Man Yumi Inap Bilip Long Em Namel Long Ol Man i Gat Sin
“GUTPELA pasin mi laik mekim, em mi no save mekim. Na pasin nogut mi no laik mekim, em mi save mekim.” Ating dispela samting i painim yu tu, a? Tasol yu ken strongim bel—aposel Pol tu i gat dispela hevi; tasol em i man bilong bihainim gut stretpela pasin bilong Kristen. Olsem wanem? Ating dispela tupela tok i pait? Taim Pol i raitim pas i go long ol Kristen long Rom, em i skelim dispela hevi, olsem: “Orait pasin mi no laikim, dispela mi save mekim. Olsem na i no mi yet mi mekim dispela. Nogat. Sin i stap insait long mi, em tasol i mekim.” Em i toktok long wanem sin? Na olsem wanem em i bin daunim bambai em i ken kamap man bilong bihainim stretpela pasin?—Rom 7:19, 20.
Long dispela pas, pastaim Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” Dispela “wanpela man” em Adam. (Rom 5:12, 14) Dispela sin em namba wan man Adam i bin kamapim, em i as bilong sin yumi ol man i bin kisim long papamama, na dispela sin i as na i hatwok tru long yumi bihainim stretpela pasin.
Tingting bilong Pol long “sin bilong pastaim,” olsem sampela i bin kolim, planti man i no bilip long dispela, long wanem, planti tisa bilong lotu i sakim tok bilong Baibel long God i bin wokim ol samting, na ol i bilip olsem ol samting i bin kamap nating tasol. Wanpela buk bilong nau i stori long Rom 5:12-14 na i tok: “Ol saveman i sakim dispela hap tok olgeta.” Tasol inap wan handet yia bipo, ol buk i stori long Baibel i tok olsem “taim Adam i mekim sin, . . . em i givim dispela sin na ol samting nogut bilong en long olgeta pikinini bilong em.”a
Man i Bin Lusim Stretpela Pasin Long Pastaim Tru
Long nau planti man i no bilip olsem namba wan man Adam i bin i stap tru, na ol i no bilip olsem Satan i stap tru—ol i ting em i wanpela stori nating bilong bipo.b Tasol man i gat bikpela save tru long dispela, em Krais Jisas, em i tok, Satan “i no bihainim pasin i tru,” olsem em i no man yumi inap bilip long em. (Jon 8:44) Na Satan yet i bin kirapim Adam na Iv long bikhet long Jehova na taim traim i painim tupela, ol i no stap gut long God.—Stat 3:1-19.
Yumi olgeta i pikinini bilong Adam, olsem na yumi olgeta i bin kisim pasin bilong mekim sin. Saveman Solomon i bin tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Saveman 7:20) Tasol olgeta wan wan man inap i stap olsem man yumi ken bilip long em. Olsem wanem man bilong graun inap mekim? Long wanem, maski man i no nambawan olgeta, em inap holimpas stretpela pasin.
As Bilong Holimpas Stretpela Pasin
King Devit i bin mekim planti popaia, na wanpela em dispela pasin pamuk em i bin mekim wantaim Batseba. (2 Samuel 11:1-27) Ol dispela planti popaia bilong Devit i kamapim klia olsem em i no nambawan olgeta, nogat tru. Tasol Jehova i lukim wanem pasin long dispela man na em i laikim em? Jehova i tokim pikinini bilong Devit, em Solomon: “Yu mas wokabaut long stretpela pasin na bihainim olgeta lo bilong mi . . . olsem papa bilong yu, Devit, i bin mekim.” (1 King 9:4) Maski Devit i bin mekim planti popaia, Jehova i lukim olsem Devit em i man yumi inap bilip long em, na Jehova i tingim dispela. Bilong wanem em i tingim?
Devit i bekim dispela askim taim em i tokim Solomon: “Bikpela i save long olgeta tingting na laik bilong yumi.” (1 Stori 28:9) Tru, Devit i bin mekim ol popaia, tasol em i gat pasin daun, na em i laik mekim ol samting i stret. Planti taim em i kisim ol tok bilong stretim em, na em i askim Jehova long mekim olsem long em. Em i tok: “God, traim olgeta pasin bilong mi. Na skelim bel na tingting bilong mi.” (Song 26:2) Na tru tumas, Jehova i stretim Devit. Strafe em i kisim long sin em i bin mekim wantaim Batseba, dispela i stap long em i go inap long taim em i dai. Tasol Devit i no laik mekim olsem em i no gat asua long dispela rong. (2 Samuel 12:1-12) Na bikpela samting moa, em i no lusim pasin bilong lotu tru long Jehova. Long dispela as, na long pasin bilong em long pilim tru rong bilong em na tanim bel, Jehova i redi long lusim ol rong bilong em na tingim em i man bilong holimpas pasin bilong i stap gut long Em.—Lukim tu Song 51.
Man Yumi Inap Bilip Long Em Long Taim Bilong Traim
Satan i bin traim Jisas bilong kirapim em long lusim pasin bilong i stap gut long God. Em i mas holimpas dispela pasin maski em i karim planti hevi na pen. Tasol Adam i no bin kisim bikpela traim olsem. Skin bilong em i nambawan olgeta, na God i tokim em long bihainim wanpela lo bilong Em, na long dispela rot God i traim Adam, olsem em bai bihainim tok bilong God o nogat. Na Jisas i save, bilong kisim bek ol man bilong graun em i mas holimpas pasin bilong i stap gut long God.—Hibru 5:8, 9.
Satan i strong long pundaunim Jisas na bai em i no stap gut long God, olsem na em i kam long Jisas taim skin bilong Jisas i no gat strong—em i bin i stap 40 de long ples i no gat man na em i tingim tingim ol wok em i mas mekim na em i stap tambu long kaikai. Tripela taim Satan i traim Jisas—long tanim ol ston i kamap bret; long go antap long tempel na kalap i go daun, olsem em i ting ol ensel bai kam helpim em na em i no ken kisim bagarap, na dispela bai i olsem wanpela mak o mirakel bilong kamapim klia olsem em i Mesaia; na long “brukim skru na lotu” long Satan inap wanpela taim tasol na bai em i ken bosim olgeta strongpela kantri bilong dispela graun. Tasol Jisas i sakim olgeta traim wan wan na em i stap gut long Jehova.—Matyu 4:1-11; Luk 4:1-13.
Jop i Stap Gut Long God
Planti man ol i save pinis long stori bilong Jop, em i stap gut long God maski bikpela traim i painim em. Jop i no save long as bilong ol dispela bikpela hevi i painim em. Em i no save Satan i bin sutim tok giaman long em na i tok, Jop i tingim skin bilong em yet na em i mekim wok bilong God, na bilong lukautim skin bilong em bambai em i no ken bagarap, em bai lusim God. God i larim sampela bikpela traim tru i painim Jop bilong kamapim long ples klia olsem tok bilong Satan i kranki.—Jop 1:6-12; 2:1-8.
Tripela pren giaman i kamap long Jop. Long laik bilong ol yet ol i mekim tok giaman long ol lo bilong God na laik bilong em. Na meri bilong Jop tu i no inap pilim bikpela tok i kamap long dispela traim, olsem na em i no strongim man bilong em long dispela taim nogut tru i painim em. (Jop 2:9-13) Tasol Jop i sanap strong. Em i tok: “Bel na tingting bilong mi i stap stret tasol long ai bilong God. Na mi tok strong olsem, mi no bin mekim rong na mi no gat asua long wanpela samting. Na bai mi mekim wankain tok tasol i go inap taim mi dai.”—Jop 27:5, 6.
Pasin bilong Jop long sanap strong, na pasin bilong planti ol narapela man na meri i bin stap gut long God na stori bilong ol i stap long Baibel, dispela i kamapim long ples klia pinis olsem Satan i man bilong giaman.
Stap Gut Long Wok Kristen
Olsem wanem? Jehova i laikim pasin bilong i stap gut long em bilong amamasim em yet tasol? Nogat. Pasin bilong i stap gut long God i save helpim tru yumi ol man bilong graun. Jisas i laik helpim yumi na em i tokim yumi long ‘laikim tru God long bel bilong yumi na long spirit bilong yumi na long tingting bilong yumi.’ Tru tumas, “dispela lo em i bikpela, na em i namba wan tru,” na ol man, na meri, na pikinini i stap gut long God, ol tasol inap bihainim dispela lo. (Matyu 22:36-38) Yumi mas mekim wanem bilong holimpas stretpela pasin bilong i stap gut long God? Na yumi kisim wanem ol gutpela samting long en?
Man i holimpas stretpela pasin, ol man inap bilip long em, na bikpela samting moa, em God inap bilip long em. Stretpela bel bilong em i kamap klia long ol pasin em i mekim; em i no man bilong tupela maus. Em i no save giaman o paulim mani o narapela samting. Aposel Pol i tok long dispela olsem: “Mipela i givim baksait pinis long olkain pasin nogut ol man i save hait na mekim. Mipela i no save wokabaut long pasin bilong giaman. Na mipela i no save senisim tok bilong God. Nogat. Mipela i save autim tok tru long ples klia, bai olgeta man i ken skelim pasin bilong mipela na long bel bilong ol, ol i ken save olsem mipela i mekim stretpela wok long ai bilong God.”—2 Korin 4:2.
Pol i kolim ol pasin i insait long wok Kristen. Olsem wanem Kristen inap mekim wok bilong helpim ol narapela sapos pasin bilong em i no stret? Dispela samting i kamap klia long stori bilong bos bilong wanpela lain bilong lotu long Aialan, nau tasol em i lusim wok bilong em. Wanpela nius (The Independent) i stori long dispela na i tok, dispela man i tokaut olsem ‘em i bin kisim save olsem wanpela pris em i man bilong mekim pasin sem long ol pikinini, tasol em i larim dispela pris i mekim yet wok bilong em wantaim ol pikinini i go inap longpela taim.’ Dispela nius i tok, pris hia i bin mekim dispela pasin nogut inap 24 yia. Em i kalabus inap 4-pela yia, tasol yumi mas tingim bikpela hevi i bin painim ol dispela pikinini em i wok long bagarapim ol insait long ol dispela yia, long wanem, bos bilong em i no bihainim stretpela pasin na kirap mekim wanpela samting bilong pasim em!
Stap Gut Long God—Gutpela Pe Bilong En
Aposel Jon i no man bilong pret—em i gat strongpela bel. Em wantaim brata bilong em Jems ol i man bilong bel i kirap tru long mekim ol samting, olsem na Jisas i kolim tupela olsem “ol man i olsem klaut i pairap.” (Mak 3:17) Jon em man bilong i stap gut tru long God, na em wantaim Pita i tokim ol hetman bilong lain Juda, em ‘i no inap pasim maus; em i mas autim tok’ long olgeta samting em i bin lukim na harim taim em i bin i stap wantaim Jisas. Na Jon em i wanpela namel long ol aposel i bin tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 4:19, 20; 5:27-32.
Yumi ken ting olsem taim Jon i winim pinis 95 krismas samting, ol i bin rausim em i go long ailan Patmos, long wanem, ‘em i bin autim tok bilong God, na em i autim tok olsem em i bilip long Jisas.’ (KTH 1:9) Jon i lapun tru na em inap ting olsem wok bilong em long autim tok i pinis. Tasol em i man bilong i stap gut long God, olsem na God inap givim wok long em bilong raitim tok bilong Kamapim Tok Hait em i bin lukim long piksa olsem driman. Jon i stap gut long dispela wok na em inapim tru. Em wanpela gutpela samting tru em inap mekim! Na wok bilong em i no pinis—em i kisim sampela wok moa. Bihain, ating long hap bilong Efesus, em i raitim Gutnius bilong em na tripela pas. Em gutpela wok tru em i kisim taim em i winim pinis 70 yia long i stap gut long God na mekim wok bilong em!
Sapos yumi stap olsem man ol narapela inap bilip long em, bel bilong yumi bai gutpela tru. Na sapos yumi stap olsem man God inap bilip tru long em, bai yumi kisim ol gutpela samting long en inap oltaim oltaim. Long nau i gat wanpela bikpela lain i save lotu tru long God na em i wok long redim ol bilong i go insait long nupela taim i gat bel isi na pasin wanbel long en, na ol inap tingting long kisim laip i stap oltaim oltaim. (KTH 7:9) Ol wokman bilong God i mas i stap stret long ol bikpela samting olsem pasin bilong marit na long lotu, maski ol hevi bilong dispela graun na planti hevi em Satan inap putim long ol. Tasol yu ken save tru, long strong Jehova i givim long yumi, yu inap tru long mekim olsem!—Filipai 4:13.
Devit, wanpela man bilong raitim Song, em i toktok long nau na long bihain, na taim em i beten na tok tenkyu long Jehova em i strongim bel bilong yumi olgeta. Em i tok: “Yu bin lukim mi wokabaut stret, olsem na yu lukautim mi, na yu holim mi klostu long yu oltaim. Yumi litimapim nem bilong Bikpela . . . I tru.”—Song 41:12, 13.
[Ol Futnot]
a Dispela tok i kamap long buk The New Testament of Our Lord and Saviour Jesus Christ, according to the Authorised Version, with a brief commentary by various authors.
b Insait bilong nem Satan i olsem “Birua.”
[Piksa long pes 4]
Maski Devit i mekim planti popaia, God inap bilip long em
[Piksa long pes 5]
Jisas i stap olsem nambawan gutpela piksa bilong man God inap bilip long em
[Ol Piksa long pes 7]
Sapos yumi stap olsem man ol narapela inap bilip long em, bel bilong yumi bai gutpela tru