Stap Gut Long Helpim Tok Bilong God

“Mipela i givim baksait pinis long olkain pasin nogut ol man i save hait na mekim. Mipela i no save wokabaut long pasin bilong giaman. Na mipela i no save senisim tok bilong God. Nogat.”​—⁠2 KORIN 4:⁠2.

1. (a) I mas i gat wanem samting bilong mekim gut dispela wok em Matyu 24:14 na 28:​19, 20 i kolim? (b) Long kirap bilong taim bilong las de, ol man inap kisim Baibel long hamas tok ples?

LONG bikpela tok profet bilong Krais Jisas long taim em bai kam i stap olsem king na pasin bilong dispela graun bai i pinis, em i tok profet olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Na em i tokim ol disaipel: “Yupela i mas i go mekim olgeta lain manmeri i kamap disaipel bilong mi. . . . Lainim ol long bihainim olgeta tok mi bin givim long yupela.” (Matyu 24:14; 28:​19, 20) Truim bilong ol dispela tok profet i mekim na i gat bikpela wok bilong tanim tok bilong Baibel na prinim ol Baibel, na skulim ol man long insait bilong ol tok bilong en, na helpim ol long bihainim ol dispela tok long i stap bilong ol. Em gutpela samting tru long yumi inap insait long kain wok olsem! Inap long yia 1914, ol i bin wokim Baibel olgeta o sampela hap bilong en long 570 tok ples. Tasol bihain long dispela taim na i kam inap nau, ol i bin wokim Baibel long planti bikpela na liklik tok ples moa, na long planti tok ples ol inap kisim ol Baibel em ol narapela narapela lain i bin tanim.a

2. Wanem ol narapela narapela tingting i bin stiaim ol man bilong tanim Baibel na ol man bilong prinim Baibel?

² Ol man bilong tanim tok ol i gat hatwok tru​—⁠ol i mas lukim ol tok i stap long wanpela tok ples na tanim i go long narapela tok ples, na kamapim ol tok i klia long ol man i save kaunim na harim dispela tok ples na bai ol inap kisim gut. Sampela man bilong tanim Baibel, ol i pilim tru olsem dispela tok ol i tanim em Tok Bilong God na ol i mas mekim gut dispela wok. Na sampela i ting, bilong tanim tok bilong Baibel, man i mas i gat bikpela save na skul, olsem na ol i laik traim save bilong ol long mekim dispela bikpela wok. Ating ol i tingim tok bilong Baibel i olsem wanpela gutpela buk i kamapim bilip na pasin bilong ol tumbuna. Na lotu em i wok mani bilong sampela man, na ol i save kisim mani long wokim wanpela Baibel i gat nem bilong ol long en olsem man bilong tanim o wokim dispela buk. Em nau, tingting bilong man bilong tanim tok bilong Baibel em i save stiaim pasin bilong em long mekim dispela wok.

3. Komiti bilong tanim Baibel New World Translation ol i ting olsem wanem long dispela wok bilong ol?

³ Yumi ken tingim tok bilong komiti bilong tanim Baibel New World Translation, ol i tok: ‘Taim man i tanim tok bilong Baibel Holi, em i tanim long narapela tok ples ol tingting na tok bilong God Jehova . . . Taim man i tingim dispela bikpela samting, em i save tingting gut. Ol man bilong tanim dispela Baibel, em ol i pret na laikim tumas dispela God em i As bilong Baibel Holi, ol i pilim olsem ol i gat bikpela wok long tanim stret tru ol tingting na tok bilong em, inap long save bilong ol. Na ol i save tingim ol man bilong kaunim Baibel em ol i laik skelim na kisim save long en na ol i mas i gat wanpela Baibel, olsem Tok bilong God Antap Tru, inap helpim ol bambai ol i ken kisim laip i stap oltaim oltaim. Orait dispela komiti i tingim ol dispela bikpela samting na ol i pilim tru bikpela wok bilong ol, olsem na inap long planti yia ol i mekim wok bilong tanim tok bilong Baibel na bihain ol i kamapim Baibel New World Translation of the Holy Scriptures.’ Tingting bilong dispela komiti, em ol i gat laik long kamapim wanpela Baibel i klia tru na ol man inap kisim gut, na ol tok bilong en i bihainim stret tok Hibru na tok Grik bilong Baibel ol i bin raitim long pastaim tru, na dispela bai helpim ol man long kisim stretpela save na wok long kamap strong.

Ol i Mekim Wanem Long Nem Bilong God?

4. Long Baibel nem bilong God i bikpela samting olsem wanem?

⁴ Wanpela bikpela wok bilong Baibel em bilong helpim ol man long save long God tru. (Kisim Bek 20:​2-7; 34:​1-7; Aisaia 52:⁠6) Krais Jisas i bin skulim ol disaipel long beten olsem nem bilong Papa bilong em “i mas i stap holi,” olsem ol man i mas tingim nem bilong em i holi. (Matyu 6:⁠9) God i bin putim nem bilong em inap 7,000 taim samting long Baibel. Em i laik bai ol man i ken save long dispela nem na long ol gutpela pasin bilong Man i holim dispela nem.​—⁠Malakai 1:​11.

5. Sampela man bilong tanim Baibel ol i mekim wanem long nem bilong God?

⁵ Planti man bilong tanim Baibel ol i soim olsem ol i tingim tru nem bilong God na ol i kamapim planti taim long ol Baibel ol i tanim. Sampela ol i laik raitim olsem Yawe. Na sampela i raitim nem bilong God olsem ol man bilong mekim dispela tok ples ol i save kolim, tasol ol man inap luksave gut olsem dispela em i wankain nem olsem i stap long Baibel long tok Hibru​—⁠ating ol i raitim long pasin em planti man i save long en, em ol i bin kolim olsem inap longpela taim pinis. Baibel New World Translation of the Holy Scriptures i kamapim nem Jehova inap 7,210 taim insait long Baibel.

6. (a) Nau long dispela taim, ol man bilong tanim Baibel ol i bin mekim wanem long ol ves i gat nem bilong God long en? (b) Ol i bin mekim olsem long sampela Baibel tasol o olsem wanem?

⁶ Nau long dispela taim, planti man bilong tanim Baibel ol i save raitim yet nem bilong ol god haiden olsem Bal na Molek, tasol planti ol i wok long rausim nem bilong God tru long ol Baibel ol i tanim. (Kisim Bek 3:​15; Jeremaia 32:35) Long ol ves olsem Matyu 6:9 na Jon 17:​6, 26, i gat wanpela hap tok Grik yumi kolim olsem “nem bilong yu” (olsem nem bilong God) tasol long wanpela Baibel long tok ples Albenia em planti man i holim, ol i tanim dispela tok olsem “yu” tasol​—⁠ol i mekim olsem ol dispela ves i no toktok long wanpela nem. Long Song 83:​18, tupela Baibel (The New English Bible na Today’s English Version) ol i rausim nem bilong God na ol tok i kamapim olsem God i gat wanpela nem. Nem bilong God i bin stap long klostu olgeta tok ples ol i bin tanim Ol Skripsa Hibru long en long bipo, tasol planti Baibel ol i tanim long nau i no gat nem bilong God long en, o ol i putim tasol long liklik rait i stap daunbilo long pes o long namel bilong pes. Ol i bin mekim olsem long ol Baibel ol i tanim long tok Inglis, na planti tok ples bilong Yurop, Afrika, Saut Amerika, India, na ol ailan bilong solwara Pasifik.

7. (a) Ol man bilong tanim Baibel i go long sampela tok ples bilong Afrika ol i mekim wanem long nem bilong God? (b) Yu ting olsem wanem long dispela samting?

⁷ Ol man bilong tanim Baibel long sampela tok ples bilong Afrika ol i mekim sampela samting moa. Taim ol i rausim nem bilong God, ol i no raitim wanpela biknem em Baibel i kolim, olsem God o Bikpela, nogat; ol i raitim wanpela nem i stap long bilip bilong ol dispela lain yet. Long Baibel The New Testament and Psalms in Zulu (bilong 1986), sampela taim ol i raitim wanpela biknem olsem God (uNkulunkulu) na sampela taim ol i raitim wanpela nem tru bilong man (uMvelinqangi), em ol Sulu i ting em nem bilong ‘bikpela tumbuna ol i save lotu long em long rot bilong ol tumbuna.’ Wanpela stori i bin kamap long nius The Bible Translator, bilong Oktoba 1992, i tok, taim ol i tanim Baibel long tok ples Sisawa, em ol bai kolim dispela Baibel olsem Buku Loyera, ol i raitim nem Chauta bilong senisim nem Jehova. Nius i tok, Chauta em “dispela God ol i bin save long en kirap long bipo yet, na ol i save lotu long em.” Tasol planti bilong ol dispela lain ol i save lotu tu long ol samting ol i bilip olsem ol i tewel bilong ol man i dai pinis. Sampela i ting, sapos wanpela lain i beten long wanpela “Bikpela Man Antap,” orait wanem wanem nem ol i kolim long dispela “Bikpela Man Antap,” em i wankain olsem ol i kolim dispela nem Jehova, maski ol i mekim wanem ol narapela samting insait long lotu bilong ol. Tasol yu ting dispela pasin i stret? Nogat tru! (Aisaia 42:8; 1 Korin 10:20) Taim ol man i rausim nem bilong God na putim wanpela nem i kirapim ol man long ting ol bilip ol i kisim long ol tumbuna i stret, dispela i no helpim ol long kam klostu long God tru.

⁸ Tasol ol dispela samting i no senisim o pasim laik bilong Jehova long kamapim nem bilong em long ol man. Long ol tok ples bilong Yurop, Afrika, ol hap bilong Amerika, Esia, na ol ailan bilong solwara, i gat planti Baibel i stap yet em ol i kamapim nem bilong God. Na i gat olsem 5,400,000 Witnes Bilong Jehova long 233 kantri samting, em olgeta wantaim i save lusim olsem wan bilion aua samting long olgeta yia long tokim ol man long nem na laik bilong trupela God. Ol i save prinim na tilim ol Baibel long tok ples bilong 3,600,000,000 manmeri bilong graun​—⁠sampela tok ples em tok Inglis, Saina, Rasia, Spen, Potugal, Frans, na Holan, na ol dispela Baibel i gat nem bilong God i stap long en. Na ol i save wokim ol buk samting bilong helpim ol man long stadi long Baibel, na ol i wokim long ol tok ples em planti lain bilong graun i save long en. Klostu nau na God yet bai kirap na mekim wanpela samting em bai truim tokaut bilong em olsem: “Olgeta lain man . . . bai ol i save gut olsem, mi yet mi Bikpela [Jehova].”​—⁠Esekiel 38:⁠23.

Taim Ol Bilip Bilong Ol i Stiaim Ol

9. Olsem wanem Baibel i makim olsem ol man i mekim wok long Tok Bilong God ol i gat bikpela wok tru na ol i mas tingim gut?

⁹ Ol man i gat wok long tanim Tok Bilong God na ol man i save skulim ol narapela long tok bilong en, ol i gat bikpela wok tru na ol i mas tingim gut dispela wok. Aposel Pol i tok long wok bilong em na ol wanwok bilong em long autim tok, na em i tok olsem: “Mipela i givim baksait pinis long olkain pasin nogut ol man i save hait na mekim. Mipela i no save wokabaut long pasin bilong giaman. Na mipela i no save senisim tok bilong God. Nogat. Mipela i save autim tok tru long ples klia, bai olgeta man i ken skelim pasin bilong mipela na long bel bilong ol, ol i ken save olsem mipela i mekim stretpela wok long ai bilong God.” (2 Korin 4:⁠2) Dispela tok “senisim tok bilong God” i olsem ol i putim narapela kain tok long en bilong kisim ples bilong dispela tok, na long dispela rot ol i paulim tok bilong God. Aposel Pol i no olsem ol wasman bilong Israel long taim bilong Jeremaia em ol i no stap gut long Jehova na Em i krosim ol, long wanem, ol i autim tok bilong ol yet na ol i no autim tok bilong God. (Jeremaia 23:​16, 22) Tasol wanem samting i kamap long taim bilong yumi?

10. (a) Long nau wanem ol tingting i stiaim sampela man bilong tanim Baibel na i no olsem ol i laik i stap gut long God? (b) Ol i mekim olsem ol i husat na dispela i no stret?

¹⁰ Long taim bilong Namba 2 Pait, wanpela komiti bilong ol tisa bilong lotu na ol pasto i wok wantaim gavman bilong Hitler long Jemani bilong kamapim wanpela “Nupela Testamen” ol i laik senisim sampela tok bilong en. Long dispela Baibel ol i rausim olgeta gutpela tok em i mekim long ol Juda na olgeta tok i makim olsem Krais Jisas i bin kamap long lain Juda. Nau long dispela taim ol man bilong tanim wanpela Baibel (The New Testament and Psalms: An Inclusive Version) ol i mekim narapela kain pasin​—⁠ol i laik rausim olgeta tok long en i makim olsem em i asua bilong ol Juda na ol i bin kilim i dai Krais. Na ol dispela man bilong tanim tok ol i tingim ol meri i strong long i stap wankain olsem ol man long ol samting bilong wok na sindaun bilong ol, em ol bai amamas long kaunim wanpela Baibel i no kolim God olsem Papa​—⁠em i kolim God olsem Papa-Mama, na Jisas i no Pikinini Man bilong God​—⁠em i Pikinini bilong God. (Matyu 11:27) Na tu, ol i rausim olgeta tok i kamapim lo olsem ol meri i mas daun long man bilong ol na ol pikinini i mas bihainim tok bilong papamama. (Kolosi 3:​18, 20) Ol man i bin tanim ol dispela Baibel ol i kamapim klia olsem ol i no bihainim tingting bilong aposel Pol, em i no orait long “senisim tok bilong God.” Ol dispela lain ol i lusim tingting long wok bilong man bilong tanim tok​—⁠ol i mekim olsem ol yet i as bilong ol dispela tok, na ol i kamapim ol buk i mekim wok long gutnem bilong Baibel bambai ol i ken kirapim ol man long bihainim tingting bilong ol yet.

11. Tok bilong ol lotu i holim nating nem Kristen, olsem wanem em i pait wantaim tok bilong Baibel long ol samting i gat laip na indai?

¹¹ Ol lotu i holim nating nem Kristen ol i save skulim ol man olsem yumi gat wanpela tewel, na taim yumi dai dispela tewel i save lusim skin bilong yumi, na em i no save dai. Tasol ol Baibel ol i bin tanim long bipo long planti tok ples ol i tokaut klia olsem yumi ol man i no gat tewel​—⁠yumi gat laip, olsem ol animal i gat laip, na ol man na animal wantaim i save dai. (Stat 12:5; 36:6; Namba 31:28; Jems 5:​20) Ol pris pasto i tingting planti tru long dispela tok bilong Baibel.

12. Sampela Baibel ol i tanim long nau, olsem wanem ol i haitim ol tok i tru?

¹² Nau sampela nupela Baibel ol i haitim ol dispela tok i tru. Ol i mekim olsem wanem? Wanpela tok Hibru, neʹphesh, na wanpela tok Grik, psy·kheʹ, ol i no bin tanim long wankain pasin long olgeta taim. Long sampela ves ol i tanim stret olsem man, laip, animal, tasol long sampela ves ol i tanim olsem tewel. (Stat 2:7; Esekiel 18:4; 1 Korin 15:45; Wok Pris 24:18; 1 Tesalonaika 5:23) Ating man bilong tanim tok i ting i stret em i ken mekim olsem. Tasol dispela i no helpim ol man i gat gutpela bel na ol i laik painim tok i tru tasol ol bilip bilong ol lotu i holim nating nem Kristen i pas pinis long tingting bilong ol.b

¹³ Bilong helpim bilip bilong ol olsem olgeta gutpela man i save go long heven, ol man bilong tanim Baibel​—⁠o ol tisa bilong lotu i skelim ol tok ol dispela man i tanim​—⁠ol i laik haitim tok bilong Baibel long ol samting God i laik mekim long graun. Long Song 37:​11, sampela Baibel i tok, ol man i gat pasin daun bai God i givim “graun” long ol. Dispela tok “graun” ol i kisim long wanpela tok (ʼeʹrets), i stap long Baibel Hibru. Tasol Baibel Today’s English Version (em ol man i mekim wok long en bilong tanim Baibel i go long planti ol narapela tok ples) em i senisim tru dispela hap tok. Tru, em i tanim tok Grik ge olsem “graun” inap 17 taim long Gutnius bilong Matyu, tasol long Matyu 5:5 em i senisim dispela tok “graun” na raitim olsem “samting God i tok promis pinis long en.” Taim ol man bilong lotu i kaunim dispela tok, ol i save tingim heven. Em nau, ol man bilong tanim dispela tok ol i haitim wanpela tok long ol man em Jisas i bin mekim long maunten, em i tok ol man i gat pasin daun, “bai God i givim olgeta graun long ol.”

¹⁴ Na sampela man bilong tanim Baibel, em yumi ken ting ol i laik helpim ol man bilong autim tok bilong lotu na bai ol inap kisim bikpela pe. Tru, Baibel i tok: “Wokman em inap long kisim pe bilong en.” (1 Timoti 5:​18) Tasol long 1 Timoti 5:​17, em i tok olsem ol “i mas givim biknem” long ol elda i mekim gutpela wok, ating sampela man bilong tanim Baibel ol i tingim wanpela kain biknem tasol i gutpela​—⁠em samting bilong mani. (Skelim wantaim 1 Pita 5:⁠2.) Olsem na wanpela Baibel (The New English Bible) i tok, ol ‘inap tru long yupela i mas dabolim mani ol i kisim long wok bilong ol,’ na narapela Baibel (Contemporary English Version) i tok, ol ‘inap tru long yupela i mas dabolim pe bilong ol.’

Stap Gut Long Helpim Tok Bilong God

15. Olsem wanem yumi inap skelim wanem Baibel bai yumi mekim wok long en?

¹⁵ Orait, ol man i kaunim Baibel na ol man i save skulim man long tok bilong Baibel ol i ken mekim wanem? Long planti bikpela tok ples, i gat ol narapela narapela Baibel ol i bin tanim, na ol man inap kisim wanem wanem kain ol i laikim. Taim yu laik tingim wanem Baibel bai yu mekim wok long en, yu mas bihainim gutpela tingting. (Sindaun 19:⁠8) Sapos wanpela Baibel ol i bin tanim em i no tok stret olsem God em i husat​—⁠olsem ol i rausim nem bilong em long Baibel na ol i giaman na mekim olsem i gat as bilong rausim​—⁠orait nogut ol dispela man bilong tanim tok ol i paulim sampela tok moa bilong Baibel, a? Sapos yu gat tupela tingting long hap tok bilong wanpela Baibel, i stret o nogat, orait skelim wantaim wanpela Baibel ol i bin tanim inap planti yia bipo. Sapos yu wanpela man bilong skulim ol man long Baibel, orait mekim wok long ol Baibel ol i bihainim stret tok Hibru na tok Grik bilong pastaim.

16. Taim yumi mekim wok long Tok Bilong God, olsem wanem yumi wan wan inap kamapim klia olsem yumi stap gut long en?

¹⁶ Yumi olgeta wan wan i mas i stap gut long Tok Bilong God. Bilong mekim olsem, yumi mas tingim tru ol tok i stap long en​—⁠olsem yumi mas lusim hap taim long olgeta de long kaunim Baibel sapos yumi gat rot long mekim. (Song 1:​1-3) Na tu, bilong i stap gut long Tok Bilong God, yumi yet i mas bihainim gut olgeta tok bilong en, na yumi lain long mekim wok long ol lo bilong Baibel na stori bilong ol man i stap olsem gutpela piksa, na dispela bai helpim yumi long skelim gut ol samting yumi mas mekim. (Rom 12:2; Hibru 5:​14) Na yumi soim olsem yumi stap gut long helpim Tok Bilong God taim yumi wok strong long autim tok bilong en long ol narapela man. Na taim yumi mekim wok tisa tu, bai yumi was gut long wok yumi mekim long Baibel, nogut yumi paulim o senisim sampela tok bilong en bilong helpim ol tingting bilong yumi yet. (2 Timoti 2:​15) Ol samting God i bin tok profet long en, olgeta bai kamap tru. Em i save stap gut long truim Tok bilong em. Orait yumi tu i mas stap gut long helpim Tok bilong em.

[Ol Futnot]

Yu Tingim Yet?

◻ Wanem ol tingting i bin stiaim wok bilong ol man bilong tanim Baibel long nau?

◻ Olsem wanem na pasin bilong tanim Baibel long nau i no bin paulim laik bilong God long nem bilong em yet?

◻ Sampela Baibel ol i bin tanim, ol i mekim wanem na ol i haitim ol tok bilong Baibel long man i gat laip, na indai, na dispela graun?

◻ Olsem wanem yumi inap kamapim klia olsem yumi stap gut long helpim Tok Bilong God?

8. Olsem wanem na ol man i no bin paulim laik bilong God long kamapim nem bilong em long ol man?

13. Sampela Baibel ol i bin tanim, ol i mekim wanem na ol i haitim laik bilong God long dispela graun?

14. Wanem tingting i kamap klia long sampela Baibel ol i bin tanim?

[Piksa long pes 16]

Yu mas mekim wok long wanem Baibel?