Yu Bilip Olsem Taim Yumi Dai Yumi Save Kamap Nupela Gen Long Narapela Bodi?
“OLSEM WANEM? Yu inap tingim yet dispela yangpela meri i bin sindaun klostu long yumi na yu bin laikim em tru taim yu wok long go bikpela hia long India?” Mukundbhai i raitim pas olsem long pikinini man bilong em, em i skul long yunivesiti long Yunaitet Stets. Na em i tok: “Inap tupela wik samting bihain bai em i marit. Mi ting i gutpela sapos yu save long dispela samting.”
Bilong wanem papa i tokim pikinini long dispela samting? Inap sampela yia i go pinis, Mukundbhai yet i bin kros long dispela samting na tupela yangpela i mas bruk. Na tu, pikinini bilong em i stap long Yunaitet Stets inap 6-pela yia pinis bilong kisim bikpela skul. Em i no bin raitim pas o toktok wantaim dispela meri long dispela taim, na Mukundbhai i save pinis long dispela samting.
Orait, bilong wanem nau em i tingting planti long dispela samting? Long wanem, em i bilip olsem taim yumi dai yumi save kamap nupela gen long narapela bodi.a Tasol sapos tupela i bin marit long taim ol i bin i stap laip bipo long narapela bodi, na long dispela as narapela i gat laik long narapela taim tupela i yangpela yet, em bai mekim pasin nogut sapos em i no larim tupela i marit nau long taim tupela i bikpela pinis inap long ol i ken marit. Mukundbhai i laik bai pikinini bilong em i save olsem dispela meri bai marit, nogut pikinini i no save long dispela samting na meri i kamap meri bilong narapela man long dispela laip nau em i stap long en.
Tingim narapela samting i bin kamap. Wanpela liklik pikinini meri i gat 4-pela krismas em i gat wanpela kain sik bilong klok na sampela taim em i mas slip long haus sik long Mumbai na em i kisim bikpela pen. Papamama bilong em ol i maniman na tupela i bel hevi tru long lukim pikinini bilong ol i karim bikpela pen. Tasol ol i tingting olsem: “Yumi mas save, pikinini bilong yumi i gat sik na yumi no inap senisim dispela samting. Ating em i bin mekim wanpela rong long narapela laip em i bin stap long en bipo na dispela sik i olsem strafe bilong em.”
Dispela bilip olsem taim yumi dai yumi save kamap nupela gen long narapela bodi, em i bikpela samting long i stap bilong planti milion manmeri bilong ol lotu olsem Hindu, Buda, Jain, Sik, na ol narapela lotu i bin kirap pastaim long India. Ol samting i save painim ol man long i stap bilong ol—olsem laik i kamap namel long man na meri, o karim bikpela pen, o ol narapela samting i save painim ol—ol i ting dispela i save kamap long sampela pasin ol i bin mekim taim ol i stap laip long narapela bodi bipo.
Na dispela bilip olsem taim yumi dai yumi save kamap nupela gen long narapela bodi, em i save pulim tingting bilong planti man long ol kantri i stap long hap bilong Wes. Wanpela meri bilong mekim pilai long ol piksa wokabaut long Amerika, em Shirley MacLaine, em i tok em i holim dispela bilip. Na wanpela man bilong raitim buk, em Laurel Phelan bilong Vankuva, Britis Kalambia, long Kanada, em i tok em inap tingim 50 taim em i bin i stap laip long ol narapela bodi bipo. Long 1994, wanpela lain (Gallup) i bin skelim dispela samting bilong wanpela oganaisesen bilong salim nius i go, em CNN na nius USA Today na i tok, ol i bin toktok wantaim 1,016 man na meri i bikpela pinis, na winim 270 bilong ol i tok ol i bilip olsem taim yumi dai yumi save kamap nupela gen long narapela bodi. Na wanpela lotu ol i kolim Nupela Taim (New Age) i gat dispela bilip. Tasol i gat wanem samting bilong helpim dispela bilip?
Ol man i holim dispela bilip ol i tok “ol man inap tingim taim ol i bin i stap laip long narapela bodi bipo!” Wanpela stori i olsem: Wanpela pikinini long Bankok i gat 3-pela krismas, em Ratana, “em i kirap na tingim taim em i bin i stap laip bipo olsem wanpela meri bilong lotu i bin i dai taim em i gat 60 krismas samting.” Orait, planti man i bin harim dispela stori ol i bilip long tok bilong em na ol i ting dispela i kamapim klia tru olsem taim yumi dai yumi save kamap nupela gen long narapela bodi.
Tasol planti man i gat tupela tingting long dispela bilip. Na i gat sampela samting inap mekim na ol man i tok ol inap tingim taim ol i bin i stap long narapela bodi bipo.b Long buk bilong em, wanpela saveman Hindu, nem bilong em Nikhilananda, em i tok, ‘stori bilong ol man long ol samting i bin painim ol bihain long taim ol i dai, sapos yumi skelim long pasin bilong gutpela tingting yumi no inap kamapim klia olsem dispela samting i tru.’ Tasol em i tok, ‘dispela bilip olsem yumi save kamap nupela gen, yumi ken ting dispela inap kamap, tasol yumi no ken ting em i no inap tru long kamap.’—Buk Hinduism: Its Meaning for the Liberation of the Spirit.
Tasol yu ting Baibel i helpim dispela bilip? Na Baibel i kolim wanem gutpela samting ol man i dai pinis ol inap wetim?
[Ol Futnot]
a Buk The New Encyclopædia Britannica i stori long dispela bilip na i tok, ‘taim yumi dai tewel i save kamap nupela gen long narapela bodi, o taim dispela bodi tu i dai, em i save kamap nupela gen long narapela bodi, i go i go olsem, na sampela taim em i bodi bilong man, o bodi bilong animal, o wanpela diwai samting.’ Dispela tok “kamap nupela gen” em tu inap makim wankain samting, tasol planti man i save kolim dispela bilip olsem “kamap nupela gen long narapela bodi.” Sampela buk dikseneri bilong ol tok ples bilong India i save kolim dispela tupela tok bilong makim wankain samting tasol.
b Lukim pes 5-7 bilong Jun 8, 1994, Kirap! (tok Inglis).
[Ol Piksa long pes 4]
Yu ting em i kisim strafe long sampela sin em i bin mekim taim em i bin i stap laip long narapela taim bipo?