Wok Yet Long Wokabaut Wantaim God
“Yupela i mas larim Holi Spirit i stiaim wokabaut bilong yupela. Sapos yupela i mekim olsem, orait yupela bai i no inap bihainim laik bilong olpela bel.”—GALESIA 5:16.
1. (a) Enok i wokabaut wantaim God namel long wanem kain pasin? Em i wokabaut wantaim God i go inap long wanem taim? (b) Noa i wokabaut wantaim God i go inap long wanem taim? Em i gat wanem ol bikpela wok tru?
BAIBEL i tokim yumi olsem Enok “i stap pren tru bilong God.” Maski ol manmeri i stap nabaut klostu long em ol i mekim ol tok nogut tru na ol pasin i no stret long ai bilong God, Enok i strong long wokabaut wantaim God i go inap long em i dai, taim em i gat 365 krismas. (Stat 5:23, 24; Jut 14, 15) Noa tu i wokabaut wantaim trupela God. Em i bin mekim olsem taim em i wok long mekim bikpela long ol pikinini bilong em, na taim em i wok long karim hevi bilong ol pasin nogut bilong ol manmeri bilong graun, em ol i bihainim pasin bilong ol bikhetlain ensel wantaim ol pikinini bilong ol, em ol i man bilong pait na bagarapim man; na Noa i wokabaut wantaim God taim em i wokim wanpela traipela sip i winim olgeta sip bilong bipo i save raun long solwara. Na em i wok yet long wokabaut wantaim God bihain long Bikpela Tait, na taim pasin bilong bikhet long Jehova i kamap gen long Babel. Yes, Noa i wokabaut wantaim God i go inap long em i dai, taim em i gat 950 krismas.—Stat 6:9, 10; 9:29.
2. Wanem insait bilong dispela tok ‘wokabaut wantaim God’?
2 Dispela tok olsem ol dispela bilipman i bin wokabaut wantaim God, em i makim olsem Enok na Noa i bihainim pasin i kamapim long ples klia olsem ol i bilip strong long God. Ol i mekim ol samting Jehova i tokim ol long mekim, na ol samting ol i mekim long i stap bilong ol i stret wantaim ol save ol i kisim long em taim ol i skelim ol pasin em i bin mekim long ol man. (Skelim wantaim 2 Stori 7:17.) Ol i no tok tasol olsem ol i wanbel long ol tok bilong God na ol samting em i bin mekim, nogat. Ol i mekim olgeta samting God i laik bai ol i mas mekim. Ol i no mekim sampela samting tasol—ol i mekim olgeta samting ol inap tru long mekim olsem man bilong graun tasol. Olsem na Noa i mekim olgeta samting i stret tru olsem God i bin tokim em long mekim. (Stat 6:22) Noa i no go pas long God na mekim sampela samting moa em God i no bin tokim em long mekim, na em i no les na isi isi tasol long mekim wok bilong em. Em i stap pren bilong Jehova, na em i save em inap beten long God na i no gat wanpela samting i pasim em, na em i amamas long larim God i soim rot long em, na dispela i kamapim klia olsem em i wokabaut wantaim God. Olsem wanem long yu? Yu mekim olsem?
Em Rot Yumi Mas Bihainim Oltaim
3. Wanem bikpela samting tru olgeta wokboi bilong God i dediket na baptais pinis ol i mas mekim?
3 Bel bilong yumi i amamas tru taim yumi lukim ol man i kirap long wokabaut wantaim God. Taim ol i kirap mekim ol samting i stret wantaim laik bilong Jehova, ol i kamapim klia olsem ol i bilip—sapos man i no bilip, God i no ken amamas long em. (Hibru 11:6) Yumi amamas tru, long wanem, long olgeta yia insait long 5-pela yia i go pinis, inap olsem 320,000 manmeri ol i bin dediketim laip bilong ol long Jehova na ol i kisim baptais long wara! Tasol i bikpela samting tu long ol, na long yumi olgeta, i mas wok yet long wokabaut wantaim God.—Matyu 24:13; KTH 2:10.
4. Tru, ol Israel i soim olsem ol i bilip liklik, tasol bilong wanem planti Israel i bin lusim Isip ol i no go insait long Graun Bilong Promis?
4 Long taim bilong Moses, ol famili Israel i mas i gat strongpela bilip bambai ol inap mekim Pasova long Isip na penim blut bilong sipsip long tupela pos bilong dua long haus bilong ol na long hap plang antap long dua. (Kisim Bek 12:1-28) Tasol planti bilong ol, taim ol i lukim ami bilong king bilong Isip i kamap klostu long ol long solwara Retsi, bilip bilong ol i no strong moa. (Kisim Bek 14:9-12) Song 106:12 i tok taim ol i brukim solwara Retsi olsem man i wokabaut long graun i drai, na ol i lukim bikpela wara i karamapim ami bilong Isip na bagarapim ol, ol i bilip gen long tok bilong Jehova. Tasol bihain liklik, taim ol i wokabaut long ples drai nating, ol Israel i kirap toktok planti long wara bilong dring, na kaikai, na long man i go pas long lukautim ol. Taim 12-pela man bilong lukstil long Graun Bilong Promis ol i kam bek, 10-pela bilong ol i mekim sampela tok long dispela ples na nau ol Israel i pret. Olsem Song 106:24 i tok, “ol i no bilipim promis bilong God.” Ol i laik go bek long Isip. (Namba 14:1-4) Bihain, taim ol i lukim sampela ol narapela kain samting tru i kamapim strong bilong God, long dispela taim tasol liklik hap bilip ol i holim i kamap ples klia. Ol i no wokabaut wantaim God long olgeta taim. Olsem na ol dispela Israel i no go insait long Graun Bilong Promis.—Song 95:10, 11.
5 Baibel i tok strong long yumi olsem: “Oltaim yupela i mas skelim pasin na tingting bilong yupela yet na painimaut, bilip bilong yupela i stap strong, o nogat.” (2 Korin 13:5) Bilong ‘i stap strong long bilip,’ yumi mas bihainim ol bilip Kristen. Dispela em i bikpela samting sapos yumi laik wokabaut wantaim God long olgeta de yumi stap laip. Na bilong wokabaut wantaim God, yumi mas bilip strong long Jehova. (Sindaun 3:5, 6) I gat planti samting i olsem umben na hul bilong kisim abus em inap holimpas ol man i no bilip strong long Jehova. Wanem sampela samting inap mekim olsem?
No Ken Bilip Tumas Long Strong Bilong Yu
6. Olgeta Kristen i gat wanem save long pasin pamuk na bagarapim marit? Ol i ting olsem wanem long ol dispela rong?
6 Olgeta manmeri i bin stadi long Baibel na dediketim laip bilong ol long Jehova na kisim baptais, ol i save Baibel i tambuim pasin pamuk na bagarapim marit. (1 Tesalonaika 4:1-3; Hibru 13:4) Ol i wanbel long tok dispela i stret. Ol i laik bihainim pasin i stret wantaim dispela tok bilong Baibel. Tasol pasin pamuk em i stap yet olsem nambawan samting bilong Satan long holimpas man. Bilong wanem i olsem?
7. Long hap bilong Moap, olsem wanem ol man bilong Israel i go insait long pasin ol i save i gat rong long en?
7 Ol manmeri i mekim pasin pamuk, ating pastaim ol i no bin tingting long mekim olsem. Na ating em i wankain tu long ol Israel taim ol i stap long hap bilong Moap na ol meri bilong Moap na Midian i pulim planti man Israel. Ol dispela man Israel em ol i les pinis long i stap bilong ol long ples drai nating, ating pastaim ol i ting ol dispela meri bilong Moap na Midian i gat gutpela pasin pren na i laik mekim gutpela pasin long ol na singautim ol i kam kaikai. Tasol wanem samting i kamap taim ol Israel i orait long go bung wantaim ol lain i save lotuim Bal na ol i no lotuim Jehova, na ol i save larim ol yangpela pikinini meri bilong ol (em sampela i bilong ol famili i gat bikpela namba) i slip wantaim ol man ol i no bin marit long ol? Taim ol man long kem bilong Israel i kisim tingting olsem em bai gutpela tru long bung wantaim ol dispela lain, em nau, ol meri i pulim ol long mekim ol samting ol i save i gat rong long en, na ol i kisim bagarap long dispela.—Namba 22:1; 25:1-15; 31:16; KTH 2:14.
8. Long taim bilong yumi, wanem samting inap kirapim wanpela Kristen long mekim pasin pamuk?
8 Orait, long nau wanem samting inap mekim na man i pundaun olsem? Tru, ating em i save olsem pasin pamuk i no stret, tasol sapos em i no pilim tru olsem pasin bilong bilip long strong bilong em yet inap bagarapim em, ating em bai givim rot long wanpela traim i kamap bilong pulim em long mekim rong na nau em i no inap tingting gut.—Sindaun 7:6-9, 21, 22; 14:16.
9. Wanem sampela tok lukaut bilong Baibel inap helpim yumi long abrusim pasin pamuk?
9 Baibel i tokaut klia tru olsem yumi no ken larim bel i giamanim yumi na yumi ting yumi gat bikpela strong na ol poroman nogut i no inap bagarapim gutpela pasin bilong yumi. Na i wankain tu sapos yumi lukim ol piksa long televisen i stori long ol manmeri i save mekim pasin pamuk, na yumi lukim ol buk samting i gat ol piksa long en i kirapim ol laik long bel bilong yumi long mekim pasin pamuk samting. (1 Korin 10:11, 12; 15:33) Na sapos yumi bung wantaim sampela wanbilip long kain taim o pasin i no gutpela, orait dispela inap kirapim yumi long mekim rong. Taim wanpela man na meri i stap wantaim, strongpela laik inap kamap namel long tupela. Oganaisesen bilong Jehova i tingim yumi, olsem na ol i givim tok lukaut long yumi olsem nogut wanpela man na meri i stap wantaim long wanpela hap i no gat sampela man i lukim ol, na tupela i no marit, o tupela i no bilong wanpela famili tasol. Bilong wokabaut yet wantaim God, yumi mas abrusim pasin bilong bilip tumas long strong bilong yumi—yumi mas bihainim tok lukaut God i givim long yumi.—Song 85:8.
No Ken Pret Long Ol Man
10 Sindaun 29:25 i kamapim klia narapela samting yumi mas lukaut long en, em i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet.” Bilong holimpas wanpela abus, sampela man i save taitim umben, o ol i taitim rop na taim abus i putim het i go insait long en, rop bai pas long nek bilong en, o lek bilong en bai paul long sampela rop i stap hait na em i no inap ranawe. (Jop 18:8-11) Sapos yumi pret long ol man, dispela i olsem rop i pas long nek na yumi no inap autim gut tok na bihainim pasin God i laikim. Tru, yumi laik mekim ol samting ol narapela i laikim—em pasin bilong yumi man—na sapos yumi no tingim ol narapela man, dispela i no pasin Kristen. Tasol yumi mas bihainim stretpela tingting long dispela samting. Sapos man i tingting tumas long ol narapela man bai ting olsem wanem long em na dispela i kirapim em long mekim ol samting God i tambuim, o em i no mekim ol samting God i tokim em long mekim, i olsem umben o rop i holimpas pinis dispela man.
11. (a) Wanem samting bai helpim yumi na bai yumi no larim pasin bilong pret long man i bosim yumi? (b) Olsem wanem Jehova i bin helpim ol wokboi bilong em ol i hatwok long daunim pasin bilong pret long ol man?
11 Bilong sakim ol dispela kain samting i laik holimpas yumi, yumi no ken tingim strong o gutpela tingting samting bilong yumi—yumi mas “bilip strong long Bikpela.” (Sindaun 29:25b) Sapos yumi bilip strong long Jehova, orait maski yumi man bilong sem, yumi inap mekim pasin olsem man i gat strongpela bel na yumi inap sanap strong. Yumi stap yet namel long ol lain bilong dispela graun bilong Satan i save putim ol hevi long yumi, olsem na oltaim yumi mas was gut, nogut yumi larim pasin bilong pret long ol man i holimpas yumi olsem umben ol i taitim pinis. Inap planti yia profet Elaija i gat strongpela bel na i no pret long mekim wok bilong God, tasol taim Jesebel i tok long kilim em i dai, em i pret na ranawe. (1 King 19:2-18) Na wanpela taim aposel Pita i pret long sampela man na em i tok em i no save long Krais Jisas, na sampela yia bihain em i larim pasin bilong pret i kirapim em long mekim wanpela pasin i no stret wantaim trupela bilip. (Mak 14:66-71; Galesia 2:11, 12) Tasol Elaija na Pita i bihainim ol tok ol i kisim bilong helpim ol, na ol i bilip strong long Jehova na wok yet long mekim wok bilong God long pasin em i laikim.
12. Kolim stori bilong sampela long taim bilong yumi em ol i no bin larim pasin bilong pret long man i pasim rot bilong ol long mekim ol samting Jehova i laikim.
12 Planti wokboi bilong Jehova long nau ol i lain pinis long daunim pasin bilong pret long ol man. Wanpela yangpela Witnes long Gaiana i tok: “Long skul ol yangpela i strong long mi mas bihainim pasin bilong ol, na mi mas pait strong long sakim ol.” Na em i tok moa olsem: “Tasol bilip bilong mi long Jehova em tu i strong.” Taim tisa i tok bilas long bilip bilong em long ai bilong olgeta wanklas bilong em, em i beten long Jehova. Orait bihain, taim tisa tasol i stap, em i autim tok long tisa long gutpela pasin. Wanpela yangpela man i wok long kisim save long ol samting Jehova i laik bai yumi mas mekim, na bihain em i go lukim ples bilong em long Benin, na em i strong long rausim wanpela god giaman papa i bin wokim bilong em. Yangpela man i save, dispela god giaman i no gat laip long en, na em i no pret long en, tasol em i save, ol wanples bai kros long dispela na nogut ol i wok long painim rot bilong kilim em i dai. Orait em i beten long Jehova na long nait em i kisim dispela god giaman i go long bus na rausim. (Skelim wantaim Hetman 6:27-31.) Taim wanpela meri long Ripablik Dominika i kirap mekim wok bilong Jehova, man bilong em i tok strong olsem em i mas makim husat em bai bihainim—man bilong em o Jehova. Man bilong em i tok long katim marit. Orait olsem wanem? Em bai pret na lusim bilip bilong em? Em i tok: “Sapos mi no bin stap gut long man bilong mi na long dispela as em i laik katim marit, bai mi gat sem, tasol mi no sem long mekim wok bilong God Jehova!” Em i wok long wokabaut wantaim God, na bihain man bilong em tu i kirap mekim laik bilong Jehova. Sapos yumi bilip strong long Papa bilong yumi long heven, bai yumi tu i no larim pasin bilong pret long man i pasim yumi na yumi surik long mekim ol samting yumi save Jehova bai laikim.
No Ken Ting Ol Tok Bilong Helpim Yumi i Liklik Samting
13. Namba wan Timoti 6:9 i givim tok lukaut long yumi long wanem samting?
13 Sampela taim ol man i save wokim ol samting bilong holimpas wanem wanem kain abus i save kam long dispela ples, tasol sampela taim ol i save giamanim abus long sampela kain kaikai i swit long en. Long planti man, mani i kain olsem dispela kaikai ol i putim bilong giamanim abus. (Matyu 13:22) Long 1 Timoti 6:8, 9, Baibel i tokim yumi olsem sapos yumi gat kaikai na laplap, yumi mas ting em inap long yumi. Orait nau Baibel i givim tok lukaut long yumi olsem: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.”
14. (a) Wanem samting inap pasim man na em i no putim tok bilong Baibel long bel bilong em olsem sapos yumi gat kaikai na laplap yumi mas ting em inap long yumi? (b) Olsem wanem sampela tingting kranki long mani inap kirapim yumi long ting tok lukaut bilong 1 Timoti 6:9 i no sutim yumi? (c) Olsem wanem pasin bilong “aigris” inap mekim na sampela i no lukim umben ol i taitim pinis na i redi long holimpas ol?
14 Tasol maski Baibel i givim dispela tok lukaut long yumi, planti ol i olsem abus i go insait long umben—ol i no bihainim ol tok ol i kisim bilong helpim ol. Bilong wanem ol i no bihainim? Ating ol i gat pasin hambak na ol i strong long holim yet sampela kain pasin long sindaun bilong ol, na bilong mekim olsem ol i mas i gat planti samting—i no “kaikai na laplap” tasol em yumi mas ting em inap long yumi. Na ating ol i ting olsem dispela tok lukaut bilong Baibel i no sutim ol, long wanem, planti mani em samting ol bikpela maniman tasol i holim. Tasol pasin bilong tingting strong long kamap maniman, Baibel i makim olsem em i narapela kain long pasin bilong ting olsem sapos yumi gat kaikai na laplap, em inap long yumi. (Skelim wantaim Hibru 13:5.) Olsem wanem? Ating pasin bilong “aigris”—olsem ol i gat bikpela laik long kisim ol samting ol i save lukim, maski ol i mas lusim sampela wok bilong spirit—em i save kirapim ol long putim ol wok bilong trupela lotu i stap olsem namba tu tasol? (1 Jon 2:15-17; Hagai 1:2-8) Tasol ol manmeri i tingim gut ol tok bilong Baibel bilong helpim ol, na ol i wokabaut wantaim God—olsem ol i putim wok bilong Jehova i stap olsem nambawan bikpela samting bilong ol, ol i stap amamas tru!
Karim Ol Hevi Bilong Dispela Graun
15. Planti Witnes Bilong Jehova i gat wanem ol hevi long i stap bilong ol na ol i tingting planti long en? Taim ol dispela kain hevi i painim yumi, yumi mas was gut long wanem samting?
15 Tru, i no planti man tumas ol i tingting strong long kamap maniman, tasol planti man ol i save tingting planti long olsem wanem ol inap painim kaikai samting ol i mas kisim. Planti wokboi bilong Jehova ol i gat liklik samting tasol bilong skin. Ol i save wok strong inap planti aua long olgeta de bilong kisim liklik klos, na ples bilong famili i ken slip long nait, na liklik hap kaikai bilong dispela de. Na sampela ol i gat hevi bilong sik, o ol yet o sampela long famili i go lapun na ol i mas karim hevi bilong dispela. Sapos ol i no was gut, ol inap larim ol dispela hevi i pasim rot bilong ol long mekim ol wok bilong spirit!—Matyu 13:22.
16. Olsem wanem Jehova i save helpim yumi long karim ol hevi i save painim yumi?
16 Long pasin sori Jehova i tokim yumi olsem aninit long Kingdom bilong em i stap long han bilong Krais, ol manmeri bai i gat malolo long karim ol dispela hevi. (Song 72:1-4, 16; Aisaia 25:7, 8) Na Jehova i helpim yumi tu long karim ol hevi bilong nau, olsem em i save tokim yumi long olsem wanem yumi ken skelim wanem ol samting i bikpela samting tru. (Matyu 4:4; 6:25-34) Ol samting Jehova i bin mekim bilong helpim ol wokboi bilong em long bipo, stori bilong en i stap long Baibel, na long dispela rot Jehova i strongim bel bilong yumi. (Jeremaia 37:21; Jems 5:11) Em i givim save long yumi olsem maski wanem hevi i painim yumi, em i wok yet long laikim tru ol wokboi bilong em ol i stap gut long em, na dispela save i strongim yumi. (Rom 8:35-39) Ol man i bilip long Jehova, em i tokim ol: “Bai mi no lusim yu. Bai mi no larim yu i stap nating. Nogat tru.”—Hibru 13:5.
17. Stori long sampela manmeri em ol inap wokabaut yet wantaim God maski ol bikpela hevi tru i painim ol.
17 Dispela save i strongim ol Kristen tru, olsem na ol i wok yet long wokabaut wantaim God, na ol i no lusim em na bihainim ol pasin bilong dispela graun, nogat. Wanpela tingting bilong dispela graun em sampela rabisman bilong planti hap i save holim, em ol i ting sapos yumi kisim nating sampela samting bilong ol man i gat planti samting bambai yumi ken painim kaikai bilong famili bilong yumi, dispela i no pasin bilong stil. Tasol ol man i bilip na wokabaut ol i sakim dispela kain tingting. Bikpela samting tru bilong ol, em ol i laik bai God i orait long ol, na ol i wetim em i givim gutpela pe long ol long stretpela pasin ol i bihainim. (Sindaun 30:8, 9; 1 Korin 10:13; Hibru 13:18) Wanpela meri long India em man bilong en i dai pinis, em i bin kisim save olsem pasin bilong givim bel long mekim wok na long traim kain kain rot long kisim wok mani, dispela i helpim em long kisim liklik samting inap long em. Em i no bel nogut long em i stap rabis; em i save, sapos em i putim Kingdom bilong God wantaim stretpela pasin bilong em i stap olsem namba wan samting bilong em, Jehova bai blesim wok bilong em long painim kaikai samting inap long em wantaim pikinini man bilong em. (Matyu 6:33, 34) Planti tausen manmeri long olgeta hap ol i kamapim long ples klia olsem maski wanem hevi i painim ol, Jehova i stap olsem ples hait na strongpela haus ol i ken ran i go long en na stap gut. (Song 91:2) Olsem wanem long yu? Yu save mekim olsem?
18. Wanem samting inap helpim yumi long abrusim ol umben bilong dispela graun bilong Satan?
18 Yumi stap yet namel long pasin bilong dispela graun, olsem na i gat sampela samting olsem umben bilong holimpas abus em yumi mas wok yet long abrusim. (1 Jon 5:19) Baibel i kamapim klia ol dispela samting na i soim yumi long olsem wanem yumi inap abrusim. Ol man i laikim tru Jehova na ol i pret long mekim ol samting em i no laikim, ol inap abrusim ol dispela umben. Sapos ol i “larim Holi Spirit i stiaim wokabaut bilong [ol],” orait ol pasin bilong dispela graun i no ken pundaunim ol. (Galesia 5:16-25) Olgeta manmeri em ol i mekim olgeta samting bambai ol inap pas gut yet wantaim Jehova, ol inap tingim gutpela samting tru bai painim ol long bihain—ol inap wokabaut wantaim God na pas gut wantaim em i go inap oltaim oltaim.—Song 25:14.
Yu Laik Bekim Wanem Tok?
◻ Pasin bilong bilip tumas long strong bilong yumi, olsem wanem dispela inap kamap olsem umben bilong holimpas abus?
◻ Wanem samting inap helpim yumi na bai pasin bilong pret long man i no inap bosim yumi?
◻ Wanem samting inap mekim na yumi no bihainim tok bilong Baibel olsem pasin bilong wok strong long kisim mani em inap bagarapim yumi?
◻ Wanem samting inap helpim yumi na bai ol hevi bilong dispela graun i no ken holimpas yumi olsem umben ol i taitim pinis?
5. Bilong wokabaut wantaim God, bilong wanem yumi mas tingim tok bilong 2 Korin 13:5 na Sindaun 3:5, 6?
10. Olsem wanem pasin bilong “pret long ol arapela man” i olsem wanpela umben samting bilong holimpas abus?
[Piksa long pes 16, 17]
Planti ol i save wokabaut wantaim God long olgeta taim ol i stap laip