Enok i Wokabaut Wantaim God Namel Long Ol Man i Sakim God

SATAN i tok em inap pulim olgeta man long lusim God, na ating sampela taim i bin luk olsem em inap long mekim olsem. Insait long ol 500 yia bihain long taim Abel i dai, i no gat wanpela i stap olsem gutpela wokman bilong Jehova. Planti manmeri i save mekim ol bikpela rong na ol pasin i no stret long ai bilong God.

Long dispela taim bilong ol man i stap nogut long ol samting bilong spirit, Enok i kamap long graun. Ol yia Baibel i makim i kamapim olsem mama i bin karim Enok long 3404 B.C.E. Enok i no olsem ol manmeri nogut long taim bilong em; em i mekim ol stretpela pasin na God i orait long em. Aposel Pol i bungim em wantaim ol wokboi bilong Jehova, em bilip bilong ol i olsem gutpela piksa ol Kristen i mas bihainim. Enok em i husat? Wanem ol hevi i painim em? Olsem wanem em i bin karim ol dispela hevi? Na pasin bilong em long stap gut long God i mas mekim wanem long yumi long nau?

Long taim bilong Enos, em klostu 400 yia paslain long taim bilong Enok, “ol man i stat long kolim nem bilong Bikpela na lotu long em.” (Stat 4:26) Kirap long taim God i wokim Adam na Iv, ol man i bin kamapim nem bilong God. Olsem na taim ol manmeri long taim bilong Enos i kolim nem bilong Jehova, ol i no mekim olsem long pasin bilong bilip na lotu i tru. Sampela saveman Hibru i ting i stret ol i tanim tok bilong Stat 4:26 olsem “ol i kirap long mekim pasin nogut” long nem bilong God, o “long dispela taim ol i wok long bagarapim” nem bilong God. Ating sampela man i bin givim nem bilong Jehova long ol yet o long sampela man, i olsem rot bilong ol long giaman long lotuim God. O ating ol i givim nem bilong God long ol god giaman bilong ol.

Enok i Wokabaut Wantaim Trupela God

Enok i stap namel long ol man i givim baksait long God, tasol em i wokabaut wantaim trupela God, Jehova. Baibel i no tok ol tumbuna bilong em​—⁠Set, Enos, Kenan, Mahalalel na Jaret​—⁠ol i bin wokabaut wantaim God. O yumi ken tok ol i no bin wokabaut gut wantaim God olsem Enok i bin mekim; pasin bilong em i narapela kain long pasin bilong ol.​—⁠Stat 5:​3-27.

Enok i wokabaut wantaim Jehova na dispela i makim olsem em i stap pren wantaim God na pas gut wantaim em, na i gat wanpela rot tasol bilong stap olsem​—⁠em i bihainim laik bilong God long olgeta samting em i mekim. Jehova i orait long pasin bilong Enok long lotuim em. Baibel Grik Septuagint i tok God “i amamas long Enok,” na aposel Pol tu i kamapim dispela tingting.​—⁠Stat 5:22; Hibru 11:⁠5.

Bikpela samting tru long pasin bilong Enok long pas gut wantaim Jehova em bilip bilong em. Em i bilip long dispela “lain,” olsem pikinini, bilong “meri” bilong God. Sapos Enok i bin bungim Adam na i toktok wantaim em, dispela i mekim na em inap kisim sampela save long ol samting God i bin mekim long namba wan man na meri long gaden Iden. Save Enok i kisim long God i mekim na em i “wok long painim em.”​—⁠Stat 3:15; Hibru 11:​6, 13.

Bilong Enok, na yumi tu, i ken pas gut wantaim Jehova, yumi mas save long Jehova, na tu, yumi mas mekim sampela samting moa. Sapos yumi laik pas gut wantaim wanpela man, tingting na pasin bilong dispela man bai stiaim tingting bilong yumi, a? Bai yumi no mekim sampela tok o pasin i bagarapim dispela pasin pren. Na sapos yumi tingting long senisim sampela samting long sindaun bilong yumi, bai yumi skelim olsem dispela samting bai mekim wanem long dispela pasin pren, a?

Laik bilong yumi long pas gut wantaim God, dispela tu inap stiaim ol samting yumi mekim. Yumi mas i gat stretpela save long samting God i orait long en na samting God i no orait long en. Na yumi mas larim dispela save i stiaim yumi, na yumi laik wok strong na bai God i ken amamas long tingting na pasin bilong yumi.

Tru tumas, bilong wokabaut wantaim God yumi mas mekim ol samting em i laikim. Enok i mekim olsem inap planti handet yia. Tok Hibru ol i tanim olsem Enok i wokabaut wantaim God, i makim olsem em i bin mekim dispela pasin inap planti taim, o em i mekim i go i go. Narapela man i bin wokabaut wantaim God, em Noa.​—⁠Stat 6:⁠9.

Enok i gat famili. Em i gat meri, na em i kamap papa bilong ol “pikinini man na meri.” Wanpela bilong ol dispela pikinini man em Metusela. (Stat 5:​21, 22) Yumi save Enok i bin wok strong tru long bosim gut famili bilong em. Tasol em i stap namel long ol man i givim baksait long God, olsem na i hatwok long mekim wok bilong God. Lamek, em papa bilong Noa, em i bin stap long taim bilong Enok, na ating em wanpela tasol i bin bilip long Jehova olsem Enok i mekim. (Stat 5:​28, 29) Tasol Enok i no pret​—⁠em i bihainim lotu i tru.

Wanem samting i helpim Enok long stap gut long God? Em i no bung wantaim ol man i bagarapim nem bilong Jehova o ol man i no stap olsem gutpela poroman long man i lotuim God. Pasin bilong beten askim Jehova long helpim em, dispela tu i bin strongim Enok long abrusim olgeta pasin God i no laikim.

Tok Profet Long Ol Man i Givim Baksait Long God

Taim yumi stap namel long ol man i givim baksait long God, i hatwok long wokabaut stret oltaim. Na tu, Enok i autim wanpela strongpela tok long kot bai painim ol man nogut. Spirit bilong God i stiaim Enok na em i tok profet olsem: “Mi lukim Bikpela i kam wantaim ol planti tausen ensel bilong en. Em i laik kotim olgeta man na mekim save long ol. Em i laik mekim ol man i no save bihainim em i pilim tru asua bilong olgeta pasin nogut ol i bin mekim. Sampela man bilong mekim sin, ol i save givim baksait long God moa yet. Olsem na God i laik mekim ol dispela man i pilim tru asua bilong ol kain kain tok nogut ol i bin mekim long em.”​—⁠Jut 14, 15.

Dispela tok i mekim wanem long ol man nogut tru i no bilip? Yumi ken ting kain tok olsem i mekim na ol man i no laikim Enok, na ol i lap na tok bilas long em, na ol i mekim tok bilong pretim em. Sampela i laik kilim em i dai. Tasol Enok i no larim dispela i pretim em. Em i save long samting i painim stretpela man Abel, na olsem Abel i bin mekim, Enok i tingting strong long mekim wok bilong God, maski wanem samting i kamap.

“God i Kisim Em”

Ating ol man i laik kilim i dai Enok taim “God i kisim em.” (Stat 5:24) Jehova i no larim gutpela profet bilong em i kisim pen long han bilong ol birua nogut tru. Olsem aposel Pol i tok, “God i kisim em i go . . . bai em i no ken i dai.” (Hibru 11:⁠5) Planti ol i save tok, Enok i no i dai​—⁠God i kisim em i go long heven, na em i stap laip yet long dispela ples. Tasol Jisas i tokaut klia olsem: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” Jisas i olsem man “i go paslain” long ol manmeri i go long heven.​—⁠Jon 3:13; Hibru 6:​19, 20.

Olsem na wanem samting i painim Enok? Yumi ken ting dispela tok “God i kisim em i go . . . bai em i no ken i dai,” i makim olsem God i mekim na long tingting Enok i kisim wanpela kain driman, na taim em i stap olsem, God i pinisim laip bilong em. Taim God i mekim olsem, Enok i no pilim pen bilong i dai. Na “ol man i wok long painim em, tasol ol i no lukim em,” long wanem, ating Jehova i kisim bodi bilong em, olsem em i mekim long bodi bilong Moses.​—⁠Lo 34:​5, 6.

Enok i stap inap 365 yia​—⁠em i no longpela taim tumas sapos yumi skelim wantaim ol man i bin stap long taim bilong em. Tasol bikpela samting long ol man i laikim tru Jehova em ol i mas i stap gut long wok bilong em i go inap long taim ol i dai. Yumi save Enok i bin mekim olsem, long wanem, “taim God i no kisim Enok yet, pasin bilong Enok i gutpela long ai bilong God.” Baibel i no tokaut long olsem wanem Jehova i kamapim dispela samting long Enok. Tasol paslain long Enok i dai, God i kamapim long Enok olsem Em i orait long em, na yumi ken bilip tru olsem Jehova bai tingim em long taim bilong kirapim bek ol man i dai pinis.

Bihainim Bilip Bilong Enok

I stret yumi bihainim pasin bilong bilip bilong ol man i givim bel tru long God. (Hibru 13:⁠7) Enok i bilip na em i kamap namba wan profet i stap gut long God. Pasin bilong ol man long taim bilong Enok i wankain olsem long taim bilong yumi​—⁠ol man i pait, ol i bagarapim nem bilong God, na givim baksait long em. Tasol Enok i narapela kain. Em i bilip tru na givim bel long God. Tru, Jehova i tokim em long autim wanpela strongpela tok bilong kot, tasol Em i strongim em tu long mekim olsem. Enok i strongim bel na mekim dispela wok, na God i lukautim em taim ol birua i laik bagarapim em.

Sapos yumi gat strongpela bilip olsem Enok, Jehova bai strongim yumi long autim tok bilong em nau long taim bilong las de. Em bai helpim yumi long strongim bel na karim hevi taim ol birua i mekim nogut long yumi, na pasin bilong yumi long givim bel long God bai mekim na yumi stap narapela kain long ol man i givim baksait long God. Bilip bai helpim yumi long wokabaut wantaim God na mekim ol pasin em i laikim na mekim em i belgut tru. (Sindaun 27:11) Long pasin bilong bilip, stretpela man Enok inap wokabaut wantaim Jehova namel long ol manmeri i givim baksait long God, na yumi tu inap mekim olsem.

[Blok long pes 30]

Baibel i Kamapim Sampela Tok Bilong Buk Enok o Nogat?

Buk Enok i wanpela stori nating na yumi no save husat tru i bin raitim dispela buk. Ol i giaman na tok Enok i bin raitim. Ating ol man i raitim dispela buk namel long yia 200 na 1 B.C.E., na ol kain kain stori nating bilong ol Juda i stap long en​—⁠ol i skruim sampela stori moa long sotpela stori bilong Enok i stap long Buk Stat. Dispela yet i mas mekim na ol man i laikim tru Tok Bilong God ol i no ken tingim dispela buk.

Long Baibel, Buk Jut tasol i stori long tok profet bilong Enok, olsem: “Mi lukim Bikpela i kam wantaim ol planti tausen ensel bilong en. Em i laik kotim olgeta man na mekim save long ol. Em i laik mekim ol man i no save bihainim em i pilim tru asua bilong olgeta pasin nogut ol i bin mekim. Sampela man bilong mekim sin, ol i save givim baksait long God moa yet. Olsem na God i laik mekim ol dispela man i pilim tru asua bilong ol kain kain tok nogut ol i bin mekim long em.” (Jut 14, 15) Planti saveman i tok dispela tok profet bilong Enok long ol man i givim baksait long God long taim bilong em i kam stret long Buk Enok. Yu ting Jut i kamapim tok bilong wanpela buk nating?

Baibel i no kamapim long olsem wanem Jut i save long tok profet bilong Enok. Ating em i kamapim tasol tok bilong sampela rait em planti man i save long en, olsem sampela stori bilong ol tumbuna bilong bipo. Ating Pol i mekim wankain samting taim em i stori long Janes na Jambres, em tupela glasman long haus king bilong Isip na ol i birua long Moses​—⁠ol narapela buk bilong Baibel i no kolim nem bilong ol. Sapos man bilong raitim Buk Enok inap lukim kain buk olsem bilong bipo, Jut tu inap lukim kain buk olsem, a?a​​—⁠Kisim Bek 7:​11, 22; 2 Timoti 3:⁠8.

Olsem wanem Jut i kisim save long ol tok Enok i givim long ol man i givim baksait long God, dispela i no bikpela samting. Spirit holi bilong God i bin kirapim Jut long raitim ol tok bilong en na dispela i mekim na yumi ken bilip long dispela tok. (2 Timoti 3:16) Spirit holi bilong God i was long ol tok em i raitim na em i no kamapim wanpela tok i no tru.

[Futnot]

[Piksa long pes 31]

Enok i strongim bel na autim tok bilong Jehova