Lukaut Long Lain “Epikurian”
“Em i gutpela man tru! Em i save bihainim ol stretpela lo. Em i no save smok, o kisim drak, o mekim ol tok nogut. Pasin bilong em i gutpela tru, winim pasin bilong sampela man i tok ol i Kristen!”
OLSEM WANEM? Yu harim pinis sampela i kamapim kain tingting olsem bilong kamapim olsem i gat as na ol i poromanim sampela pren i no stret ol i poromanim ol? Dispela tingting i stret taim yu skelim wantaim tok bilong Baibel? Samting i painim wanpela kongrigesen Kristen long taim bilong ol aposel inap givim save long yumi long dispela samting.
Long taim bilong ol aposel, aposel Pol i givim tok lukaut long kongrigesen Korin olsem: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ” Ating sampela Kristen i poromanim sampela man em tingting bilong ol saveman Grik i bin pulim ol, olsem tingting bilong lain Epikurian. Ol Epikurian ol i husat? Bilong wanem tingting bilong ol inap bagarapim ol Kristen long Korin long ol samting bilong spirit? I gat sampela man long nau ol i olsem lain Epikurian, na yumi mas lukaut long ol?—1 Korin 15:33.
Ol Epikurian Ol i Husat?
Ol Epikurian em ol man i bihainim saveman Grik, em Epikurus, em i bin stap long yia 341 i go inap long yia 270 B.C.E. Em i bin skulim ol man olsem amamas em i nambawan gutpela samting long i stap bilong man. Orait yu ting dispela i makim olsem ol Epikurian i mekim ol pasin nogut tru na ol i no bihainim moa ol lo, na ol i mekim ol pasin sem bilong painim ol amamas? Nogat! Epikurus i no skulim lain bilong em long mekim kain pasin olsem! Em i skulim ol olsem sapos ol i bihainim savepasin, na ol i strongim bel, na bosim gut skin bilong ol, na mekim stretpela pasin, dispela em nambawan gutpela rot bilong kisim amamas. Em i kirapim ol man long painim kain amamas i save stap inap long taim ol i dai, ol i no ken painim kain amamas i bilong liklik taim tasol. Olsem na sapos man i skelim pasin bilong ol Epikurian wantaim ol man i mekim ol bikpela rong, ating i olsem ol i stretpela man.—Skelim wantaim Taitus 1:12.
Ol i Wankain Olsem Ol Kristen?
Sapos yu insait long kongrigesen Korin bilong bipo, yu ting ol pasin na tingting bilong ol Epikurian inap pulim yu? Ating sampela Kristen i bin ting ol Epikurian i bihainim ol stretpela pasin, olsem na sapos ol i poromanim ol, dispela i no inap bagarapim ol. Na ating sampela Kristen long Korin i bin ting ol lo bilong ol Epikurian i wankain olsem ol lo i stap long Tok Bilong God.
Olsem: Ol Epikurian i kisim ol amamas long skel tasol. Ol i ting amamas long samting bilong tingting i winim amamas bilong skin. Gutpela pasin pren wantaim man ol i kaikai wantaim em i bikpela samting, winim kaikai yet. Na ol Epikurian i no insait long wok politik na ol i no ken mekim ol rong long pasin hait. Olsem na ating i no hatwok long ting olsem: “Ol i wankain olsem yumi!”
Tasol olsem wanem? I tru ol Epikurian i wankain olsem ol Kristen bilong bipo? Nogat tru! Ol man i skulim gut tingting na bel bilong ol, ol i save olsem ol i narapela kain tru. (Hibru 5:14) Olsem wanem long yu? Yu inap lukim olsem ol i narapela kain? Orait nau yumi ken skelim gut sampela bilip bilong Epikurus.
Sampela Bilip Nogut Bilong Ol Epikurian
Bilong helpim ol man na ol i no ken pret long ol god na long indai, Epikurus i bin skulim ol man olsem ol god i no save tingim ol man na ol i no save pasim wok bilong ol. Epikurus i tok, ol god i no bin wokim olgeta samting—ol samting i kamap nating. Tasol dispela bilip i pait wantaim tok bilong Baibel i tok, i gat “wanpela God tasol,” em Man bilong wokim olgeta samting, na em i save tingim ol manmeri em i bin wokim.—1 Korin 8:6; Efesus 4:6; 1 Pita 5:6, 7.
Epikurus i skulim tu ol man olsem ol i no inap kisim laip bihain long i dai bilong ol. Tasol dispela bilip i pait wantaim tok bilong Baibel long ol man i dai pinis bai kirap bek. Ating taim aposel Pol i mekim tok long maunten Areopagus, ol Epikurian i stap namel long ol man i tok pait long Pol long bilip bilong kirap bek.—Aposel 17:18, 31, 32; 1 Korin 15:12-14.
Tasol ating wanpela bilip bilong Epikurus inap nogutim moa yet ol man, i olsem wanpela samting i stap hait tru bilong nogutim ol. Em i no bilip olsem ol man inap kisim laip bihain long i dai bilong ol, olsem na em i ting man i mas kisim olgeta amamas em inap kisim insait long liklik hap taim em i stap laip long graun. Olsem yumi kisim save pinis, em i no gat tingting olsem man i ken mekim ol rong, nogat, tasol em i ting man i mas wok long kisim ol amamas long nau, long wanem, i stap bilong em i bilong nau tasol.
Olsem na Epikurus i skulim ol man long ol i no ken mekim ol rong long pasin hait bambai ol i no ken pret long ol man bai kisim save long rong bilong ol, long wanem, dispela bai mekim na ol i no ken amamas long nau. Em i skulim ol man olsem ol i mas kisim ol samting long skel tasol bambai ol i no ken kisim nogut long pasin bilong abrusim skel bilong ol—em narapela samting inap pasim rot bilong ol long i stap amamas long nau. Em i skulim tu ol man long pren gut wantaim narapela, long wanem, ol inap kisim ol gutpela samting long dispela. Tru ol pasin olsem ol i no ken mekim rong long pasin hait, na no ken abrusim skel, na wok long pas gut wantaim narapela, ol dispela pasin i gutpela samting. Orait, i gat wanem as na tingting bilong Epikurus inap bagarapim ol Kristen? Long wanem, tok em i givim long ol, as bilong en em tingting bilong em i no gat bilip long en, olsem: “Yumi kaikai na dring, long wanem, tumora bai yumi dai.”—1 Korin 15:32.
Tru, Baibel i soim ol man long rot bilong i stap amamas long nau. Tasol Baibel i tok: “God i save laikim yupela tru, na yupela i mas i stap klostu long em na larim em i laikim yupela oltaim. Na oltaim yupela i mas wetim Bikpela bilong yumi Jisas Krais, bai em i kamapim sori bilong en long ples klia, na yupela bai i kisim tru laip bilong i stap gut oltaim oltaim.” (Jut 21) Yes, ol tok bilong Baibel i kamapim klia olsem bikpela samting tru em ol samting bilong i stap gut oltaim oltaim, i no ol samting bilong nau em bilong liklik taim tasol. Mekim wok bilong God em i nambawan bikpela samting long Kristen, na em i pilim olsem taim em i putim wok bilong God i go pas, em i amamas tru. Jisas tu, em i no tingim laik bilong em yet, nogat. Long strong bilong em olgeta em i mekim wok bilong Jehova na helpim ol man. Em i skulim ol disaipel bilong em long mekim gutpela pasin long ol narapela, long wanem, ol i laikim tru ol. Ol i no ken mekim gutpela pasin long ol narapela bambai ol inap kisim gutpela samting long en. Tru tumas, samting i kirapim ol man i bihainim ol bilip bilong Epikurus i narapela kain long tingting i kirapim ol man i bihainim lotu Kristen.—Mak 12:28-31; Luk 6:32-36; Galesia 5:14; Filipai 2:2-4.
Long Pasin Hait Em Inap Bagarapim Ol
Ol Epikurian i tingting strong long kisim amamas, tasol ol i no kisim amamas tru. Epikurus i no kisim “amamas long Bikpela,” olsem na em i tok laip i olsem wanpela “presen nogut.” (Nehemia 8:10) Tasol ol Kristen bilong bipo ol i amamas tru! Jisas i no bin tokim ol long lusim ol samting ol i mas kisim, na ol i no ken amamas, nogat. Taim yumi bihainim rot bilong em bai yumi kisim bikpela amamas tru.—Matyu 5:3-12.
Sapos sampela insait long kongrigesen Korin i ting ol inap poromanim ol man i bihainim tingting bilong ol Epikurian na dispela i no inap nogutim bilip bilong ol, ol i popaia long dispela. Long taim Pol i raitim namba wan pas bilong em i go long ol Korin, sampela bilong ol i lusim pinis bilip long ol man i dai pinis bai kirap bek.—1 Korin 15:12-19.
Ol Epikurian Long Nau?
Tru bilip bilong ol Epikurian i pinis long yia 300 C.E. samting, tasol long nau tu i gat sampela man ol i bihainim dispela tingting olsem yumi bilong i stap nau tasol. Ol dispela man i gat liklik bilip tasol long ol tok promis bilong God long laip oltaim, o ol i no bilip olgeta. Tasol sampela bilong ol i bihainim ol stretpela pasin.
Ating wanpela Kristen i laik pren gut wantaim kain man olsem, na em inap ting i stret em i mekim, long wanem, ol dispela man i save bihainim ol gutpela pasin. Tru, yumi no ken ting pasin bilong yumi i winim pasin bilong ol narapela man, tasol yumi mas ting olsem olgeta ‘poroman nogut’—na ol poroman i pulim yumi long pasin hait tu—“inap bagarapim gutpela pasin bilong yumi.”
Na tu, dispela tingting olsem yumi bilong i stap nau tasol i wok long kamap long ol skul bilong bisnis, ol buk, ol piksa wokabaut, ol program bilong televisen, na musik. Ol dispela samting i no kirapim ol man long mekim rong, nogat. Tasol olsem wanem? Long pasin hait ol dispela tingting bilong ol man i no gat bilip inap pulim yumi? Olsem: Yumi inap kirap long tingim tasol ol samting yumi yet i laik mekim na yumi lusim tingting long dispela bikpela tok i bin kamap long wok king bilong Jehova? Ol samting inap pulim tingting bilong yumi na yumi ‘no wok strong moa,’ na yumi no ting olsem ‘oltaim yumi mas wok strong long mekim wok bilong Bikpela.’ Nogut yumi larim ol narapela i giamanim yumi na yumi kisim tupela tingting long ol lo bilong Jehova, ol inap helpim yumi na ol i stret o nogat. Yumi mas abrusim ol pasin pamuk, na pasin pait, na wok bilong ol spirit nogut, tasol yumi mas lukaut tu long ol man em tingting bilong dispela graun i bin pulim ol!—1 Korin 15:58; Kolosi 2:8.
Olsem na gutpela yumi pren wantaim ol man i givim bel olgeta long bihainim rot Jehova i save soim long yumi, na yumi no pren tumas wantaim ol narapela man. (Aisaia 48:17) Sapos yumi mekim olsem, dispela bai strongim ol gutpela pasin bilong yumi. Na bilip bilong yumi bai kamap strong. Bai yumi stap amamas long nau na long bihain tu—em yumi inap tingting long kisim laip oltaim.—Song 26:4, 5; Sindaun 13:20.
[Piksa long pes 24]
Kisim long: The British Museum
[Kredit Lain]
Epikurus i skulim ol man olsem ol god i no save tingim ol man