Yumi Mas Nolaik Tru Long Pasin Nogut
JEHOVA em i God holi. Long bipo em i Man Holi bilong ol Israel, olsem na em i strong long ol Israel i mas i stap klin na i no gat doti. (Song 89:18, NW) Em i tokim lain bilong em: “Yupela i mas i stap holi . . . , long wanem, mi yet mi holi.” (Wok Pris 11:45) Sapos man i laik “go antap long maunten bilong God,” em i mas i stap olsem “man i no mekim pasin nogut, na bel bilong en i [mas] klin.” (Song 24:3, 4) Tasol kain man olsem em i no ken abrusim pasin bilong mekim rong na em tasol. Nogat. Em i ‘no ken laikim tru ol pasin nogut.’—Sindaun 8:13.
Long gutpela pasin sori, Jehova i givim ol lo long lain Israel bambai ol i ken save wanem pasin em i pasin nogut na bai ol i no ken mekim. (Rom 7:7, 12) I gat ol strongpela lo bilong maritpasin samting. Pasin bilong bagarapim marit, na pasin sodom, na mekim maritpasin wantaim wanblut, na mekim pasin sem wantaim animal, ol dispela pasin i no holi na ol inap bagarapim man long ol samting bilong spirit. (Wok Pris 18:23; 20:10-17) Ol Israel i save kilim i dai ol man i mekim ol dispela pasin i nogut tru.
Taim lain Kristen God i makim ol long spirit holi i kamap “lain Israel tru bilong God,” God i givim kain lo olsem long ol. (Galesia 6:16) Ol Kristen tu i mas “givim baksait tru [olsem nolaik tru] long pasin nogut.” (Rom 12:9) Ol tu i mas bihainim ol tok Jehova i bin givim long ol Israel, olsem: “Yupela i mas i stap holi . . . , long wanem, mi God bilong yupela, mi stap holi.” (1 Pita 1:15, 16) Pasin i no holi olsem pasin pamuk, na bagarapim marit, na pasin sodom, na mekim pasin sem wantaim animal, na mekim maritpasin wantaim wanblut, ol dispela pasin i no ken stap insait long kongrigesen Kristen. Ol man i no laik lusim kain pasin olsem, ol i no inap go insait long Kingdom bilong God. (Rom 1:26, 27; 2:22; 1 Korin 6:9, 10; Hibru 13:4) Long dispela “taim bilong las de,” “ol arapela sipsip” tu i mas bihainim wankain lo. (2 Timoti 3:1; Jon 10:16) Long dispela rot ol Kristen God i makim ol na ol narapela sipsip ol i kamap wanpela lain i klin na i stretpela, olsem na ol inap holim nem bilong God bilong ol; ol i stap Witnes Bilong Jehova.—Aisaia 43:10.
Kongrigesen i Mas i Stap Klin
Tasol ol man bilong dispela graun i no olsem; ol i save orait long ol kain kain pasin pamuk. Ol Kristen tru ol i narapela kain, tasol ol i no ken lusim tingting olsem planti Kristen em nau ol i mekim wok bilong Jehova, bipo ol i insait long ol pasin bilong dispela graun. Planti man, taim ol i no save yet long God holi bilong yumi, ol i ting i no gat rong long inapim ol laik nogut bilong bel bilong ol; ol i mekim ol “pasin nogut.” (1 Pita 4:4) Aposel Pol i stori long ol pasin i nogut tru bilong ol haiden em ol i save mekim kain kain pasin i no stret, na em i tok: “Bipo sampela bilong yupela i stap kain man olsem.” Na em i tok moa: “Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.”—1 Korin 6:11.
Dispela tok inap mekim gut bel bilong man, a? Maski bipo man i mekim wanem wanem samting, taim em i harim gutnius bilong Krais, dispela i kirapim bel bilong em na em i senisim pasin bilong em. Em i kamapim bilip bilong em na dediket long God Jehova. Kirap long dispela taim na i go, em i bihainim stretpela pasin, na em i stap stretpela man long ai bilong God. (Hibru 9:14) God i lusim ol rong bipo em i mekim, na em i ken “wok strong long kisim dispela samting bai i kamap bihain.”a—Filipai 3:13, 14; Rom 4:7, 8.
Devit i bin kilim man i dai na bagarapim marit, tasol em i tanim bel, olsem na Jehova i lusim rong bilong em. Na Jehova i lusim rong bilong Manase, em i bin lotuim ol god giaman na kapsaitim blut bilong planti man, tasol em tu i bin tanim bel. (2 Samuel 12:9, 13; 2 Stori 33:2-6, 10-13) Yumi ken tenkyu tru olsem Jehova i redi long lusim ol rong bilong yumi tu sapos yumi tanim bel na go klostu long em long pasin daun. Tasol maski Jehova i bin lusim rong bilong Devit na Manase, dispela tupela man—na ol Israel tu—ol i kisim ol hevi i bin kamap long pasin nogut bilong tupela. (2 Samuel 12:11, 12; Jeremaia 15:3-5) Na olsem tasol, Jehova i save lusim rong bilong ol sinman i tanim bel, tasol sampela hevi inap kamap long pasin ol i mekim na ol i no inap abrusim.
Sampela Hevi Bai Kamap
Olsem: Man i pamuk na kisim sik AIDS, em inap kisim tok i tru na senisim pasin bilong em na dediket na baptais. Nau em i wanpela Kristen i stap klin long ol samting bilong spirit na em i pas gut wantaim God, na em i wetim gutpela samting i kamap bihain; tasol sik AIDS i stap yet long em. Sori tru, ating bihain moa dispela sik i mekim na em i dai, em samting em i no inap senisim na i kamap long rot bilong pasin nogut bipo em i mekim. Sampela Kristen, em bipo ol i mekim pasin pamuk nogut tru, sampela narapela kain hevi inap kamap na i stap strong yet. Inap planti yia bihain long ol i kisim baptais, o ating long olgeta de ol i stap laip long dispela taim yumi stap long en, ol i mas wok strong long daunim ol laik nogut bilong ol i pulim ol long mekim gen ol pasin nogut bipo ol i mekim. Spirit bilong Jehova i helpim ol, na planti ol inap sakim dispela laik nogut. Tasol oltaim ol i mas wok strong long sakim.—Galesia 5:16, 17.
Kain man olsem i no ken mekim sin sapos em i bosim gut laik bilong bel. Tasol sapos wanpela brata i mas wok strong yet long daunim ol strongpela laik nogut, orait em bai bihainim gutpela tingting na pasin sori sapos em i no tingting long kisim bikpela wok insait long kongrigesen. (1 Timoti 3:1) Bilong wanem i olsem? Long wanem, em i save, ol brata sista i bilip long ol elda. (Aisaia 32:1, 2; Hibru 13:17) Ol i save ol brata sista i save toktok wantaim ol elda long planti samting bilong ol yet. Sapos man i mas wok oltaim long sakim ol laik nogut bilong bel, em i no bihainim gutpela na stretpela tingting na pasin sori sapos em i wok long kisim bikpela wok insait long kongrigesen.—Sindaun 14:16; Jon 15:12, 13; Rom 12:1.
Sapos man i bin mekim pasin sem long pikinini taim em i no baptais yet, ating narapela hevi inap kamap long dispela. Taim em i kisim save long tok i tru, em i tanim bel na senisim pasin bilong em na em i no bringim dispela pasin i nogut tru i kam insait long kongrigesen. Ating bihain em i kamap strong, na daunim tru dispela laik nogut, na ating em i laik holim wok insait long kongrigesen tu. Tasol olsem wanem sapos long hap bilong em, em i gat nem yet olsem man i bin mekim pasin sem long ol pikinini? Yu ting em i stap olsem man em ol narapela “i no inap lukim wanpela rong long em . . . , [na em] i gat gutpela nem namel long ol man i stap ausait long sios”? (1 Timoti 3:1-7, 10; Taitus 1:7) Nogat, em i no stap olsem. Olsem na em i no inap kisim wok insait long kongrigesen.
Taim Kristen i Dediket Pinis i Mekim Rong
Jehova i save pinis olsem yumi no strong tumas, na maski yumi baptais pinis yumi inap mekim sin. Aposel Jon i tokim ol Kristen long taim bilong em: “Mi raitim dispela tok long yupela, bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta. Em yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.” (1 Jon 2:1, 2) Yes, long rot bilong ofa bilong Jisas, Jehova bai lusim rong bilong ol Kristen i baptais pinis em ol i pundaun na mekim sin—sapos ol i tanim bel tru na lusim rot nogut ol i bihainim.
Kain samting olsem i bin kamap insait long kongrigesen long Korin long taim bilong ol aposel. Aposel Pol i harim tok olsem, insait long dispela nupela kongrigesen, wanpela man i mekim maritpasin wantaim wanblut, na Pol i tok ol i mas rausim em. Bihain, dispela sinman i tanim bel, na Pol i kirapim kongrigesen long ol i mas kisim em bek. (1 Korin 5:1, 13; 2 Korin 2:5-9) Olsem na long rot bilong gutpela pasin sori bilong Jehova na wok bilong ofa bilong Jisas long baim bek ol man, sin bilong dispela man i tekewe. Kain samting olsem inap kamap long nau. Tasol maski man i baptais pinis i mekim wanpela bikpela rong na em i tanim bel na long ai bilong Jehova dispela sin i tekewe, ating sampela hevi i bin kamap long rot bilong dispela rong, ol i stap yet.—Sindaun 10:16, 17; Galesia 6:7.
Olsem: Sapos wanpela yangpela meri i dediket pinis i mekim pasin pamuk, ating em i hevi tru long rong em i mekim na kongrigesen i helpim em na bihain em i kamap strong gen long spirit. Tasol olsem wanem sapos pasin pamuk bilong em i mekim na em i gat bel? Orait nau bikpela senis tru bai painim em na em i no inap abrusim. Man i bagarapim marit ating em i tanim bel na kongrigesen i no rausim em. Tasol poroman marit bilong em i no gat asua em i gat as bilong katim marit bilong em olsem Baibel i makim, na em i ken mekim olsem. (Matyu 19:9) Sapos em i mekim olsem, dispela man, maski Jehova i lusim rong bilong em, em bai tingim dispela samting nogut i bin kamap long rong bilong em inap long olgeta de em i stap laip.—1 Jon 1:9.
Olsem wanem sapos man i katim marit bilong em bambai em i ken maritim narapela meri? Ating bihain em bai tanim bel na kongrigesen i kisim em bek. Insait long planti yia bihain ating em bai kamap strong na kamap “man i bikpela pinis.” (Hibru 6:1) Tasol sapos namba wan meri bilong em i no kisim nupela poroman, dispela man i no inap mekim bikpela wok insait long kongrigesen. Em i no “stap man bilong wanpela meri tasol,” long wanem, i no gat as bilong katim marit bilong em long namba wan meri olsem Baibel i makim.—1 Timoti 3:2, 12.
Ol dispela i olsem strongpela as na Kristen i mas kisim pasin bilong nolaik tru long pasin nogut, a?
Olsem Wanem Long Man Bilong Mekim Pasin Sem Long Pikinini?
Olsem wanem sapos Kristen i bikpela pinis na i baptais, na nau em i mekim pasin sem long pikinini? Yu ting dispela sinman em i nogut olgeta na Jehova i no inap lusim rong bilong em? Ating i no olsem. Jisas i tok “man i mekim tok nogut long Holi Spirit,” em dispela kain sin God i no inap lusim. Na Pol i tok sapos man i save pinis long tok i tru na long laik bilong em yet em i bihainim pasin bilong sin, orait i no gat ofa moa i stap bilong tekewe dispela sin. (Luk 12:10; Hibru 10:26, 27) Tasol i no gat wanpela hap long Baibel i tok olsem sapos wanpela Kristen i bikpela pinis i mekim pasin sem long pikinini—maski em i wanblut o nogat—dispela sin i no ken tekewe. Tru tumas, sin bilong em i ken tekewe sapos em i tanim bel na senisim pasin bilong em. Tasol ating em i mas wok strong yet long daunim ol laik nogut em i bin lainim. (Efesus 1:7) Na ating i gat sampela samting em i no inap abrusim.
Lo bilong sampela kantri i makim kain man olsem i mas kalabus o kisim sampela narapela strafe. Orait sapos Kristen hia i stap long kain kantri olsem, kongrigesen i no ken haitim rong bilong em na bai em i ken abrusim strafe. Dispela man i bin kamapim long ples klia olsem i gat sampela samting em i no save strong tumas long sakim na kongrigesen i mas tingim dispela samting. Sapos i olsem em i tanim bel tru, kongrigesen bai kirapim em long kamap strong long spirit, na insait long wok autim tok, na mekim ol tok insait long Skul Bilong Wok Autim Tok, na insait long sampela soim samting long Miting Bilong Wok Autim Tok. Tasol dispela i no makim olsem em inap kisim bikpela wok insait long kongrigesen, nogat. I gat wanem as bilong dispela samting olsem Baibel i makim?
Wanpela as i olsem: Elda i mas “bosim gut” skin. (Taitus 1:8) Tru, sampela taim yumi olgeta i no bosim gut skin. (Rom 7:21-25) Tasol sapos Kristen i bikpela pinis na i dediket, na em i mekim pasin sem long pikinini, em i kamapim wanpela laik nogut bilong em i no stret long mekim. Ol samting i bin kamap i soim olsem dispela kain man inap mekim pasin sem long sampela pikinini moa. Tru, i no olsem olgeta man i mekim pasin sem long pikinini ol i mekim gen dispela rong, tasol planti ol i mekim gen. Na kongrigesen i no inap skelim bel bilong man na bai ol i ken save husat inap mekim pasin sem gen long pikinini. (Jeremaia 17:9) Olsem na tok Pol i givim long Timoti i stret long ol man i bikpela pinis na i baptais pinis em ol i bin mekim pasin sem long pikinini: “Yu no ken hariap long putim han antap long wanpela man bilong makim em bilong mekim wok bilong God. Nogut sin bilong sampela man i pas long yu.” (1 Timoti 5:22) Bilong lukautim ol pikinini bilong yumi, sapos ol man i save olsem wanpela man bipo em i man bilong mekim pasin sem long pikinini, em i no inap kisim bikpela wok insait long kongrigesen. Na tu, em i no ken mekim wok painia o wok long Betel samting.—Skelim wantaim lo i stap long Kisim Bek 21:28, 29.
Ating sampela i gat askim olsem: ‘Sampela i bin mekim sampela narapela kain rong na i olsem ol i tanim bel, tasol bihain ol i bin mekim gen dispela rong, a?’ Tru, dispela samting i bin kamap, tasol i gat sampela narapela samting yumi mas tingim. Sapos man i grisim narapela i bikpela pinis long mekim pasin pamuk, dispela man i bikpela pinis em inap sakim em. Tasol i no hatwok long giamanim ol pikinini, o paulim tingting bilong ol, o pretim ol. Baibel i stori long ol pikinini olsem ol i save sot long gutpela tingting. (Sindaun 22:15; 1 Korin 13:11) Jisas i stori long ol pikinini olsem ol i gat pasin daun na ol i no gat asua. (Matyu 18:4; Luk 18:16, 17) Pikinini i no gat asua na em i no save yet long planti samting. Klostu olgeta pikinini i no sem liklik long toktok wantaim ol man na ol i amamas tru long mekim ol samting ol man i laikim, olsem na man i bikpela pinis, em ol pikinini i save long em na bilip long em, em i no hatwok long mekim pasin sem wantaim pikinini. Olsem na kongrigesen i gat wok long ai bilong Jehova long lukautim gut ol pikinini bilong ol.
Ol pikinini i bin lain gut, ol i save lain long bihainim ol tok bilong papamama, na ol elda, na ol narapela i bikpela pinis, na ol i daun long ol. (Efesus 6:1, 2; 1 Timoti 5:1, 2; Hibru 13:7) Ol pikinini i save bilip long kain man olsem, na sapos wanpela bilong ol dispela man i bikpela pinis em i mekim wok nogut long dispela pasin bilong ol pikinini bambai em i ken pulim o subim ol long mekim pasin sem wantaim em, em samting i nogut tru. Planti pikinini em ol narapela i bin mekim dispela rong long ol, inap planti yia ol i save hatwok long daunim bikpela bel hevi ol i bin kisim long dispela. Olsem na man i mekim pasin sem long pikinini, kongrigesen i save mekim sampela strongpela samting long em, na putim sampela tambu long em. Ol i no ken tingim namba bilong dispela man insait long kongrigesen i bikpela samting; ol i laik bai kongrigesen i mas i stap klin na i no gat doti.—1 Korin 5:6; 2 Pita 3:14.
Sapos man i mekim pasin sem long pikinini em i tanim bel tru, em bai save olsem em i bihainim gutpela tingting taim em i bihainim ol lo bilong Baibel. Sapos em i lain long kisim pasin bilong nolaik tru long pasin nogut, em bai bel nogut tru long samting em i bin mekim na em bai wok strong bambai em i no ken mekim gen dispela rong. (Sindaun 8:13; Rom 12:9) Na tu, em bai tok tenkyu long Jehova long bikpela pasin sori Em i bin mekim long em, em wanpela sinman i tanim bel pinis, na bai em inap mekim yet ol wok bilong God holi bilong yumi na tingting long stap oltaim long graun wantaim “ol gutpela stretpela man.”—Sindaun 2:21.
[Futnot]
a Lukim “Askim” long Wastaua bilong Me 1, 1996.
[Rait long pes 28]
Jehova i save lusim rong bilong ol sinman i tanim bel, tasol sampela samting inap kamap long pasin ol i mekim na ol i no inap abrusim