Ripot Long Wok Bilong Kingdom
Tok Bilong God i Gat Strong Bilong Senisim Pasin
APOSEL POL yet i tok, “bipo mi bin tok bilas long nem bilong [Krais], na mi birua long em na mi bin tok nogut long em.” (1 Timoti 1:13) Tasol em i senis! Aposel Pol i mekim bikpela senis tru long pasin bilong em na bihain em inap tok: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.”—1 Korin 11:1.
Long nau planti handet tausen manmeri long olgeta hap em ol i gat gutpela bel, ol i wok long senisim pasin bilong ol wankain olsem Pol i bin mekim. Wanem samting i helpim ol long mekim olsem? Ol i kisim save long Tok Bilong God na ol i bihainim long olgeta wokabaut bilong ol. Stori i kam bihain i kamapim klia olsem Tok Bilong God i gat strong bilong senisim pasin bilong man.
Long Slovenia tupela lapun marit i save sindaun arere long wanpela liklik ples. Man em Jože, em i gat 60 krismas na em i gat bikpela hevi tru long dring oltaim. Tasol em i save lukautim meri bilong em Ljudmila, em i gat sik. Wanpela de, tupela Witnes i kam autim tok long Jože. Em i singautim ol i kam insait long haus na ol i bungim meri bilong em. Taim Ljudmila i harim pinis gutpela tok bilong Kingdom, aiwara bilong amamas i pundaun long pes bilong em. Jože tu i amamas long ol samting em i harim na em i tromoi planti askim. Ol Witnes i tilim sampela nius bilong Baibel long tupela marit, na bihain ol i lusim ol.
Wanpela mun bihain ol Witnes i bin go bek, na ol i lukim buk Yu Inap i Stap Oltaim Long Paradais Long Graun i stap long tebol. Ol i askim Jože em i kisim buk we na em i tok: “Mi lukim wanpela toksave long baksait bilong wanpela bilong ol nius yu bin lusim wantaim mi. Olsem na mi raitim pas long ofis bilong yupela long Sagrep na askim ol long salim dispela buk i kam.” Taim ol Witnes i lukim olsem em i gat laik long kisim save, ol i singautim em long kam long bung bilong tingim i dai bilong Krais em bai kamap long Haus Kingdom. Ol Witnes i amamas tru taim ol i lukim em i kam!
Liklik taim bihain ol i kirap stadi wantaim em long Baibel na em i kamap strong. Olsem: Taim ol i soim Jože long Baibel olsem “yupela i no ken wokim wanpela giaman god, na . . . yupela i no ken brukim skru long wanpela giaman god o piksa na lotuim em,” wantu em i bungim olgeta imis na piksa bilong lotu i stap long haus bilong em na em i tromoi olgeta wantaim.—Kisim Bek 20:4, 5.
Jože i wok long inapim hangre bilong em bilong spirit. Tasol sori tru, em i hangre yet long narapela samting. Inap 18 yia em i save dring 7-pela lita wain long olgeta de. Dispela hevi bilong dring i mekim na em i no save tingim gut bilas bilong em. Tasol taim em i kisim save long tingting bilong God long pasin bilong dring planti tumas, em i tingting strong long lusim dispela pasin.
Isi isi em i wok long winim dispela hevi bilong dring, na long olgeta de em i save raitim long pepa hamas dring em i bin kisim long dispela de. I no longtaim na wain i no kalabusim em moa. Taim em i stadi i go, em i kisim save tu olsem ol Kristen tru i mas lukautim gut skin. Olsem na em i givim mani long ol Witnes na em i tokim ol: “Yupela i mas go baim wanem wanem klos mi mas putim bambai mi inap bilas gut long ol miting Kristen na long wok autim tok!” Ol Witnes i kam bek wantaim ol singlis samting, sokis, su, siot, saket, trasis, nektai, na wanpela paus.
Ol i bin stadi inap wanpela yia na bihain Jože na Ljudmila i winim ol mak bilong raun wantaim ol Witnes long wok bilong autim tok long ol haus. Tripela mun bihain long wanpela kibung distrik bilong ol Witnes Bilong Jehova, ol i kisim baptais long wara bilong makim ol i dediket long God. Maski em i lapun na skin bilong em i no save stap gutpela, Jože i save autim gutnius long olgeta taim, na bihain em i bin stap gut long wok bilong em olsem wanpela wokman bilong kongrigesen, i go inap long em i dai long Me, 1995. Ol gutpela kaikai i bin kamap long laip bilong dispela man i gat pasin daun na meri bilong em, i kamapim klia olsem: Tok Bilong God i gat strong bilong senisim pasin bilong man!