Amamas Tru—Olsem Wanem Yumi Inap Kisim?
EM LAIK bilong God long ol manmeri i ken i stap amamas. Olsem wanem yumi inap save olsem? Orait, tingim i stap bilong ol man long pastaim tru.
God Jehova i wokim namba wan man na meri na em inapim ol long i stap amamas. Em i putim Adam na Iv long wanpela paradais, long wanpela gaden bilong amamas ol i kolim Iden. Man bilong wokim ol samting em i givim olgeta samting long tupela inap tru long ol i ken i stap laip. Long dispela gaden i gat “ol kain kain diwai, pikinini bilong ol i gutpela long kaikai. Olgeta dispela diwai i naispela tru.” (Stat 2:9) Skin bilong Adam tupela Iv i strong na i naispela na ol i no gat sik—ol i nambawan olgeta na ol i stap amamas tru.
Tasol wanem samting i mekim na ol i stap amamas? Yu ting ol i amamas, long wanem, ol i sindaun long wanpela naispela ples paradais o skin bilong ol i nambawan olgeta? Tru, ol dispela presen i kam long God ol i bin helpim tupela long i stap amamas. Tasol ol dispela samting i no mekim tru na ol i stap amamas olsem, nogat. Tru gaden Iden em wanpela naispela gaden, tasol i no dispela tasol. Em wanpela ples holi, olsem wanpela ples bilong lotuim God. Bilong ol i ken i stap amamas oltaim, ol i mas laikim tru Man bilong wokim ol samting na pas gut wantaim em. Bilong stap amamas, pastaim ol i mas tingim ol samting bilong spirit.—Skelim wantaim Matyu 5:3.
Pasin Bilong Tingim Ol Samting Bilong Spirit i Kamapim Amamas
Pastaim Adam i pas gut wantaim God. Em i laikim tru God olsem wanpela pikinini i laikim tru papa bilong em. (Luk 3:38) Long gaden Iden i no gat wanpela samting i pasim tupela long inapim laik bilong ol long lotuim God. Ol i laikim tru Jehova na ol i redi long bihainim tok bilong em, na long dispela rot bai ol i givim biknem long God—ol animal i no inap mekim olsem. Tupela inap tingim ol gutpela pasin bilong God na litimapim nem bilong em, na helpim wok king bilong em. Na tu, ol inap kisim yet ol gutpela pasin sori Jehova i mekim long ol.
Ol i pas gut wantaim Man bilong wokim ol samting, na ol i bihainim ol lo bilong em, na dispela i mekim na papamama bilong yumi bilong pastaim ol i stap amamas tru. (Luk 11:28) I no olsem Adam tupela Iv i mas traim traim na popaia nabaut inap planti yia na bai ol inap save long rot bilong kisim amamas, nogat. Kirap long taim God i wokim tupela, ol i stap amamas. Ol i stap wanbel wantaim God na ol i aninit long wok bos bilong em na dispela i mekim ol i amamas.
Tasol dispela amamas i pinis taim ol i sakim tok bilong God. Adam tupela Iv i bikhet long Jehova na dispela i mekim na tupela i no pas moa wantaim em. Ol i no stap pren moa bilong God. (Stat 3:17-19) Yumi ken ting olsem, kirap long taim God i rausim tupela long gaden, Jehova i no toktok gen wantaim ol. Ol i lusim nambawan laip tru bilong ol, na rot bilong i stap oltaim oltaim, na gutpela ples gaden ol i sindaun long en. (Stat 3:23) Tasol bikpela samting moa, ol i no pas gut moa wantaim God, olsem na ol i no stap amamas moa.
Yumi Inap Tingim Wanem Rot Yumi Laik Bihainim
Taim Adam na Iv i no dai yet, ol i givim long ol pikinini bilong ol, ol pasin bilong ol olsem man bilong graun, na maus bilong bel em God i bin putim long skin bilong ol, na pasin bilong tingim ol samting bilong spirit. Olsem na ol man i no kamap wankain olsem ol animal. Yumi ol man inap kamap wanbel gen wantaim Man bilong wokim ol samting—ol animal i no inap. (2 Korin 5:18) Ol man i gat tingting, olsem na ol inap skelim yet ol bai bihainim tok bilong God o nogat. Planti handet yia bihain, dispela samting i kamap ples klia long taim lain Israel i kamap nupela na Jehova i tokim ol long makim wanem rot ol i laik bihainim—laip o i dai. Long rot bilong mausman bilong em, Moses, God i tok: “Mi soim yupela tupela rot. Sapos yupela i bihainim wanpela rot, yupela bai i kisim gutpela laip tru, na bai yupela i stap gut oltaim. Na sapos yupela i bihainim narapela rot, bai yupela i kisim taim nogut na bagarap, na bai yupela i dai.”—Lo 30:15-18.
Tasol long nau tu, em planti tausen yia bihain long Paradais bilong pastaim i lus, yumi ol man inap skelim yet wanem rot i stret tru long bihainim. Maus bilong bel bilong yumi i save mekim wok bilong en, na yumi inap long bihainim ol lo bilong God. Baibel i stori long “bel” na “tingting” bilong man. (2 Korin 4:16; Rom 7:22) Dispela tupela hap tok i makim ol pasin i stap pinis insait long skin bilong yumi taim mama i karim yumi, olsem na yumi olgeta inap bihainim sampela pasin bilong God, na kisim wankain tingting olsem em, na tingim ol samting bilong spirit.
Aposel Pol i stori long maus bilong bel na long pasin bilong yumi bilong bihainim lo, na em i tok: “Ol arapela lain ol i no gat lo, tasol long tingting bilong ol yet sampela bilong ol i save bihainim pasin bilong lo. Ol i no gat lo, tasol sapos ol i bihainim pasin bilong lo, orait tingting bilong ol yet i stap olsem lo bilong ol. Long dispela pasin bilong ol, tok bilong lo God i bin raitim long bel bilong ol em i kamap ples klia. Na tingting i stap insait tru long bel bilong ol, dispela tu i soim olsem lo i stap long bel bilong ol. Olsem na long de God i makim bilong skelim olgeta pasin hait na tok hait bilong olgeta man, tingting bilong ol dispela man bai i kotim ol long pasin ol i bin mekim. Na sampela taim ating em bai i orait long pasin ol i bin mekim.”—Rom 2:14, 15.
Gutpela Save na Tingting i Kam Long God na Pasin Bilong Bihainim Tok—Em Rot Bilong Kisim Amamas
Tasol ating yu laik save, ‘Sapos skin bilong yumi i pulim yumi long lotuim God na kisim amamas tru long dispela, bilong wanem planti man i no amamas?’ I olsem: Bilong yumi ken i stap amamas, yumi olgeta wan wan i mas wok long kisim pasin bilong tingim ol samting bilong spirit. Pastaim God i wokim man i olsem em yet, tasol nau ol man i stap longwe long Man bilong wokim ol. (Efesus 4:17, 18) Olsem na yumi olgeta wan wan i mas mekim sampela samting na bai yumi inap pas gen wantaim God. Dispela samting i no inap kamap nating—yumi mas mekim sampela wok.
Jisas i kolim tupela bikpela samting bilong helpim yumi long kisim pasin bilong tingim ol samting bilong spirit. Wanpela, em yumi mas kisim stretpela save long God, na narapela, em yumi mas daun na bihainim laik bilong em. (Jon 17:3) Jisas i kamapim tok i stap long Tok Bilong God, na em i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ” (Matyu 4:4) Narapela taim, Jisas i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Taim yumi wok long painim amamas, i no olsem yumi mas traim traim na popaia nabaut inap planti yia, nogat. Ol samting i painim yumi na yumi pilim pinis, i no rot bilong kisim amamas. Gutpela save na tingting i kam long God na pasin bilong bihainim tok bilong Man bilong wokim yumi, em tasol inap kamapim amamas tru.—Song 19:7, 8; Saveman 12:13.
Tru tumas, sapos yumi bihainim gutpela save na tingting i kam long God na yumi stap gut long ai bilong em, bai yumi stap amamas. (Aposel 17:26, 27) Rot i op long olgeta manmeri i ken kisim save bilong Jehova na long laik bilong em. I gat planti bilion Baibel long planti tok ples, olsem na Baibel em buk ol i bin tilim long planti hap, winim olgeta narapela buk. Tok bilong Baibel inap helpim yu long kamap pren bilong God na kisim amamas tru, long wanem, Baibel i tok olsem “ol manmeri i putim Bikpela i stap God bilong ol, ol . . . i ken amamas.”—Song 144:15.
[Blok long pes 6]
Ol Samting Yu Ken Mekim Bilong Kisim Amamas
1. Pilim tru na wok long kisim pasin bilong tingim ol samting bilong spirit. Jisas i tok: “Ol man i harim tok bilong God na i bihainim, em ol i ken amamas.”—Luk 11:28.
2. Yu mas save olsem, sapos God i orait long yu, dispela i winim ol mani kago samting. Pol i tok: “Tru, sapos yumi bihainim pasin bilong God yumi kisim planti gutpela samting, em sapos yumi amamas long ol samting God i save givim yumi. . . . Sapos yumi gat kaikai na laplap samting, orait yumi ken tok, ‘Em inap long mi.’ ”—1 Timoti 6:6-8.
3. Wok strong long lainim maus bilong bel long ol tok bilong Baibel, na bihainim.—Rom 2:14, 15.
4. Pasim tok long bel olsem yu mas bihainim tok bilong God Jehova, na long dispela rot bai yu inapim mak bilong kam insait long lain bilong em. Devit bilong bipo em i tok: “Ol manmeri i putim Bikpela i stap God bilong ol, ol . . . i ken amamas.”—Song 144:15.
[Piksa long pes 7]
“Ol manmeri i save, ol i stap rabis tru long ol samting bilong God, em ol i ken amamas.”—Matyu 5:3