Wok Gut Wantaim Oganaisesen Bilong Jehova

“Sapos man i no lusim yu, orait yu no save lusim em.”​—⁠2 SAMUEL 22:⁠26.

1, 2. Wanem sampela pasin bilong i stap gut long God ating yumi olgeta i save lukim insait long kongrigesen?

WANPELA taim long nait, wanpela elda i wok long redim tok bilong mekim long wanpela miting Kristen. Em i laik lusim dispela wok pastaim na malolo liklik, tasol em i wok yet i go, na em i wok long painim ol tok bilong Baibel na ol tok piksa bai kirapim tru ol manmeri bilong kongrigesen na strongim bel bilong ol. Long apinun long taim bilong dispela miting, papa na mama bilong wanpela famili long dispela kongrigesen yet ol i laik tru long i stap tasol long haus, long wanem, ol i bin mekim bikpela wok na skin bilong ol i les tru; tasol ol i redim ol pikinini bilong ol na ol i go long miting. Taim miting i pinis, sampela Kristen i bung na stori long tok dispela elda i bin mekim. Wanpela sista i laik tokaut olsem wanpela taim bipo dispela elda i mekim wanpela tok i sutim bel bilong em; tasol em i kamapim wanpela gutpela tok em elda i bin mekim. Orait, yu pilim dispela wankain samting i stap long olgeta dispela stori?

² Dispela samting i olsem pasin bilong i stap gut long wanpela man o wanpela wok samting. Elda i stap gut long wok bilong em long lukautim lain bilong God; dispela papamama i no lusim ol miting bilong kongrigesen; sista i stap gut long pasin bilong sambai long ol elda. (Hibru 10:​24, 25; 13:17; 1 Pita 5:⁠2) Tru tumas, long olgeta samting long i stap bilong ol, yumi lukim lain bilong God ol i tingting strong long wok gut wantaim oganaisesen bilong Jehova.

3. Bilong wanem em i bikpela samting tru long yumi mas i stap gut long oganaisesen bilong Jehova long graun?

³ Taim Jehova i lukluk i kam daun long ol lain bilong dispela graun ol i save mekim ol pasin nogut, em i no save lukim planti manmeri i stap gut long narapela o long wanpela wok samting, nogat. (Maika 7:⁠2) Olsem na taim em i lukim lain bilong em ol i stap gut long em, ating bel bilong em i amamas moa yet! Em nau, taim yu yet yu stap gut long em, em i save amamas tru long dispela. Tasol dispela bikhetman bilong pastaim tru, em Satan, em i belhat tru long dispela pasin bilong yu, long wanem, dispela i kamapim long ples klia olsem em i man bilong giaman. (Sindaun 27:11; Jon 8:​44) Yu mas save, Satan bai wok strong long bagarapim pasin bilong yu long i stap gut long Jehova na oganaisesen bilong Em long graun. Orait nau yumi ken stori long sampela rot bilong Satan long mekim olsem. Olsem bai yumi inap save gut long olsem wanem yumi ken stap gut long Jehova na oganaisesen i go inap long pinis bilong dispela taim.​—⁠2 Korin 2:​11.

No Ken Lukluk Tasol Long Pasin Kranki Bilong Man

4. (a) Olsem wanem na i no hatwok long skelim skelim pasin bilong ol man i gat namba long bosim kongrigesen? (b) Kora i mekim wanem na em i no stap gut long oganaisesen bilong Jehova?

⁴ Taim wanpela brata i holim bikpela wok insait long kongrigesen, ating ol liklik pasin kranki bilong em bai kamap ples klia moa. Em nau, i no hatwok long ‘lukim liklik hap pipia i stap long ai bilong brata bilong yumi, tasol yumi no tingim bikpela plang i stap long ai bilong yumi yet’! (Matyu 7:​1-5) Tasol taim yumi wok long tingim tingim ol liklik pasin kranki bilong ol brata, dispela inap mekim na yumi no stap gut moa long oganaisesen bilong Jehova. Bilong pilim tru dispela samting, yumi ken tingim Kora na Devit, em pasin bilong tupela i narapela narapela kain. Kora i bin holim bikpela wok, na ating em i bin stap gut long Jehova inap planti yia, tasol bihain em i gat laik long holim bikpela namba moa. Olsem na em i bel nogut long namba em tupela kasen brata bilong em, Moses na Aron, i holim bilong bosim ol Israel. Moses em i man bilong mekim pasin daun, winim ol narapela man, tasol Kora i kirap na skelim pasin bilong Moses. Ating em i bin lukim sampela liklik pasin kranki long Moses. Tasol ol dispela liklik pasin kranki i no givim rot long em na em i ken bikhet long oganaisesen bilong Jehova, nogat. Orait, God i bagarapim em na em i no stap moa namel long lain bilong God.​—⁠Namba 12:3; 16:​11, 31-​33.

5. I gat wanem as na Devit inap tingting long mekim pasin bikhet long Sol?

⁵ Tasol Devit i narapela kain. Em i wanpela wokman bilong King Sol. Pastaim Sol em i gutpela king, tasol bihain em i kamap man nogut. Em i bel nogut tru long Devit na i laik bagarapim em, olsem na Devit i mas i gat bilip, na pasin bilong sanap strong, na savepasin bambai em i ken abrusim bagarap. Orait wanpela taim Devit i gat rot long bekim nogut long Sol, tasol em i tok, i no stret tru long ai bilong Jehova sapos em i bagarapim dispela king Jehova i bin makim.​—⁠1 Samuel 26:⁠11.

6. Maski yumi lukim sampela liklik pasin kranki long ol elda, yumi no ken mekim wanem?

⁶ Taim yumi ting olsem sampela i go pas long lukautim yumi ol i no bin skelim gut ol samting insait long kongrigesen, o ol i save mekim hatpela tok, o i olsem ol i save laikim sampela, winim ol narapela, bai yumi mekim wanem? Bai yumi toktok planti long ol, na ating long dispela rot bai yumi helpim pasin bilong skelim skelim pasin bilong ol brata insait long kongrigesen? Bai yumi lusim ol miting Kristen bilong makim olsem yumi no orait long dispela pasin bilong ol? Nogat tru! Bai yumi bihainim pasin bilong Devit na yumi no larim ol pasin kranki bilong ol narapela i kirapim yumi long lusim pasin bilong i stap gut long Jehova na oganaisesen bilong em!​—⁠Song 119:165.

7. Wanem sampela pasin nogut i bin kamap long tempel long Jerusalem? Jisas i ting olsem wanem long dispela samting?

⁷ Krais Jisas i nambawan gutpela piksa bilong man i stap gut long Jehova, na Baibel i tok profet na kolim em olsem “man bilong [Jehova] yet,” olsem man i stap gut long Jehova. (Song 16:10) Ol wok nogut ol i bin mekim insait long tempel long Jerusalem, ating dispela i mekim na i hatwok long i stap gut long Jehova. Jisas i save, wok bilong hetpris na ol ofa i makim wok bilong Jisas yet na indai bilong em olsem ofa, na em i save, i bikpela samting tru long ol man i mas lukim ol dispela samting i stap olsem piksa na ol i mas kisim save. Olsem na em i belhat tru taim em i lukim haus bilong God i kamap olsem “ples hait bilong ol stilman.” Em i mekim wok long namba God i bin givim long em na tupela taim em i kirap na mekim ol samting bambai haus bilong God i ken stap klin.a​—⁠Matyu 21:​12, 13; Jon 2:​15-​17.

⁸ Tasol maski ol i mekim olsem, Jisas i helpim yet wok bilong tempel na em i no bikhet long en. Kirap long taim em i manki yet, em i save go long ol bikpela bung i kamap long tempel na planti taim em i skulim ol man insait long en. Na em i save tromoi takis bilong tempel tu, maski em i no gat wok long mekim olsem. (Matyu 17:​24-​27) Jisas i mekim gutpela tok long wanpela rabismeri, man bilong em i dai pinis, em i tromoi “olgeta mani bilong en” long bokis mani bilong tempel. Bihain liklik long dispela, Jehova i givim baksait olgeta long dispela tempel na em i no laikim moa. Tasol inap long dispela taim, Jisas i stap gut long en. (Mak 12:​41-​44; Matyu 23:38) Oganaisesen bilong God long nau em i winim tru ol pasin na lo bilong ol Juda wantaim tempel bilong ol. Tru, oganaisesen bilong God long nau i no nambawan olgeta, olsem na sampela taim oganaisesen i save stretim sampela tok o pasin bilong en long mekim wok. Tasol i no gat planti pasin giaman na pasin nogut long en, na God Jehova i no tingting long rausim na kisim wanpela senis bilong en. Sapos yumi lukim sampela liklik pasin kranki insait long oganaisesen, yumi no ken larim dispela i kirapim yumi long bel nogut long en o kisim pasin bilong skelim skelim ol brata o toktok planti long ol. Yumi mas bihainim pasin bilong Jisas, em i bin stap gut long wok bilong tempel.​—⁠1 Pita 2:​21.

Ol Pasin Kranki Bilong Yumi Yet

9, 10. (a) Olsem wanem dispela graun bilong Satan i save mekim wok long ol pasin kranki bilong yumi bilong pulim yumi na bai yumi no stap gut long God? (b) Sapos wanpela i bin mekim bikpela rong, em i mas mekim wanem?

⁹ Satan i gat narapela rot tu bilong kirapim yumi long lusim pasin bilong i stap gut long God​—⁠em i mekim wok long ol pasin kranki bilong yumi. Pasin bilong dispela graun i stap aninit long Satan i mekim wok long ol pasin kranki bilong yumi na i laik pulim yumi long mekim ol samting i no stret long ai bilong Jehova. Sori tru, long olgeta yia planti tausen ol i save pundaun na mekim pasin pamuk. Sampela i mekim dispela pasin bilong bikhet long God i go bikpela moa na long ai bilong ol man ol i save wokabaut stret olsem gutpela Kristen, tasol ol i wok yet long mekim rong. Wanpela yangpela meri i bin kaunim sampela tok bilong dispela samting long nius Kirap! long ol stori “Ol Yangpela i Laik Save . . . ,” na em i raitim pas olsem: “Ol dispela stori i makim stret i stap bilong mi.” Long pasin hait em i bin kamap pren bilong ol yangpela i no save laikim Jehova. Orait, wanem samting i kamap? Em i tok: “I stap bilong mi i go nogut olgeta, na mi kirap mekim pasin pamuk na kongrigesen i mas stretim mi. Mi nogutim pasin bilong mi long pas gut wantaim Jehova, na papamama bilong mi na ol elda ol i no bilip moa long mi.”b

¹⁰ Ol elda i bin helpim dispela yangpela meri na em i kirap gen long mekim wok bilong Jehova na stap gut long dispela wok. Tasol sori tru, planti ol i save kisim nogut moa yet long rong ol i bin mekim, na sampela ol i no save kam bek insait long lain bilong God. Mobeta ol i bin i stap gut long Jehova na sakim ol traim bilong ol man nogut bilong dispela graun! Harim gut ol tok lukaut i save kamap long nius Wastaua na Kirap! i stori long ol kain samting olsem pasin bilong poroman wantaim ol manmeri bilong dispela graun na ol amamas nogut. Nogut yu pundaun na mekim sampela pasin olsem yu no stap gut long Jehova. Tasol sapos yu pundaun na mekim olsem, yu no ken giaman na mekim olsem yu bihainim stretpela pasin. (Song 26:⁠4) Yu mas singaut long sampela i helpim yu. Ol papamama Kristen na ol elda ol i stap bilong mekim dispela wok.​—⁠Jems 5:⁠14.

¹¹ Na ol pasin kranki bilong yumi inap nogutim yumi long narapela rot. Sampela ol i mekim wanpela rong na nau ol i les na ol i no laik wok strong long mekim pasin Jehova i laikim. Tingim Devit​—⁠em i bin mekim sampela bikpela rong tru. Tasol planti handet yia bihain, Jehova i wok yet long tingim em olsem wanpela gutpela wokboi bilong Em. (Hibru 11:32; 12:⁠1) Olsem wanem na Jehova i ting olsem long Devit? Long wanem, oltaim em i wok strong long mekim pasin Jehova i laikim na em i no les. Sindaun 24:16 i tok: “Maski sapos stretpela man i save pundaun planti taim, oltaim em bai i kirap gen.” Olsem na sapos yumi gat sampela pasin kranki yumi hatwok tru long stretim, na dispela i mekim na yumi pundaun na mekim sampela liklik rong​—⁠na sapos planti taim yumi mekim olsem​—⁠yumi inap i stap olsem stretpela man yet long ai bilong Jehova sapos yumi wok yet long “kirap gen”​—⁠olsem yumi tanim bel tru na kirap mekim gen wok bilong Jehova na stap gut long dispela wok.​—⁠Skelim wantaim 2 Korin 2:⁠7.

Lukaut Long Sampela Pasin Hait Bilong Bikhet Long Jehova!

12. Pasin bilong ol Farisi, em ol i strong tumas long putim lo long olgeta samting, olsem wanem dispela i mekim na ol i no stap gut long God?

¹² Sampela pasin bilong bikhet long Jehova i no stap ples klia, na sampela taim, long skin i olsem em i pasin bilong i stap gut long Jehova! Olsem: Ating ol Farisi long taim bilong Jisas ol i bin ting olsem ol i man tru bilong i stap gut long God.c Tasol ol i no lukim olsem pasin bilong i stap gut long God i narapela kain long pasin bilong pas strong tumas long ol lo em ol man yet i kamapim, long wanem, ol dispela lo i strong tumas na i olsem i skelim ol man long kot. (Skelim wantaim Saveman 7:16.) Long dispela pasin ol i no stap gut long ol manmeri ol i gat wok long helpim ol; na ol i tok ol i save skulim ol man long Lo, tasol ol i no stap gut long ol samting Lo i makim, em dispela Lo ol i tok ol i save skulim ol man long en, na ol i no stap gut long Jehova yet. Tasol Jisas i stap gut long ol samting Lo i makim, em pasin bilong laikim tru ol narapela i as bilong dispela Lo. Olsem na Jisas i strongim bel bilong ol man, olsem ol tok profet long Mesaia i tok em bai mekim.​—⁠Aisaia 42:3; 50:4; 61:​1, 2.

¹³ Pasin bilong Jisas long dispela samting em i save helpim gut ol Kristen i gat sampela wok bos ol i mas mekim. Olsem: Ol papamama i stap gut long God ol i save ol i mas stretim ol pikinini bilong ol. (Sindaun 13:24) Tasol ol i was gut na bai ol i no skrapim bel bilong ol pikinini, olsem mekim hatpela pasin bilong stretim ol pikinini na mekim wantaim belhat, o ol i wok oltaim long sutim tok long ol pikinini long ol samting ol i mekim. Sapos pikinini i pilim olsem em i no inap mekim wanpela samting papamama i laikim, o lotu bilong papamama i save kirapim ol long toktok planti oltaim long em na sutim tok long em, dispela inap mekim na pikinini bai bel hevi, na ating bihain em bai lusim trupela bilip.​—⁠Kolosi 3:​21.

14. Olsem wanem ol wasman Kristen inap i stap gut long lain bilong God ol i save lukautim?

¹⁴ Ol elda na wasman bilong raun tu, ol i save was gut long ol hevi inap kamap insait long lain bilong God na ol samting inap bagarapim ol. Ol i olsem wasman i stap gut long ol sipsip, olsem na taim hevi i kamap, ol i save givim tok long ol bilong helpim ol, tasol pastaim ol i mas save gut long ol samting bilong dispela hevi, na ol i was gut na bai ol tok bilong Baibel na ol buk samting bilong Sosaiti i as bilong ol tok ol i givim long ol. (Song 119:105; Sindaun 18:13) Na ol i save, ol sipsip i wetim ol i strongim ol na givim kaikai bilong spirit long ol. Olsem na ol i wok strong long bihainim pasin bilong Krais Jisas, em i Gutpela Wasman. Long olgeta wik long ol miting Kristen ol i mekim wok bilong helpim ol sipsip​—⁠ol i no save sutim hatpela tok long ol na daunim ol, nogat; ol i wok long strongim ol na strongim bilip bilong ol.​—⁠Matyu 20:28; Efesus 4:​11, 12; Hibru 13:​20, 21.

15. Sampela long taim bilong ol aposel i bin mekim wanem na dispela i kamapim klia olsem ol i stap gut long wanpela samting na i no stret long mekim olsem?

¹⁵ Narapela kain pasin bikhet i stap hait em pasin bilong i stap gut long wanpela man o wanpela wok samting na i no stret long mekim. Bilong i stap gut tru long God olsem Baibel i makim, yumi no inap i stap gut long wanpela samting na putim dispela i go pas long pasin bilong i stap gut long God Jehova, nogat. Planti Juda long taim bilong ol aposel ol i strong tru long holimpas Lo Bilong Moses na ol pasin na lo bilong ol Juda. Tasol taim bilong Jehova i kamap pinis long em i mas tekewe ol blesing bilong em long dispela bikhetlain na givim long lain Israel bilong spirit. Liklik hap lain tasol i stap gut long Jehova na isi isi ol i lain long bihainim dispela bikpela senis i kamap. Na namel long ol trupela Kristen tu, sampela man i laik bihainim pasin bilong ol Juda na ol i strong long bihainim gen “ol dispela rabis [pasin] i no gat strong tru,” em ol samting bilong Lo Bilong Moses, em Krais inapim pinis.​—⁠Galesia 4:9; 5:​6-​12; Filipai 3:​2, 3.

¹⁶ Tasol lain bilong Jehova long nau ol i no olsem; taim sampela senis i kamap, ol i kamapim long ples klia olsem ol i stap gut long em. Taim lait bilong tok i tru i wok long kamap klia moa, oganaisesen bilong Jehova i save stretim sampela tok. (Sindaun 4:​18) Nau long dispela taim “wokboi i gat gutpela tingting” i helpim yumi long stretim tingting bilong yumi long dispela tok “ol manmeri bilong dispela taim,” olsem yumi lukim long Matyu 24:​34, na taim bilong skelim ol “sipsip” na “meme” long kot, olsem Matyu 25:31-​46 i stori long en, na tingting bilong yumi long sampela kain wok i no bilong ami em ol man i mas mekim bilong helpim ples. (Matyu 24:45) Yumi save, planti man i lusim bilip na ol i bikhet na givim baksait long Jehova ol bai amamas sapos planti Witnes Bilong Jehova i laik holim strong tingting bilong ol bilong pastaim long ol dispela kain samting na ol i no laik stretim tingting na kisim ol dispela nupela save. Tasol dispela kain pasin i no kamap. Bilong wanem? Long wanem, lain bilong Jehova ol i stap gut long em.

17. Olsem wanem ol manmeri yumi laikim ol tumas ol inap traim pasin bilong yumi long i stap gut long Jehova?

¹⁷ Tasol pasin bilong i stap gut long wanpela man na i no stret long mekim, dispela samting inap painim yumi yet. Taim wanpela gutpela pren o wanpela long famili i laik bihainim pasin i kalapim ol lo bilong Baibel, ating yumi pilim olsem yumi mas i stap gut long famili. Tru, yumi laik i stap gut long famili. Tasol yumi no ken tru putim dispela samting i go pas long pasin bilong i stap gut long Jehova! (Skelim wantaim 1 Samuel 23:​16-​18.) Ol man i bin mekim rong, yumi no ken helpim ol long haitim wanpela bikpela rong ol i bin mekim, na yumi no ken sambai long ol na sakim ol elda em ol i laik ‘mekim pasin isi long ol dispela man na helpim ol long stretim pasin bilong ol.’ (Galesia 6:⁠1) Sapos yumi mekim olsem, yumi no stap gut long Jehova, na oganaisesen bilong em, na dispela man o meri yumi laikim em tumas. Long wanem, sapos yumi pasim rot bilong man i bin mekim rong na em i no inap kisim ol tok bilong stretim em, i olsem yumi pasim dispela rot bilong Jehova long kamapim pasin sori bilong em long dispela man. (Hibru 12:​5-7) Na yumi mas tingim tu olsem ‘ol pren tru i save givim pen long yumi bilong helpim yumi.’ (Sindaun 27:⁠6) Tru, taim wanpela yumi laikim tumas em i mekim wanpela rong na yumi givim sampela tok bilong Baibel long em bilong helpim em, ating dispela bai givim pen long em, olsem sutim bel bilong em, tasol ating bihain dispela bai helpim em long abrusim bagarap na i stap laip!

Stap Gut Long God Taim Hevi i Kamap

¹⁸ Sampela taim Satan i mekim wok long ples klia bilong kirapim yumi long lusim pasin bilong i stap gut long God. Tingim samting i bin painim Nabot. King Ahap i strong tru long baim gaden wain bilong Nabot, tasol em i tokim king: “Bipo yet dispela hap graun i bilong ol lain tumbuna bilong mi, na nau mi holim i stap. Olsem na long nem bilong Bikpela, mi no inap givim long yu.” (1 King 21:⁠3) I no olsem Nabot i bikhet, nogat; em i stap gut long God. Lo Bilong Moses i tok, hap graun ol Israel i kisim long ol lain tumbuna, ol i no ken baim i go long narapela man bilong holim oltaim. (Wok Pris 25:​23-​28) Nabot i save pinis dispela king nogut inap kilim em i dai, long wanem, Ahap i bin larim meri bilong em, Jesebel, i kilim i dai planti profet bilong Jehova! Tasol Nabot i sanap strong.​—⁠1 King 18:⁠4.

18, 19. (a) Ahap i laik kisim wanem samting bilong Nabot? Bilong wanem Nabot i no laik givim long em? (b) Taim yu tingim samting i bin painim Nabot, yu ting Nabot i mekim pasin kranki taim em i stap gut long God? Stori long dispela.

¹⁹ Taim yumi stap gut long God, sampela taim ol man inap mekim nogut long yumi. Jesebel i kisim sampela “man nogut” bilong helpim em na ol i sutim tok giaman long Nabot na tok em i bin mekim wanpela rong. Olsem na ol man i kisim em wantaim ol pikinini man bilong em na kilim ol i dai. (1 King 21:​7-​16; 2 King 9:​26) Orait olsem wanem? Ating Nabot i popaia taim em i stap gut long God? Nogat tru! Nabot em i wanpela bilong planti man na meri ol i bin stap gut long God na nau long dispela taim ol i “stap laip” long tingting bilong Jehova​—⁠ol i slip i stap long matmat inap long taim bilong ol long kirap bek.​—⁠Luk 20:38; Aposel 24:⁠15.

20. Pasin bilong wetim gutpela samting i kamap bihain, olsem wanem dispela inap helpim yumi long i stap gut long God?

²⁰ Ol manmeri bilong nau ol i stap gut long Jehova, ol tu inap tingim dispela gutpela tok promis. Yumi save, long dispela graun long nau yumi inap kisim bagarap long pasin bilong yumi long i stap gut long God. Krais Jisas i bin stap gut long God na ol i kilim em i dai, na em i tokim lain bilong em olsem ol man bai mekim wankain pasin long ol. (Jon 15:20) Tasol em i tingting long gutpela samting em bai kisim bihain na dispela i strongim em, na gutpela samting yumi wet long en, em i strongim yumi tu. (Hibru 12:⁠2) Olsem na yumi inap i stap gut long Jehova, maski wanem samting nogut ol man i mekim long yumi.

21. Yumi inap bilip tru olsem Jehova bai mekim wanem long ol manmeri ol i stap gut long em?

²¹ Tru, i no planti bilong yumi i save kisim bikpela hevi olsem long i stap gut long God. Tasol ol man inap mekim nogut moa yet long lain bilong God paslain long pinis bilong dispela taim. Orait, olsem wanem yumi ken stap gut long God long dispela taim bihain? Yumi mas i stap gut long em long nau. Jehova i bin givim wanpela bikpela wok long yumi​—⁠em wok bilong autim tok na skulim ol man long Kingdom bilong em. Orait yumi mas stap gut long God na mekim dispela bikpela wok. (1 Korin 15:58) Sapos yumi no larim ol pasin kranki bilong narapela i bagarapim pasin bilong yumi long i stap gut long oganaisesen bilong Jehova, na sapos yumi was gut na sakim pasin bilong i stap gut long sampela man taim i no stret long mekim olsem, dispela inap helpim yumi long sanap strong taim wanpela bikpela hevi tru i kamap bilong traim pasin bilong yumi long i stap gut long God. Tasol yumi inap bilip tru olsem: Long olgeta taim Jehova i save stap gut long ol wokboi bilong em ol i stap gut long em. (2 Samuel 22:26) Tru tumas, em bai lukautim ol manmeri i stap gut long em!​—⁠Song 97:⁠10.

[Ol Futnot]

Bai Yu Bekim Olsem Wanem?

◻ Yumi ken mekim wanem na bai yumi no larim ol pasin kranki bilong ol narapela i mekim na yumi lusim pasin bilong i stap gut long God?

◻ Ol pasin kranki bilong yumi yet inap kirapim yumi long mekim wanem ol pasin bikhet long God?

◻ Olsem wanem yumi ken sakim pasin bilong i stap gut long sampela na i no stret long mekim olsem?

◻ Taim ol man i mekim nogut long yumi, wanem samting bai helpim yumi long i stap gut long God?

8. (a) Jisas i mekim wanem na em i stap gut long ol wok samting bilong dispela tempel? (b) Olsem wanem yumi ken kamapim klia olsem yumi amamas long lotuim Jehova wantaim klinpela oganaisesen bilong em?

11. Bilong wanem i no stret sapos yumi ting yumi nogut olgeta? Wanem stori bilong Baibel inap helpim yumi long stretim dispela tingting bilong yumi?

13. (a) Ol papamama Kristen inap mekim wanem na ol i no stap gut long God? (b) Bilong wanem ol papamama i no ken mekim hatpela pasin o wok long sutim tok long ol pikinini taim ol i laik stretim ol?

16. Taim oganaisesen bilong Jehova i mas stretim sampela tok samting, ol wokboi bilong Jehova i stap gut long em ol i save mekim wanem?

[Blok long pes 9]

Ol i Stap Gut Long Wok Bilong Ol Long Betel

“Yupela i mas bihainim stret ol gutpela pasin bilong lotu.” Aposel Pol i bin tok olsem. (1 Korin 14:40) Pol i save, bilong kongrigesen i ken wok gut, ol i mas bihainim “gutpela pasin” bilong mekim ol wok bilong kongrigesen. Long nau tu, ol elda i mas tingim gut pasin bilong mekim ol wok insait long kongrigesen, olsem makim husat husat bai insait long ol grup bilong buk-stadi, na putim ol bung bilong i go autim tok, na skelim gut ol hap bilong autim tok long en, olsem ol i mekim pinis o nogat. Sampela taim ol dispela kain wok inap kamap olsem samting bilong traim pasin bilong man long i stap gut long wok. Spirit holi yet i no bin givim tok long ol elda long mekim ol dispela kain wok, na i no olgeta wan wan long kongrigesen bai orait long pasin ol i makim bilong mekim ol dispela wok.

Orait olsem wanem long yu? Sampela taim yu save hatwok long bihainim pasin ol elda i makim bilong mekim ol dispela wok insait long kongrigesen Kristen? Sapos yu hatwok, ating pasin bilong mekim wok long Betel em inap helpim yu. Dispela nem Betel em wanpela tok Hibru, na insait bilong en i olsem “Haus Bilong God.” Ol i bin givim dispela nem Betel long olgeta 104 brens bilong Sosaiti Was Taua, na hetkota bilong en long Yunaitet Stets.* Ol volantia i save sindaun na wok long ol haus Betel ol i laik bai ol dispela haus i givim biknem long Jehova. Bilong mekim olsem, olgeta wan wan i mas i stap gut long wok bilong ol.

Planti man i kam raun na lukim Betel ol i save toktok long pasin ol i lukim long mekim stret ol wok na ol samting i stap klin tru. Ol wokman i redi gut long mekim ol wok bilong ol na ol i stap amamas; toktok bilong ol, na pasin bilong ol long mekim gut long ol man, na klos samting bilong ol, ol i kamapim long ples klia olsem ol i save bihainim maus bilong bel em Baibel i skulim pinis. Olgeta wan wan long famili bilong Betel ol i save stap gut long bihainim ol lo bilong Baibel.

Na tu, Lain Bilong Bosim Ol Witnes i save givim wanpela buk long ol (Dwelling Together in Unity) i kolim sampela pasin ol i mas bihainim bambai bikpela lain famili olsem ol inap wok gut wantaim. (Song 133:⁠1) Dispela buk i toktok long ol samting bilong ol rum slip, kaikai, ol samting i mas i stap klin, klos na pasin bilong mekim gut skin, na ol kain samting olsem. Ol manmeri long famili bilong Betel ol i save stap gut long bihainim ol dispela pasin em buk i kolim, maski ol yet i laik bihainim narapela rot bilong mekim ol dispela samting. Ol i tingim ol tok bilong dispela buk i olsem samting bilong soim rot long ol na bai ol i ken i stap wanbel na wok gut wantaim, na i no olsem wanpela buk i gat ol strongpela lo ol i mas bihainim. Ol wasman bilong lukautim ol wok ol i save stap gut long bihainim ol dispela pasin bilong mekim wok, em Baibel i as bilong en, na ol i save mekim wok long en bilong strongim famili bilong Betel na kirapim ol long mekim yet wok holi bilong ol long Betel.

* Ol dispela haus faktori, na ofis, na haus slip, ol i no dispela bikpela haus lotu spirit bilong God, nogat. Haus lotu spirit bilong God em ol samting Jehova i putim bilong stretim rot bambai yumi ken lotu tru long em. (Maika 4:⁠1) Olsem na em i no wanpela haus tru long graun, nogat.

[Blok long pes 10]

Man i Stap Gut Long Lo na Man i Strong Tumas Long Bihainim Lo

Bipo long 1916 wanpela buk (Encyclopædia of Religion and Ethics) i tok, ‘man i stap gut long lo na man i strong tumas long bihainim lo, ol i narapela narapela kain long olgeta samting.’ Buk i tok: “Man i strong tumas long bihainim lo, em i save mekim ol samting ol i tokim em long mekim, na em i no save brukim wanpela lo; em i save bihainim stret ol tok ol i raitim na em inap kaunim. Na man i save stap gut long lo, em tu i save mekim ol dispela samting, tasol . . . em i mekim sampela samting moa​—⁠em i save putim tingting bilong em olgeta long wok bilong em, na em i save wanbel long as tru bilong dispela wok.” Bihain dispela buk i tok: “Man i stap gut long lo, em i no bihainim tasol dispela lo​—⁠em i save mekim sampela samting moa. . . . Man i stap gut long lo em i narapela kain long man i bihainim lo​—⁠em i save givim bel na tingting olgeta long mekim wok bilong em . . . Em i save bosim gut skin na em i no mekim ol sin long laik bilong em yet, olsem mekim wanpela samting i no stret long mekim, o givim baksait long wanpela samting em i mas mekim, o mekim wanpela samting em i no save i gat rong long en.”