God Bai Skelim Wok Bilong Olgeta Wan Wan
“Yumi olgeta wan wan bai yumi mas tokim God long as bilong olgeta pasin yumi bin mekim.”—ROM 14:12.
1. God i givim rot long Adam na Iv long i stap fri, tasol tupela i no stap fri long mekim wanem?
GOD JEHOVA i bin wokim tupela tumbuna bilong pastaim, em Adam na Iv, na bai ol yet inap tingim rot ol i laik bihainim. Tru, ol i aninit long ol ensel, tasol ol i gat save na ol inap skelim gut ol samting ol i mas mekim. (Song 8:4, 5) Tasol maski ol i stap fri long tingim rot ol i laik bihainim, God i no tok ol i ken skelim wanem samting i stret na wanem samting i no stret. God bai skelim ol samting ol i mekim, na i wankain tu long olgeta pikinini bilong ol.
2. Klostu nau na Jehova bai kirap skelim wanem samting? Bilong wanem em bai mekim olsem?
2 Nau yumi kam klostu tru long pinis bilong dispela taim nogut yumi stap long en, olsem na Jehova bai skelim wok bilong olgeta man bilong graun. (Skelim wantaim Rom 9:28.) Klostu nau na ol man i givim baksait long God ol i mas kot long God Jehova long ol i bin bagarapim ol samting long graun, na bagarapim ol man—na bikpela samting moa, em ol i bin mekim nogut long ol wokman bilong em.—KTH 6:10; 11:18.
3. Bai yumi skelim wanem ol askim?
3 Yumi tingim dispela samting bai kamap, olsem na bilong helpim yumi, yumi mas tingim ol stretpela pasin Jehova i bin mekim long ol manmeri bilong em long bipo. Olsem wanem Baibel inap helpim yumi yet long mekim gut wok bilong yumi na bai Man bilong wokim yumi i ken orait long yumi? Husat ol i stap olsem gutpela piksa na yumi ken bihainim pasin bilong ol? Na yumi no ken bihainim pasin bilong husat?
Ol Ensel i Mas Mekim Gut Wok
4. Olsem wanem yumi save, Jehova i skelim wok bilong ol ensel tu?
4 Ol ensel bilong Jehova long heven ol tu i mas mekim gut wok God i bin givim long ol, wankain olsem yumi. Paslain long taim bilong Bikpela Tait long taim bilong Noa, sampela ensel i bikhet long God na ol i tanim i kamap man bambai ol i ken slip wantaim ol meri. Ol inap tingting long mekim olsem, long wanem, ol i stap fri long makim rot ol i laik bihainim; tasol God i mas skelim ol samting ol i mekim. Taim ol dispela bikhetlain ensel i go bek long ples spirit, Jehova i no larim ol i holim wok ol i bin mekim long pastaim. Disaipel Jut i tok, God “i pasim ol long ol sen i save stap oltaim oltaim, na em i kalabusim ol i stap long dispela ples i tudak nogut tru. Ol i wetim De bilong bikpela kot bilong God.”—Jut 6.
5 Bos bilong ol dispela bikhetlain ensel, o spirit nogut, em Satan. (Matyu 12:24-26) Dispela ensel nogut i bin bikhet long Man bilong wokim em na em i sutim tok long Jehova olsem i no stret Jehova i stap King. Satan i bin pulim tupela tumbuna bilong yumi bilong pastaim long mekim sin, na dispela i mekim na bihain ol i dai. (Stat 3:1-7, 17-19) Tru, inap long sampela taim bihain, Jehova i larim Satan i go long heven, tasol Buk Kamapim Tok Hait long Baibel i tok profet olsem: Long taim God i makim, ol bai rausim dispela ensel nogut i kam daun long graun. Ol samting i kamap i makim olsem dispela samting i bin painim Satan taim Krais Jisas i kamap King long Kingdom long yia 1914. Bihain Satan wantaim ol spirit nogut bilong em bai bagarap na pinis olgeta, inap oltaim oltaim. Dispela bai stretim bikpela tok i bin kamap olsem husat i mas i stap king, na kot bilong Satan long pasin bikhet em i bin mekim, Jehova i stretim pinis.—Jop 1:6-12; 2:1-7; KTH 12:7-9; 20:10.
Pikinini Bilong God i Mas Mekim Gut Wok Bilong Em
6. Jisas i ting olsem wanem long wok bilong Papa em i mas mekim?
6 Pikinini bilong God, em Krais Jisas, em i stap olsem gutpela piksa tru! Jisas em man i gutpela olgeta, wankain olsem Adam, na em i amamas long mekim laik bilong God. Na em i amamas tu long mekim gut wok bilong em long bihainim lo bilong Jehova. Man bilong raitim Song i mekim wanpela tok profet long em i makim em stret, olsem: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”—Song 40:8; Hibru 10:6-9.
7. Taim Jisas i beten long nait paslain long taim em i dai, olsem wanem na em inap mekim tok i stap long Jon 17:4, 5?
7 Maski ol man i birua nogut tru long Jisas, em i mekim laik bilong God na em i stap gut long God i go inap long taim em i dai long pos diwai. Long dispela rot em i baim bek ol man bilong graun long ol samting nogut em sin bilong Adam i bin kamapim, em i bin givim dai long ol. (Matyu 20:28) Olsem na long nait paslain long taim Jisas i dai, em inap tru long beten olsem: “Mi bin soim biknem na strong bilong yu long ol manmeri bilong dispela graun. Mi pinisim pinis dispela wok yu bin givim mi long mekim. Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.” (Jon 17:4, 5) Jisas inap mekim dispela tok long Papa bilong em long heven, long wanem, em i mekim gut wok God i bin givim long em na God i orait long em.
8. (a) Olsem wanem Pol i soim yumi olsem God Jehova bai skelim wok bilong yumi? (b) Wanem samting bai helpim yumi na bai God i ken orait long yumi?
8 Tru, yumi no olsem dispela man Krais Jisas em i gutpela olgeta—yumi gat sin. Tasol God bai skelim wok bilong yumi tu. Aposel Pol i tok: “Yu, bilong wanem yu skelim pasin bilong brata bilong yu na tok nogut long em? Na yu, bilong wanem yu tok bilas long brata bilong yu? Yupela i save, bai yumi olgeta i sanap long kot bilong God. Em i olsem buk bilong God i tok, ‘Mi Bikpela, mi save stap oltaim, mi tok tru tumas, olgeta manmeri bilong graun bai i kam long mi na brukim skru long mi. Na olgeta bilong ol bai i tokaut olsem, mi God tru.’ Olsem na yumi save, yumi olgeta wan wan bai yumi mas tokim God long as bilong olgeta pasin yumi bin mekim.” (Rom 14:10-12) Bilong yumi ken mekim gut wok bilong yumi na Jehova i ken orait long yumi, em i bin givim maus bilong bel long yumi na em i givim Baibel long yumi bilong stiaim ol tok na wok yumi mekim. (Rom 2:14, 15; 2 Timoti 3:16, 17) Yumi mas mekim wok long olgeta samting bilong spirit Jehova i bin givim long yumi, na bihainim maus bilong bel em Baibel i skulim pinis, na dispela bai helpim yumi long mekim ol samting i stret na God i ken orait long yumi. (Matyu 24:45-47) Spirit holi, olsem strong bilong Jehova, em i narapela samting bilong strongim na stiaim yumi. Sapos yumi mekim ol samting olsem spirit i soim yumi long en, na yumi bihainim maus bilong bel em Baibel i skulim pinis, yumi kamapim klia olsem yumi no “sakim tok bilong God,” em dispela Man bai skelim olgeta wok yumi mekim.”—1 Tesalonaika 4:3-8; 1 Pita 3:16, 21.
God i Skelim Wok Bilong Ol Lain
9. Ol Idom ol i husat? Ol i bin mekim nogut long ol Israel na wanem samting i painim ol?
9 Ol lain man tu i mas kot long Jehova long olgeta wok ol i mekim. (Jeremaia 25:12-14; Sefanaia 3:6, 7) Yumi ken tingim kantri Idom long bipo tru, em i stap long hap saut bilong raunwara Detsi na hap not bilong Galf Bilong Akaba. Ol Idom ol i kamap long lain bilong Sem, na ol i olsem wanlain bilong ol Israel. Tumbuna bilong ol Idom em Iso, tumbuna pikinini bilong Abraham, tasol ol Idom i no larim ol Israel i wokabaut long “bikrot” na brukim graun bilong ol taim ol i laik i go long Graun Bilong Promis. (Namba 20:14-21) Insait long sampela handet yia bihain, ol Idom i wok long kisim pasin bilong birua nogut long ol Israel. Orait, bihain ol Idom i mas kot long God long ol i bin kirapim ol Babilon long bagarapim Jerusalem long yia 607 B.C.E. (Song 137:7) Olsem 500 yia samting paslain long Krais, ami bilong Babilon aninit long King Nabonaidas ol i daunim Idom, na em i kamap bus nating i no gat man long en, olsem Jehova i bin tok.—Jeremaia 49:20; Obadia 9-11.
10. Ol Moap i bin mekim wanem pasin long ol Israel? God i mekim wanem long Moap long dispela pasin ol i bin mekim?
10 Ol Moap tu i kisim strafe. Kantri Moap i stap long hap not bilong Idom na hap is bilong raunwara Detsi. Taim ol Israel i laik go insait long Graun Bilong Promis, ol Moap i no mekim gut long ol; ating ol i givim bret na wara long ol Israel bilong kisim mani tasol. (Lo 23:3, 4) King Balak bilong Moap i baim profet Balam bilong tok olsem ol god i mas bagarapim ol Israel, na ol meri Moap i pulim ol man Israel long mekim pasin pamuk na lotuim ol god giaman. (Namba 22:2-8; 25:1-9) Tasol Jehova i lukim pinis pasin birua ol Moap i mekim long lain Israel. Olsem em i tok profet long en, ol Babilon i kam na bagarapim Moap. (Jeremaia 9:25, 26; Sefanaia 2:8-11) Yes, ol Moap i kot long God long ol pasin ol i bin mekim.
11. Moap na Amon i kamap olsem wanem ol taun? Ol tok profet bilong Baibel i makim olsem God bai mekim wanem long dispela pasin nogut bilong nau?
11 Tasol i no ol Moap tasol i gat kot—ol Amon tu i mas kot long God long ol pasin ol i bin mekim. Jehova i bin tok profet olsem: “Ol Moap na ol Amon bai i bagarap olsem taun Sodom na Gomora i bin bagarap. Na bai salat tasol i kamap na i karamapim graun bilong ol. Na bai ol hul bilong kisim sol i kamap na bai dispela ples i bagarap na i stap olsem tasol.” (Sefanaia 2:9) Kantri Moap na Amon i bagarap olgeta, wankain olsem long taim God i bin bagarapim taun Sodom na Gomora. Wanpela lain long Landon (Geological Society) i tok, sampela saveman i bin painim ples em taun Sodom na Gomora i bin i stap long en long nambis bilong raunwara Detsi long hap bilong is. Sapos ol i painim sampela samting moa bilong en na yumi inap bilip olsem em ples tru bilong dispela tupela taun, orait ol dispela samting bai i strongim ol tok profet bilong Baibel olsem God Jehova bai skelim long kot dispela pasin nogut bilong nau, wankain olsem em i bin mekim long ol dispela ples long bipo.—2 Pita 3:6-12.
12. Israel i mas kot long God long ol rong ol i bin mekim, tasol tok profet i tok wanem long wanpela hap lain bilong ol Juda?
12 Maski Jehova i bin laikim tru lain Israel, ol tu i mas kot long God long ol rong ol i bin mekim. Taim Krais Jisas i kam long lain Israel, klostu olgeta i sakim em. Liklik hap lain tasol ol i bilip na ol i kamap disaipel bilong em. Pol i kolim sampela tok profet bilong makim dispela hap lain taim em i tok: “Aisaia i bin tingting long ol Israel na em i bin autim tok olsem, ‘Maski sapos ol manmeri bilong Israel i kamap planti tru olsem wesan bilong nambis, Bikpela bai i kisim bek liklik lain tasol. Bikpela i kotim pinis ol manmeri bilong graun, na kwiktaim em bai i mekim save tru long ol.’ Ol dispela samting i kamap olsem bipo Aisaia i bin tok. Em i bin tok olsem, ‘Sapos Bikpela I Gat Olgeta Strong i no bin larim liklik lain bilong yumi i stap, bai yumi bagarap pinis, olsem taun Sodom na taun Gomora i bin bagarap.’ ” (Rom 9:27-29; Aisaia 1:9; 10:22, 23) Pol i stori long dispela 7,000 man long taim bilong Elaija em ol i no bin brukim skru long god Bal, na bihain Pol i tok: “Olsem tasol nau long dispela taim tu i gat hap lain i stap, God i bin marimari long ol na makim ol bilong em yet.” (Rom 11:5) God bai skelim wok bilong olgeta wan wan bilong dispela hap lain.
Sampela Man God i Bin Skelim Wok Bilong Ol
13. Taim Kein i kilim i dai brata bilong em Abel na God i skelim em long kot, wanem samting i painim em?
13 Baibel i stori long planti man em God Jehova i bin skelim wok bilong ol. Yumi ken tingim namba wan pikinini bilong Adam, em Kein. Em wantaim brata bilong em Abel ol i givim ofa long Jehova. God i orait long ofa bilong Abel, tasol em i no orait long ofa bilong Kein. Taim Kein i kilim i dai Abel na God i skelim Kein long kot, em i no pilim rong bilong em; em i tokim God: “Olsem wanem? Yu ting mi stap tasol bilong lukautim brata bilong mi?” Orait, God i givim strafe long Kein na em i rausim Kein i go i stap long “wanpela hap graun ol i kolim ‘Raun Nabaut.’ Dispela graun i stap long hap sankamap bilong gaden Iden.” Kein i no pilim rong bilong em, na em i no tanim bel; em i bel hevi tasol long dispela strafe i stret em i bin kisim.—Stat 4:3-16.
14. Olsem wanem stori bilong hetpris Eli na tupela pikinini bilong em i kamapim klia olsem God i save skelim wok bilong olgeta wan wan?
14 Hetpris bilong Israel, em Eli, God i bin skelim wok bilong em tu. Tupela pikinini man bilong em, em Hopni na Finias, tupela i mekim wok pris, tasol man bilong raitim stori bilong ol samting i bin kamap bipo, em Josifas, em i tok, ol “i bin mekim rong long ol man, na ol i mekim pasin i no stret long God, na i no gat wanpela kain pasin nogut ol i no bin mekim.” Dispela tupela “man nogut tru” i no daun long Jehova, na ol i mekim pasin nogut long ol samting i holi, na ol i mekim pasin pamuk nogut tru. (1 Samuel 1:3; 2:12-17, 22-25) Eli, em papa bilong tupela na em i hetpris bilong Israel, em i gat wok long stretim tupela, tasol em i krosim ol liklik tasol long pasin isi. Long dispela pasin Eli i wok long ‘litimapim nem bilong tupela pikinini na daunim nem bilong Jehova.’ (1 Samuel 2:29) Orait strafe i painim lain bilong Eli. Tupela pikinini wantaim i dai long de stret em papa bilong ol i dai, na bihain lain bilong ol, em lain bilong mekim wok pris, i pinis olgeta. Em nau, Jehova i stretim pinis long kot dispela pasin nogut ol i bin mekim.—1 Samuel 3:13, 14; 4:11, 17, 18.
15. Bilong wanem God i givim gutpela pe long pikinini bilong King Sol, em Jonatan?
15 Tasol pikinini bilong King Sol, em Jonatan, em i stap narapela kain piksa tru. Taim Devit i kilim i dai Goliat, ‘Jonatan i givim bel moa yet long Devit na em i laikim Devit tru olsem em i laikim em yet,’ na tupela i wokim wanpela strongpela tok promis long ol bai stap pren oltaim. (1 Samuel 18:1, 3) Ating Jonatan i pilim pinis olsem spirit bilong God i lusim pinis Sol, tasol Jonatan i strong yet long lotu tru long God. (1 Samuel 16:14) Jonatan i save, God yet i bin givim namba long Devit long kamap king, na oltaim em i stap gut long Devit. Jonatan i save, God bai skelim olgeta wok bilong em, na Jehova i givim gutpela pe long em long dispela pasin bilong em long daun long Devit—lain bilong Jonatan i stap longtaim, i go inap long planti lain tumbuna pikinini.—1 Stori 8:33-40.
Insait Long Kongrigesen Kristen
16. Taitus em i husat? Olsem wanem yumi ken tok, em i mekim gut wok bilong em na God i orait long em?
16 Ol Skripsa Grik i mekim gutpela tok long planti man na meri em ol i bin mekim gut wok bilong ol. Wanpela em Taitus, em wanpela Kristen bilong lain Grik. Sampela i ting em i bin kamap Kristen long namba wan taim Pol i bin i go mekim wok misineri long Saiprus. Ating sampela Juda na ol man bilong Saiprus i bihainim lotu Juda ol i bin i stap long Jerusalem long Pentikos bilong yia 33 C.E., olsem na ating lotu Kristen i bin kamap long dispela ailan bihain liklik long dispela taim. (Aposel 11:19) Ol samting Taitus i mekim i kamapim klia olsem em i wanpela gutpela wanwok bilong Pol. Em i bin go wantaim Pol na Barnabas long Jerusalem long yia 49 C.E. samting, taim ol i stretim pinis bikpela tok i bin kamap long pasin bilong katim skin. Ol i no bin katim skin bilong Taitus, na dispela i strongim tok bilong Pol olsem ol man i kamap Kristen ol i no ken stap aninit long Lo Bilong Moses. (Galesia 2:1-3) Baibel i kamapim klia olsem Taitus i mekim gutpela wok, na tu, Pol i raitim wanpela pas long Taitus em spirit holi i bin kirapim Pol long raitim. (2 Korin 7:6; Taitus 1:1-4) Ol samting i makim olsem Taitus i bin mekim gut ol wok bilong em i go inap long taim em i dai, na God i orait long wok bilong em.
17. Olsem wanem long wok bilong Timoti? Pasin bilong Timoti inap helpim yumi olsem wanem?
17 Timoti tu em i man bilong wok strong, na God Jehova i orait long wok bilong em. Maski Timoti i gat sampela sik, em i “bilip tru long Krais,” na ‘em i bin helpim Pol long wok bilong gutnius.’ Olsem na Pol inap tokim ol wanwok Kristen long Filipai: “I no gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela.” (2 Timoti 1:5; Filipai 2:20, 22; 1 Timoti 5:23) Maski skin bilong yumi i no strong na yumi gat ol narapela hevi, yumi tu inap bilip strong na mekim gut ol wok bilong yumi na bai God i ken orait long yumi.
18. Lidia em i husat? Em i mekim wanem gutpela pasin?
18 Lidia em i wanpela meri i save daun long God, na ol samting i makim olsem em i bin mekim gut wok bilong em na God i orait long em. Em wantaim ol wanhaus bilong em i insait long namba wan lain bilong Yurop ol i kisim lotu Kristen taim Pol i autim tok long Filipai long yia 50 C.E. samting. Lidia em i bilong Taiataira, na yumi ken ting em i bin bihainim lotu Juda, tasol ating i no gat planti Juda na i no gat wanpela haus lotu bilong ol Juda long Filipai. Lidia wantaim sampela meri moa bilong lotuim God ol i bin bung long arere bilong wanpela wara taim Pol i givim tok long ol. Olsem na Lidia i kamap wanpela Kristen na em i strong long Pol wantaim ol poroman bilong em i mas i stap long haus bilong em. (Aposel 16:12-15) Gutpela pasin bilong Lidia long kisim ol i go long haus bilong em na lukautim ol, em i stap yet olsem wanpela mak bilong ol Kristen tru.
19. Dorkas i bin mekim wanem ol gutpela wok na God i orait long em?
19 Dorkas em narapela meri i bin mekim gut wok bilong em na God Jehova i orait long em. Taim em i dai, sampela disaipel i stap long Jopa ol i singautim Pita i kam. Em i kamap pinis na tupela man i “bringim em i go long dispela rum antap. Olgeta meri, man bilong ol i dai pinis, ol i kam sanap klostu long Pita na ol i krai i stap. Ol i soim em olgeta klos na saket samting Tabita i bin wokim, taim em i stap yet wantaim ol.” Pita i kirapim bek Dorkas. Tasol pasin bilong Dorkas long mekim pasin sori na givim ol samting long ol meri, yu ting em dispela samting tasol bilong em na yumi tingim em? Nogat. Em i wanpela “disaipel,” na em i mekim wok bilong kamapim ol disaipel. Ol meri Kristen long nau tu ‘i save mekim ol gutpela pasin na helpim ol manmeri i sot long ol samting.’ Na ol tu i amamas long mekim wok bilong autim gutnius bilong Kingdom na kamapim ol disaipel.—Aposel 9:36-42; Matyu 24:14; 28:19, 20.
20. Yumi ken givim wanem ol askim long skin bilong yumi yet?
20 Baibel i kamapim klia olsem Bikpela King Jehova bai skelim wok bilong olgeta lain na olgeta man wan wan. (Sefanaia 1:7) Sapos yumi dediket pinis long God, yumi ken askim skin bilong yumi yet: ‘Mi ting olsem wanem long wok God i bin givim long mi na mi mas mekim? Mi mekim wanem kain wok long dispela na taim God Jehova na Krais Jisas i skelim wok bilong mi, bai ol i orait long en?’
Wanem Ol Bekim Bilong Yu?
◻ Olsem wanem yu inap kamapim klia olsem ol ensel na Pikinini bilong God tu i mas mekim gut wok bilong ol na bai Jehova i ken orait long ol?
◻ Wanem ol stori bilong Baibel i kamapim klia olsem God i skelim wok bilong ol lain man?
◻ Baibel i tok wanem long God bai skelim wok bilong yumi olgeta wan wan?
◻ Baibel i stori long wanem sampela manmeri em ol i bin mekim gutpela wok na God Jehova i orait long ol?
5. Ol i bin mekim wanem long Satan wantaim ol spirit nogut bilong em? Jehova bai mekim wanem bilong stretim kot bilong dispela pasin bikhet ol i bin mekim?
[Piksa long pes 10]
Krais Jisas i bin mekim gut wok bilong em na Papa bilong em long heven i orait long em
[Piksa long pes 15]
Olsem Dorkas i bin mekim, ol meri Kristen long nau ol i save mekim ol gutpela wok na bai God Jehova i ken orait long ol
[Piksa Kredit Lain long pes 13]
The Death of Abel/The Doré Bible Illustrations/Dover Publications, Inc.