeta. Olsem na yupela i mas givim yupela yet long God na stap holi long olgeta wokabaut bilong yupela.”​—⁠1 Pita 1:⁠15.

¹⁴ Wanem insait bilong dispela tok, man i mas i stap holi? Ol man i lotu long Jehova ol i mas i stap klin long samting bilong spirit na long pasin bilong ol. (2 Pita 3:14) God i no orait long ol man em long laik bilong ol yet ol i mekim rong na ol i no tanim bel, em pasin bilong ol i makim olsem ol i no tingim liklik ofa bilong Krais. (Hibru 6:​4-6) Jehova i laik kongrigesen Kristen i mas i stap klin na holi. Olsem wanem kongrigesen i ken i stap klin na holi? Wanpela rot em long rausim ol man i laik bagarapim kongrigesen.​—⁠1 Korin 5:​9-13.

¹⁵ Paslain long ol i save long tok i tru, planti man i bin inapim laik nogut bilong ol, na ol i bin tingting long painim amamas bilong skin tasol, na tingim ol yet tasol. Tasol tok bilong Krais i bin senisim pasin bilong ol, na God i lusim rong bilong ol. Pol i bin tok: “Ol man i save mekim pasin nogut, ol bai i no inap i go insait long kingdom bilong God. Ating yupela i no save long dispela, a? Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God. Na bipo sampela bilong yupela i stap kain man olsem. Tasol God i wasim yupela pinis na mekim yupela i kamap lain manmeri bilong em stret.”​—⁠1 Korin 6:​9-11.

¹⁶ Yumi save Jehova i orait long man i tanim bel, na baut, olsem lusim ol pasin i no stret wantaim tok bilong Baibel, na ol i kamap disaipel tru bilong Krais na bihainim tok bilong em. Ol i save laikim tru ol narapela man olsem ol i save laikim ol yet, na ol i kamapim dispela samting long planti rot, olsem ol i strong long autim tok i tru i save helpim man i harim long i stap laip.​—⁠2 Timoti 4:⁠5.

“Tok Tru Bai i Mekim Yupela i Kamap Fri”

¹⁷ Namba 10 samting ol man i laik lotu long Jehova long spirit na long pasin i tru ol i mas mekim i olsem​—⁠ol i mas bihainim ol bilip tru. (Jon 4:​23, 24) Jisas i tokim ol disaipel bilong em olsem: “Yupela bai i save long tok tru, na tok tru bai i mekim yupela i kamap fri.” (Jon 8:⁠32) Tok tru bilong Baibel i save mekim yumi i kamap fri long ol bilip giaman i bagarapim nem bilong God, olsem man i gat tewel i no save dai, na bikpaia, na klinpaia. (Saveman 9:​5, 6, 10; Esekiel 18:​4, 20) Em i mekim yumi i kamap fri na yumi no bilip moa long God Triwan olsem ol lotu i holim nating nem Kristen i bilip long en, em wanpela bilip hait bilong ol Babilon. (Lo 4:35; 6:4; 1 Korin 15:​27, 28) Taim ol man i bihainim tok tru bilong Baibel ol bai kamap man i mekim pasin sori, na tingim narapela, na mekim gutpela pasin, na marimari. I no gat wanpela taim lotu Kristen tru i bin kirapim ol man long bagarapim tru ol man i no bihainim bilip bilong misin olsem Tomas de Tokemada i bin mekim, na trupela lotu i no bin kirapim ol man long mekim pasin birua na pait, olsem ol pop i bin mekim long Ol Pait Bilong Lotu. Tasol long bipo yet na i kam inap nau Bikpela Babilon i bin kamapim dispela kain kaikai nogut, kirap long taim bilong Nimrot na i kam inap nau.​—⁠Stat 10:​8, 9.

Wanpela Nem i Narapela Kain

¹⁸ Husat long nau i bihainim tru dispela 10-pela samting olsem mak bilong lotu tru? Husat long nau i gat nem olsem ol i stap gut long God na ol i stap isi? Long olgeta hap bilong graun ol man i save olsem ol Witnes Bilong Jehova ol i “no man bilong dispela graun.” (Jon 15:19; 17:​14, 16; 18:36) Lain bilong Jehova i amamas tru long God i larim ol long karim nem bilong em na ol inap i stap ol Witnes bilong em, olsem Jisas i bin stap olsem gutpela witnes bilong Papa bilong em. Yumi holim dispela nem holi, na yumi tingim wok bilong yumi long bihainim ol samting dispela nem i makim. Na olsem Witnes bilong em, gutpela samting i wetim yumi long bihain! Bai yumi inap i stap long wanpela lain man i wanbel na i bihainim tok bilong God, na lotu long King bilong heven na graun long Paradais i kamap bek long graun. Bilong kisim dispela blesing, yumi mas wok yet long mekim ol samting i olsem mak bilong lotu tru na yumi mas amamas long holim nem olsem Witnes Bilong Jehova, long wanem, “kot bilong en em i tru na i stret olgeta.”​—⁠KTH 19:2; Aisaia 43:​10-12; Esekiel 3:⁠11.

[Futnot]

Bai Yu Bekim Olsem Wanem?

◻ Ol wokboi bilong Jehova i ting olsem wanem long Bikpela Babilon bai bagarap?

◻ Wanem sampela bikpela mak bilong lotu tru?

◻ Olsem wanem tok i tru i mekim yu i kamap fri?

◻ Yumi ol Witnes Bilong Jehova i gat wanem bikpela wok?

[Askim Bilong Stadi]

1. Bikpela Babilon bai bagarap olsem wanem?

2. Ol wokboi bilong Jehova bai mekim wanem taim Babilon i bagarap?

3. I gat wanem ol askim yumi laik save long bekim bilong en?

4. Wanem namba wan mak bilong lotu tru, na olsem wanem Jisas i makim gutpela pasin bilong bihainim?

5. (a) Ol man i lotu tru long God i mas i gat wanem tingting long nem bilong God? (b) Wanem samting i kamapim long ples klia olsem ol Witnes Bilong Jehova i litimapim nem bilong God?

6. (a) Wanem namba 3 mak bilong lotu tru? (b) Olsem wanem tok bilong Jisas na Daniel i makim olsem Kingdom i bikpela samting? (Luk 17:​20, 21)

7. Ol wokman tru bilong God i ting olsem wanem long Baibel?

8. Wanem namba 5 mak bilong lotu tru?

9. Husat i bin bihainim pasin bilong laikim tru narapela, na ol i mekim olsem wanem?

10. Bilong wanem ol Kristen tru i no insait long wok politik samting?

11. (a) Ol Kristen i ting olsem wanem long pait? (b) I gat wanem tok long Baibel i makim olsem tingting bilong ol long dispela samting i stret? (2 Korin 10:​3-5)

12. (a) Wanem namba 8 mak bilong lotu tru? Stori long sampela lotu ol i bruk? (b) Pol i stori long dispela namba 8 mak olsem wanem?

13, 14. (a) Wanem insait bilong dispela tok, “yupela i mas i stap holi”? (b) Lotu tru inap i stap klin olsem wanem?

15, 16. Planti Kristen i bin mekim wanem kain senis long pasin bilong ol?

17. Wanem namba 10 mak bilong lotu tru? Stori long en.

18. (a) Husat i winim 10-pela mak bilong lotu tru na olsem wanem ol i winim? (b) Yumi olgeta wan wan i mas mekim wanem bilong kisim gutpela samting long bihain?

[Ol Piksa long pes 17]

Ol Witnes Bilong Jehova i autim tok bilong Kingdom bilong God na ol i skulim ol man long en

[Piksa long pes 18]

Long olgeta taim ol Kristen tru i no bin insait long wok politik na pait

[Kredit Lain]

Airplane: Courtesy of the Ministry of Defense, London