Enok—Em i No Pret Long Ol Birua
EM I wanpela gutpela man, tasol em i stap long taim nogut tru. Pasin bilong givim baksait long God i pulap tru long graun. Ol manmeri bilong graun i lusim stretpela pasin na i wok long go nogut. I no longtaim na Jehova “i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.”—Stat 6:5.
Enok em i namba 7 man i kamap long ol lain tumbuna pikinini bilong Adam, na em i gat strongpela bel na i no pret long i stap narapela kain long ol man bilong dispela taim. Em i holimpas stretpela pasin, maski ol man i biruaim em long dispela samting. Ol tok Enok i autim i sutim tru bel bilong ol sinman i givim baksait long God, olsem na ol i makim em bilong kilim em i dai, na Jehova tasol inap helpim em.—Jut 14, 15.
Enok na Bikpela Tok i Bin Kamap
Inap sampela handet yia paslain long taim Enok i kamap, wanpela bikpela tok i bin kamap long husat i mas i stap king bilong heven na graun. Olsem wanem? I stret God i bosim ol man? Satan i tok nogat. I olsem em i tok, ol man bai stap gutpela sapos ol i bosim wokabaut bilong ol yet na God i no soim rot long ol. Satan i laik kamapim sampela samting bilong strongim dispela tok em i sutim long God Jehova, olsem na long pasin trik em i wok long stiaim ol man i kam long em. Adam, na meri bilong em Iv, na namba wan pikinini man bilong tupela, em Kein, ol i bin helpim tok bilong Satan—ol i laik bosim ol yet na ol i no laik bai God i bosim ol. Namba wan man na meri i kamapim dispela tingting bilong ol taim ol i kaikai pikinini bilong diwai em God i bin tambuim, na Kein i kamapim dispela tingting bilong em taim em i kilim i dai brata bilong em Abel, em i stretpela man.—Stat 3:4-6; 4:8.
Abel i strongim bel na em i no pret long helpim tok bilong Jehova. Pasin bilong Abel long holimpas bilip, dispela i helpim lotu i tru, olsem na Satan i amamas tru long lukim Kein i belhat na kilim i dai Abel. Kirap long dispela taim, Satan i mekim wok long pasin bilong ol man em “ol i save pret long dai” na bai em i ken pundaunim ol. Em i laik pretim ol man i gat tingting long lotuim trupela God.—Hibru 2:14, 15; Jon 8:44; 1 Jon 3:12.
I kam inap long taim Enok i kamap, i olsem planti man bilong graun i helpim tok bilong Satan, olsem ol man i no laik bai Jehova i stap nambawan Bos. Abel i dai pinis, na ol man i no bihainim pasin bilong em long i stap gut long God. Tasol ol samting Enok i mekim i kamapim klia olsem em i narapela kain. Bilip bilong em i gat as tru bilong en, long wanem, em i save gut long ol samting i bin kamap long gaden Iden.a Yumi ken save, em i bin givim bel tru long tok profet bilong Jehova i makim olsem wanpela Pikinini bai kamap na em bai pinisim Satan wantaim ol pasin trik bilong em!—Stat 3:15.
Enok i tingting oltaim long dispela samting em i bilip na wet long en, olsem na dispela pasin birua i bin painim Abel, em Satan yet i bin kirapim na planti man i save long en, dispela i no pretim Enok. Em i stap pren tru bilong Jehova na em i bihainim stretpela pasin i go inap long taim em i dai. Enok i stap narapela kain long ol man, na em i sakim tingting bilong dispela graun olsem ol man yet inap bosim wokabaut bilong ol.—Stat 5:23, 24.
Na tu, Enok i strongim bel na em i tokaut na kamapim klia olsem ol wok nogut bilong Satan bai i no inap kamapim laik bilong em. Spirit holi bilong God, olsem strong bilong em, i stiaim Enok na em i tok profet long ol man nogut olsem: “Mi lukim Bikpela i kam wantaim ol planti tausen ensel bilong en. Em i laik kotim olgeta man na mekim save long ol. Em i laik mekim ol man i no save bihainim em i pilim tru asua bilong olgeta pasin nogut ol i bin mekim. Sampela man bilong mekim sin, ol i save givim baksait long God moa yet. Olsem na God i laik mekim ol dispela man i pilim tru asua bilong ol kain kain tok nogut ol i bin mekim long em.”—Jut 14, 15.
Enok i no pret long autim ol dispela toksave, olsem na taim aposel Pol i raitim pas i go long ol Kristen Hibru, em i bungim Enok wantaim “ol dispela manmeri bilong bipo ol i . . . raunim yumi i stap olsem bikpela klaut,” em ol i bin mekim ol wok i kamapim bilip bilong ol na ol i stap olsem gutpela piksa tru.b (Hibru 11:5; 12:1) Enok em i man bilong bilip, na em i bin sanap strong na holimpas bilip inap 300 yia samting. (Stat 5:22) Ating pasin bilong Enok long i stap gut long God i bin skrapim tru bel bilong ol birua bilong God i stap long heven na long graun! Strongpela tok profet bilong Enok i kirapim Satan na em i bel nogut tru long Enok, tasol Jehova i lukautim em.
God i Kisim Enok Olsem Wanem?
Jehova i no larim Satan o lain bilong em long graun i kilim i dai Enok, nogat. Baibel i tok: “God i kisim em.” (Stat 5:24) Aposel Pol i stori long dispela olsem: “Enok i bilip long God, olsem na God i kisim em . . . bai em i no ken i dai. Ol man ol i wok long painim em, tasol ol i no lukim em, long wanem, God i kisim em pinis. Na buk bilong God i tok, taim God i no kisim Enok yet, pasin bilong Enok i gutpela long ai bilong God.”—Hibru 11:5.
Olsem wanem ‘God i kisim em bai em i no ken i dai’? O olsem ol i raitim long Baibel bilong R. A. Knox, olsem wanem “God i kisim Enok i go na dai i no painim em”? Long pasin isi God i pinisim laip bilong Enok na em i no pilim pen bilong i dai long rot bilong sik o long ol birua i kilim em i dai, nogat. Em nau, Jehova i pinisim laip bilong Enok taim em i gat 365 krismas—em i olsem yangpela man liklik sapos yumi skelim em wantaim ol man i bin i stap long taim bilong em.
Olsem wanem Enok i save, ‘pasin bilong em i gutpela long ai bilong God’? I gat wanem samting i makim olsem? Yumi ken ting God i mekim long tingting bilong Enok na i olsem em i slip na lukim wanpela piksa olsem driman, olsem God i bin mekim long aposel Pol, em “i kisim dispela man [Pol] i go,” na ating em i lukim piksa bilong paradais bilong spirit bihain lain Kristen bai stap long en. (2 Korin 12:3, 4) Bilong Enok i ken save olsem God i amamas long em, ating God i bin givim piksa olsem driman long em na em i lukim Paradais bihain bai kamap long graun, na olgeta man i stap long dispela taim ol i laik bai God i stap nambawan Bos. Taim Enok i kisim dispela piksa olsem driman, ating long dispela taim yet God i kisim em na em i dai na i no pilim pen bilong en, na em i ken slip i go inap long taim bilong em long kirap bek. Olsem Jehova i bin mekim long Moses, ating em i pinisim bodi bilong Enok, long wanem, “ol man i wok long painim em, tasol ol i no lukim em.”—Hibru 11:5; Lo 34:5, 6; Jut 9.
Tok Profet Bai Kamap Tru
Long nau ol Witnes Bilong Jehova i save autim dispela tok profet bilong Enok. Long rot bilong Baibel ol i soim ol man olsem klostu nau na truim bilong dispela tok profet bai kamap taim God i bagarapim ol man i givim baksait long em. (2 Tesalonaika 1:6-10) Ol i autim dispela tok, olsem na planti man i no laikim ol, long wanem, dispela tok i narapela kain tru long tingting na laik bilong ol man bilong dispela graun. Tasol taim ol man i birua long ol, ol i no kirap nogut long dispela, long wanem, Jisas i bin toksave long lain bilong em olsem: “Olgeta man bai i bel nogut tru long yupela, long wanem, nem bilong mi em i stap long yupela.”—Matyu 10:22; Jon 17:14.
Tasol olsem Enok, ol Kristen bilong nau ol inap bilip tru olsem God bai kisim bek ol long han bilong ol birua bilong ol. Aposel Pita i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim. Na Bikpela i . . . save long rot bilong bekim pe nogut long ol [man nogut], i go inap long De bilong bikpela kot bilong God.” (2 Pita 2:9) Sapos i stret long laik bilong em, God inap tekewe wanpela hevi. Em inap pinisim pasin birua ol man i mekim long ol Kristen. Tasol sapos em i no mekim olsem, em i save long pasin bilong “wokim rot” bambai lain bilong em inap sanap strong na ol hevi i no ken daunim ol. Na bilong helpim ol, Jehova i save givim strong long ol, “em i strong bilong God.”—1 Korin 10:13; 2 Korin 4:7.
Jehova “i save mekim gut tru long ol man i wok long painim em,” olsem na em bai givim laip i stap oltaim oltaim long ol wokman bilong em ol i stap gut long em. (Hibru 11:6) Bikpela hap lain bilong ol bai kisim laip oltaim long Paradais long graun. Olsem na yumi mas bihainim pasin bilong Enok na yumi no ken pret long autim tok bilong God. Yumi mas bilip na mekim dispela wok, maski ol man i birua long yumi.
[Ol Futnot]
a Adam i gat 622 krismas taim Enok i kamap. Enok i stap 57 yia moa bihain long taim Adam i dai. Olsem na taim Enok i stap laip, Adam i stap yet i go inap long planti yia.
b Dispela tok long Hibru 12:1, olsem “ol manmeri bilong bipo,” sampela Baibel i tanim olsem “lain witnes,” na ol i kisim long wanpela tok Grik olsem marʹtys. Wanpela buk (Wuest’s Word Studies From the Greek New Testament) i tok, dispela tok i makim “wanpela man i save tokaut long kot, o em inap tokaut long kot, long samting em i bin lukim o harim o em i save long en long narapela rot.” Na buk Christian Words, bilong Nigel Turner, i tok dispela tok i makim wanpela man i tokaut “long ol samting i bin painim em . . . , na ol tok i tru na ol tingting em i bilip tru long en.”
[Blok long pes 30]
Ol i Bagarapim Nem Bilong God
Inap olsem 400 yia paslain long Enok, wanpela tumbuna pikinini bilong Adam, em Enos, em i kamap. Stat 4:26 i tok: “Long dispela taim ol man i stat long kolim nem bilong Bikpela.” Sampela saveman bilong tok Hibru i ting ol i mas raitim dispela ves olsem “ol i kirap long mekim pasin nogut” long kolim nem bilong God. Buk Jerusalem Targum i toktok long dispela taim bipo olsem: “Em dispela lain manmeri bilong bipo ol i kirap long lusim stretpela pasin, na ol i wokim ol god giaman bilong ol, na ol i givim nem bilong Tok bilong Bikpela long ol dispela god giaman.”
Long taim bilong Enos planti man ol i mekim wok nogut long nem bilong Jehova. Ating ol i givim nem bilong God long ol yet o long sampela man i olsem rot bilong ol long giaman long lotuim God Jehova. O ating ol i bin givim nem bilong God long ol god giaman bilong ol. Tasol maski ol i mekim olsem wanem, Satan i bin kalabusim strong ol man long pasin bilong lotuim ol god giaman. Taim Enok i kamap, i olsem i no gat wanpela man i lotu tru long God. Sapos wanpela man i olsem Enok, em man bilong bihainim tok i tru na em i autim dispela tok, ol man i no inap laikim em, na ol bai mekim nogut long em.—Skelim wantaim Matyu 5:11, 12.
[Blok long pes 31]
Enok i Bin Go Long Heven o Nogat?
“Enok i bilip long God, olsem na God i kisim em i go long heven, bai em i no ken i dai.” Taim sampela Baibel i tanim tok bilong Hibru 11:5 olsem, ol i makim olsem Enok i no bin i dai tru. Olsem: Baibel bilong James Moffatt, A New Translation of the Bible, i tok: “Enok i bilip long God na God i kisim em i go long heven, olsem na em i no i dai.”
Tasol inap 3,000 yia samting bihain long taim bilong Enok, Krais Jisas i tok: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jon 3:13) Wanpela Baibel (The New English Bible) i tok: “I no gat wanpela man i bin go antap long heven. Wanpela man tasol i go antap long heven, em dispela man i bin lusim heven na i kam daun, em Pikinini Bilong Man.” Taim Jisas i mekim dispela tok, em i no go antap yet long heven.—Skelim wantaim Luk 7:28.
Aposel Pol i tok, Enok wantaim ol narapela witnes i bin i stap paslain long taim bilong ol Kristen na ol i olsem bikpela klaut, “ol i dai” na “ol i no kisim ol dispela gutpela samting God i bin promis long givim ol.” (Hibru 11:13, 39) Bilong wanem? Long wanem, olgeta man bilong graun—Enok tu—ol i bin kisim sin long Adam. (Song 51:5; Rom 5:12) I gat wanpela rot tasol bilong kisim bek ol, em ofa bilong Krais Jisas. (Aposel 4:12; 1 Jon 2:1, 2) Long taim bilong Enok, Krais Jisas i no bin mekim yet dispela wok bilong baim bek ol man. Olsem na Enok i no bin go long heven, nogat. Em i dai na slip i stap na em i wetim taim bilong kirap bek long graun.—Jon 5:28, 29.
[Piksa Kredit Lain long pes 29]
Ol i kisim piksa long Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s