Epafras—“Gutpela Wokman Bilong Krais”

HUSAT i bin kamapim ol kongrigesen Kristen long Korin, Efesus, na Filipai? Ating wantu bai yu tok: ‘Em Pol, dispela man God i bin salim em i go bilong mekim wok namel long ol man bilong ol narapela lain.’ (Rom 11:13) Sapos yu tok olsem, tok bilong yu i stret.

Tasol husat i bin kamapim ol kongrigesen long Kolosi, Hierapolis, na Laodisia? Yumi no save tru, tasol ating em wanpela man nem bilong em, Epafras. Ating yu laik kisim sampela save moa long dispela man bilong autim tok, long wanem, Baibel i kolim em wanpela “gutpela wokman bilong Krais.”​—⁠Kolosi 1:⁠7.

Em i Autim Tok Long Ples Daun Bilong Lukus

Epafras em sotpela nem bilong Epafroditus. Tasol yumi no ken ting dispela Epafras em i Epafroditus bilong Filipai. Epafras em bilong Kolosi, em wanpela bilong tripela kongrigesen Kristen i stap long ples daun bilong wara Lukus, long Esia Maina. Taun Kolosi i bin stap 18 kilomita longwe long Laodisia na 19 kilomita longwe long Hierapolis, long hap bipo ol i kolim Frigia.

Baibel i no kamapim klia olsem wanem gutnius bilong Kingdom i bin kamap long Frigia. Tasol sampela Frigia i bin stap long Jerusalem long de Pentikos bilong yia 33 C.E., na ating sampela i bin kam long Kolosi. (Aposel 2:​1, 5, 10) Taim Pol i bin stap long Efesus (long yia 52 i go inap yia 55 C.E.), em i wok strong long autim tok na em i mekim gutpela wok tru, olsem na “olgeta manmeri i stap long provins Esia ol i harim tok bilong Bikpela, em ol Juda na ol Grik wantaim,” na ol lain bilong Efesus tu. (Aposel 19:10) Yumi ken ting olsem Pol yet i no bin autim gutnius long ples daun bilong Lukus, long wanem, planti bilong ol manmeri i bin kamap Kristen long dispela hap ol i no bin lukim pes bilong em.​—⁠Kolosi 2:⁠1.

Olsem Pol i tok, man i bin skulim ol Kolosi long “gutnius bilong marimari bilong God” em Epafras. Pol i kolim em “gutpela wokman bilong Krais” na “wanwok bilong mipela,” olsem na dispela i kamapim klia olsem Epafras i bin wok strong long autim tok long dispela hap.​—⁠Kolosi 1:​6, 7.

Aposel Pol wantaim Epafras ol i tingim tru ol wanlotu bilong ol long ples daun bilong Lukus, na ol i laik bai ol i stap gut long ol samting bilong spirit. God i bin salim Pol i go bilong mekim wok namel long ol man bilong ol narapela lain, olsem na ating em i amamas tru taim em i harim tok olsem ol Kolosi i bin kamap strong. Epafras yet i bin tokim Pol long ol Kolosi i stap olsem wanem long ol samting bilong spirit.​—⁠Kolosi 1:​4, 8.

Ripot Bilong Epafras

Ol Kolosi i gat sampela bikpela hevi na dispela i kirapim Epafras long raun i go longwe long Rom bambai em inap toktok wantaim Pol long ol dispela samting. Epafras i kamapim gut olgeta samting, na ating dispela tasol i bin kirapim Pol long raitim tupela pas long ol dispela brata em i no bin lukim. Wanpela pas i go long ol Kolosi. Narapela pas i go long ol Laodisia, tasol ating dispela pas i no stap moa. (Kolosi 4:16) I stret yumi ken ting olsem ol tok Pol i raitim long dispela tupela pas i bilong helpim ol Kristen long ol samting Epafras i pilim ol i sot long en. Em i ting ol i mas kisim wanem helpim? Na dispela i givim wanem save long yumi long pasin bilong em?

Pas bilong ol Kolosi i makim olsem Epafras i tingting planti long ol samting inap pundaunim ol Kristen long Kolosi, olsem: Pasin bilong tambuim skin long kisim sampela amamas, wok marila posin samting, bihainim ol bilip giaman bilong ol tumbuna na lotuim ol god giaman. Na tu, ol Juda i skulim ol man long i stap tambu long kaikai na long bihainim sampela bikpela de, na ating dispela i bin paulim tingting bilong sampela long kongrigesen.​—⁠Kolosi 2:​4, 8, 16, 20-23.

Ol dispela samting Pol i stori long en i kamapim klia olsem Epafras i was i stap long ol brata Kristen bilong em na em i pilim gut ol samting ol i mas kisim bilong helpim ol. Em i sori long ol na em i laik helpim ol long stap gut long ol samting bilong spirit, long wanem, em i tingim ol samting inap pundaunim ol long dispela hap ol i stap long en. Epafras i laik kisim sampela tingting long Pol, na dispela i kamapim klia olsem em i man bilong pasin daun. Ating em i pilim olsem i gutpela long kisim sampela tingting long wanpela i gat planti save. Long dispela samting Epafras i mekim, em i bihainim gutpela tingting.​—⁠Sindaun 15:22.

Man Bilong Tingim Tru Beten

Long pinis bilong pas Pol i raitim long ol Kristen long Kolosi, em i tok: “Epafras em i tok gude long yupela. Em i wantok bilong yupela na em i wokman bilong Krais Jisas. Oltaim em i save strong long prea na askim God long helpim yupela long sanap strong olsem ol Kristen i kisim pinis pasin bilong God na i save gut tru long olgeta laik bilong God. Mi laik tokim yupela olsem, em i save hatwok tru long helpim yupela wantaim ol manmeri bilong ol sios i stap long taun Laodisia na taun Hierapolis.”​—⁠Kolosi 4:​12, 13.

Yes, maski em i stap kalabus wantaim Pol long Rom, Epafras i wok long tingim ol gutpela brata bilong em long Kolosi na Laodisia na Hierapolis, na em i wok long beten long ol. (Filemon 23) I olsem ‘em i taitim bun tru’ long beten long ol. Saveman D. Edmond Hiebert i tok, ol i mekim wok long wanpela tok Grik long dispela ves em i makim “wanpela strongpela wok i gat hatwok long mekim,” na i kain olsem long taim Krais Jisas i wok long beten long gaden bilong Getsemani na em i “pilim hevi nogut tru.” (Luk 22:44) Epafras i laik tru bai ol brata na sista spirit bilong em i kamap strongpela Kristen. Ating dispela brata bilong tingim ol samting bilong spirit i bin stap olsem wanpela bikpela blesing long ol kongrigesen, a?

Pol i tok, Epafras “em i wanwok bilong mipela, na mipela i save laikim em tru,” olsem na yumi save ol pasin bilong em i kirapim ol brata Kristen long laikim em. (Kolosi 1:⁠7) Taim i gat rot long mekim olsem, olgeta long kongrigesen i mas amamas long mekim pasin sori na givim taim na strong bilong ol long helpim ol narapela. Olsem: Ol i mas tingting long helpim ol sikman, ol lapun, na sampela i gat hevi. Ating i gat ol narapela narapela wok long mekim long kongrigesen, o ating rot bai op long helpim wok bilong sanapim Haus Kingdom samting.

Pasin bilong beten bilong helpim ol narapela, olsem Epafras i bin mekim, em wanpela hap wok bilong lotuim God yumi olgeta inap mekim. Long beten yumi ken askim Jehova long lukautim ol brata em hevi i bin painim ol na ol inap kisim bagarap long samting bilong spirit o bilong skin. Sapos yumi wok strong long mekim olsem, bai yumi bihainim pasin bilong Epafras. Yumi olgeta wan wan inap kisim gutpela blesing na amamas bilong i stap olsem wanpela ‘gutpela wanwok’ bilong ol man i stap gut long mekim wok bilong Jehova insait long lain bilong em.