Wok Long Strongim Kongrigesen

“Yupela wan wan i mas givim gutpela tok long ol arapela manmeri bilong God na strongim bel bilong ol.”​—1 TE. 5:11.

1. Yumi kisim wanem ol blesing taim yumi stap insait long kongrigesen Kristen? Yumi inap kisim wanem ol hevi?

EM I wanpela bikpela blesing tru long i stap insait long kongrigesen Kristen. Yu pas gut wantaim Jehova. Yu larim Tok bilong em i stiaim yu, na dispela i banisim yu long ol samting nogut em ol pasin bilong dispela graun i save kamapim. Yu gat ol pren tru husat i laik bai ol samting yu mekim i kamap gutpela. Yes, yu kisim planti blesing. Tasol planti Kristen i gat kain kain hevi. Ating sampela bilong ol i nidim helpim bilong kliagut long ol strongpela tok bilong Baibel. Sampela i gat sik o ol i bel hevi, o ol i karim hevi long wanem ol i no bin tingting gut na wokim sampela disisen. Na yumi olgeta i mas i stap namel long ol manmeri bilong dispela graun i stap longwe long God.

2. Yumi mas mekim wanem taim ol bratasista i karim hevi? Bilong wanem yumi mas mekim olsem?

² Yumi no laik bai wanpela wanbilip Kristen i karim pen o hevi. Aposel Pol i tok kongrigesen i olsem bodi bilong man na “sapos wanpela hap bodi i pilim pen, olgeta hap i save pilim pen wantaim.” (1 Ko. 12:​12, 26) Long kain taim olsem, yumi mas helpim ol brata na sista bilong yumi. I gat planti stori long Baibel i soim olsem ol bratasista bilong kongrigesen i bin helpim ol narapela long karim na winim ol hevi. Nau, taim yumi skelim ol dispela stori, tingim olsem wanem yu inap givim kain helpim olsem ol dispela stori i kamapim. Olsem wanem yu inap strongim ol bratasista long ol samting bilong spirit na long dispela rot strongim kongrigesen bilong Jehova?

“Tupela i Kisim Em i Go”

3, 4. Olsem wanem Akwila na Prisila i helpim Apolos?

³ Taim Apolos i go sindaun long Efesus, em i man bilong givim bel long wok autim tok. Buk Aposel i tok: “Bel bilong en i strong moa long skulim ol manmeri, na em i save tokim ol stret long ol samting Jisas i bin mekim. Tasol em i save long baptais bilong Jon tasol.” Apolos i no save long pasin bilong baptais “long nem bilong Papa na bilong Pikinini na bilong Holi Spirit,” olsem na ating dispela i makim olsem wanpela disaipel bilong Jon Bilong Baptais i bin autim tok long em o wanpela disaipel bilong Jisas paslain long Pentikos 33 C.E. Apolos i givim bel tru long wok, tasol i gat sampela bikpela samting em i no save long en. Olsem wanem pasin bilong bung wantaim ol wanbilip i helpim em?​—Ap. 1:​4, 5; 18:25; Mt. 28:19.

⁴ Tupela marit Kristen, em Akwila na Prisila, ol i harim Apolos i autim tok long haus lotu na i no pret, na ol i kisim em i go stap wantaim ol na skulim em long sampela tok moa. (Ritim Aposel 18:​24-26.) Dispela em i gutpela pasin tru. Akwila na Prisila i toktok wantaim Apolos long gutpela pasin na long pasin i helpim em, na ol i no mekim long pasin i kirapim Apolos long pilim olsem ol i sutim tok long em. Nogat. Apolos i no save long sampela samting i bin kamap insait long kongrigesen Kristen taim kongrigesen i kamap nupela. Na Apolos i tenkyu tru long ol nupela pren bilong em i kamapim ol dispela bikpela samting long em. Taim Apolos i kisim dispela save, em i ‘helpim moa yet’ ol brata bilong em long Akaia na em i autim strong tok long ol man.​—Ap. 18:​27, 28.

5. Planti tausen pablisa bilong Kingdom i mekim wanem gutpela wok bilong helpim ol man? Dispela i kamapim wanem samting?

⁵ Planti bratasista long kongrigesen Kristen long nau, ol i tenkyu tru long ol lain i bin helpim ol long kliagut long tok bilong Baibel. Gutpela pasin pren bin kamap namel long planti sumatin na tisa bilong ol, na dispela pasin pren i stap inap longtaim. Bilong helpim ol man long kliagut long tok i tru, yumi mas makim taim bilong toktok wantaim ol long Baibel long olgeta wik inap planti mun. Tasol ol pablisa bilong Kingdom i amamas long mekim olsem, long wanem, ol i save olsem dispela wok i helpim ol man long kisim laip. (Jo. 17:3) Na yumi amamas tru long lukim ol man i kisim na i bihainim tok i tru, na yusim laip bilong ol bilong mekim laik bilong Jehova!

‘Ol i Tok Pasin Bilong Timoti i Gutpela’

6, 7. (a) Bilong wanem Pol i makim Timoti long raun wantaim em? (b) Timoti i kisim helpim bilong mekim gut wanem wok?

⁶ Taim aposel Pol na Sailas i mekim namba tu raun bilong wok misineri na i go long Listra, ol i bungim yangpela man Timoti, ating em i gat 20 krismas samting. “Ol Kristen long Listra na Aikoniam ol i tok long pasin bilong em olsem, Timoti i gutpela man.” Mama bilong Timoti, Yunis, na bubu meri bilong em Lois, ol i Kristen i dediket pinis, tasol papa bilong Timoti i no wanbilip. (2 Ti. 1:5) Ating Pol i bin kisim save long dispela famili long namba wan taim em i go raun long dispela hap inap sampela yia i go pinis. Tasol nau Pol i tingim tru Timoti, long wanem, em i wanpela yangpela man i gat gutpela pasin tru. Olsem na taim lain elda i givim tok orait, Timoti i kamap helpim bilong Pol long mekim wok misineri.​—Ritim Aposel 16:​1-3.

⁷ I gat planti samting em Timoti i mas kisim skul long en long Pol. Na tru tumas, em i lainim planti samting, olsem na bihain Pol inap salim Timoti i go lukim ol kongrigesen na stap olsem mausman bilong em. Timoti i poroman wantaim Pol inap 15 yia samting, na dispela yangpela man em bipo i no gat bikpela save na ating em i man bilong sem, em i lain gut long mekim wok na em i kamap wanpela gutpela wasman tru.​—Fl. 2:​19-22; 1 Ti. 1:3.

8, 9. Ol bratasista bilong kongrigesen inap mekim wanem bilong strongim ol yangpela? Kamapim wanpela eksampel.

⁸ Planti yangpela man na meri insait long kongrigesen Kristen long nau ol inap mekim gutpela wok. Sapos ol pren husat i strong long ol samting bilong spirit i strongim ol, orait ol dispela yangpela inap wok strong na mekim ol bikpela wok insait long lain bilong Jehova. Lukluk raun insait long kongrigesen bilong yu! Yu inap lukim sampela yangpela husat i redi long mekim wok, olsem Timoti i bin mekim? Sapos yu helpim na strongim ol, orait ol inap kamap painia, misineri, wasman raun, o wok long Betel. Yu inap mekim wanem bilong helpim ol long winim ol kain mak olsem?

⁹ Martin i wok long Betel inap 20 yia, na em i tingim gutpela pasin bilong wanpela wasman sekit long tingim em tru, taim tupela i bin autim tok wantaim inap 30 yia i go pinis. Dispela wasman sekit i bin amamas na toktok long wok em i bin mekim long Betel taim em i yangpela man. Em i bin strongim Martin long skelim sapos em tu i redi long mekim kain wok olsem insait long oganaisesen bilong Jehova. Martin i ting dispela tok bilong wasman sekit i bin stiaim em tru long makim ol samting em i laik mekim. Ating yu tu inap helpim ol yangpela long rot bilong toktok wantaim ol long ol mak ol i ken putim bilong mekim bikpela wok moa bilong God.

“Mekim Gut Bel Bilong Ol Man i Bel Hevi”

10. Epafroditus i pilim olsem wanem? Bilong wanem em i pilim olsem?

¹⁰ Epafroditus i lusim Filipai na mekim longpela raun i go long Rom bilong visitim aposel Pol husat i kalabus, long wanem, em i holimpas bilip bilong em. Epafroditus i stap olsem mausman bilong ol Filipai. Em i karim presen bilong ol i go long Pol, na tu, em i tingting long stap wantaim Pol na mekim ol samting em inap mekim bilong helpim Pol long dispela taim nogut. Tasol taim Epafroditus i stap long Rom, em i kisim sik na “klostu em i dai.” Epafroditus i pilim olsem em i no bin mekim gut wok bilong em, na em i bel hevi.​—Fl. 2:​25-27.

11. (a) Bilong wanem yumi no ken kirap nogut sapos sampela insait long kongrigesen i bel hevi? (b) Pol i tokim ol Filipai long mekim wanem long Epafroditus?

¹¹ Kain kain hevi long nau i mekim na planti manmeri i gat sik bilong bel hevi. Ripot bilong lain Wol Helt Oganaisesen i tok, long olgeta 5-pela 5-pela man, 1-pela inap kisim sik bilong bel hevi sampela taim long laip bilong em. Lain bilong Jehova tu i save kisim dispela sik. Ol hevi bilong lukautim famili, no gat gutpela helt, bel hevi long pasin kranki bilong yumi yet, o ol narapela samting inap mekim na yumi bel hevi. Ol Filipai inap mekim wanem bilong helpim Epafroditus? Pol i tok: “Yupela i mas amamas tru long kisim Epafroditus long nem bilong Bikpela. Yupela i mas givim biknem long ol dispela kain man. Em i mekim wok bilong Krais na klostu em i dai pinis. Em i no tingting long em yet i mas i stap gut. Nogat. Em i tingting tasol long wok yupela i bin givim em bilong helpim mi, na em i sakim sik bilong en na mekim wok yet.”​—Fl. 2:​29, 30.

12. Wanem samting inap mekim gut bel bilong ol man i bel hevi?

¹² Yumi tu i mas strongim bel bilong ol bratasista husat i bel hevi. I gat ol gutpela tok yumi ken kamapim long wok bilong Jehova ol i save mekim. Ating ol i bin mekim ol bikpela senis long laip bilong ol bilong kamap Kristen o bilong mekim fultaim sevis. Yumi tingim tru dispela bikpela samting ol i bin mekim, na yumi ken save tru olsem Jehova tu i tingim dispela. Sapos sampela i lapun o ol i gat sik na dispela i pasim ol na ol i no inap mekim bikpela wok olsem bipo, orait yumi mas tingim gutpela wok ol i bin mekim inap planti yia na rispek tru long ol. Jehova i tokim olgeta gutpela wokboi bilong em olsem: “Mekim gut bel bilong ol man i bel hevi, na helpim ol man i no gat strong, na yupela i mas kamapim pasin bilong i no les kwik long olgeta man.”​—1 Te. 5:​14, NW.

‘Lusim Sin na Mekim Isi Bel Bilong En’

13, 14. (a) Kongrigesen Korin i mekim wanem bikpela samting? Bilong wanem ol i mekim olsem? (b) Taim ol i rausim dispela man, dispela i kamapim wanem samting?

¹³ Kongrigesen Korin long taim bilong ol aposel i gat hevi long wanpela man i mekim pasin pamuk na i no tanim bel. Pasin bilong em inap mekim na kongrigesen i no stap klin moa na ol ausaitman tu i kirap nogut long pasin bilong em. Olsem na i stret Pol i tokim ol long rausim dispela man long kongrigesen.​—1 Ko. 5:​1, 7, 11-13.

¹⁴ Dispela strafe i kamapim ol gutpela samting. Em i helpim kongrigesen long i stap klin, na dispela man i mekim rong i luksave long rong bilong em na em i tanim bel tru. Em i mekim pasin i makim olsem em i tanim bel, olsem na long namba tu pas Pol i raitim long dispela kongrigesen, em i tokim ol long ol i mas kisim bek dispela man. Tasol ol i mas mekim sampela samting moa. Pol i tokim kongrigesen long “lusim sin bilong [dispela man i tanim bel] na mekim isi bel bilong en. Nogut bikpela bel hevi moa i daunim tru dispela man.”​—Ritim 2 Korin 2:​5-8.

15. Yumi mas i gat wanem tingting long ol man i mekim rong na i tanim bel na kongrigesen i kisim bek ol?

¹⁵ Dispela stori i skulim yumi long wanem samting? Yumi save bel hevi taim ol i mas rausim wanpela long kongrigesen. Ating em i bin bagarapim nem bilong God na kongrigesen, o em i bin rongim yumi. Tasol taim ol elda i skelim samting i bin kamap na ol i bihainim ol stiatok bilong Jehova, na ol i wokim disisen olsem kongrigesen i mas kisim bek dispela man i tanim bel, orait dispela i makim olsem Jehova i lusim rong bilong em. (Mt. 18:​17-20) I stret yumi mas bihainim pasin bilong Jehova, a? Tru tumas, sapos yumi no gat sori na yumi no laik fogivim man, dispela i makim olsem yumi no wanbel wantaim Jehova. Bilong helpim kongrigesen bilong God long i stap bel isi na wanbel na bilong Jehova i ken orait long en, yumi mas kamapim klia olsem yumi ‘laikim yet’ ol man i mekim rong em ol i tanim bel tru na kongrigesen i kisim bek ol.​—Mt. 6:​14, 15; Lu. 15:7.

“Em i Gutpela Man Bilong Helpim Mi”

16. Bilong wanem Pol i bel hevi long Mak?

¹⁶ Narapela stori bilong Baibel i soim olsem yumi no ken bel nogut i stap long ol man i bin mekim yumi bel hevi. Olsem, aposel Pol i bin bel hevi tru long Jon Mak. Bilong wanem? Taim Pol na Barnabas i kirap mekim namba wan raun bilong wok misineri bilong ol, Mak i go wantaim ol bilong helpim ol. Tasol bihain Jon Mak i lusim tupela na i go bek long ples; Baibel i no stori long as na em i mekim olsem. Pol i bel hevi tru long dispela, olsem na taim em i wokim plen bilong namba tu raun bilong wok misineri, em i tok kros wantaim Barnabas, long wanem, em i no laik bai Mak i go wantaim ol. Pol i tingim samting i bin kamap long namba wan raun, olsem na em i no laik bai Mak i raun wantaim ol.​—Ritim Aposel 13:​1-5, 13; 15:​37, 38.

17, 18. Olsem wanem yumi save Pol na Mak i bin stretim hevi i stap namel long ol? Dispela i skulim yumi long wanem samting?

¹⁷ Mak i mekim yet wok misineri wantaim Barnabas long narapela hap, na dispela i kamapim klia olsem Mak i no larim pasin bilong Pol i daunim em. (Ap. 15:39) Mak i stap gut long wok na ol narapela inap bilip long em, dispela i kamap klia long tok Pol i mekim inap sampela yia bihain taim em i stori long Mak. Long dispela taim Pol i kalabus long Rom, na em i raitim pas long Timoti na tokim em long kam. Long dispela pas em i tok tu olsem: “Yu mas kisim Mak na bringim em i kam wantaim yu. Em i gutpela man bilong helpim mi long wok.” (2 Ti. 4:11) Yes, nau Pol i pilim olsem Mak i save mekim gutpela wok.

¹⁸ Dispela stori tu i skulim yumi long sampela samting. Mak i bin kisim ol pasin bilong gutpela misineri. Em i no pundaun taim Pol i no laik kisim em i go wantaim ol. Mak tupela Pol ol i strong long ol samting bilong spirit, na ol i no bel nogut i stap inap longpela taim. Nogat. Bihain Pol i tok Mak em i gutpela man bilong helpim wok. Olsem na taim ol brata i winim hevi, i stret ol i lusim tingting long hevi na wok yet long helpim ol narapela long kamap strong long tok i tru. Pasin bilong tingting gut long ol narapela i strongim kongrigesen.

Kongrigesen na Yu

19. Olgeta insait long kongrigesen Kristen inap mekim wanem bilong helpim ol narapela?

¹⁹ Long dispela taim bilong “planti hevi nogut tru,” yu nidim helpim bilong ol brata na sista bilong kongrigesen, na ol i nidim helpim bilong yu. (2 Ti. 3:1) Sampela taim ol Kristen i no save wanem samting ol i ken mekim bambai ol samting long laip bilong ol i ken kamap gutpela, tasol Jehova i save. Na em inap yusim ol brata o sista bilong kongrigesen​—na yu tu​—​bilong helpim ol narapela long bihainim stretpela rot. (Ais. 30:​20, 21; 32:​1, 2) Olsem na bihainim tok bilong aposel Pol! Wok yet long “givim gutpela tok long ol arapela manmeri bilong God na strongim bel bilong ol, olsem nau yupela i save mekim.”​—1 Te. 5:11.

Bai Yu Bekim Olsem Wanem?

• Bilong wanem narapela i mas strongim narapela insait long kongrigesen Kristen?

• Yu inap helpim ol narapela long winim wanem ol hevi?

• Bilong wanem yumi mas kisim helpim long ol narapela insait long kongrigesen bilong yumi?

[Piksa long pes 11]

Taim wanbilip Kristen i karim hevi, yumi inap helpim em

[Piksa long pes 12]

Planti yangpela man na meri insait long kongrigesen Kristen long nau ol inap mekim gutpela wok