Ol Man i Autim Tok Giaman Ol i No Ken Stap Bel Isi!
“Ol man nogut bai i bagarap olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—SONG 37:9, 11.
OL MAN bilong autim tok—ol i autim tru tok bilong God o ol i autim tok giaman? Dispela tupela kain man i bin stap long taim bilong ol man i raitim Baibel. Tasol olsem wanem long nau? Long Daniel 12:9, 10, wanpela man i bin kisim tok i kam long heven em i tokim profet bilong God olsem: “Buk i pas pinis na i tambu long opim nau, long wanem, as bilong dispela tok i mas i stap hait inap long taim bilong las de. Ol dispela hevi i kamap bai i strongim planti manmeri long mekim stretpela pasin tasol, na bai ol i kamap klin tru long ai bilong God. Na ol dispela manmeri i gat gutpela save na tingting, ol tasol bai i save long as bilong ol dispela samting. Tasol ol manmeri nogut bai i no inap save long as bilong ol dispela samting, na bai ol i wok long mekim planti pasin nogut.” Yumi stap nau long “taim bilong las de.” Olsem wanem? “Ol manmeri nogut” na ol “manmeri i gat gutpela save na tingting,” yumi inap lukim dispela tupela lain i narapela narapela? Tru tumas, yumi inap lukim!
2 Long sapta 57, ves 20 na 21, yumi kaunim dispela tok bilong Aisaia, em man bilong autim tok bilong God, em i tok: “Ol manmeri bilong mekim pasin nogut, ol i no inap lusim pasin nogut bilong ol. Ol i olsem solwara i bruk oltaim na i bringim ol kain kain pipia na rabis samting i kam bagarapim nambis. God bilong mi i tok olsem, ‘Ol manmeri bilong mekim pasin nogut, bai ol i no inap painim gutpela taim.’ ” Dispela tok i makim stret ol samting i wok long kamap long graun nau long dispela taim i kam klostu pinis long yia 2000! Olsem na sampela i gat askim olsem, ‘Bai yumi winim yia 2000 o nogat?’ Ol man bilong autim tok na ol i gat gutpela save na tingting, ol bai tok wanem long yumi?
3 Aposel Jon i gat gutpela save na tingting, em spirit bilong God i givim long em. Long 1 Jon 5:19, em i tok: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” Tasol i gat narapela lain i no bilong dispela graun, em 144,000 Israel bilong spirit, em liklik hap lain bilong ol i stap yet long graun na ol i wok long go lapun. Na “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples,” ol i bung wantaim ol—nau ol i winim 5 milion, na ol tu i gat gutpela save na tingting. Ol dispela manmeri bai winim taim bilong “bikpela hevi.” Bilong wanem ol i kisim dispela gutpela pe? Ol i kisim, long wanem, “ol i bin wasim ol klos bilong ol long blut bilong Pikinini Sipsip,” olsem ol i bilip long ofa bilong Jisas. Na olsem man bilong autim tok bilong God, em ol tok bilong lait, ol tu “i save stap long haus bilong [God] na mekim wok bilong en” long san na long nait.—KTH 7:4, 9, 14, 15.
Ol i Tok Ol i Man Bilong Autim Tok Bilong Gutaim
4 Tasol olsem wanem long ol man bilong dispela graun bilong Satan em ol i tok ol i man bilong autim tok bilong gutaim? Aisaia sapta 33, ves 7, i tok: “Lukim. Ol strongpela man bilong Jerusalem i stap nabaut long ol rot na ol i wok long krai. Na ol man i bin hatwok long mekim gutpela taim i kamap, ol i krai strong moa.” Dispela tok i stret tru long ol man em ol i taitim bun long go raun long ol nambawan biktaun bilong graun na ol i wok strong long kamapim gutaim! Sori tru! Wok bilong ol bai lus nating! Bilong wanem i olsem? Long wanem, ol i no wok long stretim as tru bilong ol hevi long graun, nogat; ol i wok tasol long stretim ol hevi i kamap long dispela. Namba wan samting, ol i no save olsem Satan em i stap tru, em aposel Pol i stori long em olsem “giaman god bilong dispela graun.” (2 Korin 4:4) Satan i bin planim ol pikinini kaikai bilong pasin nogut namel long ol manmeri bilong dispela graun, na samting dispela i kamapim i olsem: Klostu olgeta man, na planti bilong ol hetman politik tu, ol i bihainim pasin em Efesus 4:18, 19 i stori long en: “Ol i no gat save tru, na bel bilong ol i pas, olsem na ol i stap ausait long laip bilong God. Ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim ol kain kain pasin doti.”
5 Ol lain bilong graun i no gat rot tru bilong rausim long bel bilong ol man pasin bilong mangal, na tingim ol yet tasol, na bel nogut long narapela—em ol pasin i go bikpela tru long nau. Man bilong wokim yumi, Bikpela King Jehova, em wanpela tasol inap mekim olsem! Na tu, liklik hap lain tasol namel long ol manmeri ol i gat pasin daun, na ol i laik daun long em na larim em i soim rot long ol. Ol samting bai painim ol dispela man i narapela kain long ol samting bai painim ol man nogut bilong dispela graun, olsem Song 37:9-11 i tok: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”
6 Olsem wanem? Yumi inap painim ol man bilong autim tok bilong gutaim insait long ol lotu bilong dispela graun i gat planti hevi? Orait, i kam inap nau, ol lotu i bin mekim wanem kain pasin? Ol samting i bin kamap bipo i kamapim klia olsem ol lotu i save insait long ol pait; na i no dispela tasol—ol i bin kirapim pait tu na kapsaitim blut bilong ol man insait long ol handet handet yia i go pinis. Olsem: Wanpela nius (Christian Century) bilong wik i kirap long Ogas 30, 1995, i stori long dispela pait i stap long kantri bipo ol i kolim Yugoslavia na i tok: “Long hap bilong Bosnia em ol Serbia i bosim, long ol bung bilong gavman ol yet i kamapim, ol pris i save sindaun paslain; na tu, ol i save go long ol hap bilong bikpela pait na blesim ol soldia na ol gan samting bilong ol taim ol i laik i go long pait.”
7 Na i wankain tu long Afrika: Ol misineri bilong ol lotu i gat nem Kristen i bin mekim wok misineri long Afrika inap wan handet yia pinis, tasol wok bilong ol i no bin kamapim gutpela samting—olsem yumi lukim pinis long bikpela pait i bin kamap long Ruanda, em planti man—inap 80 pesen—ol i bilong lotu Katolik. Nius The New York Times bilong Julai 7, 1995 i tok: “Golias, em wanpela nius ol Katolik i wokim long Lion, [Frans], i tok em bai kamapim nem bilong 27 pris moa bilong Ruanda na 4-pela sister em nius i tok ol i bin kilim i dai ol man o kirapim ol narapela long kilim i dai man long Ruanda long yia i go pinis.” Na wanpela lain long Landon (African Rights), em i gat wok long helpim ol man ol narapela i daunim ol, i bin mekim dispela tok: “Ol misin i gat asua long wanem ol i no bin tokaut, tasol bikpela samting moa, ol i gat asua long wanem sampela pris na pasto na sister ol yet i bin helpim wok bilong bagarapim ol man.” Wankain samting i bin kamap bipo long Israel, na long dispela taim man bilong autim tru tok bilong Jehova, em Jeremaia, em i bin tok ol Israel wantaim ol hetman na ol pris na ol profet ol “i gat sem,” na em i tok moa: “Yu kilim ol nating na blut bilong ol i pas i stap yet long ol klos bilong yu.”—Jeremaia 2:26, 34.
8 Planti taim ol man i bin kolim Jeremaia olsem profet bilong toksave long ol samting nogut bai kamap, tasol yumi ken kolim em tu olsem man bilong autim tok bilong God long gutaim bai kamap. Em i stori planti long “gutaim,” wankain olsem Aisaia bipo i bin mekim. Jehova i bin mekim wok long Jeremaia bilong toksave long kot bai painim Jerusalem, em i tok: “Stat long taim ol i wokim Jerusalem na i kam inap nau, ol Jerusalem i bin mekim mi i belhat nogut tru. Olsem na mi laik bagarapim dispela taun na bai mi no ken lukim moa. Olgeta manmeri bilong Israel na Juda i laik mekim mi i belhat moa yet na ol i bin mekim ol kain kain pasin nogut. Olgeta manmeri nating na ol king na ol hetman na ol pris na ol profet, olgeta manmeri bilong Juda na Jerusalem i bin mekim pasin nogut.” (Jeremaia 32:31, 32) Dispela i olsem piksa na i makim kot bilong Jehova bai painim ol hetman na pris pasto bilong ol kantri i gat nem Kristen long nau. Bilong gutaim tru i ken kamap, ol dispela man bilong kirapim ol narapela long mekim ol pasin nogut na pait na bagarapim man ol i mas pinis—ol i no ken i stap moa! Ol i no man bilong autim tok bilong gutaim. Nogat tru.
Yunaitet Nesen Bai Kamapim Gutaim?
9 Tasol olsem wanem long Yunaitet Nesen? Ating ol inap kamap lain tru bilong autim tok bilong gutaim? Tingim dispela sata i kolim ol as lo bilong en, ol i bin wokim long Jun 1945, inap 41 de paslain long taim bom atom i bagarapim Hirosima. Long ol tok i go pas, sata i tok wok bilong Yunaitet Nesen em bilong helpim “ol lain i kamap bihain bambai bikpela pait i no ken bagarapim ol.” Ol kantri i laik insait long Yunaitet Nesen—long dispela taim bipo ol inap olsem 50—ol i mas “bungim strong [bilong ol] bilong helpim olgeta lain long sindaun gut wantaim na i stap bel isi.” Long nau inap 185 kantri ol i insait long Yunaitet Nesen, na ol i tok ol i wok strong long kamapim wankain samting.
10 Insait long ol yia i go pinis, ol man i bin litimapim tru Yunaitet Nesen, na ol bikman bilong lotu i bin mekim moa yet. Long Epril 11, 1963, Pop John Namba 23 i bin sainim wanpela pepa em yet i wokim, nem bilong en “Pacem in Terris” (Gutaim Long Graun), na long dispela pepa em i tok: “Mipela laik bai dispela lain Yunaitet Nesen i ken kisim bikpela strong moa na ol samting bilong inapim em long mekim dispela bikpela wok tru bilong en, em wanpela gutpela wok em i laik mekim.” Bihain, long Jun 1965, ol bikman bilong lotu—ol i tok ol i olsem mausman bilong 50 pesen bilong olgeta lain bilong graun—ol i mekim bikpela bung long San Fransisko bilong makim namba 20 krismas bilong Yunaitet Nesen. Na tu, long 1965, taim Pop Paul Namba 6 i bin go raun long Yunaitet Nesen, em i stori long dispela lain na i tok, “i no gat narapela samting inap helpim ol man long i stap wanbel na bel isi.” Long 1986, Pop John Paul Namba 2 i bin go pas long helpim wok bilong Yunaitet Nesen long makim yia 1986 olsem Yia Bilong Gutaim Long Olgeta Hap.
11 Bihain, taim pop i raun gen long dispela hap long Oktoba 1995, em i tok: “Nau em bikpela de bilong amamas long Gutpela Tok bilong Kingdom bilong God.” Tasol tru God i bin salim em bilong autim gutpela tok bilong Kingdom? Em i stori long ol hevi bilong graun na em i mekim dispela tok: “Yumi laik stretim ol dispela bikpela hevi tru, tasol yumi save, rot bilong mekim olsem em dispela Oganaisesen Bilong Yunaitet Nesen.” Olsem na pop i no tingim Kingdom bilong God, nogat; em i tingim Yunaitet Nesen.
Ol i “Krai Strong Moa”
12 Ol i mekim bikpela amamas bilong makim 50 yia bilong Yunaitet Nesen, tasol dispela i no bin kamapim wanpela rot tru bilong kamapim “gutaim long graun.” Wanpela man bilong raitim ol stori long nius The Toronto Star bilong Kanada i makim wanpela as bilong dispela samting, na em i tok: “Lain Yunaitet Nesen i olsem wanpela laion i no gat tit, na taim em i lukim ol pasin nogut tru ol man i wokim em i save krai strong, tasol em i mas wetim ol kantri i insait long en i putim ol tit giaman long maus bilong en pastaim bambai em inap long kaikaim wanpela samting.” Planti taim em i bihaintaim tumas long mekim sampela samting, na strong bilong en long kaikaim samting long tit i liklik tumas. Ol man bilong autim tok bilong gutaim long dispela graun bilong nau, na moa yet long hap bilong ol lotu i gat nem Kristen, ol i save mekim wankain tok olsem i stap long Jeremaia 6:14: “Ol manmeri bilong mi i gat ol bikpela sua, tasol ol pris na profet i lukim ol sua olsem samting nating, na ol i no pasim gut. Ol i save tokim ol manmeri olsem, ‘Yupela i no ken wari. Yumi stap gut.’ Tasol nogat. Ol i no stap gut.”
13 Ol seketeri-jeneral bilong Yunaitet Nesen i bin wok strong long helpim wok bilong en long kamap gutpela, na ating ol i bin bilip tru long wok bilong en. Tasol ol hevi i save kamap namel long ol memba bilong en i gat narapela narapela tingting, em ol inap olsem 185 kantri—olsem ol i save paitim tok i go i kam long pasin bilong daunim pait, na kamapim ol nupela lo, na mekim wok long mani—ol dispela hevi i pasim rot na wok bilong en i no kamap gutpela. Long wanpela ripot em seketeri-jeneral long dispela taim i raitim bilong yia 1995, em i stori olsem dispela “tingting pret bilong ol man long pait nuklia bai kamap long olgeta hap” i wok long pinis, na nau dispela i opim rot bambai “ol kantri i ken wok wantaim long kamapim planti wok bisnis na long helpim sindaun bilong ol manmeri long kamap gutpela.” Tasol em i tok moa: “Sori tru, ol samting i bin kamap long graun insait long ol yia i go pinis i narapela kain tru long ol dispela gutpela samting yumi laik bai ol i mas kamap.” Tru tumas, dispela lain i ting em bai autim tok bilong gutaim, em i wok long “krai strong moa.”
14 Wanpela het-tok long nius The Orange County Register bilong Kalifonia i tok: “Yunaitet Nesen i Bagarap Long Ol Samting Bilong Mani na Pasin Bilong En.” Stori i tok, namel long 1945 na 1990 i gat 80 pait samting i kamap, na winim 30 milion man i bagarap long ol dispela pait. Stori i kamapim tok bilong wanpela man i bin raitim tok long buk Reader’s Digest bilong Oktoba 1995, em i “stori long wok bilong ol ami bilong Yunaitet Nesen na em i tok, ‘ol ofisa i no gat save, ol soldia i no bihainim gut tok, ol i pren wantaim ol lain birua, ol i no pasim ol man long mekim pasin nogut tru bilong bagarapim man na sampela taim ol i helpim ol dispela pasin nogut tru.’ Na ‘ol i tromoi nating planti samting, na paulim planti mani na mekim nogut long planti samting.’ ” Long wanpela hap bilong nius The New York Times i gat bikpela het-tok, “Yunaitet Nesen, Taim Em i Gat 50 Krismas,” na aninit long en ol i raitim het-tok olsem: “Ol i No Bosim Gut Wok na Ol i Tromoi Nating Planti Samting, Dispela i Bagarapim Laik Bilong Yunaitet Nesen Long Mekim Gut Wok.” Het-tok bilong wanpela stori long nius The Times bilong Landon, Inglan, i tok, “Em i Gat 50 Krismas na Em i No Gat Strong—Yunaitet Nesen i mas mekim sampela eksasais bilong helpim em long kamap strong gen.” I olsem yumi kaunim long Jeremaia sapta 8, ves 15: “Yumi bin ting bai yumi sindaun gut, tasol yumi no sindaun gut. Na yumi bin ting bai yumi gat taim bilong kamap orait gen, tasol ol birua i kam na mekim yumi pret nogut tru.” Na ol manmeri i pret yet long bikpela bagarap bai kamap taim sampela lain i pait na tromoi ol bom nuklia. Tru tumas, Yunaitet Nesen i no man bilong autim tok bilong gutaim em ol manmeri i sot long en.
15 Wanem samting bai kamap long bihain? Ol tok profet bilong Jehova long Baibel i tokaut klia long dispela samting. Pastaim yumi laik save, wanem samting bai painim ol lotu giaman bilong dispela graun em ol i bin pren gut wantaim Yunaitet Nesen? Ol dispela lotu i kamap long wanpela as tasol, em Babilon bilong bipo. Olsem na i stret Kamapim Tok Hait 17:5 i stori long ol olsem: “Bikpela taun Babilon, em mama tru bilong olgeta pamukmeri na bilong olgeta pasin nogut tru i stap long graun.” Jeremaia i bin stori long ol samting nogut bai painim dispela lain bilong giaman. Wankain long pamukmeri, ol i prenim ol bikman politik bilong dispela graun, na em i grisim lain Yunaitet Nesen na mekim pasin pamuk wantaim ol gavman i insait long dispela lain. Ol i nambawan lain long insait long ol bikpela pait. Wanpela man i tok long ol pait bilong lotu long India olsem: “Karl Marx i bin tok, lotu i olsem drak opiam bilong ol man. Tasol dispela tok i no stret olgeta, long wanem, drak opiam i olsem wanpela drak i save mekim man i laik slip na tingting i olsem i dai. Mobeta yumi tok lotu i olsem drak ol i kolim krek koken. Em i save kirapim bel bilong man long pait strong tru na bagarapim olgeta samting.” Tasol tok bilong dispela man tu i no stret olgeta. Lotu giaman i mekim tupela samting—em i mekim man i laik slip na man i laik pait.
16 Orait, ol manmeri i gat stretpela bel ol i mas mekim wanem? Man bilong autim tok bilong God, em Jeremaia, em i bekim dispela askim olsem: “Yupela i mas lusim Babilon na ranawe i go. . . . Nogut yupela i bagarap wantaim kantri Babilon, long wanem, nau em i taim bilong Bikpela i bekim pe nogut long Babilon long ol pasin nogut bilong en.” Yumi amamas tru long planti milion manmeri i ranawe pinis long Bikpela Babilon, em olgeta lotu giaman bilong dispela graun. Olsem wanem? Yu wanpela bilong ol? Sapos olsem, ating yu save gut long wanem pasin Bikpela Babilon i bin mekim long olgeta lain bilong graun, olsem: “Babilon i bin stap long han bilong Bikpela olsem wanpela kap gol, na Bikpela i bin mekim ol arapela lain i dring wain long dispela kap. Na ol i spak na nau ol i longlong nabaut.”—Jeremaia 51:6, 7.
17 Klostu nau Jehova bai stiaim ol dispela lain bilong Yunaitet Nesen “ol i longlong nabaut,” na ol bai bagarapim olgeta lotu giaman olsem Kamapim Tok Hait 17:16 i tok: “Ol bai i birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” Dispela samting bai kirapim taim bilong bikpela hevi tru em Matyu 24:21 i stori long en, na bai i pinis long Armagedon, em pait bilong bikpela de bilong God i Gat Olgeta Strong. Wankain long Babilon bilong bipo, Bikpela Babilon bai kisim dispela strafe em Jeremaia 51:13, 25 i kolim, em i tok: “Babilon, yu gat planti wara long kantri bilong yu na planti gutpela gutpela samting. Tasol taim bilong yu i bagarap, em i kam klostu pinis. . . . ‘Strong bilong yu i bikpela moa olsem bikpela maunten, na yu wok long bagarapim olgeta hap bilong graun. Tasol tru tumas, mi Bikpela, mi birua long yu na bai mi taitim han bilong mi na holim yu na tromoi yu i go daun long graun na bai paia i pinisim yu olgeta.’ ” Ol lotu giaman bai bagarap pastaim, na bihain ol lain bilong graun em ol i lusim pinis stretpela pasin na ol i save pait, ol tu bai bagarap long dispela de bilong Jehova bilong bekim pe nogut.
18 Long 1 Tesalonaika 5:3, Baibel i tok long ol man nogut olsem: “Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.” Na Aisaia i tok long ol dispela man olsem: “Lukim. . . . Ol man i bin hatwok long mekim gutpela taim i kamap, ol i krai strong moa.” (Aisaia 33:7) Tru tumas, olsem Aisaia 48:22 i tok, “Ol manmeri bilong mekim pasin nogut, bai ol i no inap painim gutpela taim.” Tasol yumi laik save, wanem samting bai painim ol man bilong autim tok long bel isi God i save givim? Bai yumi toktok long dispela samting long stori i kamap bihain long dispela.
Ol Askim Bilong Tingim Gen
◻ Ol profet bilong God i autim wanem strongpela tok bilong kamapim long ples klia ol man bilong autim tok giaman?
◻ Bilong wanem ol lain bilong graun i no inap kamapim gutaim bilong i stap oltaim?
◻ Olsem wanem ol man bilong autim tru tok bilong gutaim ol i narapela kain long ol man i helpim Yunaitet Nesen?
◻ Ol man i gat pasin daun ol i mas mekim wanem bambai ol i ken kisim amamas long gutpela taim Jehova i tok promis long kamapim?
[Askim Bilong Stadi]
1. Bilong wanem yumi ken ting ol man bilong autim tru tok bilong God na ol man bilong autim tok giaman, ol i stap long “taim bilong las de”?
2. Olsem wanem tok bilong Aisaia 57:20, 21 i kamap tru long nau?
3. (a) I gat wanem tupela lain olsem 1 Jon 5:19 i tok? (b) Kamapim Tok Hait sapta 7 i stori olsem wanem long ol “manmeri i gat gutpela save na tingting”?
4. (a) Ol man bilong dispela graun bilong Satan em ol i tok ol i man bilong autim tok bilong gutaim, bilong wanem ol i mas lus? (b) Olsem wanem Efesus 4:18, 19 i kamap tru long nau?
5. (a) Bilong wanem ol lain bilong graun i no inap kamapim gutaim? (b) Song 37 i autim wanem gutpela tok?
6, 7. Ol lotu bilong dispela graun i mekim wanem na dispela i kamapim long ples klia olsem ol i no man bilong autim tok bilong gutaim?
8. Bilong wanem yumi ken tok Jeremaia i man bilong autim tok bilong gutaim?
9. Olsem wanem Yunaitet Nesen i tok ol i lain bilong autim tok bilong gutaim?
10, 11. (a) Ol bikman bilong lotu i bin mekim wanem ol tok bilong strongim wok bilong Yunaitet Nesen? (b) Olsem wanem ol pop i no bin kamapim stret “Gutpela Tok bilong Kingdom bilong God”?
12, 13. (a) Olsem wanem Yunaitet Nesen i bin mekim pasin olsem Jeremaia 6:14 i stori long en? (b) Bilong wanem ol hetman bilong Yunaitet Nesen tu ol bai mekim olsem Aisaia 33:7 i stori long en?
14. (a) Bilong wanem yumi ken tok, Yunaitet Nesen i bagarap long ol samting bilong mani na pasin bilong en? (b) Olsem wanem tok bilong Jeremaia 8:15 i kamap tru?
15. Olsem wanem Babilon bilong bipo na ol lain bilong en ol i mekim na man i laik slip na em i laik pait tu?
16. Bilong wanem nau ol manmeri i gat stretpela bel ol i mas lusim Bikpela Babilon? (Lukim tu Kamapim Tok Hait 18:4, 5.)
17. Klostu nau Jehova bai givim wanem strafe long Bikpela Babilon? Na wanem samting bai kamap bihain long en?
18. Long wanem taim truim bilong Aisaia 48:22 bai kamap? Em bai kamap olsem wanem?
[Ol Piksa long pes 15]
Aisaia, Jeremaia, na Daniel, olgeta i tok profet olsem ol man bilong graun i no inap kamapim gutaim
[Piksa long pes 16]
“Dispela graun olgeta em i stap aninit long strong bilong Satan.”—Aposel Jon i tok olsem
[Piksa long pes 17]
“Save bilong ol i olsem tudak.”—Aposel Pol i tok olsem