Ripot Long Wok Bilong Kingdom
Tromoi Pikinini Kaikai Bilong Kingdom Long Olgeta Taim
TOK Bilong God, em Baibel, em i kirapim yumi long wok strong. King Solomon i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai kamap gut.”—Saveman 11:6.
Long olgeta taim i stret, ol Witnes Bilong Jehova i planim “kaikai” taim ol i autim gutnius bilong Kingdom bilong God. Long winim 230 kantri na ailan, ol i wok strong yet long autim gutnius na skulim ol man long Krais Jisas. (Aposel 5:42) Ol ekspiriens i stap daunbilo i kamapim olsem wanem ol Witnes Bilong Jehova i wok strong long wok bilong autim tok.
◻ Long Ripablik Bilong Kep Vet, wanpela Witnes Bilong Jehova i wokabaut klostu long wanpela haus kalabus taim em i mekim wok autim tok. Insait long banis bilong haus kalabus, sampela kalabus i sindaun antap long wanpela diwai. Ol i lukim Witnes daunbilo na ol i singaut olsem ol i laik kisim sampela nius. Dispela Witnes i pasim sampela Wastaua na Kirap! long wanpela ston na tromoi i go insait long banis bilong haus kalabus. Ol Witnes i go lukim ol dispela lain i laik harim tok na ol i kirapim 12-pela Baibel-stadi. Tripela bilong ol dispela kalabus i dediketim ol yet long God na ol i kisim baptais. Wanpela bilong ol dispela kalabus i winim wanpela yia long mekim wok olsem man bilong autim tok long olgeta de. Tasol olsem wanem ol i save mekim wok autim tok long haus kalabus? Pastaim ol i skelim haus kalabus i go long ol wan wan teritori. Na ol 3-pela Witnes i skelim ol teritori namel long ol yet na ol i autim tok long ol wan wan rum gat. Ol dispela man bilong autim tok bilong Kingdom i save go bek lukim ol man i laik harim tok long wankain pasin olsem ol Witnes Bilong Jehova i save mekim long olgeta hap bilong graun—ol i save mekim ol gobek. Wanpela samting tasol i narapela kain, ol i save mekim Baibel-stadi planti taim. Ol i no stadi long Baibel long wanpela o tupela taim tasol long wanpela wik inap wanpela aua samting, nogat; sampela kalabus i stadi long olgeta de! Na tu, dairekta bilong haus kalabus i tok orait long ol Witnes long mekim olgeta miting bilong kongrigesen insait long haus kalabus.
◻ Taim tumbuna mama bilong em i dai, wanpela meri long Potugal i kisim ol buk na magasin bilong Sosaiti Was Taua bilong em. Meri hia i no wanpela Witnes Bilong Jehova, olsem na em i no laik holim ol dispela buk. Tasol em i no laik bagarapim ol buk. Wanpela de em i tokim wanpela Witnes Bilong Jehova i bin kam autim tok long em long haus bilong em long ol dispela buk. Dispela Witnes i askim em, em i save long wok tru bilong ol dispela buk. Dispela meri i bekim tok: “Mi tok tru, mi no save long wok tru bilong ol, tasol mi inap save olsem wanem?” Dispela meri i orait long stadi long Baibel, na i no longtaim na em i laikim tumas ol dispela buk bilong tumbuna mama bilong em. Nau em tu i wanpela Witnes Bilong Jehova i baptais pinis. Na pikinini meri bilong em na wanpela gutpela pren bilong famili bilong ol tu ol i stadi long Baibel. Man! Ol dispela buk em i bin kisim long tumbuna mama bilong em ol i bin kamapim gutpela samting tru.