Ripot Long Wok Bilong Kingdom
Helpim Ol Man i “Nek Drai” Long Rasia
JISAS i tok: “Ol manmeri i laikim tumas long bihainim stretpela pasin, long wankain pasin olsem man i hangre tru na i laikim tumas long kisim kaikai na i dai long wara, em ol i ken amamas. Bai God inapim ol tru.” (Matyu 5:6) Ol ekspiriens i stap daunbilo i soim olsem wanem ol Witnes Bilong Jehova i helpim ol man i nek drai long ol samting bilong spirit long Rasia, em ples ol i tambuim wok bilong ol Witnes inap 70 yia.
▪ Wanpela meri nem bilong em Valentina i gat bikpela askim bilong Baibel em i no bin kisim bekim bilong en inap planti yia. Em i tingting: ‘Jisas i bin beten long husat?’ Em i ting olsem Jisas i mas beten long wanpela Man i winim em, na em i ting dispela man i mas i gat nem.
Em i go long Misin Otodoks Bilong Rasia. Tasol long dispela lotu, em i no painim bekim bilong dispela askim. Em i no amamas. Orait, em i kirap i go long Misin Talatala, tasol long dispela misin tu em i no bin painim stretpela bekim. Valentina i no save em bai i go we, olsem na em yet i kirap long kaunim Baibel bilong painim bekim, tasol em i no inap painim. Em i kirap beten bilong kisim helpim.
Sampela taim bihain ol Witnes Bilong Jehova i paitim dua bilong em. Ol i soim em long Baibel olsem nem bilong God em Jehova. Nau em i save Jisas i bin beten long God Jehova! Em i kirap stadi long Baibel long olgeta wik wantaim ol Witnes. Sampela taim long nait olgeta em i kaunim ol buk em Sosaiti Was Taua i wokim na em i kaunim ol tok bilong Baibel. I no longtaim na Valentina i pilim olsem em i painim pinis tok i tru. Insait long tripela mun tasol em i kirap long insait long wok autim tok, na tupela mun bihain em i kisim baptais. Pasin bilong em long painim painim tok i tru long rot bilong beten i kamapim gutpela samting tru.
▪ Wanpela Witnes i bin go long bas long wanpela longwe ples long autim tok. Long dispela raun em i toktok long wanpela yangpela meri long ol tok promis bilong Baibel, tasol dispela yangpela meri i no laik harim. Orait tupela mun bihain dispela Witnes i go bek gen long dispela ples long mekim wanpela pablik- tok. Bihain long tok, em i bungim wanpela nupela man na askim em: “I gat wanpela man i bin toktok wantaim yu long ol tok bilong Baibel?” Na man i tok, “Yes, yu yet yu bin toktok long mi.” Witnes i ting man i tok pilai. Tasol yangpela man i stori gut olsem tupela mun bipo em i bin sindaun harim ol tok Witnes hia i bin mekim wantaim dispela yangpela meri, taim ol i ran long bas. Em i tok: “Mi laik save long sampela tok moa, tasol yu lusim bas, na mi ting mi no inap lukim gen ol Witnes Bilong Jehova. Bihain, long ples wok bilong mi, mi bungim wanpela man i stadi long Baibel wantaim ol Witnes. Long dispela rot nau mi stap hia!”
Dispela man na meri bilong em i kirap stadi long Baibel. Na i no longtaim na em i lukim olsem wok bilong em i no stret wantaim ol lo bilong Baibel. Em i laik bai maus bilong bel bilong em i stap gut na no gat tok long ai bilong God, olsem na em i senisim wok em i bin holim. Nau long olgeta taim em i save tokim ol narapela long Kingdom bilong God taim rot i op long mekim. Meri bilong em tu i kamap gutpela long stadi bilong em long Baibel.
Ol Witnes Bilong Jehova i stap long olgeta hap bilong Rasia i amamas long insait long wok bilong autim tok na tokim ol man i gat gutpela bel: “ ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.”—KTH 22:17.