Askim

Olsem wanem? Dispela dokta Juda i bin stap olsem 600 yia i go pinis, nem bilong em Sem-Top ben Aisak Ibn Saprut, em i bin raitim gen fopela leta Hibru bilong nem bilong God i stap long Buk Matyu long tok Hibru?

Nogat. Tasol dispela rait bilong Buk Matyu i kamapim wanpela tok olsem hash·Shem’ (ol i raitim olgeta o ol i sotim) inap 19 taim, olsem yumi lukim long pes 13 bilong Wastaua bilong Ogas 15, 1996.

Insait bilong dispela tok Hibru hash·Shem’ i olsem “dispela Nem,” na yumi save em i makim nem bilong God. Olsem: Long rait bilong Sem-Top, dispela tok hash·Shem’ em ol i sotim, em i stap long Matyu 3:​3​—⁠long dispela ves Matyu i kamapim tok bilong Aisaia 40:⁠3. I gat as na yumi ken ting, taim Matyu i kamapim wanpela ves bilong Ol Skripsa Hibru i gat dispela fopela leta i makim nem bilong God, em i raitim nem bilong God long Gutnius bilong em. Olsem na maski Buk Matyu bilong Sem-Top long tok Hibru i no kamapim dispela fopela leta, em i raitim tok olsem “dispela Nem,” olsem long Matyu 3:​3, na dispela i strongim pasin bilong kamapim nem “Jehova” long Ol Skripsa Grik.

Ol tok bilong Buk Matyu long tok Hibru, Sem-Top i bin raitim gen long buk bilong em, ʼEʹven boʹchan. Tasol em i kisim we dispela rait Hibru bilong Buk Matyu? Profesa George Howard, em wanpela man i bin mekim bikpela wok bilong skelim dispela samting, em i ting olsem ‘Buk Matyu bilong Sem-Top long tok Hibru i bin kamap long wanpela taim insait long 400 yia bihain long Krais.’a Ating sampela i no wanbel long dispela tok bilong em.

Howard i tok: ‘Buk Matyu long tok Hibru em Sem-Top i putim long dispela rait, i gat planti samting i narapela kain long buk em Matyu i bin raitim long tok Grik na i stap long Baibel.’ Olsem: Long Buk Matyu bilong Sem-Top, Jisas i stori long Jon olsem: “Mi tok tru long yupela, Jon Bilong Baptais em i winim olgeta man i bin kamap long graun.” Tasol em i lusim narapela tok Jisas i mekim bihain long dispela, olsem: “Tasol man i stap liklik tru long kingdom bilong heven, em i winim Jon.” (Matyu 11:11) Na long Ol Skripsa Hibru ol i bin raitim long tok Hibru na i stap yet, i gat planti tok i narapela kain long tok bilong ol dispela ves yet i stap long Ol Skripsa Hibru ol i bin raitim long tok Grik long Baibel Grik Septuagint. Tru, i gat sampela tok i narapela narapela kain, tasol ol dispela rait bilong bipo i save helpim wok bilong stadi na skelim tok bilong Ol Skripsa Hibru ol i bin raitim long tok Hibru na long tok Grik.

Olsem yumi tok pinis, long Buk Matyu em Sem-Top i bin raitim gen, i gat “dispela Nem” long ol ves em yumi inap bilip olsem Matyu i bin raitim fopela leta bilong nem bilong God long en. Olsem na kirap long 1950 na i kam inap nau, ol i bin mekim wok long rait bilong Sem-Top bilong strongim pasin bilong putim nem bilong God long Ol Skripsa Grik, na dispela nem i stap yet long Baibel The New World Translation of the Holy Scriptures​—⁠With References.b

[Ol Futnot]