Kristen i Mas Helpim Narapela Kristen
“Yumi olgeta i stap hap bilong wanpela bodi.”—EFESUS 4:25.
1. Wanpela buk i tok wanem long bodi bilong man?
BODI bilong man i wanpela gutpela samting tru God i bin wokim! Wanpela buk (The World Book Encyclopedia) i tok: “Sampela i save kolim bodi bilong man olsem wanpela masin—em nambawan gutpela masin, winim olgeta narapela masin.” Tru, bodi bilong man i no wanpela masin. Tasol yumi ken tok, long planti samting em i wankain. Olsem wanpela masin, bodi i gat planti hap bilong en. Olgeta wan wan hap i olsem ol wan wan hap bilong masin—olgeta i gat wanpela wok stret ol i mekim. Tasol olgeta hap i save wok wantaim na bai bodi o masin i ken wok gut.
2. Olsem wanem bodi bilong man i wankain olsem kongrigesen Kristen?
2 Tru tumas, bodi bilong man i gat planti hap bilong en, na narapela i save helpim narapela. I no gat wanpela liklik rop, o masol, o narapela hap bilong bodi i no gat wok bilong en. Na olsem tasol, olgeta wan wan insait long kongrigesen Kristen inap mekim sampela samting bilong helpim kongrigesen long i stap strong long spirit na i stap gutpela tru. (1 Korin 12:14-26) Tru, wanpela man o meri insait long kongrigesen i no ken ting em i winim ol narapela, tasol em i no ken ting em i samting nating.—Rom 12:3.
3. Olsem wanem Efesus 4:25 i makim olsem ol Kristen i mas i gat ol narapela Kristen bilong helpim ol?
3 Olgeta wan wan hap bilong bodi i mas i gat ol narapela hap bilong helpim ol, na olsem tasol ol Kristen i mas i gat ol narapela Kristen bilong helpim ol. Aposel Pol i tokim ol wanbilip em God i bin makim ol long spirit holi: “Yupela olgeta i mas mekim tok tru tasol long ol arapela Kristen, long wanem, yumi olgeta i stap hap bilong wanpela bodi.” (Efesus 4:25) Ol i “hap bilong wanpela bodi,” olsem na namel long ol Israel bilong spirit—em “bodi bilong Krais”—narapela i save mekim tok tru long narapela na ol i wok gut wantaim. Tru tumas, olgeta wan wan i hap bilong ol narapela. (Efesus 4:11-13) Na tu, ol Kristen i wet long kisim laip oltaim long graun, ol i stap wanbel wantaim dispela lain na ol i save tok tru na wok gut wantaim ol.
4. Yumi inap helpim ol nupela man olsem wanem?
4 Long olgeta yia, planti tausen manmeri em ol i laik i stap long Paradais long graun ol i save kisim baptais. Ol narapela insait long kongrigesen ol i amamas long helpim ol long “kisim olkain skul bilong ol man i bikpela pinis.” (Hibru 6:1-3) Bilong helpim ol olsem, ol i save bekim ol askim bilong ol long Baibel o helpim ol long wok bilong autim tok. Yumi ken helpim ol nupela man taim yumi stap olsem gutpela piksa long bekim tok oltaim long ol miting Kristen. Na tu, long taim bilong hevi yumi ken givim sampela tok long ol bilong strongim ol o mekim gut bel bilong ol. (1 Tesalonaika 5:14, 15) Yumi mas wok long painim rot bilong helpim ol narapela long “bihainim tok tru.” (3 Jon 4) Maski yumi yangpela o lapun, o nau tasol yumi kirap bihainim tok i tru o yumi bin bihainim inap planti yia pinis, yumi ken mekim ol samting bilong helpim ol wanbilip long i stap strong long ol samting bilong spirit—na tru tumas, ol i mas i gat yumi ol wanbilip bilong helpim ol.
Ol i Laik Helpim Ol
5. Akwila na Prisila i bin helpim Pol olsem wanem?
5 Ol marit Kristen ol i save amamas long helpim ol wanbilip. Akwila na meri bilong em, Prisila, i bin helpim Pol. Ol i singautim em i kam long haus bilong ol, na wok wantaim em long samapim haus sel, na helpim em long strongim nupela kongrigesen long Korin. (Aposel 18:1-4) Na long wanpela rot Baibel i no tokaut long en, klostu ol i dai bilong helpim Pol. Ol i bin sindaun long Rom taim Pol i tokim ol Kristen bilong Rom: “Yupela givim gude bilong mi long Prisila na Akwila, tupela wanwok bilong mi long wok bilong Krais Jisas. Tupela i bin redi long i dai bilong helpim mi. Olsem na i no mi tasol i tenkyu long tupela. Nogat. Olgeta sios bilong ol arapela lain manmeri, ol tu i save tenkyu long tupela.” (Rom 16:3, 4) Wankain olsem Akwila na Prisila, sampela Kristen bilong nau i save strongim ol kongrigesen na helpim ol wanlotu long ol kain kain rot, na sampela taim ol i redi long i dai bambai ol i no ken givim rot long ol birua long mekim nogut long ol narapela wokman bilong God o kilim ol i dai.
6. Apolos i bin kisim wanem helpim?
6 Na tu, Akwila na Prisila i bin helpim wanpela Kristen i gat save tru long mekim tok, em Apolos, em i wok long skulim ol lain bilong Efesus long Jisas Krais. Long dispela taim Apolos i save long baptais bilong Jon tasol, em i makim olsem man i hevi long rong em i bin mekim long kontrak bilong Lo na em i tanim bel. Akwila na Prisila i lukim olsem ol i mas helpim Apolos, olsem na tupela i “tokim em long Rot bilong God, bai em i ken klia gut long en.” Yumi ken ting tupela i bin skulim em olsem: Long baptais Kristen man i save go insait long wara na em i save kisim spirit holi. Apolos i bihainim gut ol tok em i bin lainim. Bihain, long Akaia, “em i helpim ol Kristen moa yet, em ol dispela manmeri God i bin marimari long ol na givim bilip long ol. Em i strong moa long autim tok long ai bilong ol manmeri, bilong bekim na daunim tru ol tok kranki ol Juda i bin mekim. Em i autim tok bilong buk bilong God bilong soim ol klia tumas olsem, Jisas em i man God i makim bilong kisim bek ol manmeri bilong en.” (Aposel 18:24-28) Sampela tok ol wanlotu i mekim i save helpim yumi long kisim gut ol tok bilong Baibel. Long dispela samting tu, yumi mas i gat ol narapela bilong helpim yumi.
Helpim Ol Long Mani Samting
7. Ol Filipai i mekim wanem long taim ol wanlain Kristen i sot long ol samting bilong skin?
7 Ol manmeri bilong kongrigesen Kristen long Filipai ol i laikim tumas Pol na ol i salim mani samting long em taim em i stap long Tesalonaika. (Filipai 4:15, 16) Na taim ol brata long Jerusalem i sot long ol samting bilong skin, ol Filipai i givim planti mani long ol, maski ol yet i rabis. Pol i amamas tru long pasin bilong ol brata sista bilong em long Filipai, olsem na em i kamapim stori bilong ol olsem gutpela piksa ol narapela bilipman i ken bihainim.—2 Korin 8:1-6.
8. Epafroditus i mekim wanem kain pasin?
8 Taim Pol i stap kalabus, ol Filipai i salim mani samting long em olsem presen, na tu, ol i salim Epafroditus bilong helpim em. Pol i tok: “[Epafroditus] i mekim wok bilong Krais na klostu em i dai pinis. Em i no tingting long em yet i mas i stap gut. Nogat. Em i tingting tasol long wok yupela i bin givim em bilong helpim mi.” (Filipai 2:25-30; 4:18) Baibel i no tok Epafroditus em i wanpela elda o kongrigesen sevent o nogat. Tasol em i wanpela Kristen i redi long lusim ol samting bilong em yet na em i save helpim ol narapela, na Pol i mas kisim helpim long em. Olsem wanem? I gat sampela olsem Epafroditus i stap long kongrigesen bilong yu?
‘Ol i Helpim Gut Tru’ Ol Narapela
9. Olsem wanem Aristarkus i stap olsem gutpela piksa yumi ken bihainim?
9 Long olgeta kongrigesen, ol i save amamas tru long ol brata sista i gat pasin sori, olsem Akwila, Prisila na Epafroditus. Ating sampela wanlotu bilong yumi ol i kain olsem Aristarkus, em wanpela Kristen i bin stap long taim bilong ol aposel. Em na sampela moa ol i bin ‘helpim gut tru’ ol brata—ating ol i bin mekim gut bel bilong ol taim ol i gat hevi, o ol i helpim ol long ol samting bilong skin. (Kolosi 4:10, 11) Taim Aristarkus i helpim Pol, em i soim olsem em i wanpela pren tru long taim bilong hevi. Em i wankain olsem man em Sindaun 17:17 (NW ) i stori long en, olsem: “Pren tru i save laikim yumi long olgeta taim, na em i olsem brata i save sambai long helpim yumi long taim bilong hevi.” Yumi olgeta i mas wok strong long ‘helpim gut tru’ ol wanlain Kristen, a? Na yumi mas strong moa long helpim ol Kristen em taim nogut i painim ol.
10. Olsem wanem Pita i stap olsem gutpela piksa ol elda Kristen i ken bihainim?
10 Ol elda Kristen i mas wok strong moa long helpim gut ol brata sista bilong ol. Krais i tokim aposel Pita: “Strongim ol brata bilong yu.” (Luk 22:32) Pita inap mekim olsem, long wanem, em i strong tru long mekim ol gutpela pasin, na em i mekim moa yet bihain long taim Jisas i kirap bek long matmat. Yupela ol elda, yupela i mas wok strong long mekim olsem, na amamas na mekim long pasin isi, long wanem, ol wanbilip i mas kisim helpim long yupela.—Aposel 20:28-30; 1 Pita 5:2, 3.
11. Taim yumi tingim pasin bilong Timoti, dispela inap helpim yumi olsem wanem?
11 Timoti, em i save raun wantaim Pol, em i wanpela elda i save tingim tru ol narapela Kristen. Maski em i gat sampela sik, em i gat strongpela bilip na em i ‘helpim Pol long wok bilong gutnius.’ Olsem na aposel Pol inap tokim ol Filipai: “I no gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela.” (Filipai 2:20, 22; 1 Timoti 5:23; 2 Timoti 1:5) Sapos yumi bihainim dispela pasin bilong Timoti, bai yumi inap helpim gut ol narapela i save lotuim Jehova. Tru, ating skin bilong yumi yet i no strong, na yumi gat ol narapela hevi yumi mas karim, tasol yumi tu inap kamapim klia olsem yumi gat strongpela bilip na yumi save tingim tru ol brata sista bilong spirit, na yumi mas mekim tru ol dispela samting. Yumi no ken lusim tingting olsem yumi gat wok long helpim ol.
Ol Meri i Save Tingim Ol Narapela
12. Pasin bilong Dorkas inap lainim yumi long wanem samting?
12 Dorkas em i wanpela meri bilong givim bel long God na em i save tingim tru ol narapela. Taim em i dai, ol disaipel i singautim Pita i kam na ol i kisim em i go long wanpela rum antap. “Olgeta meri, man bilong ol i dai pinis, ol i kam sanap klostu long Pita na ol i krai i stap. Ol i soim em olgeta klos na saket samting Tabita [olsem Dorkas] i bin wokim, taim em i stap yet wantaim ol.” Pita i kirapim bek Dorkas, na yumi ken ting em i wok yet long mekim ‘ol gutpela pasin na helpim ol manmeri i sot long ol samting.’ Long kongrigesen Kristen long taim bilong yumi, i gat ol meri i kain olsem Dorkas, em ol i save wokim klos o mekim ol narapela gutpela wok bilong helpim ol manmeri i sot long ol samting. Tasol nambawan bikpela wok bilong ol long helpim ol man, em wok bilong autim tok bilong Kingdom na kamapim ol disaipel.—Aposel 9:36-42; Matyu 6:33; 28:19, 20.
13. Olsem wanem Lidia i soim olsem em i save tingim ol narapela Kristen?
13 Wanpela meri i save stap aninit long God, em Lidia, em i save tingim tru ol narapela. Em i bilong Taiataira, tasol em i sindaun long Filipai taim Pol i autim tok long dispela hap long yia 50 C.E. samting. Ating Lidia em i wanpela meri i save bihainim lotu bilong ol Juda, tasol i no gat planti Juda o wanpela haus lotu bilong ol Juda long Filipai. Em wantaim ol narapela meri i save lotu long God, ol i bin bung long arere bilong wanpela wara bilong mekim lotu taim Pol i autim gutnius long ol. Baibel i tok: “Bikpela i tanim bel bilong [Lidia], na em i putim yau long dispela tok Pol i mekim. Em i kisim baptais, na ol wanhaus bilong en wantaim. Em i kisim baptais pinis, na em i tokim mipela, ‘Sapos yupela i ting mi bilip tru long Bikpela, orait yupela i ken i kam i stap long haus bilong mi.’ Na em i strong tumas long mipela, na mipela i bihainim tok bilong em.” (Aposel 16:12-15) Lidia i laik mekim gutpela pasin long ol man, olsem na em i strong long Pol na ol poroman bilong em i mas go i stap long haus bilong em. Long nau yumi tu i amamas taim ol Kristen i gat pasin sori ol i save singautim yumi i go long haus bilong ol, a?—Rom 12:13; 1 Pita 4:9.
Mipela i Mas i Gat Yupela Ol Yangpela Tu
14. Jisas Krais i bin mekim wanem kain pasin long ol pikinini?
14 Man bilong kirapim kongrigesen Kristen, em Pikinini bilong God, Jisas Krais, em man bilong mekim gutpela pasin long ol man. Taim ol manmeri i stap wantaim em, ol i stap bel isi, long wanem, em i save mekim pasin sori na marimari long ol. Wanpela taim sampela i bringim ol liklik pikinini bilong ol i kam long Jisas, na ol disaipel i laik rausim ol i go. Tasol Jisas i tok: “Yupela larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini. Mi tok tru long yupela, sapos wanpela man i no kisim kingdom bilong God olsem ol liklik pikinini i save kisim, em i no inap i go insait long en. Nogat tru.” (Mak 10:13-15) Bilong kisim ol blesing bilong Kingdom, yumi mas mekim pasin daun na larim ol narapela i skulim yumi, olsem ol pikinini i save mekim. Jisas i soim olsem em i laikim tru ol liklik pikinini taim em i holim ol na askim God long mekim gut long ol. (Mak 10:16) Orait olsem wanem long yupela ol yangpela long nau? Yupela i ken bilip tru olsem mipela i laikim tru yupela na kongrigesen i mas i gat yupela ol yangpela i stap long en.
15. Luk 2:40-52 i stori olsem wanem long i stap bilong Jisas? Olsem wanem em i stap olsem gutpela piksa bilong ol yangpela?
15 Taim Jisas i yangpela yet, em i soim olsem em i save laikim tru God na Baibel. Taim em i gat 12-pela krismas, em wantaim papamama, em Josep na Maria, ol i lusim Nasaret na i go long Jerusalem bilong mekim Pasova. Taim ol i lusim Jerusalem na wokabaut i kam bek, papamama i lukim olsem Jisas i no stap wantaim ol lain i wokabaut wantaim ol. Tupela i wok long painim em, na bihain ol i lukim em i sindaun insait long banis bilong tempel na harim tok bilong ol tisa Juda na givim askim long ol. Jisas i kirap nogut long Josep na Maria i wok long painim painim em, na em i askim ol: “Ating yutupela i no save, mi mas i stap long haus bilong Papa bilong mi?” Em i go bek long ples wantaim tupela, na oltaim em i save bihainim tok bilong tupela. Na em i wok long kamap bikpela na save bilong em i kamap gutpela tru. (Luk 2:40-52) Em nau, Jisas i stap olsem gutpela piksa tru bilong ol yangpela bilong yumi! Ol i mas bihainim tok bilong papamama na i gat laik long kisim save long ol samting bilong spirit.—Lo 5:16; Efesus 6:1-3.
16. (a) Taim Jisas i autim tok long tempel, sampela mangi i singaut na tok wanem? (b) Ol yangpela Kristen i gat rot long mekim wanem long nau?
16 Yu wanpela yangpela na ating yu save autim tok bilong Jehova long skul na yu save go wantaim papamama long haus bilong ol man na autim tok. (Aisaia 43:10-12; Aposel 20:20, 21) Klostu long taim Jisas i dai, em i autim tok na oraitim ol sikman long tempel, na sampela mangi i singaut olsem: “Amamas long Pikinini Bilong Devit.” Tasol ol bikpris na saveman bilong lo i belhat long dispela na ol i askim Jisas: “Ating yu harim dispela tok ol i mekim?” Jisas i bekim tok olsem: “Yes, mi harim. Tasol ating yupela i no bin ritim dispela tok, ‘Ol liklik pikinini i save litimapim nem bilong yu.’ ” (Matyu 21:15-17) Olsem ol dispela pikinini, yupela ol yangpela insait long kongrigesen, yupela tu i gat rot long litimapim nem bilong God na Pikinini bilong em. Mipela i laik bai yupela i wok wantaim mipela long autim tok bilong Kingdom, na mipela i mas i gat yupela ol yangpela bilong helpim mipela long mekim dispela wok.
Taim Hevi i Kamap
17, 18. (a) Bilong wanem Pol i stretim rot bilong bungim mani bilong helpim ol Kristen long Judia? (b) Taim ol i givim mani long laik bilong ol yet bilong helpim ol bilipman bilong Judia, dispela i mekim wanem long ol Juda Kristen na ol Kristen bilong ol narapela lain?
17 Maski yumi gat wanem kain sindaun, pasin bilong laikim tru ol narapela bai kirapim yumi long helpim ol wanlain Kristen i sot long ol samting. (Jon 13:34, 35; Jems 2:14-17) Pasin bilong laikim tru ol brata sista long Judia i kirapim Pol long stretim rot bambai ol kongrigesen long Akaia, Galesia, Masedonia, na provins bilong Esia, i ken bungim sampela mani bilong helpim ol. Ol man i bin mekim nogut long ol disaipel long Jerusalem, na i gat ol kros pait na bikpela hangre tu i kamap long dispela hap, na ating dispela i as na Pol i tok ol i “karim planti pen,” na ol man i “givim ol bikpela hevi” long ol na “pulim ol samting bilong [ol].” (Hibru 10:32-34; Aposel 11:27–12:1) Olsem na em i stretim rot bilong bungim sampela mani bilong helpim ol Kristen long Judia ol i stap rabis.—1 Korin 16:1-3; 2 Korin 8:1-4, 13-15; 9:1, 2, 7.
18 Mani samting ol i bin givim long laik bilong ol yet bilong helpim ol manmeri bilong God long Judia, dispela i kamapim klia olsem pasin bilong pas gut wantaim olsem brata brata i stap namel long ol Juda na ol narapela lain i lotuim Jehova. Na taim ol Kristen bilong ol narapela lain i bringim dispela mani samting i go, dispela i givim rot long ol long tok tenkyu long ol wanlotu Juda long ol gutpela samting bilong spirit ol i bin kisim long ol. Olsem na tupela lain wantaim i givim ol samting—ol samting bilong skin na ol samting bilong spirit. (Rom 15:26, 27) Long nau tu, ol mani samting ol Kristen i givim bilong helpim ol wanbilip i sot, ol i givim long laik bilong ol yet, na pasin bilong laikim tru ol brata i kirapim ol long givim. (Mak 12:28-31) Long dispela pasin tu, narapela i mas helpim narapela, bambai ol man i gat liklik samting tasol ol i no sot olgeta.—2 Korin 8:15.
19, 20. Stori long olsem wanem lain bilong Jehova i save helpim ol man long taim ol bikpela bagarap i kamap.
19 Yumi save, ol Kristen i mas i gat ol narapela Kristen, olsem na yumi save hariap long helpim ol brata sista wanbilip. Yumi ken tingim samting i bin kamap taim ol bikpela guria i kamap long El Salvado long 2001 na maunten i bruk na graun i karamapim ol ples. Wanpela ripot i tok: “Long olgeta hap bilong El Salvado ol brata i kirap stretim rot bilong helpim ol man. Ol brata bilong Guatemala, Yunaitet Stets, na Kanada ol i kam bilong helpim mipela. . . . Hariap tru ol i wokim olsem 500 haus na 3-pela gutpela Haus Kingdom. Ol dispela brata i wok strong na givim ol yet long mekim dispela wok, na ol i wok gut wantaim, na dispela i olsem wanpela bikpela wok witnes i kamap.”
20 Wanpela ripot bilong Saut Afrika i tok: “Bikpela tait wara i bin bagarapim planti hap bilong Mosambik, em i bagarapim ol samting bilong ol brata Kristen bilong yumi tu. Brens-ofis long Mosambik i stretim rot bilong lukautim ol long ol samting ol i sot long en. Tasol ol brata long brens-ofis i tokim mipela long salim klos long ol brata i sot, em ol klos i gutpela tasol i no nupela klos. Mipela i bungim planti klos na pulimapim wanpela traipela bokis i longpela olsem 12 mita na salim i go long ol brata long Mosambik.” Em nau, long ol dispela rot tu, narapela i mas helpim narapela.
21. Long stori i kamap bihain long dispela bai yumi toktok long wanem samting?
21 Olsem yumi stori pinis, olgeta wan wan hap bilong bodi i bikpela samting. Na i wankain tu long kongrigesen Kristen. Olgeta wan wan insait long en i mas i gat ol narapela narapela bilong helpim ol. Na tu, ol i mas i stap wanbel long mekim wok bilong ol. Stori i kamap bihain long dispela bai toktok long sampela samting i helpim yumi long mekim olsem.
Bai Yu Bekim Olsem Wanem?
• Bodi bilong man na kongrigesen Kristen i wankain olsem wanem?
• Ol Kristen bilong pastaim i bin mekim wanem long taim ol wanbilip i sot long ol samting bilong skin?
• Wanem sampela stori bilong Baibel i soim olsem ol Kristen i mas i gat ol wanbilip na narapela i save helpim narapela?
[Piksa long pes 10]
Akwila na Prisila i save tingim ol narapela
[Ol Piksa long pes 12]
Lain bilong Jehova i save helpim ol wanbilip na ol narapela man taim ol bikpela hevi i kamap