Ol Misin i Tokaut Long Ol Rong Bilong Ol
“Pop i Putim Misin Long Kot.” “Kot Bilong Misin na Pasin Bilong Biruaim Ol Juda—Misin i Redim Wok Bilong Mekim Mea Culpa.”a “Mea Culpa Bilong Tingim Planti Juda i Bin Kisim Bagarap.” “Ol Metodis i Tok Sori Long Rong Ol i Bin Mekim Long Ol Indian Bilong Hap Wes Bilong Amerika.”
OLSEM WANEM? Yu lukim pinis kain het-tok olsem? Planti misin long nau i wok long tokaut olsem ol i gat asua na ol i tok sori long ol samting i bin kamap insait long planti handet yia i kam inap nau. Planti taim ol nius i stori long ol nupela mea culpa em pop i mekim.
Pop i Askim Ol Man Long Lusim Ol Rong Bilong Misin
Long buk Quando il papa chiede perdono (Pop i Askim Ol Man Long Lusim Ol Rong Bilong Misin), wanpela niusman bilong raitim ripot long Vatiken, em Luigi Accattoli, em i stori olsem inap 94 taim, namel long 1980 na 1996, John Paul Namba 2 i bin ‘tokaut long ol bikpela rong Misin i bin mekim o em i bin askim ol man long lusim ol rong bilong Misin.’ Accattoli i tok, “insait long Misin Katolik, pop tasol inap tru long mekim mea culpa.” Na tru tumas, em i bin mekim olsem. Em i bin tokaut long ol bikpela samting i bin kamap insait long Misin Katolik em ol man i gat tok long en—ol Pait Bilong Lotu bilong kisim bek Jerusalem, ol bikpela pait, pasin bilong helpim ol dikteta, ol misin i bruk, pasin bilong biruaim ol Juda, ol Kot Bilong Misin bilong skelim ol man i no wanbel long ol tok bilong Misin, lain Mafia, na pasin bilong tingting nogut long ol man bilong narapela skin. Long 1994, John Paul Namba 2 i salim wanpela pepa i go long ol Kadinal (em sampela i ting ol tok bilong en em i bikpela samting tru, winim ol narapela pepa pop i bin wokim), na long dispela pepa pop i tok em i laik “tokaut long ol rong em Misin i bin mekim insait long 1,000 yia i go pinis.”
Sampela bisop i bihainim dispela pasin bilong pop. Long Disemba 1994 wanpela nius bilong Itali (Il Giornale) i tok: “Planti bisop bilong Amerika i bin kamap long televisen na askim ol man long lusim rong bilong ol.” Ol i bin mekim wanem rong? Ol i bin ting olsem pasin sem ol pris i bin mekim long ol pikinini em i no bikpela samting tumas, olsem na sori tru, planti yangpela i kisim nogut. Long Janueri 1995 nius La Repubblica i stori long “wanpela samting i bin kamap em Misin Katolik bilong nau i no bin tokaut long en bipo”—ol i tokaut olsem, taim ol Natsi i kilim i dai planti milion Juda, Pop Pius Namba 12 i bin pasim maus na em i no mekim wanpela tok. Long Janueri 1995 dispela nius i tok ol bisop bilong Jemani i bin askim ol man long lusim “planti rong” bilong ol Katolik em ol i bin helpim wok nogut bilong ol Natsi. Sampela misin Talatala ol tu i bin skelim pasin bilong ol yet.
Bilong Wanem Ol i Askim Ol Man Long Lusim Rong Bilong Ol?
Baibel i kirapim yumi olsem taim yumi mekim rong, yumi mas tok sori na askim ol man long lusim dispela rong, na planti man i amamas long ol misin i skelim pasin bilong ol yet. (Jems 5:16) Tasol i gat wanem as na ol misin i wok long mekim olsem? Dispela i mas mekim wanem long tingting bilong yumi long ol?
[Futnot]
a Em wanpela tok Latin na i makim “asua bilong mi,” na em i hap bilong wanpela beten bilong Misin Katolik (nem bilong en em Confiteor o, “mi tokaut mi bin mekim rong”), na taim ol i mekim dispela beten, lain bilong misin i save kolim dispela tok.