Onesiforus—Strongpela Man Bilong Strongim Ol Narapela
“TINGIM ol manmeri bilong God i stap long kalabus, olsem yupela yet i kalabus wantaim ol. Na yupela i mas tingting long ol man ol birua i mekim nogut long ol.” (Hibru 13:3) Taim aposel Pol i raitim dispela tok long yia 61 C.E. samting, em yet i bin kalabus bipo inap sampela taim, na em bai kalabus gen na bihain ol bai kilim em i dai olsem wanpela Kristen. (Aposel 16:23, 24; 22:24; 23:35; 24:27; 2 Korin 6:5; 2 Timoti 2:9; Filemon 1) I mas i gat man bilong strongim em hariap, olsem ol i save mekim long nau—ol kongrigesen i save hariap long helpim ol wanbilip em hevi i painim ol bilong traim bilip bilong ol.
Wanpela disaipel bilong bipo i bin mekim olsem bilong helpim ol narapela i gat hevi, em Onesiforus. Em i bin go lukim Pol long taim Pol i kalabus long Rom long namba 2 taim. Pol i raitim pas na stori long Onesiforus olsem: “Mi prea long Bikpela i ken sori long Onesiforus wantaim ol famili bilong en. Planti taim Onesiforus i bin mekim gut bel bilong mi. Na em i no sem long mi stap long kalabus. Nogat. Em i kam long Rom na em i wok strong tru long painim mi, na bihain em i lukim mi.” (2 Timoti 1:16, 17) Yu bin sindaun na skelim dispela liklik tok na tingim gut? Taim yu mekim olsem bai yu pilim tru gutpela pasin bilong Onesiforus. Bai yu lukim olsem em i strongpela man bilong strongim bel bilong ol narapela.
Paul i Kalabus Namba 2 Taim
Taim Pol i kalabus long namba wan taim na ol i lusim em, bihain em i kalabus gen long haus kalabus bilong Rom, tasol nau sindaun bilong em long haus kalabus i narapela kain. Long taim em i kalabus bipo, em i stap long wanpela haus em i save baim na ol poroman bilong em inap i go lukim em, na em i ting olsem klostu nau bai em i lusim kalabus. Tasol nau planti ol i lusim em, na em i save ol bai kilim em i dai olsem wanpela Kristen.—Aposel 28:30; 2 Timoti 4:6-8, 16; Filemon 22.
Dispela namba 2 taim Pol i stap long kalabus, em long yia 65 C.E. samting. Olsem wanpela yia samting paslain—long Julai 64 C.E.—paia i kukim Rom na i bagarapim 10-pela bilong 14 ples insait long Rom. Wanpela saveman bilong Rom, em Tasitus, em i tok, King Niro i no inap long “haitim tok win olsem asua bilong em yet na taun i paia. Olsem na bilong pinisim dispela tok, em i haitim dispela asua na sutim tok long wanpela lain ol man i kolim ol olsem Kristen na em i bel nogut long ol, na em i givim strafe nogut tru long ol dispela lain. . . . Em i mekim kain kain pasin nogut tru long ol bilong kilim ol i dai. Em i bin pasim skin bilong ol animal long ol na ol dok i holim ol na bagarapim ol, o em i nilim ol long kruse, na long nait em i kukim ol long paia bilong kamapim lait.”
Long dispela taim nogut Pol i bin kalabus gen na i olsem wankain samting nogut bai painim em tu. Olsem na i gat as na em i amamas tru taim pren bilong em Onesiforus i kam lukim em! Orait, nau yumi ken stori long ol samting Onesiforus i bin mekim.
Em i Go Lukim Pol Long Kalabus
Famili bilong Onesiforus i bin sindaun long Efesus. (2 Timoti 1:18; 4:19) Ating Onesiforus i bin kam long biktaun bilong kantri long mekim wok bilong em yet o em i kam bilong lukim Pol, tasol Baibel i no stori long dispela samting. Maski i gat wanem as na em i kam, aposel Pol i tok: ‘Planti taim Onesiforus i bin mekim gut bel bilong mi taim em i kam long Rom.’ (2 Timoti 1:16, 17) Em i mekim gut bel bilong Pol olsem wanem? Ating Onesiforus i bin helpim em long ol samting bilong skin tu, tasol taim em i stap wantaim Pol, dispela i olsem marasin bilong strongim Pol na mekim gut bel bilong em. Sampela Baibel i tanim dispela tok olsem: “Em i save mekim bel bilong mi i amamas.”
Bilong inapim laik bilong ol long go lukim wanpela Kristen i kalabus long Rom long dispela taim, em i hatwok tru. Ol Kristen bilong Rom i save go lukim Pol long taim em i kalabus long namba wan taim, tasol taim em i kalabus gen, ol i no inap i go lukim em moa. Long kain biktaun olsem Rom, em i hatwok tru long painim wanpela kalabusman namel long bikpela lain tru em ol i kalabus long ol narapela narapela rong ol i bin mekim. Olsem na Onesiforus i mas wok strong bilong painim Pol. Saveman Giovanni Rostagno, em i stori long dispela samting olsem: “Ating kain kain hevi i bin painim em. Na planti taim em i mas was gut moa yet na bihainim savepasin taim em i wok long painim Pol. Sapos em i go i kam bilong save Pol i stap we, na em i tingting planti long painim haus kalabus em ol i tok dispela lapun kalabusman i bin mekim bikpela rong tru i stap long en, dispela inap kirapim ol man long ting em tu i bilong dispela lain.”
Saveman P. N. Harrison i stori gut long dispela samting na i tok: “Yumi lukim wanpela pes namel long bikpela lain man i wokabaut i go i kam, na yumi bihainim dispela man bilong narapela hap, em bilong nambis bilong Ijien, em i wokabaut long ol narapela narapela rot em i no save long en, na em i paitim dua bilong planti haus, na em i bihainim tok ol man i givim long em bilong painim Pol, na ol i toksave olsem bagarap inap painim em long ol samting em i mekim bilong painim Pol, tasol em i no lusim dispela wok; em i painim painim Pol i go inap long em i kamap long wanpela haus kalabus nating, na wanpela nek em i save long en i tok gude long em, na nau em i lukim Pol, ol i pasim em long sen wantaim wanpela soldia bilong Rom.” Sapos dispela haus kalabus i wankain olsem ol narapela haus kalabus bilong Rom, ating dispela ples i kol, na tudak, na i doti nogut tru, na ol i mekim nogut tru long ol man i stap kalabus long en.
Bagarap inap painim Onesiforus sapos ol i save olsem em i pren bilong wanpela man i kalabus, em Pol. Na i nogut moa yet long i go lukim em planti taim. Sapos em i go planti taim, ol inap save em i wanpela Kristen na ol bai kalabusim em na givim pen nogut tru long em na kilim em i dai. Tasol Onesiforus i no laik go lukim em wanpela o tupela taim tasol. Em i no sem o pret long go lukim em “planti taim.” Onesiforus i mekim ol samting i stret olsem nem bilong em i makim (olsem “Man Bilong Karim Gutpela Samting”), na em i strongim Pol na helpim em maski bagarap inap painim em.
Bilong wanem Onesiforus i mekim ol dispela samting? Brian Rapske i tok: “Haus kalabus em i ples ol kalabusman i save kisim bagarap long skin, na tu em i ples bilong tingting planti na bel hevi long bikpela pen ol i kisim. Long kain ples olsem, sapos yumi go lukim wanpela kalabusman na givim gutpela tok long em bilong strongim em, dispela bai mekim em i amamas tru.” Onesiforus i tingim dispela na em i strong tru long go lukim pren bilong em. Ating Pol i bin pilim tru dispela kain helpim!
Wanem Samting i Painim Onesiforus?
Long namba tu pas Pol i salim long Timoti, em i salim gude bilong em i go long ol wanhaus bilong Onesiforus na i tok long em olsem: “Mi prea long Bikpela i ken sori long em long De bilong bikpela kot bilong God.” (2 Timoti 1:18; 4:19) Dispela tok “long De bilong bikpela kot,” planti man i ting olsem em i de God i makim bilong skelim ol man, olsem na ol i tok Onesiforus i dai pinis. Sapos tru em i bin dai, ating “ol i bin holim Onesiforus na kilim em i dai . . . long laspela taim em i go lukim Pol long haus kalabus.” P. N. Harrison i tok olsem. O ating Onesiforus i no bin stap long ples long dispela taim, o Pol i bin salim gude bilong em long olgeta wantaim long haus na i no long Onesiforus tasol.
Sampela i bilip olsem dispela tok “Mi prea long Bikpela i ken sori long em long De bilong bikpela kot bilong God,” em i makim narapela samting tu. Ol i ting dispela tok i makim olsem i stret yumi ken beten bilong helpim ol man i dai pinis na tewel bilong ol i stap laip long narapela ples na ating ol i kisim pen long wanpela ples bilong ol spirit. Tasol kain tingting olsem i pait wantaim tok bilong Baibel, olsem ol man i dai pinis i no save long wanpela samting. (Saveman 9:5, 10) Na sapos tru Onesiforus i bin dai, orait ating Pol i kamapim tingting bilong em olsem em i laik bai God i sori long pren bilong em. R. F. Horton i tok: “Dispela kain tok, yumi laik mekim long olgeta man. Tasol bilong beten long ol man i dai pinis na mekim misa bilong helpim ol, [aposel Pol] i no gat tingting liklik long mekim kain samting olsem.”
Yumi Mas Stap Gut Long Ol Narapela na Strongim Ol
Tru Onesiforus i bin dai taim em i helpim Pol o nogat, em yumi no save. Tasol maski em inap kisim bagarap, em i no tingim laip bilong em yet—em i painim painim Pol na i go lukim em long haus kalabus. Na yumi save, Pol i bin pilim tru ol helpim na tok bilong strongim em, em i bin kisim long Onesiforus.
Taim ol hevi i painim ol wanbilip bilong yumi, na ol man i mekim nogut long ol, o kalabusim ol, yumi mas redi long mekim gut bel bilong ol na strongim ol. Yumi mas beten askim God long helpim ol, na long pasin sori yumi mas mekim olgeta samting yumi inap mekim bilong helpim ol. (Jon 13:35; 1 Tesalonaika 5:25) Olsem Onesiforus, yumi mas stap olsem strongpela man bilong strongim ol narapela.
[Piksa long pes 31]
Onesiforus i strongim bel na em i mekim gut bel bilong aposel Pol taim em i stap kalabus